НАЦИЯНЬКОНЬ СУДЬБАЦ ЭСЬ КЯДЬСОНК

Мокшэрзянь народть Всероссийскяй VII съездонцты
Мокшалять В.Ф.Кирдяшовонь лемоц, национальнай ширеть мархта сотф мяленза-арьсеманза лац содафт аф аньцек мокшэрзянь, но и финно-угрань мирса-масторса. Ученайсь—Мокшэрзянь народть VI съездонцты молемс мокшэрзянь народть общественнай движениянц Межрегиональнай Советонц членоцоль, делегатоль финно-угорскяй народонь Всемирнай конгресснень эса (Сыктывкарса, Ханты-Мансийскяйса, Шиофок Венгриянь ошса). Примсесь участия Россиянь Финно-угорскяй нароттнень съездснон эса, этнополитикать коряс кеветиеда лама Международнай и Всероссийскяй конференциянь участниколь. Оцю мяльса кулхцонкшневи Василий Филипповичень азфоц тя или тона кизефкснень коряс. Фкя инь таколфты прябалакс, кона ульсь и лядонды учёнайть сельминголе—тя мокшэрзянь нациять ванфнемац. Кода лятфнесы сонць мокшалясь, сембось ушедсь Финно-угорскяй народонь I Всемирнай конгресса, кона ётафтфоль Сыктывкарса 1992 кизонь декабрьста. Пуромксс тертьфнень ётксоль и тячиень героеньке. Сонь седишкава таколфтозе корхтамась мокшэрзятнень колга. Народоньконь эса «явфтсть» кафту, а республиканьконди ерасть максомс ёфси лия лем. Тя и кошардозе В.Ф.Кирдяшовонь, улемок Москуса, молемс библиотекав и ваномс этноснень и политологиять коряс уликс литературать, омба масторонь учёнайхнень национальнай кизефкснень коряс мяльснон-арьсемаснон.
Н.П.Огарёвонь лемса МГУ-са работамста Василий Филиппович сермадсь сядода лама научнай работа, нолдась кемоньда лама учебник и учебнай пособия. Ученайсь арась Историко-социологическяй институтса «Этнополитология» курсонь арьсикс-ушедыкс.
Тяниень пингть мокшалясь пенсияса, но национальнай кизефкснень эзда шири сембе сяка аф лядонды. Таколды Василий Филиппович эсь шачема-касома Сире Синдру веленц инкса. Эряй В.Ф.Кирдяшов Саранскяйса, но мзярдовок аф юксни седити инь мала и питни уженянц колга. Саранск ошень округонь оцюнять П.Н.Тултаевонь мархта вятьсазь Сире Синдрунь землячествать. Кода аф ужяль, но велесь кизоста кизос коль кири и кири.
Ня шитнень Василий Филиппович ульсь редакциясонк, азозень эсь мялензон-арьсеманзон тянь-тонань колга. Башка мяль корхтамаса мокшалясь шарфтсь мокшэрзянь народть VII Всероссийскяй съездонцты, кона тяддень сёксеня ётафтови республиканьконь столицаса.
—Тейне удалась примамс участия тяда ингольдень сембе съезттнень эса. Финцнень эса улень делегатокс, омбонцнень—инжикс. Университетса работамста студенттнень мархта тяшнеме-аноклакшнеме лама материал        съезттнень колга, сянь, кода пяшкотькшневихть пингстост примаф решениятне. П.Н.Тултаевонь мархта 2006 кизоня нолдаме «Национально-культурная автономия—один из приоритетов национальной политики Российской Федерации (на примере мордвы)» лем ала книга, коса фкя разделсь стане жа лемтьф съезттненди и мокшэрзятнень национальнай движениясост синь вастснонды.
Тядде мокшэрзянь масторсь сисемцеда пуроптсыне эсь стирензон-цёранзон. И пяк мялезе, штоба эсонза афольхть уле шава корхнемат, сялондомат-явондомат. Главнайсь—ванфтомс мокшэрзянь нациять сонцень шамаликонц, сяда тов цебярьгофтомс соткснень национальносттнень еткса, кемокстамс нароттнень, конат эряйхть минь масторсонк, ялгаксшиснон и фкя-фкянь шарьхкодемать, тиемс стама условият, кодамса няфтеволь республикань ломаттнень и, васендакиге, мокшетнень и эрзятнень козяшисна. Минь вдь Россиянь ломаттяма, фкя усфс сотнефтяма и тя усфсь ускома тейнек марса.
—Василий Филиппович, кда максови вал тя оцю пуромксса, кодама кизефкснень васендакиге кеподьсайть ваномс?
—Монь, кода велеса шачф-касф ломанень, пичефтьсамань мокшень велетнень тячиень эряфсна. Пароль сяда оцю мяль шарфтомс лангозост, азонкшнемс колгаст. Меле «Мокша» журналть главнай редакторонц В.М.Лобановонь мархта путоме ушеткс пяк пара тевонди. Изданиять колма номеронзон эса максфтольхть оцю статьят Сире Синдру велеть колга. Статьятнень анокласьк стирезень мархта. Сёрматфть эса крхкаста азонтф велеть историянц и тячиень эряфонц колга. Тя тевсь, арьсян, мольфтема и сяда тов. Азонкшнемс, мярьктяма, аф аньцек Мордовиянь, но и шабра региононь мокшень велетнень колга. Съездть пингста лац-ряц арьсема-смекама тя кизефкссь, шять, специальнай рабочай группа пуроптома велеса тячиень эряфть колга пачфнемать коряс.
Омбоцесь. Эряви, штоба эрь районца улель хуш фкя национальнай школа интернат мархта, коса тонафнемась мольфтеволь  аньцек родной кяльса. Пяксневихть, кода няфнесы эряфсь, школатне, усксесазь иттнень тонафнема лия велева. Прябалась бта фкя ширде инголдавсь, но эвондафтсь лия: рузонь школаса мокшень кяльть тонафнеманц коряс программась лия, а оцю класснень эса сон ёфсикс аф вятеви.
Тяда башка, койсон, сяда крхкаста тонафнемаль кяльсь ошень  школатнень эсовок. Шарфтома мяль и национальнай кадратнень лангс.
—Тячи мокшэрзятнень, кода и мастор лангонь лия нароттнень инголе, оржаста ащи демографиянь кизефкссь. Кода арьсят, мезсь арси туфталкс лувксоньконь киреманцты?
—Лувксоньке афкукс кири. Тяса  шарфтан мяль монцень Сире Синдру велезень лангс. Мзярда-бди сон пяк оцюволь. Кизоньберьф тяса шачендсь 200-та лама шаба. Тячи—фкя-кафта. Туфталсь—аш кинди шачфнемс синь. Велеса аш работама вастт, а сяс од ломаттне тушендыхть ошу и арсихть ошеряйкс. Омбоце туфталсь, фкя-кафта идень шачфнемась арась моднайкс. Тячи шуроста васьфтят семьят, коса касфтови колма или сяда лама шаба. Монь идькс пингстон тяфтама семьятнень лангса нльне рахсекшнельхть, а тяни шабань ширде ашу семьятненди кивок афи дивандай.
—Василий Филиппович, койсот, кодама работа эряволь вятемс од ломаттнень ёткса национальнай самосознанияснон кеподеманкса, штоба синь афолезь юксне-сёпонда родной кяльснон и пара мяльса корхнельхть тядянь-алянь валса?
—Кода няфнесы эряфсь, вихца  ломанть кядьста мзярдовок аф тифтьсак тевть цебярьста. Вихца аф тонафнесак кяльтьке. Но шарфтомс ломанть мяленц ули кода. И ламось тя тевса ащи тядятнень-алятнень эзда. Теест эсь примерсост няфнема родной кяльти кельгомать. Аньцек эста кельгомань цятконясь етай иттнендивок.
—Спасиба!