Поиск по сайту: 
 

Архив
 апрель 
 2024 
пн вт ср чт пт сб вс
1234567
891011121314
15161718192021
22232425262728
2930     

 
 

 

«ЭСЬ АРЬСЕФОНЬКОНЬ ФАЛУ САТНЕСАСЬК»,— мярьгсь корреспондентоньконь мархта корхнемста Рузаевскяй райононь «Агросоюз—Левженский» ООО-ть директороц В.И.СЕТИН

Мокшалять Владимир Иванович Сетинонь содаса кунара ни. Улендень ширесонза и азонкшнень тевонзон колга, мзярда сон покодсь хозяйствань директоркс Лямбирскяй райононь Масловка велеса, тяда меле киньке васедсть Старошайговскяй районца, коса сон тяфта жа работась хозяйствань оцюнякс. Мекольце кемголмува кизотнень В.И. Сетин «Агросоюз—Левженский» ООО-ти директор. Тя хозяйствать историяц аф фкя лацонне—советскяй пингть сонь и шнакшнезь, и сялдозь. Ламось эста тяса срадсь-каладсь, пяксневсть переработкань цехне, кирсь жувататнень лувкссна, соксевсть-витцевсть аф сембе паксятне. Тевсь хозяйстваса валом-валом ушедсь полафнема, мзярда тяза сась оцю опыт и оцю содамоши мархта специалистсь, афкуксонь модань кельгись Владимир Иванович Сетин. Сон нюрьхкяня пингста кемокстазе коллективса дисциплинать, винань кельгихненди, конань ашель мялец стямс эряфонь лия кис, няфтсь кенкшти, пингть вешфксонзон коряс ладязе тевть кода растениеводстваса, стане и животноводстваса. Ташта ферматнень вастс эвондась молочнай од комплекс, коза ладяф омба масторонь оборудования. Машинно-тракторнай паркса тяни кемотть эрь кодама од техника, сокамань и видемань инвентарь, ладяфт токарнай станокт, тязк, механизациянь цехса, машинатненди етафневи диагностика. Курокста хозяйствать сатфксонзон колга кармасть содама марнек республикаса. Аф васенце кизось ни «Агросоюз—Левженский» ООО-са кочксихть сёронь козя урожай. Етай кизоть эрь гектарсь тяса макссь 37,3 центнер сера. Марнек тяляф 4228 тонна сера.
 
Нинге сяда кеняртьфтихть жувата мельге якайхнень сатфкссна. Средняйста эрь траксста меля тяса потяфоль 8734 килограммань лофца. Сембе жувататне,  а марнек тяса тежяньда лама крупнай жувата, красно-пестрай породань. Инголи тя породань ведрашнень рамсезь ширеста, оцю питне лангс. Тяни синць касфтыхть эсост, эрь вазнясь сявф учетс, кирдевихть коське и ару помещенияса, эсь пингстонза анневихть-симневихть.
 
Хозяйстваса тяфта жа касфнихть мацихть. Од кизонь карша тяса печкфоль 1000 тяфтама нармонь, миф нильгемонь тонна кал, карпт. Тяса лофцть себестоимостец инь емлась марнек республикаса, аньцек 15 цалковай.
 
—Оцю сатфксне сатневихть эста, мзярда покоди ломанць эсь тевонц тиендьсы совестьс коре, маштозь,—мярьгсь В.И. Сетин.—Минь коллективсонк покодихть и отт, и эряфкшу кизоса ломатть. Эрть колга мялезе азомс аньцек шнамань валхт, сюконямс теест, мес сембоса кенерькшнихть, мес эсь тевснон тиендьсазь оцю ответственностень марязь, лац. Монь задачазе—тиемс теест работамань цебярь условият, аф лядондомс ширеса, мзярда ломанть кодама-бди ризфоц или лиссь семьясонза зиян, лездомс сембоса теенза. Эряфса лама мезе уленди и  тянди минь малаткшнетяма шарьхкодезь, мезьса машттама, лезттама. Кулхцондат Владимир Ивановичень эса и марят гордость пара мокшень ломаненьконь инкса. Сон аф виздезь корхни эсь родной кяльсонк, пара мяльса  лятфни идькс пингонц, Колапа шачема веленц колга.
 
Сетиттнень семьясна оцюволь—кафта церат и вете стирьхть. Алясна,  Иван Федорович, кемотть киза покодсь ветеринарнай врачекс, лама жувата пчкафнесь аф аньцек Колапаса, но и шабрань велетнень эса. Тядясна, Екатерина Петровна, тяфта жа лама киза лемдсь велень  хозяйствати, касфтсь-трясь итть. Шачфтыснон киге тусть и синь идьсна, конатнень колга  кулят аньцек шнамань валхт.
 
—Мон сидеста васьфнян сазорозень Надеждать мархта,—сяда тов азонды Владимир Иванович.—Сон лама киза покодсь тинь газетасонт, лац содасы мокшень кяльть и минь корхнеманьке най мольфневихть тядянь-алянь кяльса. Тячемс эздонза кулендян ару мокшень валхт, сяда лама содан народоньконь коензон-обуцянзон, историянц колга.
Владимир Иванович рьванц Любовь Викторовнань мархта касфтсть кафта итть—церасна Константин и стирьсна Елена кочказь эсь киснон эряфса. Аф виздезь корхнихть тядянь-алянь кяльса,  маряйхть гордость шачфтыснон инкса.
—Эсь мяльсон, эряфозе удалась,—мярьгсь меколи В.И.Сетин.—55 кизозень васьфтине шумбрашиса, лама цебярь ялга еткса, кенерькшнян эсь тевнень инкса и еран тиемс нинге сяда лама. А тейть, Владимир Иванович, оцю сатфкст работаса, шумбраши, паваз.  
 
                                                                                                  Н.Лобанов. Фототне Н.Карановонь.  
 
 

 
НОВОСТИ

https://mokshapr.ru

Наш новый сайт.

https://mokshapr.ru/
10.06.2022
 

МОРДОВИЯСА ЛОТКАФТФ МАСКАНЬ КАННЕМАНЬ РЕЖИМСЬ

2 июньцта коронавируснай инфекциять инголдаманц и келемоманцты кить персеманц коряс региональнай оперативнай штабть заседанияса примафоль решения—лоткафтомс Мордовияса маскань каннемань режимть. Кода азозе вице-премьерсь Галина Лотванова, республикаса эпидемиологическяй ситуациясь лувондови цебярькс и ащи контроль ала. Мекольдень шитнень коронавирусса урмаськодсь 19 ломань, стационархнень эса пчкси 160 пациент.
 

 
Тяконь мархта азфоль, што ковидсь ашезь пота, сяс хуш и валхтф маскань каннемань обязательнай режимсь, общественнай транспортса  и лама ломанень ёткса улемста мярьгондеви нолямс тевс араламань средстватнень. Общественнай питаниянь предприятиятненди мярьгондеви каннемс маскат сотрудникненди, конат работайхть оцю лувксса ломаттнень мархта.

 

09.06.2022  № 22
 

НАЦПРОЕКТТНЕНЬ—ЭРЯФС!

Мордовиянь Правительствась сяда тов мольфтьсы работать национальнай проекттнень эряфс ётафтоманкса, конатненди ки макссь странань Президентсь Владимир Путин. Республикань Оцюнять ширеса совещанияса корхтафоль основной федеральнай и республиканскяй программатнень эряфс ётафтомаснон колга. Мольфтеви работать квалма азондсть вице-премьерсь Игорь Чадов, МР-нь строительствань и архитектурань министрсь Алексей Гришакин, МР-нь транспортть и дорожнай хозяйствать коряс Госкомитетть председателец Валерий Кандрин, МР-нь велень хозяйствань и продовольствиянь министрсь Александр Кечайкин, МР-нь вирень, охотничьяй хозяйствань и природопользованиянь министрсь Алексей Ларькин.

 

Мордовиянь Оцюнясь путсь задача кирдемс кеме контроль ала строямань графикнень пяшкотькшнемаснон. Васендакиге корхтамась мольфтевсь социальнай инфраструктурань объекттнень колга. Тяфта, ванфтольхть кизефксне, конат сотфт Саранскяйса Кировонь ульцяса 250 вастонди идень садть и Тавлинскяй набережнайса 1450 вастонди школать строямаснон шумордамасна.

 

09.06.2022  № 22
 

ЁТАФТОВСЬ АНТИКРИЗИСНАЙ ШТАБТЬ ЗАСЕДАНИЯЦ

2 июньцта Мордовияса ётафтовсь экономикать ширенц кирдеманц и кемошинц ванфтоманц коряс антикризиснай штабть заседанияц, коса ванондовсть республикаса уликс тефне. Азфоль, што Россиянь Правительствась сяда тов мольфти работа санкциятнень эзда экономикать араламанц коряс законодательнай базань тиеманкса. Региоттнень ширень кирдемасна и синь финансовай кемошиснон кемокстамасна—главнай направлениятнень эзда фкясь. Путф подпись РФ-нь Правительствать постановлениянц алу, кона максси возможность кирьфнемс пандоматнень бюджетнай кредиттнень коряс, конат сявфт дефицитть пяшкодеманкса.

 

Майста нолдаф тевс важнай продукциянь импортёрхнень специальнай льготнай кредитованиянь программасна. Тянкса федеральнай бюджетста нолдаф 37 миллиардта лама цалковай. Тяфтама ширень кирдемать сюнеда бизнести ули кода меки  ладямс товаронь рамсемать, конат мзярс аф нолявихть Россиять территорияса, и сяда тов мольфтемс сембе пингонь работать.
 

09.06.2022  № 22
 

Панжемат—од квартираста

Республикасонк лац ётафневи эряфс ломаттнень ташта, калада кудста одс ётафтомаснон коряс федеральнай программась. Тя программать пяшкодемаса Мордовиясь лувондови фкя инь цебярь регионкс марнек Россияса. Эрь кизоня миньцонк цебярьгофнесазь эсь эрямань условияснон, макссевихть панжемат од квартираста 3-4 тёжянь семьянди. Тяфта тевсь ащи кода Саранск ошса, стане республикань райоттнень эса.
 
02.06.2022  № 21
 

Одкстоптови общественнай транспортсь

28 майста Саранскяйса Советскяй площадьса Мордовиянь Оцюнясь Артём Здунов ванозень пассажирскяй од автобуснень, конат работайхть газса. Мордовияти тя общественнай од видонь транспорт, кона арьсекшневи нолдамс тевс республикань транспортнай предприятиятнень подвижнай составснон одкстоптоманкса.

Автобусонь ноляйхне няфтезь средняй и оцю классонь техникать. Артём Здунов ванозень автобуснень эса тяниень пингонь салонть и водителень кабинаса оборудованиять.

«Газса работай техникась сяда ванфтсы экологиять и аф веши оцю карьхцьт. Тяфтама транспортть эвондамац максы инфраструктурати касома-виияма—ков сяда лама тяфтама видонь транспортта, тов сяда лама кармай заправочнай станцияда. Тянь мельге сай пингсь»,—китькстазе Мордовиянь Оцюнясь.

Сембе автобусне стане жа тифт усксемс физическяй ширде ограниченнай возможность мархта ломаттнень. Тяниень пингть Саранск ошса ули автомобильнай газонаполнительнай компрессорнай фкя станция.

02.06.2022  № 21
 

Ревакцинация COVID-ть эзда эряви ётамс сембонди

Мордовиянь Оцюнять Артём Здуновонь председательстванц ала 27 майста ётафтовсь Мордовияса коронавируснай инфекциять инголдаманц и келемоманцты кить персеманц коряс оперативнай штабть заседанияц.

Отмечафоль, регионца ванфтови ковидса одс сярядихнень лувксснон киремац—ётай недялять тя ульсь 30 ломань шити.

«Эряви сяда тов мольфтемс ломаттнень вакцинацияснон и ревакцинацияснон коряс работать. Тянь мельге ванома кода муниципальнай образованиянь оцюнятненди, стане и предприятиянь и бизнес-структурань руководительхненди. Тяниень пингть ётафтовихть ЕГЭ-тне, сяс инфекцияда инголдамань мератненди эряви шарфнемс башка мяль»,—мярьгсь региононь руководительсь.

МР-нь Правительствать Председателенц заместителец Галина Лотванова азозе, што республикань медицинскяй учреждениянь стационархненди тона недялять эрь шиня пачфневсь 20 малава ломань. Сёлкф нинге 50 ковиднай койка-вастсь, стационарса пчкси 203 ломань, конатнень эзда пялесна—60+ кизосот.

02.06.2022  № 21
 

Экономикать виияфтоманцты—башка мяль

Мордовиянь Оцюнясь Артём Здунов 27 майста ётафтозе республикань экономикать ширень кирдеманц и кемошинц ванфтоманц коряс антикризиснай штабть заседаниянц.
Региононь руководительсь мярьгсь, што Россиянь Правительствась сяда тов примси решеният, конат эрявкснихть тячиень аф тёждя пингть экономикать работанц лац ладяманцты.
 
«Васенце очередень тевонь мольфтемань федеральнай планти сувафтф нинге 23 кизефкс. Фалу эвондакшнихть од механизмат, од возможностть. Тейнек эряви синь сяда лац нолямс тевс,—мярьгсь Артём Здунов.—Кепотьксонди, Россиянь Правительствась дополнительнайста нолдай 3 миллиартт цалковай региоттнень эса спортивнай инфраструктурать виияфтоманкса. Эряви кенеремс тиемс заявка ня программатненди и получамс финансирования».

Тяфта жа арьсекшневихть отечественнай программнай обеспечениянь ширень кирдемань од механизмат. Республикань цифровой виияфтомань министерствати и региональнай IT-компаниятненди мярькф активнайста примсемс участия ня процесснень эса.

02.06.2022  № 21
 

ОТТНЕ—МИНЬ НАДИЯМА ВАСТОНЬКЕ

Артём Здунов ётафтсь васедема «Просвещение» компаниятнень группаснон президентонц Михаил Кожевниковонь мархта. Васедемаса примасть участия МР-нь Правительствать Председателенц заместителец Галина Лотванова и МР-нь образованиянь министрсь Елена Солдатова.

 

Ванондовсть мокшень и эрзянь кяльхнень и литературать коряс учебнай пособиятнень анокламасна и нолдамасна, регионца образовательнай пилотнай   проекттнень эряфс ётафтомасна, конат водендафт школьникнень историять, культурать, родной крайть коензон-обуцянзон колга содамошитнень касфтоманкса, а стане жа образовательнай учреждениятнень эса воспитательнай процессть ладямаса од ширень сувафтоманкса.
 

 

02.06.2022  № 21
 

Артём Здунов встретился с многодетными семьями

Глава Мордовии Артём Здунов провел встречу с многодетными семьями республики – её приурочили к Международному дню защиты детей.

Встреча состоялась в Доме Республики в теплой, почти семейной обстановке, за чашкой чая. В ней участвовали вице-премьер Галина Лотванова и министр социальной защиты, труда и занятости населения РМ Игорь Князьков.

«Я хочу от всей души поблагодарить всех многодетных родителей за ваш нелегкий труд, достойный глубокого уважения и общественного признания, - сказал Артём Здунов. – Вы взяли на себя большую ответственность. Понимаю, сколько дел в большой семье, какая у вас загруженность, но прошу вас, чтобы за этими делами вы не забывали разговаривать со своими детьми. Обсуждайте с ними, что происходит в мире, что было много лет назад. Нам важно, чтобы дети выросли настоящими людьми, чтобы любили свою семью и свою Родину. Это наша с вами общая задача. Вы выполнили и перевыполнили свою демографическую программу, спасибо вам за это, теперь дело за нами».

В Мордовии около 8 тысяч многодетных семей, в которых воспитываются более 25 тысяч детей.

25 мая Президент России Владимир Путин на заседании президиума Государственного Совета, посвящённого вопросам социальной поддержки, подчеркнул, что многодетная семья должна быть ценностным ориентиром для всего общества и поддерживаться государством. Президентом поставлена задача сделать всю систему поддержки семьи целостной, последовательной, понятной и эффективной.
02.06.2022