Поиск по сайту: 
 

Архив
 апрель 
 2019 
пн вт ср чт пт сб вс
1234567
891011121314
15161718192021
22232425262728
2930     

 
 

 

Наши мокшанские сыновья и дочери

ЭРЯФОНЬ КИНЦ УШЕДОЗЕ МАЛЫШЕВАСТА

Ю.Ф.Юшкин—Мордовия Республикань Оцюнять видеса ветеранонь  Консультативнай советонь член, МР-нь Культурань, национальнай политикань и архивнай тевонь министерствань архивнай управлениять видеса Общественнай советть председателец, Мордовиять территорияса помилованиянь кизефкснень коряс Комиссиянь член. Лама киза совестьс коре трудендаманкса мокшаляти максф «Мордовия Республикань культурань Заслуженнай работник» лем, казьф Мордовия Республикань Государственнай премияса, Мордовия Республикань Оцюнять премияса.
 
Ламотненди Ю.Ф.Юшкин содаф кода пара вайме, лиянь ризфонь-пичефксонь шарьхкоди ломань, кона фалу анок лездомс ширезонза сайти. Аф кунара мокшалясь васьфтезе эсь юбилеенц. Теенза топодсь 70 киза. Илань карша мархтонза васетькшнесь минь корреспондентоньке.
 
—Юрий Фролович, примайть седи ваксстонь поздравленияньконь юбилейцень мархта! Арьсетяма тейть кемодонга кеме шумбраши, паваз и лама киза эрямс!
—Спасиба.
 —Эрь ломанть эряфса фкя инь питнись, инь мяляфтовись—идькс пингсь. Сяс васенце кизефксоньке тяфтама: кодамотольхть синь—идькс пингонь кизотне?
 —Торбеевскяй райононь Малышева велеть, коса етась шабакс пингозе, пяк козя историяц. Тя ингольдень волостной центра. Советскяй пингть тяса ульсь участковай больниця, средняй школа, коса тонафнесть шабат Варжеляйста, Сире и Од Четоваста, Куликоваста, Носакинаста, Сире и Од Пичеморгста. Школаса работасть эсь тевонь лац содай тонафтыхть. Тячемс мяляфтсайне учительнень: литературань вятить В.А.Сараевонь, математикань тонафтыть М.П.Макушкинать.
 Шачень мон велень интеллигенциянь семьяса. Алязе образованияс коре физиколь. Великай Отечественнай войнань кизотнень  танковай ротань командироль. 1946 кизоня госпитальса пчксемда меле путфоль Малышевскяй средняй школань директоркс, коса покодсь стакаста урмаськодомозонза, 1955 кизоть самс. Мзярда алязе тусь эряфста, тейне ульсь 8 кизот. Тонафнема тунь 6 кизоса. Аляфтома лядомась стака канксокс лаподсь лафтунень лангс. Эрявсь лезнемс тядязти. Куд пирьфсонк кирдеме тракс, конанди тялонди эрявсь аноклакшнемс корма. Сяс стяшендонь мон, кода корхнихть, шить мархта ряцок, мзярда ялгане нинге кемоста удость, мзярс расась нинге ашезь коське и тишеть лядемс сяда теждя. Школаса тонафнемста мекольце колма класснень улень школань  комсомолонь комитетонь секретарькс. Школать шумордайне 1966 кизоня сиянь медальса.
 
—Мезсь кошардонзе тонь, ефси од цёрать, 1962 кизоня арамс районнай газетань и «Молодой ленинец» газетань юнкоркс?
 
—Алязень куломда меле минь эряме хибараса (лиякс революцияда ингольдень тя постройкать афи лемдьсак) аф ичкозе школать эзда. Почтовай отделениясь ащесь веленьконь эзда ниле вайгяльбень вастса. Почтальонць, штоба кенеремс явомс почтать шоподемс, эняльтькшнесь тейне школати тяштьф газетатнень и журналхнень пачфнемс школьнай канцелярияв. Шарьхкотьф, мон старандань мушендомс пинге ваномс прессать.  Пяк оцюволь мялезе содамс од кулятнень. Сяс оцю мяльса содафнень «Советская Мордовия», «Мокшень правда», «Комсомольская правда», «Пионерская правда», «Правда» газетатнень, «Пионер», «Новое время» журналхнень эса серматфнень мархта.
Тяфта эвондась мяльсь азондомс эряфонь козя ки мархта земляконень колга. Ламос арьсемда меле сань мяльс васьфтемс мокшень кялень тонафтыть Фекла Петровна  Суксовать мархта. Сонь учителень стажец 47 киза. Мирдец повсь сталинскяй репрессиятнень алу. Сермадонь колганза и кучине сермать редакцияв. Районнай газетать лисема шиня учендыне почтальонть велеть песа, аф ваномок цят моли кельмоть лангс. И вов сон, кафта недялянь ётазь, «На заслуженном отдыхе» лем ала публикациясь. Омбоце геройкс арась участковай больницянь фельдшерсь Игнат Семенович Шипилов. «Молодой ленинец» газетав сёрматкшнень од электрикнень, механизаторхнень, животновоттнень колга. Кода «Молодой ленинец» газетань юнкор 1962 кизонь мартста отмечафолень комсомолонь обкомть Почётнай грамотаса.
 
Ся пингть 8 класса школаса мольфтевсь производственнай обучения, минь тонафнемазь велень хозяйствань трудти. Но прябалась сянь эсоль, што школаса ашель трактор. «Максода тейнек трактор» лем ала авторскяй публикациязе, кона печатлафоль «Пионерскяй правдаса», лездсь школати получамс эрявикс техникать.
 
Школада меле 1966 кизонь июньцта примафолень районнай газетав штатнай сотрудникокс. Но, аф ваномок изданияса покодихнень корхнемаснон лангс, арань студентокс. Сяськсь мяльсь тонафнемс Н.П.Огаревонь лемса МГУ-са «Рузонь кяль и литература» специальностьс коре. Мордовскяй госуниверситетса очнай отделенияса тонафнень 1970 кизоть самс, меле ётань индивидуальнай планц, штоба улель кода работамс родной Торбеевскяй районнай газетаса ответственнай секретарень должностьса. Тяза мрдань армияда мелевок.
 
—М.П.Девятаевонь кудоц-музеец—Мордовия Республикань фкя инь содаф культурно-историческяй учреждениясь. 1975 кизонь 8 майста кудть вастса, коса шачсь и кассь Михаил Петрович, панчфоль музейнай комплекс, коза сувась оду строяф кудсь и экспозиционнай залсь. Содаф, што мяльсь панжемс кудть-музейть тоннель, Юрий Фролович.
—Улемок КПСС-нь Торбеевскяй райкомонь пропагандань и агитациянь отделонь заведующайкс, кудть-музейть строяманц колга мяльть азыне васенце секретарти А.М.Синчуринонди. Мяльть ширец киртьфоль.
 
Персональнай музейхне эста панчсевсть аньцек СССР-нь Культурань министерствать специальнай разрешениянц коряс. Соньфтомонза панчфоль аньцек космонавтти Ю.А.Гагаринонди лемтьф музейсь. Мон срхкань Москуву, штоба арьсефть эряфс етафтоманкса вешемс ширень кирдема А.И.Покрышкинонь—Советскяй Союзонь колмонь-крдань Геройть эзда, кона ся пингть вятезе ДОСААФ-нь ЦК-ть. Покрышкин, содамок эняльдемазень, лоткафтомань пяле вал лангса: «Мишанди? Девятаевонди? Кунара ни панжемаль музей. Аф верондан, што улихть тянди каршек ащихть». Тияк сон кеподезе «Кремлевкать» телефоннай трубканц. Аф ламос корхтамда меле шарфтсь тейне: «Архт, цёра, Торбеевав. Строясть музейть. ЦК-са кирдьсазь мялентень ширенц. Культурань союзнай министерствать указанияц кармай».
 
Тяниень пингть кудса-музейса ванфтови ниле тёжяньда лама экспонат. Экспозиционнай залса ули кода содафтомс геройть колга материалхнень мархта (документтнень, фотографиятнень и стак тов). Крестьянскяй кудть эса няфтьф авань мокшень щамсь, конань каннезе геройть тядяц Акулина Дмитриевна, кудъетконь паршихть. Музеень коллекциясь коль козякофневи. Эрь кизоня тяза сашенды тёжятть ломань странаньконь разнай уженястонза, а стане жа и омба масторста.
 
—Саранскяйса эрь кизоня ётафневи «Шумбрат, Мордовия!» Народнай творчествань республиканскяй фестивальсь. Сон пяк кельгови республикань эряйхненди. Фестивальть ётафтомста Культурань дворецса марьти аш коза прамс. Тя оцю мероприятияти арьсикс и пуроптыкс ульсь республикань Культурань министерствась, мзярда сонь вятить тон?
 —Фестивальти ушетксокс эряви лувомс 1996 кизоть. Самодеятельнай артисттне пара мяльса васьфтезь Культурань министерствать инициативанц. Концерттнень программасна пяк козятольхть. Кеняртьфти, што «Шумбрат, Мордовия!» фестивальсь арась традиционнайкс, лиякс мярьгомс, етафневи эрь кизоня.
 
Россиянь Культурань министерствать мархта киртьфоль республикасонк патриотическяй моронь всероссийскяй конкурсть ётафтоманц коряс мяленьконь ширец. Эсонза примасть участия самодеятельнай артистт странань ламоц региоттнень эзда и Белоруссияста.
 
90-це кизотнень Мордовиянь Культурань министерствась ладясь соткст Венгриянь, Финляндиянь, Эстониянь коллегатнень мархта. Сире Теризморга, Кочетовка велень самодеятельнай артисттне улендсть гастрольса Венгрияса и Финляндияса. Концерттне пяк лямбоста примафтольхть тя странань эряйхнень мархта.
 
Национальнай культурань центратнень панжемасна ульсь оцю и пяк эрявикс задачакс. Культурань министерствась макссь финансовай лезкс Старошайговскяй районца мокшень костюпнень, авань мазоптомбяльхнень анокламаснон коряс мастерскойть панжеманкса, тифоль ремонт Культурань кудти. Кемокстафоль Вирь алдонь Тавлань идень художественнай школать материальнай базац. Шуфтста керсеф скульптуратне, конатнень аноклазь минь мастероньке, арасть содафокс аф аньцек Россияса, но и эздонза ширеса.
—Улемок архивнай службань вятикс, тон путоть лама вий историческяй источникнень келиста содафокс тиеманкса.
—Нолдафт «Солдатские письма», «Письма из войны», «Михаил Девятаев: воспоминания, отклики, публицистика, хроника», «История мордовского народа и мордовского края в уникальных архивных документах», «Недаром помнит вся Россия…» (1912 кизонь Отечественнай войнань кизотнень пингста мокшэрзянь масторть колга) и лия сборникне.
 
2011 кизоня Москуса Федеральнай архивнай агентствать выставочнай залсонза няфтьфоль «Любимая Русь и мордва» архивнай документонь выставкась, конань аноклазь Мордовиянь архивисттне.
Кодама должность афолень занце, мон фалу старандань путнемс путкс историять, культурать, койхнень-обуцятнень ванфнемаснонды.
—Спасиба!
                                                                                                                                О.ЕВДОКИМОВА.
 

Юрий Фролович Юшкинонь шачема шистонза 70 кизонь топодемати
28.03.2019 №12
 
 
 

 
НОВОСТИ
 
 
 
 
 
 

МОРДОВСКЯЙ ГОСУНИВЕРСИТЕТСА ПАНЧФ УЧЕБНО-НАУЧНАЙ ЛАБОРАТОРИЯ

2 апрельста Мордовиянь Оцюнясь В.Д.Волков ульсь Н.П.Огаревонь лемса      МГУ-са, коса ванозе лекарственнай средствань технологиянь учебно-научнай лабораториять и корхнесь од ученайхнень и студенттнень мархта.
Лекарственнай средствань технологиянь учебно-научнай лабораториясь панчфоль Физикань и химиянь институтть видеса 2019 кизоня университетть и «Биохимик» АО-ть марстонь вийса. Тянкса нолдафоль пцтай 4 миллиотт цалковай (фкя миллион цалковайсь—предприятиять). Лабораториясь козякофтф тяниень пингонь оборудованияса, кона максси возможность етафнемс аф аньцек учебнай занятият, но и фармацевтическяй субстанциятнень и анок лекарственнай форматнень технологияснон анокламанц коряс научнай исследованият. Лабораторияса студенттненди ули кода пяшкодемс лекарственнай препараттнень производстваснон действующай веществать синтезонц эзда сявомок анок продукцияти молемс. Лиякс мярьгомс, тевса варчсесазь университетса получаф содамошитнень.
11.04.2019  № 14
 

1 апрельста ушедсь 2019 кизоть омбоце пяленцты газетас и журналс сёрматфтомась

11.04.2019  № 14
 
 
 

 

 

Яндекс.Метрика Яндекс цитирования Rambler's Top100
Учредительхие:
Главнай редакторсь: И. С. Лушкин