Поиск по сайту: 
 

Архив
 август 
 2020 
пн вт ср чт пт сб вс
     12
3456789
10111213141516
17181920212223
24252627282930
31      

 
 

 

Демография

60 КИЗА ЭРЯЙХТЬ КЕЛЬГОЗЬ И ФКЯ-ФКЯНЬ ШАРЬХКОДЕЗЬ

Раиса Павловна Бардина шачсь 1939 кизонь июльста Московскяй областень Клин ошса. Тядянзон-алянзон ульсть нинге кафта стирьсна, конат, ужяленди, тусть эряфста войнать пингста. Алянц стане жа  сявозе войнась, и Раиса Павловна тядянц мархта мрдасть ёмла родиназост—Мордовияв. Ушедсть эряма щятянц кудса.
 
Надиямс ашель кинь лангс и сембе кудонь тефне лаподсть аватнень лафтуснон лангс. Сяс аш стама тев, конань афолезе машта тя мокшавась. Сон хуш и кассь тядянц ваксса тяконякс, но сафнезе сембоса,  нльне алянь тевсовок.
 
Раиса Павловнань мирдец, Андрей Васильевич Бардин, шачсь 1937 кизонь 26 августста Ковылкинскяй райононь Самозлейка велеса, мокшень оцю семьяса, коса кассть сисем церат и фкя стирь. Андрей Васильевич оцюсель цератнень еткста и сембе тефненди аляц тонафтозе сонь васенцекс. Сон пяк лац содасы плотниконь тевть. Плотничендама алясь тонадсь ефси емланяста. Аш велеса стама куд, коза сон афолезе пута эсь кяденц. Сембе стройкатненди тернезь, и мокшалясь фалу макссесь ломаттненди оцю лезкс.
 
1959 кизоня тевонь кельги ня кафта ломаттне васедсть и кельгомань цятконясь эстокиге крьвязсь седисост и ванфневи тячемс. Сядонга павазукс арасть полатне, нльне мзярда шачсть иднясна. Мирттне-рьвятне касфтсть вете итть. А тячи синь кеняртьфнесазь кемонь уноксна и уноконь фкя идьсна. Велеряйхне Бардиттнень шабаснон колга корхтайхть аньцек шнама валса, а мезе нинге азат ня асу ломаттнень колга. Стирьснон, Зинать и Верать, Шкабавазсь казезень мазы, кайги вайгяльса, сяс и сотозь эряфснон морамать мархта. Нина стирьснон—зрняннет кяденза. Сон сташенды мокшень щапт, панархт, сапонят, наряжакшнесыне сембонь, кие теенза эняльди. Церасна, Иван и Владимир, и кштийхть, и морайхть, и маштыхть гитараса и гармонияса морама. Афкукс, родительснонды ули мезенкса марямс гордость. Мзярда пуромкшни марс Бардиттнень оцю семьясна, эздост лувови мянь 38 ломань (тяса и рьвянят, и офт). Синь сембонь маласькофнесыне морамась и кштимась. Сонць семьянь азорсь тонадсь гармонияса морама нинге идькс пингста, тонафтозень тянди церанзонга. Сяс, мзярда пуромкшнихть марса, кудботмосост азорондай афкуксонь ила, конань мазопнесазь гармониянь и моронь вайгяльхне.
 
Сембе пинкнень мокшень тя семьясь содавсь эсь тевонь кельгоманц мархта. Пирьфсост фалу касфнесть тракст, букат, тувот, сараст, алашат. Андрей Васильевич эсь кельгома лишмонцты сонць крандазовок  тись и тянемс эсонза ванфты, арьси, уноконзонды эрявксты.
 
Нинге Бардиттнень ули пара койсна—синь кельгсазь марса морафтомаснон. Лувихть аньцек мокшень кяльса, сяс и тяштьфнихть «Мокшень правда» газета. Эрь недяляня оцю мяльса учендсазь од номерть лисеманц. Лувондсазь васенце лопаняста сявомок мекольцети молемс. Атясь луви, а бабась озай ваксозонза и оцю мяльса кулхцонды. Эрть ули эсь кельгома рубрикац: Андрей Васильевич кельгсыне кулятнень, а Раиса Павловна—советтнень. Тяфта жа пяк мялезост пеетькс пакшкятне.
 
Тяни мирттне-рьвятне Бардиттне эряйхть кафонест. Идьснон шири аш мяльсна етамс, вдь тя кудть, коса синь эряйхть, мокшалясь тиезе эсь кядьсонза и путозе эзонза ваймонь пяльксканц. И афкукс, афи муят сяда валда, мазы куд… Улема, сянкса, мзярда нинге  ашель Самозлейкаса клуб, велеряйхне кочксевсть пялост посиделкас.
 
Тяддень ноябрьста топоди 60 киза, кода Раиса Павловна и Андрей Васильевич эряйхть марса. Синь тячивок инь питни ломатть фкя-фкянди. Стирьсна лятфнесы, мзярда тядяц  мадсь больницяв, аляц нолдась сакал, якась колаф мяльхть. А мзярда сась пинге молемс рьванц инкса, сон меки эреклась: наразе сакалонц, щазе од панаронц, срхкась, бта васенце свиданияс. Аньцек няйсть фкя-фкянь, ашкорясть и аварьгодсть, сяс мес кафцьконди недяляське фкя-фкафтома няевсь кувака пингокс. Тя ли аф пример афкуксонь кельгомати? Ваномок тя мокшень семьять лангс, шарьхкодьсак, кельгомать аш пец, сон ули и одста, и сирестовок.
 
                                                                                                                                          К.Сайгутина.
 

28.03.2019 №12
 
 
 

 
НОВОСТИ

Ушедсь сёронь урядама пингсь

Эрь гектарста ули кочкаф 50 центнер сёра

 

Тяфтама ни велень эряфсь, фкя тевсь полафнесы омбоцеть. Нинге исяк республикань велень хозяйстватнень эса инь оцю мяль шарфневсь и водендафоль лама вий кормань анокламати,  тячи лама вастова кярьмодсть ни сёронь урядамати. Лихтезь паксятнень лангс эсь комбайнаснон и Рузаевскяй райононь «Агросоюз—Левженский» ООО-нь механизаторхне.

 

 

—Сёронь урядама пингти маладоме сембе ширде аноклафста,—азонды хозяйствань вятись, Мордовия Республикань велень хозяйствань Заслуженнай работниксь В.И.Сетин.—Комбайнатне пцтай сембе отт, мяльце касы мархтост работамс. Сёронь урядама пингть синь фалу паксясот, кой-кона участкатне ащихть кемоньшка вайгяльбень вастса и техникась мековасу аш месть панцемс. Марнек сёротне видефтольхть фкя тёжянь гектар лангса. Урожайсь пяк цебярь, эрь гектарста сяфтяма аф ведьгемоньда кржа центнер сёра. Кда кармай цебярь погодась, сембе  ня площаттнень  урядасаськ кафта-колма недяляста.

 

30.07.2020  № 29
 

МОРДОВИЯ РЕСПУБЛИКАНЬ ОЦЮНЯСЬ ВЛАДИМИР ВОЛКОВ ВАНОЗЕНЬ РЕСПУБЛИКАНЬ РАЙОТТНЕНЬ ЭСА СОЦИАЛЬНАЙ ОБЪЕКТТНЕНЬ СТРОЯМАСНОН КОРЯС РАБОТАТНЕНЬ МОЛЬФТЕМАСНОН

Краснослободскяй районца

 

 

24 июльста МР-нь Оцюнясь Владимир Волков ульсь Краснослободскяй районца, коса ванозе, кода мольфтевихть Бобылевские Выселки велеса «Комплексное развитие сельских территорий» программать коряс комплекснай компактнай строямать коряс проектть эряфс ётафтомац.

 

Проектть коряс арьсекшневи строямс спортивнай комплекс и  модань 132 участкаса эряма кутт. Бобылевские Выселки велесь ащи маласа Краснослободск ошти, сяс тя пцтай фкя агломерация.

 

Кода няезе Мордовиянь Оцюнясь, спортивнай сооружениять строямац мольфтеви сембе вийса и нльне графикта инголе. Республикаса тя фкя и сяка спортивнай объектсь, коса фкя вельхкс ала кармай ледовай арена, оцюфненди и иттненди бассейнат, тренажернай и фитнес-залхт. Лама функцияса спортивнай сооружениясь арай межрайоннайкс.

 

Кда сявомс проектть омбоце пяльксонц—комплекснай компактнай застройкать, тячиень шити площадкаса аделсеви газопроводонь и водопроводонь ётафтомась, тиф 1,4 вайгяльбень кувалмоса ки, лядыкс 1,7 вайгяльбесь—сай кизонь планца.

 

Владимир Волков путсь Краснослободскяй районть оцюнянц Алексей Буйновонь инголе задача—сяда виияфтомс аноклаф  территорияса куттнень строямаснон, тяконь лувксса льготнай велень ипотекать вельде.
 

 

 
30.07.2020  № 29
 
 
 
 
 
 
 

ВЛАДИМИР СУШКОВ ВЕШСЬ СЯДА ЭРЕКЛАФТОМС ТЕФНЕНЬ И КЕМОСТА ВАНОМС КАЧЕСТВАТЬ МЕЛЬГЕ

6 июльста Мордовиянь Правительствань члеттнень мархта совещанияса ванондовсть национальнай проекттнень эряфс ётафтомаснон коряс кизефксне. Республикань Правительствать Председателец Владимир Сушков отмечазе, што социальнай ширде важнай кой-кона объекттнень эса заняф аф сатомшка ломаньда и аф марнек нолявихть тевс графикнень ванфтозь работатнень пяшкотькшнеманкса строительнай механизматне.

 

 
Ётай ваймама шитнень региональнай кабминонь премьер-министрсь ванозень Идень республиканскяй клиническяй больницять хирургическяй корпусонц и Республиканскяй онкологическяй диспансерть поликлиническяй отделениянц, конат строявихть «Здравоохранение» нацпроектть рамкаса, строямаснон. Владимир Сушков мярьгсь работамс        объекттнень эса сутканьберьф и кемоста ваномс тиеви работатнень качестваснон мельге. Тяфта жа Правительствать Председателец мярьгсь анокламс уликс онкодиспансерть зданиянц петеманкса сембе документациять. Тядде нацпроектть рамкаса кармайхть одкстоптфт 70 фельдшерско-акушерскяй пункт и фкя врачебнай амбулатория.

 

09.07.2020
 
 

 

 

Яндекс.Метрика Яндекс цитирования Rambler's Top100
Учредительхие:
Главнай редакторсь: И. С. Лушкин