Поиск по сайту: 
 

Архив
 июнь 
 2019 
пн вт ср чт пт сб вс
     12
3456789
10111213141516
17181920212223
24252627282930

 
 

 

Люди и дела

ИНГОЛИ МОЛЕМСТА—ВАРЖАКСНЕМА ФТАЛУ

Но, эряви азомс сяньге, марстонь производствась велеса (колхосне и совхосне) няевиста цебярьгофнезе велеряйть эряфонц. Ульсть строяфт цебярь школат, больницят, идень сатт, клупт. Эста вели пачкодсть радиось, телевидениясь, телефоттне-месне. Сембонди мушендовсь работа. Нльне нолатненге, симилатненге вихца кошярязь покодема, апрякасть эсост пуромкснень эса-коса. Лац работайхненди макссесть премият, питни казнет, питнефтома путёвкат санаторияв и стак тов.
 
Но инь кальдявть, койсон, сембе велетненди и велеряйхненди кандозе сюдоф Перестройкась.
 
Азондан аньцек фкя кепотькс тянь коряс. Ковылкинскяй райононь ингольдень «Гигант» минь колхозсонк перестройкада инголе кирдевсь 3,5 тёжянь крупнай жувата, ульсть тувонь фермат, учань колма стадат, птичник, мешень пасека, парниконь хозяйства, алашат-месть и стак тов. Ульсть ниле колхознай бригадат, сембонь ульсть синцень фермасна, техникасна и велень хозяйствань инвентарьсна, мастерскойсна-мезьсна и лия вастсна.
 
Хозяйствасоль 40-да лама трактор, нинге сяда лама автомашина, 36 комбайна, комбикормовай завод, зерносушилка, лама утом, жуватань 24 карда, идень сад, столовай, гарашт, мастерскойхть и лия постройкат. Сембе азфть эзда мезевок ашезь ляда.
 
Тяни пяк пара нинге ся, што колхозонь сембе паксятнень витцесазь ЗАО «Беконць» и фермерсь Н.В.Аношкин. А трудонь кельги велеряеньке, кода панжапт, срадсть-тушендсть тевонь вешендема марнек странаньконь келес.
 
Виденц корхнихть: «Кальдявсь тиеви курокста, а цебярь и оцю тевонь тиемс лама пингта эряви». Перестройкань «тефне»  сашендовихть петнемс тячемс. Пяк пара, што Шкабавазсь кучсь тейнек ёню вятихть, эсь ломанень и странань кельгихть.
 
 Эряви азомс, тяни велень хозяйствасонк тефне ламоц вастова молихть аф кальдявста. Велеть тячиень эряфоц ламода полафтсь цебярь шири. Строяф жуватань лама ферма-комплекс. Эрь кизоня сяда лама ярмак ноляви велень хозяйствать кирдемс-кеподемс странать бюджетста, паксятнень лангса няендеви сяда лама од техникада. Велень од специалисттненди кудонь строямс и хозяйствань водендамс государствась максси дотацият и грантт, кафта и сяда лама идень шачфтоманкса-касфтоманкса—тядянь капитал. Астама тянкса оцю сюкпря тячиень вятиеньконди, сяс мес тяфтама лезкс велеряйти вестевок ашель.
 
Тячи лама велева строяфт асфальтонь калгода кит, валом петневихть сембе нолдаф эльбятьксне. Велеса сире ломаттнень эряфсна аф кальдяв. Сембонь кудса газ, цебярь мебель, телефотт, телевизорхт, сидеста сашендыхть варжамост ошста идьсна-уноксна. Илять ламоц велетнень ульцява, кода ошса, столбатнень прява палыхть лампочкат, фалу урятцевихть тялонда китне. Минь Ёжкасонк лама ошэряй строясь шачема велезост цебярь кутт: сашендыхть эряма вели пенсияс тумдост меле, кизонда отпускста, а ошень квартираснон кадондсазь идьснонды.
 
Аф сёпса, велеса тячи нинге лама прябалада. Васендакиге, аф сатнихть работама васттне тевонь кельги ломаттненди. Сяс пяк кржа лядсь вели од ломаньда, а синьфтомост аф кирдевихть жуватат, аш кинди озамс тракторс и машинас, аш заготбазат, велеряйхнень касфтф продукцияснон примамс приёмнай пунктт. Тя пяк пичефтьсыне сембе велеряйхнень.
 
А.ТРЕМАСКИН,
педагогическяй трудонь ветеран.
Ковылкинскяй райононь Ежка велесь.  
 

28.03.2019 №12
 
 
 

 
НОВОСТИ
 
 

Исавелети—300 киза

Эрь кизоня Тройцянь шиня Инсарскяй райононь Исавели кочксеви лама ломаньда. Тядде тяза сашендсь кафта тежянть малава инжи странать сембе уженястонза: Москуста, Санкт-Петербургста, Самараста, Краснодарста, Коми Республикаста, лия областтнень и республикатнень эзда.
Тядде вели ломаттнень пуроптозень аф аньцек Тройцясь, ня шитнень Исавелети топодсь 300 киза. Велесь козя эсь историянц, коензон, обуцянзон мархта, тяса шачсь лама содаф ломаньда. Нят: ученайсь, писательсь, драматургсь, виднай общественнай деятельсь Г.Я.Меркушкин, Мордовия Республикань Почетнай Гражданинць, Российскяй Федерациянь Президентть видеса финно-угорскяй  нароттнень сембе масторонь конгрессть спецпредставителец Н.И.Меркушкин, медицинскяй наукань докторхне В.А.Базаев и М.Д.Кузьмин, лама лия содаф ломань. Велесь инжихнень васьфтезень эсь мазышинц мархта. Тяса лама од кудта, аф кунара панчфт социальнай центра, идень сад, од ФАП, строяфт спортивнай площадкат, культурань объектт, велеть мазопнесы Шкаень кудсь. Ламонцне илас састь идьснон, унокснон мархта, ломаттне кштисть, морасть, седисна и ваймосна пяшксель кенярдемада. Фкя-фкянь мельге сцена лангста кайгсть поздравленият, илань вятихне   азондсть велеть историянц колга, лятфтазь сятнень лемснон, кит аралазь Родинать вракнень эзда. Лама велеряй фронтста ашесть мрда, максозь эряфснон минь инксонк.
20.06.2019  № 24
 

Минь поздравленияньке

13.06.2019  № 23
 
 
 
 
 

«Рузаевкаса мольфтевихть анокламатне стекольнай заводть панжеманцты»

Мордовиянь Оцюнясь Владимир Волков:
Мордовиянь Оцюнясь Владимир Волков 29 майста ётафтсь рабочай васедема Рузаевскяй райононь руководительть Вячеслав Кормилицынонь мархта. Ванондовсть территориять социально-экономическяй виияфтоманц коряс кизефксне. Тяконь лувксса корхтамась мольфтевсь социальнай объекттнень строямаснонды анокламать колга: Рузаевкаса Паровознай ульцяса 160 вастонди идень садть, Татаронь Пишляса 250 вастонди школать, фельдшерско-акушерскяй пункттнень.
Ванондовсть районца водоснабжениянь и водоотведениянь систематнень одкстоптомаснон, а стане жа «Безопасные и качественные автомобильные дороги» национальнай проектть эряфс ётафтоманц рамкаса китнень строямаснон и петемаснон коряс кизефксне. Тядде, кода отмечазе Вячеслав Кормилицын, петевихть-одкстоптовихть 13 вайгяльбень кувалмоса кит.
06.06.2019  № 22
 

Аделсеви «Мокшень правдати» сёрматфтомась

Эряскодода!
Кельгома ялгат!
2019 кизоть омбоце пяленцты «Мокшень правдати» сёрматфтомать шумордамс ляткшни аньцек кафта недялят.  И ули тячи мяленьке нинге весть азомс нюрьхкяняста: мес именна «Мокшень правда» эряви тинь семьянтенди.
Кода аф ужяль, мокшэрзятнень лувкссна стаки кири. А «Мокшень правдась» семботь тиендьсы сянкса, штоба аф нолдамс тянь. Кода ванфтомс и виияфтомс кяленьконь, культураньконь, аф юкстамс эсь коеньконь-обуцяньконь—вов мезть колга мольфтеви корхтамась сонь лопанянзон эса. Пцтай эрь номерса макссевихть материалхт мокшэрзятнень историяснон, содаф ломаньцнон колга, азонкшневи народоньконь арьсеманзон и пичефксонзон колга.
«Мокшень правдаса» макссевихть медицинскяй темас советт и рекомендацият, советт перень сёронь касфнихненди и жувата мельге якайхненди. Эрь номерса ули юморонь и сатирань уженя, рузонь кяльса печатлакшневихть недялянди ламоц телевизионнай программатне.
«Мокшень правдась» республиканскяй газетатнень эзда фкя инь интереснай и уцез газетась. Сон нльне сяда уцез ламоц «районкатнень» коряс.
Теенза тяшфтемать питнец:
6 ковонди—336 цалковай,
3 ковонди—168 цалковай.
Газетать индексоц П4719.
 Эряскодода почтав. Тоса учихть эсонт. Пингсь содай ётаманц.
06.06.2019  № 22
 

 

 

Яндекс.Метрика Яндекс цитирования Rambler's Top100
Учредительхие:
Главнай редакторсь: И. С. Лушкин