Поиск по сайту: 
 

Архив
 январь 
 2020 
пн вт ср чт пт сб вс
  12345
6789101112
13141516171819
20212223242526
2728293031  

 
 

 

Юмор и сатира

ЭХИ ВАСЬКАФТОВОНЬ

Тячи 1 апрельсь. Рахсек и васькафнек кинь-повсь клдомазт лихоень арамс. Тянкса тейть кивок туркс валня аф азы. Тяфтамка ни тячи шись. Финцне сонь ётафтсазь хи-хи-хиса да ха-ха-хаса, а омбонцне ламос кармайхть сюдомонза. Вов монць. Шобдава ашень кенере галош пильге лапанень нолдамс койкать лангста, маряйне бабазень вайгяленц:
—Сашендсь домкомсь. Мярьгсь, штоба лиселеть тротуарть лангста эень чистендама. Кудстонк сембе алятне лисихть.
Мон варжакстонь вальмава. Ушеса горняйхть шудерькст. Тундась блдорды. А нява сонць домкомсь, Филипп Иванович. Шинять каршеса нозы «сявань пильгта».
Ломса и каймоса покодемазень аф кельгса. Мзярда бабазе кучсемань тяфтама тевс, старандань атказакшнемс. То мярьгондень пексон мезе-бди жольдерди, то тушендонь «производственнай совещанияс». А тячи... няк сонць домкомсь тернесь. Мезьге аф тият, сави лисемс. А то сяконь пельхть, сатирическяй стенгазетав поват.
Аф лама пингта меле пок-пок ни лазондонь эень пакшт. Сяка тев ширем сельмот варжакснень домкомть шири. А сон пухиесь, бта мезьге ашезь маря.
Копорьган шудерьксокс шудесь ливозсь. Эздон мольсь туста шиньф. А мон лазондонь и ёрянь эйхть.
—Тон, Будкин, молодецат... Мон ёрань тердемс тонь, а тон, няйсак, тонць, апак кошартт...
Монь бта кельме ошксса лоськафтомазь.
—Ся кода стане? Васькафтомазь?!
—Э-э.., браткяй, да тонь, няйса, шобдавакиге кати-кие эждензе. Эрь, и пяк лац тисть...
—Тьфу!—сельгонь мон и вткофтыне ломнень-каймонень куд ужети. А кенкш лангса бабазе ктор-ктор... Кле, ваток пидихтень, счетсь 1:0.
Тяфтама тевда меле завтраксь марявсь танцтиста. А сяльде тунь конторав. Тяса работан бухгалтеркс. Аньцек лонтядень шразень ваксс, дррь!—телефонць. Сявине трубкать:
—Бухгалтерия?—марявсь тоста эчке вайгяль.—Будкин ялгась, ревизорхне нинге ширезт ашесть пачкоде?
Вай, тядякай-авакай! Ревизорхт! А монь шрасон   документтне шееронь пизокс тапаряфт. Ну и повонь!
Шразень лангс таргань кептерьшка кагод. Кжфозе. Няелесте, кода вишкста кфтолдыхть сурне. Калтыесть щётонь пакарнятне. Обедта мелес урафтонь прянь апак кепсек, а сяльде тёждяста таргайне ваймозень. Тяни катк сай ревизор хуш Африкаста. Мезьге кальдяв аф муй. Аф пелян!
Учень, мзярда читоргоды кенкшсь... Но ревизорхне ашесть эряскода. И вдруг, мзярда няине ингольден календарень листкять, рахазевонь: «1 апрель! Эхи таяфтфан! Тяшкава васькафтомазь. Оду тевсна аф лиси...»
Тага цингоргодсь телефонозе.
—Алло!—кулевсь кашкомф вайгяль.—Будкин, сувака ширезон.
—Тя кие корхтайсь?
—Директорсь, Папкин.
—Ах, Паапкин,—пшкядень.—Директорозень вайгяленц содаса. Папкинонь корхтамста стенатневок трнатыхть. Рнай. Не-ет, аф васькафтован.
—Сувак, мярьгонь!
—А кушмань корянь аф эряви?
—Мезе? Мезе?!
—Кургозт тяльхця! Кда эряван, сак сей тонць. Ишь, мувсь баярсь. Па-апкин...
Аньцек путыне трубкать, телефонць тага—цингорк.
—Будкин, сувак ширезон.
—Тя тага «Папкин»? Содак, ялгай, видексонь Папкинць тяфта сетьмоняста корхнема аф машты.
—А кода сон корхни?
—Пинекс рнай. Сонь эздонза пелихть кода толда. Сон зверь—аф ломань. Лияста стакащемда сяшкава уватанза, недяляшка кармайхть цинняма пилетне. А тон...—тш-тш-тш. Маштомс эряви васькафнема.
Проводть тона песа кжнамась лоткась. А пингонь ётазь кие-бди кяжда норхцадезе бухгалтериянь кенкшть! Сонць Папкин... Кргац сотнеф.
—Аде ширезон,—мярьгсь сон кашкомф вайгяльса. Мон эрязста—мельганза. Озась Папкин шранц ваксс, сетьмоняста кизефтсь:
—Азка, ялгай, кие зверсь, кие барбоссь?..
М.МОИСЕЕВ.

04.04.2019 №13
 
 
 

 
НОВОСТИ
 
 
 
 
 
 

Од ломаттненди азонтфоль РФ-нь Конституциять колга

12 декабрьста Мордовия Республикань Государственнай Собранияса ётась пуромкс, кона лемтьфоль Российскяй Федерациянь Конституциять шинцты. Госсобранияв сашендсть Саранск ошень 23№ гимназиянь и Рузаевкань 9№ школань тонафнихне. Тяса теест ётафтфоль экскурсия зданиять эзга, няфтьфоль Госсобраниянь музейсь, азонтфоль закононь нолни органть работанц колга. Тяда меле школьникне пуромкшнесть Оцю залса, коса синь мархтост васетькшнесь МР-нь Госсобраниять Председателец, «Единая Россия» партиять Мордовскяй региональнай отделениянц Секретарец В.В.Чибиркин. Владимир Васильевич пачфтсь од ломаттненди кода и мезенди примафоль Конституциясь, азондсь республикаса властень системать колга.

—Странаньконь фкя инь васенце законоц—Конституциясь примафоль аф тёждя пингста синцень странань эряйхнень мяльснон коряс,—азозе В.В.Чибиркин.—Эсонза кемокстафт ломанть праванза и воляшинза.

 

Российскяй Федерациянь Конституциясь примафоль 1993 кизоня. Тядде теенза топодсь 25 киза.

 

В.В.Чибиркин кошардозень од ломаттнень улемс эсь странань афкуксонь гражданинкс, кельгомс шачема масторснон. Тинь эздонт, мярьгсь Владимир Васильевич, ащи Россиять сай пингоц.

 

Сяда тов Российскяй Федерациянь Конституциять колга лекция школань тонафнихненди лувсь «Молодая гвардия «Единой России» ВОО-ть МРО-ц вятиенц тевонзон тиендисна И.А.Заугольнов.

 

О.ЕВДОКИМОВА.

 

 

 

13.12.2019
 
 
 
 

 

 

Яндекс.Метрика Яндекс цитирования Rambler's Top100
Учредительхие:
Главнай редакторсь: И. С. Лушкин