Поиск по сайту: 
 

Архив
 ноябрь 
 2019 
пн вт ср чт пт сб вс
    123
45678910
11121314151617
18192021222324
252627282930 

 
 

 

Культура

«СЯВСА КЯДЕЗОН ГАРМОНИЯТЬ»…

…Кунара-кунара сисем кизоса церокшсь Коля Вергаскин васенцеда сявозе кядезонза гармониять. Лиякс ашель кода, вдь синь родсост-плямасост сембе ладясть музыкальнай тя инструментть мархта. Сявозе и ушедсь пунянзон люпшнема, кода тянь маштозь тиендезь  оцю брадонза. Церась фалу мяль вельде ванондсь, кода кизонь илядня тевонь аделамда меле ломаттне пуромкшнесть кудснон малас морсема, гармониянь-балалайкань коряс кштикшнема. Сонцьке ушедсь тонафнема гармонияса морама. Тонадсы кодамовок мелодиять, омбоце шиня сявсы гармониять кядезонза, а суронза ни синць мяляфтсазь, кода морамс сонь оду. Аляц, няемок, конашкава кельговсь церанцты музыкальнай инструментсь, рамась теенза гармония. Тяда питни казнень колга Коля афи арьсекшнесь. Нинге сяда оцю мяльса ушедсь морсема. Ашезе юксне гармониять школаса тонафнемста, армияса служамста. Од церась-гармонистсь кельговсь ялга еткса, аньцек сявсы кядезонза гармониять, люпштасыне пунянзон, стирьхне  юпадихть коряванза кштима. Николай Михайлович лятфнесы, кода армияста самстонза ялганза васьфтезь сонь  веле песа, максозь кядезонза гармониять и эзк кштизь-моразь тусть велень клубу.
 
Эряфоньберьф Н.М.Вергаскинонди савсь полафтомс аф фкя работа. Пачкотькшнесь покодема мянь Тольятти ошу. Лама киза трудендась велень хозяйстваса Старошайговскяй районца. Тяни Николай Михайлович эряй Саранскяйса, работай ошень зоопаркса. Аш тяфтама ши, штоба афолезе сяве кядезонза гармониять. Кда мушендови етка пинге, морси работама вастса. Фалу сявондьсы инструментть мархтонза инжикс, ялга еткса васетькшнема. Гармониять вайгялец мазопнесы любой илать.
 
Мокшалясь фалу примси участия художественнай самодеятельностьса. Аф фкя киза ни Н.М.Вергаскин сувси гармонистонь кельгиень клубти, кона работай Саранск ошень округонь Культурань дворецса. Морси ошса ётафневи ламоц илатнень пингста. Тяни, кепотьксонди, мокшалясь гармонист ялганзон мархта аноклай Масланцяти, кона, кода фалу, келиста отмечави А.С.Пушкинонь лемса культурань и ваймосемань паркса.
 
Н.Вергаскин кунара примси участия «Морак, гармония!» народнай творчествань республиканскяй конкурсса, «Шумбрат, Мордовия!» народнай творчествань республиканскяй фестивальса. Теенза, кода и ламоц лия гармонисттненди, тя аф пялькстомат, а васедемат ялга мархта.
 
Фестивальхнень, конкурснень пингста синь оцю мяльса морсихть аф аньцек сценать лангса, но и фойеса. Васьфнесазь ваныхнень мазы мороса. —Ломаттне ваймосихть концерттнень эса, музыкась лезни теест эжнемс ваймоснон, юкснемс стакатнень-сталмотнень колга. Вов мес тя тевти макссеса седиень сембе псинязень,—азозе мокшалясь.
Николай Михайлович сидеста терневи гармонияса морама свадьбатненди. Асу гармонистсь содаф лама вастса, ломаттне, конат кулендезь мокшалять мораманц, азонкшнихть колганза лиятненди. Н.Вергаскинонь гармошканц вайгялец кайгондсь ни Атюрьевскяй, Краснослободскяй, Ковылкинскяй, Темниковскяй, Старошайговскяй и республикань лия райоттнень эса. Ломаттне учендыхть эсонза одувок. 
 
Николай Михайлович аф шарьхкотькшнесы эсь эряфонц гармонияфтома. Музыкальнай инструментсь кядьсонза налхкозь налхки, а кда нинге сонць вайгяль нолдай—эста шиньберьф эсонза кулхцонкшнелеть. Афи азовихть  моротнень лувкссна, конатнень содасыне Николай Вергаскин. Нят рузонь и мокшень морот. Кодама мора афолеть эняльде морамс, сон эстокиге апак арьсек люпштасыне гармониянь эрявикс пунятнень. И кайгозеви инструментть мазы вайгялец, кона аш кода кулхцондомс седиень таколдомафтома. Сяс мес сонць гармонистсь нолдасы мороть ваймонц пачк.
 
—Кда морамста арьсемс мезень-бди лиянь колга, мелодиясь ули аф сяшкава мазы, туй кичкорязь,—азозе Николай Михайлович. Эряви, кле, сонь марямс ваймосот. Эста лиятневок ушедыхть кулхцондома кашт аф молезь.
 
                                                                                                                                 О.ЕВДОКИМОВА.
 

28.02.2019 №8
 
 
 

 
НОВОСТИ
 
 

ЭСОНЗА АФ МАДОНДЫ ТОЛКС ЮРНАЙ МИНЦЕННЕТИ КЕЛЬГОМАСЬ

 
Родной кялень кельги, национальнай коень-обуцянь ванфты, афкуксонь патриот. Тянь ули кода азомс Мордовиянь Инсарскяй райононь Пою велеса шачф-касф мокшавать Анастасия Афанасьевна Шумкинать (Акшаевать) колга. Аф ваномок сянь лангс, што сон лама киза ни аф эряй мокшэрзянь масторса, эсонза аф мадонды толкс юрнай семботи минценнети кельгомась. Мзярда корхнень Анастасия Афанасьевнань мархта, тя шарьхкодевсь эстокиге. А ушедозе азондомать аф эсь колганза, а ёмла родинанц эзда.

 

Уликс легендать мяльс сявозь, атянзон атясна эрясть оцю губор лангса, конань лемоцоль Ош панда ляй, кона кафта ширде шарфоль вирьхнень мархта, а нинге кафта ширде ульсть сери крутоярхт, конатнень ала шудесь Исса ляйсь. Пингонь ётазь карафне ушедсть пяярема и ляйсь полафтозе ведень шудема вастонц, вов эста родонь плямась сась мяльс ётамс эряма такор вастти, коса ульсь кода касфнемс козя урожай, а Иссать трвава кассь поювонь оцю и туста вирь. Вельденза алятне шапондсть од кутт семьяснонды. Тяфта и эвондась велеть лемоц—Пою.

 

Школаса тонафнемстонза Анастасия сидеста ванондсь раскопкатнень мельге, конатнень Ош панда ляйса ётафнезь Мордовскяй госуниверситетонь студенттне и преподавательхне. Синь мушендсть сёвонень кядьгонь пакшт, трудонь кевонь орудият, налонь пет, авань мазоптомат, монетат и лама мезе лия. Кунардонь эряма вастста ламоц муфкснень ули кода няемс Саранск ошса Краеведческяй музейса, улихть синь и велень школань музейса.

 

24.10.2019  № 42
 
 
 

Россиянь и Мордовиянь Народнай артисткась, Мордовия Республикань Почётнай гражданинць Александра КУЛИКОВА:

 «ПАВАЗУВАН, МЕС ЭРЯН МОРДОВИЯСА!»
 
Тячи республиканьконь столицаса, Саранскяйса, ушедсы эсь работанц Мордовскяй (мокшень и эрзянь) народть Межрегиональнай общественнай организациянц Всероссийскяй VII съездоц. Пингстонза вановихть кизефксне, конат оржаста ащихть мокшэрзянь нациять инголе. Тя оцю пуромксть карша тейнек удалась корхнемс Россиянь и Мордовиянь Народнай артисткать, Мордовия Республикань Государственнай премиянь лауреатть, Славань III степенень орденонь кавалерть, Мордовия Республикань, Рузаевкань и Темников ошень почётнай гражданинть Александра Куликовать мархта. Александра Николаевна сувси съездонь делегаттнень лувксс.

 

Александра Куликовать лемоц лац содаф аф аньцек эсь республикасонк, но и ламоц лия вастова. Вии, седиень-ваймонь токай вайгялец лездсь велень стирняти арамс кельговиксокс тежятть ваныти. Эсь творческяй кинц артисткась ушедозе 1962 кизоня «Умарина» моронь и кштимань государственнай ансамбльса. Лама киза А.Куликова кеняртьфнесыне ломаттнень сольнай мораманц мархта.

 

Александра Николаевнань творческяй киц козя гастролень ширде. Вайгялец кайгсь аф аньцек Россияса, но и лия ширеса: Германияса, Чехословакияса, Финляндияса, Польшаса, Венгрияса, Китайса, Белоруссияса, Украинаса, Молдавияса, Киргизияса, Таджикистанца, Чувашияса. Лия регионца и нльне омба масторса улемста артисткати удалси васьфнемс-корхнемс тоса эряй мокшетнень и эрзятнень мархта, а сяс аф кулемас коре содасы, мезсь синь пичефтьсыне-таколфтсыне.

 

Корреспондентоньконь мархта корхнемста артисткась азозе, мезе ученды мокшэрзятнень оцю пуромксснон эзда, мезть колга мялец корхтамс сонцень, а стане жа отвечась и лия кизефкснень лангс.

 

 

 
24.10.2019  № 42
 
 
 

МОКШЕНЬ И ЭРЗЯНЬ КЯЛЬХНЕ ТОНАФНЕВИХТЬ ШКОЛАТНЕНЬ

Понедельникста Саранск ошень округонь Администрацияса ётафтф оперативнай совещанияса ванондовсь лама кизефкс. Башка мяль шарфтфоль Мордовскяй (мокшень и эрзянь) народть Межрегиональнай общественнай организациянц VII съездонцты анокламати. Тяса азфоль, што Саранскяень 45 сембе школатнень эса 2 класста сявомок 7 классти молемс тонафневихть мокшень и эрзянь кяльхне. Тя тевса заняф 94 педагог. Тонафнемаса фатяф 17916 ученик. Недяляти макссеви 1-2 част. Тяда башка, тяконди водендафт кружокне, музейхне. Саранскяень идень сембе саттнень эса тевс ноляви «Минь эрятама Мордовияса» этнокультурнай компонентсь. Дошкольнай учреждениятнень эса мокшэрзянь народть историянц, коензон-обуцянзон и культуранц мархта иттне содафневихть культорологическяй аспектть, налхксематнень вельде. Стане жа работай этнокультурнай (кштимань, музыкальнай, народнай творчествань) 93 кружок, коса заняф 2160 шаба. Тянь и ламоть лиять колга заседанияса пачфтсь социальнай политикать коряс Департаментть директоронц заместителец—Образованиянь управлениять начальникоц Оксана Шуляпова.

 

24.10.2019
 
 

 

 

Яндекс.Метрика Яндекс цитирования Rambler's Top100
Учредительхие:
Главнай редакторсь: И. С. Лушкин