Поиск по сайту: 
 

Архив
 июнь 
 2019 
пн вт ср чт пт сб вс
     12
3456789
10111213141516
17181920212223
24252627282930

 
 

 

Национальная тематика

Сире Шайгавса

Мезсь пяк пара, пяк важна, М.С.Моисеев лама цебярь, седиень токай статья, азкс, фкя поэма тяштсь сембонди содаф мокшень ломанть, эсь земляконц, легендарнай летчикть, Советскяй Союзонь Геройть Михаил Петрович Девятаевонь колга. Синь ульсть пара ялгат, кирдсть фкя-фкянь мархта кеме соткст, марса ётафнесть васьфтемат велень и ошень эряйхнень мархта. Лувсайть Михаил Степановичень сёрматфонзон и инголет, кода живой, стяй Михаил Петрович Девятаевонь образоц.
 Тячи минь макссаськ М.С.Моисеевонь фкя азксонц, коса пачфневи Сире Шайгавонь районца синь марса улемаснон колга.
 
1988 кизонь январень ветеце шиня Девятаев сашендсь Казаньцта Саранскяи. И мархтонза срхкаме мокшень велева. Вдь ламоц мокшетне арьсихть, шять, легендарнай геройсь мокшекс афи шарьхкоди. Но кодама районц молема? Михаил Петрович ушедсь мянцема суронзон:
—Зубово-Полянскяй районца улендень, Атерьса—аф сяшкава кунаролень…
—А Сире Шайгавса?—кизефтине.
—Аде тоза арттама.
 Январень ся шись лямболь аф тялоннекс. Мольсь шура пиземня. Кой-кона вастова сргозсть нльне шудерьксне. Перьфпяльсь таватфоль туста туманца. Тяфтама ушет эряйхть аньцек мартть песта али апрельть ушетксста.
 Автобуссь ардсь валом. Шиньгучкать нльне фаранзон крьвяснезень.
Сире Шайгавса партиянь райкомть секретарец Нина Николаевна Карпушкина кабинетсонза симдемазь чайда, азондсь, кода нинге войнань кизотнень повсь мокшетнень ёткс—эста атнай иднять пачфтезь тяза палы Украинаста. Сяльде райкомть секретарец «максомазь» райкомть пропагандань и агитациянь отделонц заведующаенцты Владимир Ильич Рогачевонди и «Знание» обществать оцюнянцты Надежда Фёдоровна Кулыгинати. Кле, муда машина и усксесть инжихнень велева-куване.
 Арьсеме плання—маластонь колма шитнень, коса кинь мархта васедемс. Ладяськ: васенда эрь пуромксса Геройть колга мзяровок вал азан мон, луван теенза лемтьф поэмастон пакш, одс лисьф книгастон колганза нюрьхкяня азкс, сяльде—вал эстеенза Геройти.
Омбоце шобдаваня, январть котоце шистонза, гостиницаста лисеме ульцяв, а тяса прокс тунда. Пизем лозняй. Ловське пяндра. А минь орсотама.
 Райкомть зданиянц инголе ащи газикти озаме ветененк, кда лувомс шофертьке. Срхкаме Кулдыму. Эрявсь пачкодемс кефкие частти. Велеряйхне пуромихть тостонь школав. Телефонца, няк, пачфтсть латта: Девятаев сай.
Мельцану пачкодеме лац—кись калгодоль, а сяда тов машинась кармась сувома-пезондома. Кафцьке ширева келемфт тяла кучкать равчкодома ушетф паксятне, васток-васток няевихть сянгяря панкст—ся озипне ушедсть штадома.
Машинать ингольдень сидениясонза—шоферсь и Надежда Федоровна, фталуцеса—мон, Рогачев и Девятаев. Киге стака канксонь вятерьфтезь кяли мокшава—шарьхкодеви якстерь руцянц коряс.
 —Лоткафтк машинать—озафтсаськ авать,—мярьгсь Девятаев шоферти.
—А коза озафтсаськ? Вастовок роди аш.
 —Кода-кода тяльктяма,—тага пшкядсь Михаил Петрович.
 Шоферсь люпштазе тормозть. Девятаев панжезе фталдонь кенкшкять:
 —Акай, лямце лакай, аде озак.
 «Акай, лямце лакай» валхнень кулендезень нинге одкс пингстонза Торбееваса и мокшавань мархта васьфтемста пеетькшнемга синь коль азонкшнелезень.
Машинаса фкя-фкянди сяда пяк люпштавоме. Варжакстонь «акать» шамас, а сон... кодама ака тейнек?! Од аваня. Комсь ветиешка кизоц. Теснаста-калмоча авась эцевсь кабинав, Девятаевонь ваксс.
—Коста тяфта кялят-пачкотькшнят?—кизефтсь Михаил Петрович.
 —Саранскяйста. Мельцану ардонь автобусса. А Мельцанцта Кулдыму вага ялга срхкань. Тоза нинге сисемшка вайгяльбе.
 Аванясь угадясь оржа кяльда. Марязе-шарьхкодезе: машинастотне, чяй, кодамовок оцюнят. И ушедсь  пеняцяма колхозозост саф од председательть лангс. Кле, аф лац тиенди. Работань, кле, дояркакс. Фермав тушендомаль рана, а церокшезень, кона тонафни васенце класса, стяфтыец, школав срхкафтыец аш. Сяс анань пря бригадав. А колхозонь прясь—нифкакую! Аф нолясамань. Потьнек, кле, тракст. Тунь эсь воля. Кармань лисендема бригадав. А сон шинень пялеснон керфтозень. Хуш авартть. Хуш велетьке катк. И туян велеста, кда тяфта сяда товга кармай...
—Кода фамилияце?—кизефтезе Рогачев, райкомонь ломанць.
—Петрова.
—Мон тяряфтан корхтамс председателентень мархта. Пезондозь-калмоча Кулдыму пачкодеме. —Да, Мельцанцта Кулдыму кись эряви такоргофтомс,—машинаста лисемста ни мярьгсь Девятаев.
 Кулдыморяйхне—сирет и отт—пуромсть школать спортивнай залозонза. Школаса вчек каникулат. Идьта аф мзяра. Да тонафнидовок, кода азозе школань директорсь, аньцек вейхксогемонь. Кири, кле, велеса идень лувкссь.
Ломаттне Девятаевонь эса кулхцондсть стяда пилет. Бта пельсть фкя валнянцка нолдамс пиле вакска. А сон азондсь эсь колганза: кода-коса кассь, кода служась, пленонь аф няйксонзон колга корхтась, тяниень пингть, мирть инкса тюремать колга.
 Официальнай васедемада меле ни коридорса кулень—лапоцясть мокшаватне:
—Тейнек азозь—Девятаев сай, минь афи верондаме. А сон афкукс сась.
—Тяфтама ломань ширезонк нинге вестьке ашезь сашенда. Да нинге мокшекс корхтай! Конашка почет путсь тейнек!
 —Ну, уледа шумбрат, мокша лефкст,—эсеннекс пеетькшнемга пшкядсь Девятаев ульцяв лисемста.
 Сяльде ардоме Вертелиму. Тостонь школатьке инь оцю залозонза пуромкшнесть оцюнек-ёмланек. Стулда ламоль, да сембонди ашесть сата. Ламотне ащесть стяда. Инжить кулхцондозь пара мяльса. Спасибасть Девятаевонди, мес сашендсь.
Школаста лисемда меле Геройсь корхнесь колхозникнень мархта. Таколгодсь-ацергодсь седиец, мес сявондихть пяк емла урожайхть—гектарста аньцек кафксошкань центнер.
 —Сяда лацкас модать аннесть. Мон вона меля улень ГДР-са. Тоса кой-кона хозяйстватне тяльсихть эрь гектарста сядонь центнер сера. Синь наземснон аф юмафнесазь. Курмозеньбес пачфнесазь паксязост. Идьснонга тевонь кельгикс касфтсазь.
 Хуш и тялоль, но Девятаев приметазе: Кулдымса, Вертелимса колхозникнень кудснон фтала пяк кржа садта. «Кода тяфта?—корхтась, бта сюцесь меки ни Сире Шайгаву ардомста.—Садсь велетьке мазоптьсы, кожфтьке аруяфтсы, фруктат максы. Мес аф озафнемс тяфтама цебярь модати марлюнят, вишнякст? Аш отростканят? Катк колхозонь оцюнятне ускфтыхть Саранскяень, Рузаевкань питомникнень эзда».
Ушесь ни шопотькшнесь. Кота частста илять Девятаевонь эса учсть шяйгяряйхне районнай Культурань кудса. И тага кулхцондозь, кизефнезь.
Январень сисемце шиня суваме партиянь райкомть библиотекас. Девятаев ванондозень газетань од номерхнень. Сась тястоконь «Трудовая правда» газетать редакцияста корреспондент—Геройть фотографировандама, эздонза интервьюнкса. Корреспондентсь—од аванясь кизефнесь:
 —Михаил Петрович, тон кода арьсят минь колганк, журналисттнень колга? Пяк мяльцень мольфнесаськ?
—Мон кяшендян тинь ялгантень эзда. Пяк ни эряскодозь, кржа арьсезь серматтада, аф крхкаста сокатада. Газетаста аш мезе лувомс. Эряви тяшнемс аф иланц инкса, а тевонь тиеманкса.
—Мезе арьсят шяйгяряйхненди Советскяй Армияти сизьгемонь кизонь топодемань карша? —Мир. Паваз. Сят, кит армиясот, катк лацкас служайхть, а кит тязкот, велесот, катк тевса касфнесазь марстонь козяшить.
 И вага минь арттама меки Саранскяй шири. Лотксеме Новотроицкяи. Тостонь эряйхневок, етксост ламоль школьникта, пара мяльса кулхцондозь Девятаевонь... Сон корхтась эсь школьнай кизонзон колга, кода карень аф улемда тялонда школав якаль кяпе. Урокса пильгонянзон пстерфтьсыне, вачкиесыне кияксу, а учительницась: «Миша, тят тара!» Но сон стане тиендсь аф тароманкса, а пильгонзон эжнезень.
 Учительницатне, школьникне венепнезь Девятаевонди инголькиге рамаф «Побег из ада» книганц, путфнезь тоза Геройть-авторть кяденц.
 Сяльде пачкодеме Сире Акшина вели. Велень Культурань кудть фойеса стенава повфнефт-петфнефт Н.П.Огаревонь, А.И.Герценонь, синь ялгаснон портретсна, колгаст серматкст. Да тя велесь мзярда-бди ульсь Огаревонне. Поэтсь-демократсь одкс пингстонза кадондозень тяза эсь пильгокинзон. Тяза 1913 кизоня калмаф сонь рьвацка—Тучковась.
Сире Акшина велесь рузонне, а совхозонь прясь тяса—мокшаля—Вячеслав Михайлович Сараев. Шачемас коре Зубово-Полянскяй райононь Селища веленне. Тяда инголе работцесь Торбееваса райисполкомонь председателькс. Михаил Петровичень васьфтезе кода кунардонь содафонь, оцю раднянь, земляконь. Сон лятфтазе, кода 1975 кизоня     Торбееваса панчфоль Девятаевонь Кудоц-музеец, поселкав сувама вастти, ки рашкти, стяфтфоль самолет-монумент, конань казезе Девятаевонь шачема ширенцты Советскяй Союзонь колмоксть Геройсь, маршалсь Александр Иванович Покрышкин.
Меле корхнематне поладовсть столовайса ужнамань шра ваксса. Азондсть Девятаевонди, азондсь сон. Сараев пачфтсь, кода якась Индияв. Кле, няине тоса козялятненьге, кинь оцю кудсна и машинасна-мезьсна, и ашуфненьге, кит якайхть сязентьфста-нозонтфста, утцихть ульцяса.                                                                                                            
                                                                                                                               (Полатксоц моли).
 
                                                                                                                                     М.МОИСЕЕВ.
 

21.03.2019 №11
 
 
 

 
НОВОСТИ

Минь поздравленияньке

13.06.2019  № 23
 
 
 
 
 

«Рузаевкаса мольфтевихть анокламатне стекольнай заводть панжеманцты»

Мордовиянь Оцюнясь Владимир Волков:
Мордовиянь Оцюнясь Владимир Волков 29 майста ётафтсь рабочай васедема Рузаевскяй райононь руководительть Вячеслав Кормилицынонь мархта. Ванондовсть территориять социально-экономическяй виияфтоманц коряс кизефксне. Тяконь лувксса корхтамась мольфтевсь социальнай объекттнень строямаснонды анокламать колга: Рузаевкаса Паровознай ульцяса 160 вастонди идень садть, Татаронь Пишляса 250 вастонди школать, фельдшерско-акушерскяй пункттнень.
Ванондовсть районца водоснабжениянь и водоотведениянь систематнень одкстоптомаснон, а стане жа «Безопасные и качественные автомобильные дороги» национальнай проектть эряфс ётафтоманц рамкаса китнень строямаснон и петемаснон коряс кизефксне. Тядде, кода отмечазе Вячеслав Кормилицын, петевихть-одкстоптовихть 13 вайгяльбень кувалмоса кит.
06.06.2019  № 22
 

Аделсеви «Мокшень правдати» сёрматфтомась

Эряскодода!
Кельгома ялгат!
2019 кизоть омбоце пяленцты «Мокшень правдати» сёрматфтомать шумордамс ляткшни аньцек кафта недялят.  И ули тячи мяленьке нинге весть азомс нюрьхкяняста: мес именна «Мокшень правда» эряви тинь семьянтенди.
Кода аф ужяль, мокшэрзятнень лувкссна стаки кири. А «Мокшень правдась» семботь тиендьсы сянкса, штоба аф нолдамс тянь. Кода ванфтомс и виияфтомс кяленьконь, культураньконь, аф юкстамс эсь коеньконь-обуцяньконь—вов мезть колга мольфтеви корхтамась сонь лопанянзон эса. Пцтай эрь номерса макссевихть материалхт мокшэрзятнень историяснон, содаф ломаньцнон колга, азонкшневи народоньконь арьсеманзон и пичефксонзон колга.
«Мокшень правдаса» макссевихть медицинскяй темас советт и рекомендацият, советт перень сёронь касфнихненди и жувата мельге якайхненди. Эрь номерса ули юморонь и сатирань уженя, рузонь кяльса печатлакшневихть недялянди ламоц телевизионнай программатне.
«Мокшень правдась» республиканскяй газетатнень эзда фкя инь интереснай и уцез газетась. Сон нльне сяда уцез ламоц «районкатнень» коряс.
Теенза тяшфтемать питнец:
6 ковонди—336 цалковай,
3 ковонди—168 цалковай.
Газетать индексоц П4719.
 Эряскодода почтав. Тоса учихть эсонт. Пингсь содай ётаманц.
06.06.2019  № 22
 
 
 
 

 

 

Яндекс.Метрика Яндекс цитирования Rambler's Top100
Учредительхие:
Главнай редакторсь: И. С. Лушкин