Поиск по сайту: 
 

Архив
 март 
 2024 
пн вт ср чт пт сб вс
    123
45678910
11121314151617
18192021222324
25262728293031

 
 

 

МОРОСЬ ЭРЯЙ СОНЬ ВАЙМОСОНЗА

Мокшавать морамань асувонц виияфнеманцты оцю путкс путсь сонь тонафтыец Александр Фролович. Алясь баянистоль. Штоба занямс тевса шабатнень урокнень еткста ваймама пингснон, пуропнелезень перьфканза синь, таркселезе баянонц и кштифнелезень-морафнелезень коряванза. Нилеце класса тонафнемста, кода лятфнесы Н.М.Прынзинась, синь, инь вайгялюфнень, ушедсть сявондемост концертс шабра велетненди. «Озсефнелемазь тракторть кузовс, вельхнелемазь орса и сявонделемазь то Краснай Пресняв, то Авгурав, то Полянкав. Сембе районга морсеме-кштикшнеме»,—мзолфкя мархта лятфни-азонды мокшавась идькс пингонц колга.
 
Аф ламода касомок, Прынзинась и мархтонза фкя класса тонафни ялганза сувафтфтольхть школань хорти. Хорсь оцюволь, выступандакшнесь аф аньцек эсь велесост, но и райцентраса, лисендсь нльне республиканскяй сценать лангс. Аф весть коллективсь няфневсь телевиденияса. А хорть фотографияц повфтафоль Саранскяйса эстонь «Октябрь» кинотеатраса.
 
Ся пингть колга Нина Михайловна лятфни кенярдема мархта и тяка пингть ужяльдезь, вдь сон аф мрдафтови ни. «Конашкава пароль велеса! Ётафтомок идькс пингть тяфтама вастса, лувондса прязень павазу ломанькс»,—азозе мокшавась.
Пингсь моли афи фатят кода. Сире Пшень велень од артисткатне кассть, эрть эвондась семьяц, идьсна, ламолгодсть тевсна-заботасна. Морсемань тевсь мзярошка пингс юкстафоль. Н.М.Прынзинатьке эряфса ламось полафтсь. Школать аделамда меле сон поступась тонафнема поваркс Саранскяень училищав. Киза работась получаф специальностьс коре. Меля мзярошка пинге покодсь заводса, а мзярда получась содамошит  медицинскяй училищаса, кярьмодсь тевс 4№ Республиканскяй клиническяй больницяса. Тяса работамста и васьфтезе телевидениянь ветеранть А.П.Исаевать, кона тяда инголе ни сотцезень Сире Пшень велень вайгялю аватнень. Тяфта морсихне оду пуроптфтольхть марс и ушедсть морсекшнема ошень пуромкснень, концерттнень эса. Мокшаватне Е.А.Любавина, Н.К.Савельева, М.Н.Надежкина,  Т.А. Климкина, Н.С.Тряпкина и тячиень героиняньке Н.М.Прынзина лама вайгяльса морамаснон мархта киньге ашезь кадонда озадонь седихть ащема. Кодама мора афольхть срхкафта, васенце мелодияста ни саласазь кулхцондыть мяленц. Но, кода содаф, эряфсь аф уленди тапорксфтома. Аф фкя лацонь туфталонкса морсихненди мзярошка пингс тага савсь явомс фкя-фкянь мархта. Но морамаснон синь мзярдовок ашезь юксне. Мазы вайгяльснон мархта весялгофнезь радня еткса пуромоматнень, ялга мархта васедематнень.
 
Вете кизода инголе мокшаватне тага шоворсть марс. Тяни синь кочказень и пуроптозень «Мокшаночка» лем ала фольклорнай ансамбльсь Саранск ошень округонь Культурань дворецть видеса эряфкшу ломаттнень мархта работать коряс отделть вятиец Т.И.Кадейкинась. Морсихненди поладсть нинге кафта мокшават—А.П.Сарайкина и Н.Ф.Евдокимова.
 
Кода азозе Н.М.Прынзина, коллективсь морси кода мокшень, стане и рузонь морот, но васенцетне теест сядонга малат.
 
—Старандатама морамс стане, кода тянь тиендезь бабаньке, тядяньке, кайгиста, лама вайгяльса, кода сядынголе морсекшнесть велеса,—азозе Н.М.Прынзина.
 
Нина Михайловнань валонзон эзда шарьхкотькшневи мокшэрзянь культурати оцю кельгомась, сонь ванфтоманцты кородозь малаткшнемась. Азома и ся, што сценать лангс ансамбльса морсихне фалу лисендихть сядынголень мокшень щамса, конат сатовсть теест бабаснон, щаваснон эзда. Синь аньцек аф ламода одкстоптфтольхть.
 
Мораманьконь минь пяк кельгсаськ,—мярьгсь Нина Михайловна.—Сярядити морось лезни пчкамс, сизефти—ваймамс.
 
«Мокшаночка» коллективсь выступандакшни аф аньцек Саранскяйса, аф шуроста мокшаватне няфнесазь морамаса-кштимаса маштомошиснон лия ошсовок. Меля, кепотьксонди, ульсть Москуса, коса пяк лямбоста примафтольхть эряйхнень мархта.
 
Ансамбльсь Нина Михайловнань седиень озафтома вастоц. Кочкавихть марса морси ялганзон мархта и юксни стакатнень-сталмотнень колга, а мзярда ушеткшнесазь седиень токай мокшень моротнень, эста марясы прянц павазукс. Эряви азомс, эсь лацонза моронь кельгикс тусть идензовок, уноконза. Синьге Шкабавазсь казезень мазы вайгяльса.
Нина Михайловна Прынзинась сафтсы аф аньцек морамаса. Сон цебярь кудазорава. Кельгсы пидеманц-панеманц. Инь лац сонь лисендихть пачанза, пяряканза.
 
Нина Михайловна кельгсы, мзярда ширезонза пуромкшнихть инжихть. Эрь недляшиня сашендыхть иденза, уноконза. Нина Михайловна каванякшнесыне эрь кодама танцтиняса, марса симихть чайда, азондыхть фкя-фкянди эсь пичефксснон, кенярдемаснон колга. Кода азозе мокшавась, семьясна пяк ладяй эсь еткова, синь фалу анокт лездомс фкя-фкянди.
 
                                                                                                                                 О.ЕВДОКИМОВА.
 

 

 
НОВОСТИ
 

МОРДОВИЯСА ЛОТКАФТФ МАСКАНЬ КАННЕМАНЬ РЕЖИМСЬ

09.06.2022  № 22
 

НАЦПРОЕКТТНЕНЬ—ЭРЯФС!

Мордовиянь Правительствась сяда тов мольфтьсы работать национальнай проекттнень эряфс ётафтоманкса, конатненди ки макссь странань Президентсь Владимир Путин. Республикань Оцюнять ширеса совещанияса корхтафоль основной федеральнай и республиканскяй программатнень эряфс ётафтомаснон колга. Мольфтеви работать квалма азондсть вице-премьерсь Игорь Чадов, МР-нь строительствань и архитектурань министрсь Алексей Гришакин, МР-нь транспортть и дорожнай хозяйствать коряс Госкомитетть председателец Валерий Кандрин, МР-нь велень хозяйствань и продовольствиянь министрсь Александр Кечайкин, МР-нь вирень, охотничьяй хозяйствань и природопользованиянь министрсь Алексей Ларькин.

 

Мордовиянь Оцюнясь путсь задача кирдемс кеме контроль ала строямань графикнень пяшкотькшнемаснон. Васендакиге корхтамась мольфтевсь социальнай инфраструктурань объекттнень колга. Тяфта, ванфтольхть кизефксне, конат сотфт Саранскяйса Кировонь ульцяса 250 вастонди идень садть и Тавлинскяй набережнайса 1450 вастонди школать строямаснон шумордамасна.

 

09.06.2022  № 22
 

ЁТАФТОВСЬ АНТИКРИЗИСНАЙ ШТАБТЬ ЗАСЕДАНИЯЦ

2 июньцта Мордовияса ётафтовсь экономикать ширенц кирдеманц и кемошинц ванфтоманц коряс антикризиснай штабть заседанияц, коса ванондовсть республикаса уликс тефне. Азфоль, што Россиянь Правительствась сяда тов мольфти работа санкциятнень эзда экономикать араламанц коряс законодательнай базань тиеманкса. Региоттнень ширень кирдемасна и синь финансовай кемошиснон кемокстамасна—главнай направлениятнень эзда фкясь. Путф подпись РФ-нь Правительствать постановлениянц алу, кона максси возможность кирьфнемс пандоматнень бюджетнай кредиттнень коряс, конат сявфт дефицитть пяшкодеманкса.

 

Майста нолдаф тевс важнай продукциянь импортёрхнень специальнай льготнай кредитованиянь программасна. Тянкса федеральнай бюджетста нолдаф 37 миллиардта лама цалковай. Тяфтама ширень кирдемать сюнеда бизнести ули кода меки  ладямс товаронь рамсемать, конат мзярс аф нолявихть Россиять территорияса, и сяда тов мольфтемс сембе пингонь работать.
 

09.06.2022  № 22
 
 

Одкстоптови общественнай транспортсь

28 майста Саранскяйса Советскяй площадьса Мордовиянь Оцюнясь Артём Здунов ванозень пассажирскяй од автобуснень, конат работайхть газса. Мордовияти тя общественнай од видонь транспорт, кона арьсекшневи нолдамс тевс республикань транспортнай предприятиятнень подвижнай составснон одкстоптоманкса.

Автобусонь ноляйхне няфтезь средняй и оцю классонь техникать. Артём Здунов ванозень автобуснень эса тяниень пингонь салонть и водителень кабинаса оборудованиять.

«Газса работай техникась сяда ванфтсы экологиять и аф веши оцю карьхцьт. Тяфтама транспортть эвондамац максы инфраструктурати касома-виияма—ков сяда лама тяфтама видонь транспортта, тов сяда лама кармай заправочнай станцияда. Тянь мельге сай пингсь»,—китькстазе Мордовиянь Оцюнясь.

Сембе автобусне стане жа тифт усксемс физическяй ширде ограниченнай возможность мархта ломаттнень. Тяниень пингть Саранск ошса ули автомобильнай газонаполнительнай компрессорнай фкя станция.

02.06.2022  № 21
 

Ревакцинация COVID-ть эзда эряви ётамс сембонди

Мордовиянь Оцюнять Артём Здуновонь председательстванц ала 27 майста ётафтовсь Мордовияса коронавируснай инфекциять инголдаманц и келемоманцты кить персеманц коряс оперативнай штабть заседанияц.

Отмечафоль, регионца ванфтови ковидса одс сярядихнень лувксснон киремац—ётай недялять тя ульсь 30 ломань шити.

«Эряви сяда тов мольфтемс ломаттнень вакцинацияснон и ревакцинацияснон коряс работать. Тянь мельге ванома кода муниципальнай образованиянь оцюнятненди, стане и предприятиянь и бизнес-структурань руководительхненди. Тяниень пингть ётафтовихть ЕГЭ-тне, сяс инфекцияда инголдамань мератненди эряви шарфнемс башка мяль»,—мярьгсь региононь руководительсь.

МР-нь Правительствать Председателенц заместителец Галина Лотванова азозе, што республикань медицинскяй учреждениянь стационархненди тона недялять эрь шиня пачфневсь 20 малава ломань. Сёлкф нинге 50 ковиднай койка-вастсь, стационарса пчкси 203 ломань, конатнень эзда пялесна—60+ кизосот.

02.06.2022  № 21
 

Экономикать виияфтоманцты—башка мяль

Мордовиянь Оцюнясь Артём Здунов 27 майста ётафтозе республикань экономикать ширень кирдеманц и кемошинц ванфтоманц коряс антикризиснай штабть заседаниянц.
Региононь руководительсь мярьгсь, што Россиянь Правительствась сяда тов примси решеният, конат эрявкснихть тячиень аф тёждя пингть экономикать работанц лац ладяманцты.
 
«Васенце очередень тевонь мольфтемань федеральнай планти сувафтф нинге 23 кизефкс. Фалу эвондакшнихть од механизмат, од возможностть. Тейнек эряви синь сяда лац нолямс тевс,—мярьгсь Артём Здунов.—Кепотьксонди, Россиянь Правительствась дополнительнайста нолдай 3 миллиартт цалковай региоттнень эса спортивнай инфраструктурать виияфтоманкса. Эряви кенеремс тиемс заявка ня программатненди и получамс финансирования».

Тяфта жа арьсекшневихть отечественнай программнай обеспечениянь ширень кирдемань од механизмат. Республикань цифровой виияфтомань министерствати и региональнай IT-компаниятненди мярькф активнайста примсемс участия ня процесснень эса.

02.06.2022  № 21
 
 

Артём Здунов встретился с многодетными семьями

Глава Мордовии Артём Здунов провел встречу с многодетными семьями республики – её приурочили к Международному дню защиты детей.

Встреча состоялась в Доме Республики в теплой, почти семейной обстановке, за чашкой чая. В ней участвовали вице-премьер Галина Лотванова и министр социальной защиты, труда и занятости населения РМ Игорь Князьков.

«Я хочу от всей души поблагодарить всех многодетных родителей за ваш нелегкий труд, достойный глубокого уважения и общественного признания, - сказал Артём Здунов. – Вы взяли на себя большую ответственность. Понимаю, сколько дел в большой семье, какая у вас загруженность, но прошу вас, чтобы за этими делами вы не забывали разговаривать со своими детьми. Обсуждайте с ними, что происходит в мире, что было много лет назад. Нам важно, чтобы дети выросли настоящими людьми, чтобы любили свою семью и свою Родину. Это наша с вами общая задача. Вы выполнили и перевыполнили свою демографическую программу, спасибо вам за это, теперь дело за нами».

В Мордовии около 8 тысяч многодетных семей, в которых воспитываются более 25 тысяч детей.

25 мая Президент России Владимир Путин на заседании президиума Государственного Совета, посвящённого вопросам социальной поддержки, подчеркнул, что многодетная семья должна быть ценностным ориентиром для всего общества и поддерживаться государством. Президентом поставлена задача сделать всю систему поддержки семьи целостной, последовательной, понятной и эффективной.
02.06.2022