Поиск по сайту: 
 

Архив
 май 
 2019 
пн вт ср чт пт сб вс
  12345
6789101112
13141516171819
20212223242526
2728293031  

 
 

 

Национальная тематика

П.В.АЛЁШИНА: «СЕМБЕ АРЬСЕФСЬ ЁТАФНЕМА ЭРЯФС»

—Полина Владимировна, миньцонк ётафневи аф кржа мероприятия. Койсот, кодама васта занцихть ётксост мокшэрзянь народонь съезттне и кодама синь смузьсна?
—Сембонди няеви, што национальнай движениянь тефне виияфнесазь ломаттнень национальнай самосознанияснон. Съезттне тянь ширде сембода эрявиксне. Ня пуромкснень эса ванондовихть ся кизефксне, конат минь пичефтьсамазь, конат лездыхть сяськомс народть эряфса сталмотнень. Съездса примави Резолюция, коса кармай тяштьф, мезе тейнек тиема маластонь пингть. И, эряви азомс, примаф решениятне пяшкотькшневихть, аф кадондовихть кагод лангс.
—Тон улеть тяда ингольдень съезттнень эса. Ванф кизефкснень эзда мезсь удалась ётафтомс эряфс?
 —Ульсь лама пичедезь корхнемада тянь-тонань колга. Пяк таколфтсь ся, што школатненди пачфневи мокшень и эрзянь кяльса лисенди аф сатомшка учебник. Съездта меле тифт оцю тефт. Книгат и учебнай пособият пачфневихть аф аньцек Мордовиянь школатненди, но и диаспорав. Россиянь ламоц региоттнень эса эряй мокшэрзятне тяни лама содайхть эсь народснон историянц колга, тонафнесазь кяльть. Саранскяйса строяф-путф мазыдонга мазы Национальнай театра, республикасонк сембе вастова петьфт-тифт китне, полафтозе шамаликонц ошсь, мазомсть районнай центратне, кассь ломаттнень кельгомасна национальнай культурати, кяльхненди, эреклакшнихть коеньке-иланьке, эсь лацонь обуцяньке. Ня и ламоц лия цебярь шири полафтксне тифт съездса примаф решениятнень коряс.
—Полина Владимировна, кда улят делегатокс, кодама кизефкст лихтят ваномс тя оцю пуромксса?
—Лама мезсь пичефтьсамань. Но инь пяк седиезе сяряди минцень родной кяленьконь ванфтоманкса. Тянь коряс кой-кодама работа мольфтеви, но, улема, сон аф сатомшка, кда улихть нинге ётксонк эсь кяльса-валса корхтамда визди ломатть. Кой-коста кульсак мокшень ломаттнень корхтамаснон и рахамаце сай: фкя вал мокшекс, кемонь—рузкс. Лятфнеса шабакс пингозень. Эста ашельхть телевизорхт, компьютерхт. Тяни тяфтамот эрь кудса. Иттне аньцек панчсазь сельмоснон, эфкставихть телевизорть инголи, тоса корхтайхть рузкс, компьютерса—рузкс. Вов тяфта валом-валом и юксневи тядянь-алянь кяльсь. Сяс, койсон, пароль сувафнемс эфиру сяда лама национальнай программа, радиоса сяда сиденяста макссемс мокшень и эрзянь морот. Аф кржась ащи тядятнень-алятнень эзда. Аф шуроста васьфтят мокшень семьят, коса корхтамась мольфтеви рузонь кяльса. Виденц азса, мон тянь аф шарьхкотькшнеса. Кода можна атказакшнемс инь питнить эзда, сянь, мезсь максф тядянь лофцть мархта?! Кяльсь—тя народть ваймоц. Юкстасаськ сонь, юмафтсаськ эсь пряньконь. Тяни ни мокшэрзятнень лувкссна ламода кирсь, и мезе ули сяда тов, кда аф примамс эрявикс мерат, пелькс арьсемска. Надиян, съездса делегаттне шарфтыхть тя кизефксть лангс сатомшка мяль.
Пичедян и культураньконь ванфтоманкса, штоба афольхть юкснев седиень токай мороньке, мазыдонга мазы щамоньке. Улель пара, кда сембе Культурань куттнень видеса пуропневольхть од ломанень национальнай коллектифт. Штоба од стирьхне-цератне щашендолезь лангозост мокшэрзянь панархнень и морсекшнелезь сценать лангса минцень мороньконь. Койсон, вов мезе нинге тиемаль: етафневи илатнень, фестивальхнень, тяконь лувксса и «Шумбрат, Мордовия!» народнай творчествань республиканскяй фестивальть программас сувафнемаль сяда лама мокшень и эрзянь номерда.
—Ламотнень тячи пяк пичефтьсыне велетнень эряфсна. Аш месть сепондомс, тефне тоса тяни молихть аф вярибантт. А вдь койхне-обуцятне, культурась васендакиге ванфтовихть тоса. Мезе арьсят тянь коряс?
—Афкукс, велетнень тячиень эряфсна мяль аф кепси. Туфталда тянди пефтома. Улихть корхнемат, бта оттне тушендыхть велеста сяс, мес тоса аш эряманкса цебярь условият. Но вдь мекольдень кизотнень велень эряфть тёждялгофтоманкса тиф аф кржа: куттнень эса ули газ, ведь, китне ацафт асфальтса. А, шять, тевсь сянь эса, мес велетнень эса селгондовихть школатне, нльне инь оцюфнень эса аш идень сатт. Работань ширдевок велеса аф тёждя. Вов кда петеволь-полафтоволь тя сембось, арьсян, афи тушендольхть оттне ошу-коза, шачфнельхть иднят и павазуста эряльхть эсь шачема-касома уженясост.
—Полина Владимировна, а тонцень ули мяльце примамс участия съездть работаса? —Кда тердьсамазь, оцю мяльса примаса предложениять. Мон улень пцтай сембе съезттнень эса, аньцек фкяти ашезь удала повомс. Мон мокшень ломанян, мезенкса марян оцюдонга оцю гордость. Сяс семботь, мезсь сотф народозень-плямазень мархта, старандан аф нолямс вакска.
—Сюкпря, Полина Владимировна!
                                                                                                                              О.ЕВДОКИМОВА.
 

07.03.2019 №9
 
 
 

 
НОВОСТИ
 
 

ВЛАДИМИР ВОЛКОВ примась участия РФ-нь Правительствать вице-премьеронц Виталий Мутконь председательстванц ала совещанияса

14 майста Мордовиянь Оцюнясь Владимир Волков примась участия совещанияса, конань видеоконференциянь лаца ётафтозе РФ-нь Правительствань вице-премьерсь Виталий Мутко. Совещаниянь основной кизефксокс арасть уштомань пингонь ётай кизонь итокне.

 


Виталий Мутко отмечазе: ся региоттнень эса, коса губернаторхне шарфнихть башка мяль тя темати, сезонць ётась тапорксфтома. Но марнек,   ЖКХ-нь объекттнень эса чрезвычайнай ситуациянь лувкссь кассь, и главнай туфталсь—сеттнень таштомомасна. Вице-премьерсь отмечазе, што сай кизоста сявомок арьсекшневи нолдамс коммунальнай инфраструктурать, кона 60 процентта таштомсь, одкстоптоманц коряс федеральнай программать. Сяс региоттненди эряви максомс  РФ-нь Минстрои тяфтама объекттнень и капитальнай вложениятнень размерснон коряс, конат эрявихть тиемс нормативно-техническяй вешфксненди кондястикс, педа-пес кочкаф информация.

24.05.2019
 

Сёрматфтода «Мокшень правда» уцез (льготнай) питнеса

24.05.2019
 
 
 
 
 
 
 

 

 

Яндекс.Метрика Яндекс цитирования Rambler's Top100
Учредительхие:
Главнай редакторсь: И. С. Лушкин