Поиск по сайту: 
 

Архив
 январь 
 2020 
пн вт ср чт пт сб вс
  12345
6789101112
13141516171819
20212223242526
2728293031  

 
 

 

Национальная тематика

КАНАЕФНЕНЬ СЕМЕЙНАЙ АНСАМБЛЬСНА АЩИ КЕПОТЬКСОКС ЛИЯТНЕНДИ

Эрь велесь, тяконь лувксса и мокшеннесь, козя ломанезон мархта. Тянь ули кода азомс Рузаевскяй райононь Левжа мокшень велеть колга. Асу, ёню, творческяй ломаненза содафт лама вастова. Ламотне эздост—минцень, национальнайть, коеньконь-обуцяньконь, родной кялень кельгихть и ванфтыхть.  Тянь ули кода азомс и Левжа велень Культурань кудть заведующаенц,  афкуксонь патриотть, мокшавать Людмила Гавриловна Канаевать колга. Лемоц содаф ламотненди уликс сатфксонзон инкса. Людмила Гавриловнань марнек семьяц творческяй, музыкань кельги. Канаефне несколька кизода инголе пуроптозь семейнай ансамбльснон, конань лангс ваномста сашендат мяльс, што вов тяфтама ломаттнень эзда сявома пример сембонди. 
Эняльдень Людмила Гавриловнанди азондомс эсь, ансамбльть эвондаманц колга:
—Монць и мирдезе шачемас коре Левжаста. Лама кизода инголе  пуроптоме семья, шачсть колма иденьке. Алексей Геннадьевич работай Мордовия Республикать эзга Внутренняй тевонь министерстваса, лац работаманкса аф весть казьфоль МВД-нь медальса. Аф ваномок заняфшинц лангс, фалу мушенды пинге  мархтонк примсемс участия пуромкснень эса.
—А кода эвондась семейнай ансамбльть пуроптоманц колга мяльсь?
—Национальнайти, мокшеннети, семботи минценнети кельгомась кошардомазь тянь тиемс. Кали кальдяв тевсь тя или тона праздникнень, пуромкснень эса примсемс участия, морсемс семьянь келеса, няфнемс мокшень щапнень-каряпнень мазышиснон, конат тейнек ащихть гордостень маряма, прянь шнафтома вастокс?
—Людмила Гавриловна, кит тяни сувсихть семейнай ансамблезонт?
—Мон, мирдезе Алексей Геннадьевич, колма иденьке—стиреньке Олеся и Татьяна, цёраньке Геннадий, овоньке Владимир, Олесять и Владимиронь идьсна (уноконьке) Арсений и Дарина, авозезе Прасковья Никифоровна.
Людмила Гавриловнань валонзон коряс, семьясост тиендеви сембось, штоба Арсений и Дарина касольхть национальнай коень-обуцянь содайкс и кельгикс. Аф ваномок сянь лангс, што овсна Владимир Кустов руз, сон Канаефнень семьяса арась афкуксонь мокшалякс. Морси мокшэрзянь морот, тонафнесы мокшень кяльть.
Канаефнень стирьсна Татьяна Саранскяйса шумордазе Л.П.Кирюковонь лемса музыкальнай училищать, сяда тов поладозе тонафнеманц М.И. Глинкань лемса Нижегородскяй государственнай консерваторияса, сон—Россиянь Президентть од таланттнень ширеснон кирдемаснон инкса Грантонь получайсь.
Олеся туф рьвакс. Мирденц Владимир Кустовонь мархта касфтыхть кафта иднят: Арсениень и Даринать. Несколька кизода инголе Кустофне сатозь васенце вастть Рузаевкаса етафтф од семьянь нилеце конкурсса.
Геннадий Канаев няфни цебярь сатфкст спортса, кельгсы уендеманц.
Прасковья Никифоровна мезьса машты лезни рьвянянцты, цёранцты и уноконзонды, уленди мархтост фестивальхнень, пуромкснень эса.
Семейнай ансамбльсна ушедозе кинц 2005 кизоня. Тяни Канаефнень содасазь ламотне. Алексей Геннадьевичень, Людмила Гавриловнань и Олесять пяк мазыхть вайгяльсна. Татьяна морай баянца и музыкальнай лия инструментса. Генаньге цебярь вайгялец. Синь аф весть сяськондсть ламоц фестивальхнень эса.
Катк ули сяда лама тяфтама ансамбльда!
Т.АЛЬШИНА.

04.04.2019 №13
 
 
 

 
НОВОСТИ
 
 
 
 
 
 

Од ломаттненди азонтфоль РФ-нь Конституциять колга

12 декабрьста Мордовия Республикань Государственнай Собранияса ётась пуромкс, кона лемтьфоль Российскяй Федерациянь Конституциять шинцты. Госсобранияв сашендсть Саранск ошень 23№ гимназиянь и Рузаевкань 9№ школань тонафнихне. Тяса теест ётафтфоль экскурсия зданиять эзга, няфтьфоль Госсобраниянь музейсь, азонтфоль закононь нолни органть работанц колга. Тяда меле школьникне пуромкшнесть Оцю залса, коса синь мархтост васетькшнесь МР-нь Госсобраниять Председателец, «Единая Россия» партиять Мордовскяй региональнай отделениянц Секретарец В.В.Чибиркин. Владимир Васильевич пачфтсь од ломаттненди кода и мезенди примафоль Конституциясь, азондсь республикаса властень системать колга.

—Странаньконь фкя инь васенце законоц—Конституциясь примафоль аф тёждя пингста синцень странань эряйхнень мяльснон коряс,—азозе В.В.Чибиркин.—Эсонза кемокстафт ломанть праванза и воляшинза.

 

Российскяй Федерациянь Конституциясь примафоль 1993 кизоня. Тядде теенза топодсь 25 киза.

 

В.В.Чибиркин кошардозень од ломаттнень улемс эсь странань афкуксонь гражданинкс, кельгомс шачема масторснон. Тинь эздонт, мярьгсь Владимир Васильевич, ащи Россиять сай пингоц.

 

Сяда тов Российскяй Федерациянь Конституциять колга лекция школань тонафнихненди лувсь «Молодая гвардия «Единой России» ВОО-ть МРО-ц вятиенц тевонзон тиендисна И.А.Заугольнов.

 

О.ЕВДОКИМОВА.

 

 

 

13.12.2019
 
 
 
 

 

 

Яндекс.Метрика Яндекс цитирования Rambler's Top100
Учредительхие:
Главнай редакторсь: И. С. Лушкин