Конференциясь лемтьфоль адмиралти Фёдор Ушаковонди

29 мартста Саранскяйса Н.П.Огарёвонь лемса Мордовскяй государственнай университетть Культурань и искусствань Дворецсонза панжевсь «Адмирал Фёдор Ушаков:  уроки истории  и вызовы современности» лем ала Всероссийскяй научно-практическяй конференциясь, конань эса примасть участия Мордовия Республикань и Россиянь образовательнай и культурнай учреждениятнень, общественнай организациятнень специалистсна.
Аноклазь и ётафтозь вяре азф конференциять «Путь к знаниям» Научно-просветительскяй центрась, Н.П.Огарёвонь лемса Мордовскяй государственнай университетсь, М.Е.Евсевьевонь лемса Мордовскяй государственнай педагогическяй институтсь.
Конференциять панжемаса примасть участия Мордовия Республикань Оцюнясь В.Д.Волков, Международнай тефнень коряс Российскяй Федерациянь Советонь комитетть председателенц васенце заместителец С.И. Кисляк, РАН-нь академиксь, Авиационнай материалонь Всероссийскяй научно-исследовательскяй институтть  Генеральнай директороц, академиксь Е.Н.Каблов, Саранскяй и Мордовскяй Митрополитсь Зиновий, лиятне.
Мордовия Республикань Оцюнясь конференциянь участникнень  и инжихнень инголе корхтамста мяль шарфтсь вов мезти:
—Фёдор Ушаковонь тевонза и подвигонза сядот киза служайхть Отечествать аралаензон од поколенияснонды. Нинге шиса улемстонза адмиралть кельгозе и уважандазе российскяй народсь и аф аньцек российскяйсь, а миронь лама лия нароттне. Ушаков арась моряконь мужествань и кемошинь, флотоньконь киндивок аф сяськовомань символкс, праведностень примеркс. Мордовияти Ушаков пяк мала. Сон эняльдсь калмамс сонь мокшэрзянь масторса, Санаксарса.
Академиксь Е.Н.Каблов лятфтазе, што тядде топоди 274 киза Фёдор Ушаковонь шачема шиста, 220 киза Корфу  и Видо острофнень воляс нолдамаснонды—тя Ушаковонь пяк оцю сяськомац, конань инкса сон получась адмиралонь лем французскяй войскатнень эзда.
Сяда тов конференцияса корхтась Международнай тефнень коряс Российскяй  Федерациянь Советонь комитетть председателенц васенце заместителец   С.И. Кисляк:
—Рузонь флотть виец васенцеда няфтезе эсь прянц сембе ширде Ушаковонь сяськоманзон пингста. Сонь асушиц, кода военнайсь, стане и дипломатическяйсь, лездсь тиемс Россиять морской пяк оцю державакс васенда Чернай, а сяльде Средиземнай моряса.
Конференцияса примась участия 1 рангонь капитанць, историческяй наукань кандидатсь, Российскяй Федерациянь Вооруженнай Виень Генеральнай штабонь Военнай академиянь ведущай научнай сотрудниксь В.Д.Овчинников. Сон марнек эряфонц лемдезе адмиралть Ушаковонь эряфонц тонафнеманцты и тись «Адмирал Фёдор Ушаков в российской истории» доклад.
Доклад тись РАН-нь членць-корреспондентсь, профессорсь, Н.П.Огарёвонь лемса Мордовскяй государственнай университетонь Историко-социологическяй инстутть директороц Н.М.Арсентьев.
Вятезе пленарнай заседаниять Н.П.Огаревонь лемса МГУ-ть ректороц С.М.Вдовин. Сон лувозе Российскяй Федерациянь Президентть Администрациянц Руководителенц васенце заместителенц  С.В.Кириенконь конференциянь участникнень лемс кучф приветствиянц.