Поиск по сайту: 
 

Архив
 май 
 2019 
пн вт ср чт пт сб вс
  12345
6789101112
13141516171819
20212223242526
2728293031  

 
 

 

Наши мокшанские сыновья и дочери

Сире Шайгавса

И Девятаев азондозе, кода ведьгемонце кизотнень песта эсь ингольдень командироц Владимир Бобров Москуса (Монинаса) Офицеронь кудса Девятаевонь тифтезе ялгакс кайги лем авиаторть Иван Пархоменконь мархта. Пархоменко фамилиять Девятаев кулендезе кунара. Ульсь гражданскяй войнань стама герой—Александр Яковлевич Пархоменко. Сон 1905-1907 кизонь, 1917 кизонь февральскяй и Октябрьскяй революциянь участниколь, гражданскяй войнаса васенце Конармияса кавалерийскяй дивизиянь оцюняль. Тюрендсь махновецнень каршес. Шавовсь 1921 кизоня.
 
Эста летчиксь Иван Пархоменко Михаил Девятаевонь сявозе инжикс эсь пялонза. Сянь квартираса стенаста инжись няйсь портретт, эсост Клемент Ефремович Ворошилов и эрек сельме цёрокш.
 
—Ворошиловонь ваксста цёрокшсь кие?—кизефтезе Девятаев Пархоменконь.
 
—Ся мон. Мзярда нинге школьниколень. Вдь Ворошилов монь алязе.
 
—Кода стане?
 
—Аф родной алязе. Эсь алязе, Александр Яковлевич Пархоменко, шавовсь нинге гражданскяйса. Тядязе кулось. Вага и Ворошилов касфтомань. Сон арась омбоце алякс урозкс лятф Тимур Фрунзендиге—Михаил Васильевич Фрунзень цёранцты. Сяньге касфтозе. Сявок летчиколь. Да шавовсь войнаса. Геройкс юмась.
 
Иван Пархоменко Девятаевонь сявондезе Клемент Ефремовичень пяливок. Вдь Девятаевонди Советскяй Союзонь Героень лемонь максомать колга Указть алу кяденц путнезе сон, К.Е.Ворошилов. Михаил Петрович пяк таколдсь пялонза сувамста.
 
Ворошилов ся пингть ни сиреняль. Теенза кафксогемонть малаваль. Летчикнень—цёранц и сянь Героень Тяште мархта ялганц—васьфтезень аф пяк корхтафкшуста. Шумбракстсь-тись и тусь лия комнатас, кле, аф карман теенть шорсема. Сонць шобдаза халатсоль, тапочкасоль.
 
—Эста Иванонди мярьгонь,—лятфнесь Девятаев.—Кизефтька Клемент Ефремовичень, аляцень: кие монь инксон пара вал азсь и Героень лем макссть. И Иван меле кизефнезе. Тейне пачфтезе: «Тонь инксот, Михаил, хлопоцясь фкя оцю академик». Ся академиксь ульсь—Королев.
 
Девятаев сяда тов корхтась: мзярда-бди Иван Пархоменко, Тимур Фрунзе, Василий Сталин (Иосиф Виссарионовичень цёрац) тонафнесть фкя спецшколаса, сяльде—летчикокс. Сяльде марса служасть—лийкснесть фкя аэродромста. Пархоменконь и Фрунзень самолетсна сенептольхть, а Василий Сталиноннесь—якстерель.
 
—Василиень мархта и тейне сашендовсь васетькшнемс фронтовой аэродромсовок, а ведьгемонь котувоце кизода меле, мзярда сон паньфоль эряма Казани, васьфнине тоса. Сон и калмаф Казанень калмотнень лангс.
 
—Михаил Петрович, кулендевсь, бта тон Сталинонь оцю цёранц, Яков Джугашвилинь мархта фкя концлагерьсолеть. Ся виде?—кизефтине.
 
—Виде. Аньцек улеме тоса аф фкя пингть. Сон—войнать васенце пялеста, мон—омбоцеста.
 
Яков Джугашвили артиллеристоль. Тядяц—Сталинонь васень рьвац—Екатерина Сванидзе. Ся авать эряфоц стакаль. Эста, векть ушетксста, мирдец тюрьмава-куване повондсъ. Авась кулось, кадомок атнай иденц сазоронц кядьс. Ся и касфтозе Яковонь. Тозк Грузияса. 1921 кизоня Яков сась Москуву, алянцты. Сяльде эрясь-тонафнесь Ленинградса. Ульсь электростанцияса рабочайкс, аделазе рабфакть. Войнада инголе аделазе артиллерийскяй академиять. Войнань васень шитнекиге анась пря фронту. Старшай лейтенантсь Яков Джугашвили батареянь пара командироль. 1941 кизонь июлень фкя шиня Витебск ошть маласа контужендафста повсь пленц. Фашисттне сонь ёразь тиемс эсь ломанькс—ашезь лисе. Ётафнезь концлагерьста концлагерьс. Нюрнбергонь лагерьста «Икс-Зет» лагери, кона Любекть маласоль. Тоста ворьгодема тяряфтоманкса ускозь Заксёнхаузен куломань концлагери, коза 1944 кизоня повондонь монга. Концлагерьса Яковонь кирдезь башка вастса, кевонь колма метрань сереса стена эшксса, кона ингольге таватфоль сялги проволкаса. Проволкать пачк мольсь 1000 вольтонь ток. Яковонди пачфнезь, кода алянцты фашисттне мярьгондсть полафтомс сонь фельдмаршалть Паулюсонь лангс. Эста аляц отвечась: «Солдат маршал лангс аф полафтан». Ацергофнезе Яковонь седиенц ся, мзярда лагерьге радиоса лувондозь алянц валонзон: «Аш военно-пленнайхть—улихть Родинань мийхть».
 
Эряфти Яковонь ашель кодамовок надиямац-сюреняц. Сон вешендсь кулома. И фашисттнень ширеса прянц вятезе афкуксонь патриотокс. 1943 кизонь апрельть 14 шистонза бараку сувамста тись аськолкст етамда аф мярьгондеви зонать шири. Сонь ляцезь. А сяльде ердазь сялги проволкать лангс.
 
1977 кизоня Яков Джугашвили кулофста казьф Отечественнай войнань васенце степенень орденца. Казнесь максфоль Яковонь стиренцты Галина Джугашвилинди, кона эряй Москуса.
 
Семботь тянь мон кармань содамонза войнада меле ни—ингольдень узникнень кургста, улихть тянь колга документт Заксёнхаузен мемориалть архивсовок.
 
Михаил Петрович аф ламос сетьмось. Сяльде поладозе:
 
—Стакаль, пяк стакаль ворьгодемс куломань ся лагерьста. Тоса машфтф-плхтаф, ляцьф, печкф, муцяф миллиотт ломань. Заксенхаузенца монь кирдемазь пцтай нильгемонь нилеце кизоть аделамс, а сяльде етафтомазь сядонга ванови концлагерьс, Заксенхаузенть филиалс, кона моря кучкаса. Но тостовок удалась, кода содасасть, ворьгодемс.
                                                                                                                                              М.Моисеев.
 

28.03.2019 №12
 
 
 

 
НОВОСТИ
 
 

ВЛАДИМИР ВОЛКОВ примась участия РФ-нь Правительствать вице-премьеронц Виталий Мутконь председательстванц ала совещанияса

14 майста Мордовиянь Оцюнясь Владимир Волков примась участия совещанияса, конань видеоконференциянь лаца ётафтозе РФ-нь Правительствань вице-премьерсь Виталий Мутко. Совещаниянь основной кизефксокс арасть уштомань пингонь ётай кизонь итокне.

 


Виталий Мутко отмечазе: ся региоттнень эса, коса губернаторхне шарфнихть башка мяль тя темати, сезонць ётась тапорксфтома. Но марнек,   ЖКХ-нь объекттнень эса чрезвычайнай ситуациянь лувкссь кассь, и главнай туфталсь—сеттнень таштомомасна. Вице-премьерсь отмечазе, што сай кизоста сявомок арьсекшневи нолдамс коммунальнай инфраструктурать, кона 60 процентта таштомсь, одкстоптоманц коряс федеральнай программать. Сяс региоттненди эряви максомс  РФ-нь Минстрои тяфтама объекттнень и капитальнай вложениятнень размерснон коряс, конат эрявихть тиемс нормативно-техническяй вешфксненди кондястикс, педа-пес кочкаф информация.

24.05.2019
 

Сёрматфтода «Мокшень правда» уцез (льготнай) питнеса

24.05.2019
 
 
 
 
 
 
 

 

 

Яндекс.Метрика Яндекс цитирования Rambler's Top100
Учредительхие:
Главнай редакторсь: И. С. Лушкин