Поиск по сайту: 
 

Архив
 январь 
 2020 
пн вт ср чт пт сб вс
  12345
6789101112
13141516171819
20212223242526
2728293031  

 
 

 

Здоровье

СОДАСТЬ!

Мазь остеохондрозда
Тя мазть анокламанкса эрявкстыхть можжевельниконь салмокст, лавровай лопат и 100 грамма скалвай.
Кофемолкаса яжамс башка лавровай лопатнень и можжевельниконь салмокснень. 6 чайнай куцюнят лавровай лопаста аноклаф порошокть шовордамс 1 чайнай куцюня можжевельниконь салмоксста порошокть мархта и каямс тя шоряфксти ляпоптьф скалвайть. Аноклаф мазть мархта вадендемс сяряди вастть.
 
Осалкс  улемась  кальдяв сире  ломаттненди
Осалшись сире ломаттненди аф ладяй, сон срхкафтсы Альцгеймеронь урманц, лиякс мярьгомс, еньфтомошить.
Врачне мярьгондихть осалгодомс ся ломаттненди, кие вельф эчке, гипертониять и диабетть эзда араламанкса. Ученайхне мярьгондихть: кальдяв аф аньцек вельф эчкокс, но и осалкс улемась. Содаф, осал аватне сяда сидеста сярятькшнихть остеопорозса. А стане жа осалшись срхкафтсы еньфтомошить. Ученайхне музь  емла сталмоть и пря уйса амилоиднай бляшкатнень кочкавомаснон еткса сотксть, кона эвондафнесы Альцгеймеронь урманц.
Сяс специалисттне мярьгондихть атказамс диетатнень эзда, а сяда лама якамс, работамс. А осал сире ломаттненди мярьгондеви аф ламняда эчкомомс.
 
Лезды бананць
Оцюфненди и ёмлатненди козда лезды кенерьф бананць. Аф пяк оцю бананть ляпоптемс ямнякс, каямс лангозонза лакай ведь и симондемс венц лангс псиста, ёмла копорксонь 3 шит.
Симондемс аньцек венц лангс, васта лангса ащезь, бананти улема пяк и пяк кенерьфокс.
Иттненди дозась кирьфтама и  варжама, штоба лофцсь улель аф пяк пси.
И нинге: кда пильгсонт оцю сурхнень ваксса касыхть пакарнят, шобдава вадендесть синь вачедонь сельгса. Сргоземок, вадемс синь и аньцек тяда меле стямс. Штоба аф юкстамс, кроватентень видес петфтада «сельге» вал мархта аф оцю каготкя.
тикла мархта ямксонь ямсь пчкафты
Кда  семьясонк киньге сярятькснесь кержи бокоц, бабазе пицекшнесь тяфтама ям. Сявондсь стакан штаф ямкс, кайсесь лангозост 2 литрат ведь, 1 стакан шоваф тикла и путнезе пянакуду. Анок ямть аф ламода салыяфнезе и шорсесь эзонза чайнай куцюня постнай вай. Сярядись ярхцсесь эздонза илять колма недяляньберьф. Сярятьфсь сетьмосесь. Но кемонь шида меле бабазе тага пицесь тяфтама ям, и тага сярядись колма недялят ярхцсесь эздонза, хуш кодамовок сярятьф ашель ни.
Мяляфтса, тяфтама ямса пчксесь Ваня щенязе, мзярда урмаськоткшнесь сонь поджелудочнаец. Мес мяляфтса? Сяс, мес эрь илядня учендонь, што щенязе аф сивсы ямть, и сон ляды тейне.  Ямсь пяк танцтиель! Эняльдемс бабазти пидемс сяда лама ям ашезь сатне смелшизе. Ся кизоня тиклань урожайсь кальдяволь, и сонь ванфнезь сярядихненди.
В.Карпова.

04.04.2019 №13
 
 
 

 
НОВОСТИ
 
 
 
 
 
 

Од ломаттненди азонтфоль РФ-нь Конституциять колга

12 декабрьста Мордовия Республикань Государственнай Собранияса ётась пуромкс, кона лемтьфоль Российскяй Федерациянь Конституциять шинцты. Госсобранияв сашендсть Саранск ошень 23№ гимназиянь и Рузаевкань 9№ школань тонафнихне. Тяса теест ётафтфоль экскурсия зданиять эзга, няфтьфоль Госсобраниянь музейсь, азонтфоль закононь нолни органть работанц колга. Тяда меле школьникне пуромкшнесть Оцю залса, коса синь мархтост васетькшнесь МР-нь Госсобраниять Председателец, «Единая Россия» партиять Мордовскяй региональнай отделениянц Секретарец В.В.Чибиркин. Владимир Васильевич пачфтсь од ломаттненди кода и мезенди примафоль Конституциясь, азондсь республикаса властень системать колга.

—Странаньконь фкя инь васенце законоц—Конституциясь примафоль аф тёждя пингста синцень странань эряйхнень мяльснон коряс,—азозе В.В.Чибиркин.—Эсонза кемокстафт ломанть праванза и воляшинза.

 

Российскяй Федерациянь Конституциясь примафоль 1993 кизоня. Тядде теенза топодсь 25 киза.

 

В.В.Чибиркин кошардозень од ломаттнень улемс эсь странань афкуксонь гражданинкс, кельгомс шачема масторснон. Тинь эздонт, мярьгсь Владимир Васильевич, ащи Россиять сай пингоц.

 

Сяда тов Российскяй Федерациянь Конституциять колга лекция школань тонафнихненди лувсь «Молодая гвардия «Единой России» ВОО-ть МРО-ц вятиенц тевонзон тиендисна И.А.Заугольнов.

 

О.ЕВДОКИМОВА.

 

 

 

13.12.2019
 
 
 
 

 

 

Яндекс.Метрика Яндекс цитирования Rambler's Top100
Учредительхие:
Главнай редакторсь: И. С. Лушкин