МОРДОВСКЯЙ ГОСУНИВЕРСИТЕТСА ПАНЧФ УЧЕБНО-НАУЧНАЙ ЛАБОРАТОРИЯ

2 апрельста Мордовиянь Оцюнясь В.Д.Волков ульсь Н.П.Огаревонь лемса      МГУ-са, коса ванозе лекарственнай средствань технологиянь учебно-научнай лабораториять и корхнесь од ученайхнень и студенттнень мархта.
Лекарственнай средствань технологиянь учебно-научнай лабораториясь панчфоль Физикань и химиянь институтть видеса 2019 кизоня университетть и «Биохимик» АО-ть марстонь вийса. Тянкса нолдафоль пцтай 4 миллиотт цалковай (фкя миллион цалковайсь—предприятиять). Лабораториясь козякофтф тяниень пингонь оборудованияса, кона максси возможность етафнемс аф аньцек учебнай занятият, но и фармацевтическяй субстанциятнень и анок лекарственнай форматнень технологияснон анокламанц коряс научнай исследованият. Лабораторияса студенттненди ули кода пяшкодемс лекарственнай препараттнень производстваснон действующай веществать синтезонц эзда сявомок анок продукцияти молемс. Лиякс мярьгомс, тевса варчсесазь университетса получаф содамошитнень.
Кода мярьгсь В.Д.Волков, лабораториясь лезды касфтомс студенттнень содамошиснон, маштомошиснон. Тонафнемать шумордамда меле синь сайхть «Биохимику» работама квалифицированнай специалистокс. Васенце выпускникне тядде ни аськолдайхть производственнай площадкать порогонц вельф.
Мордовиянь Оцюнясь  корхнесь Медицинскяй институтонь васенце курсонь студенттнень мархта, конат учебно-лабораторнай комплексть видеса тонафнесазь химиять. Кода содавсь, од стирьхне-цератне сафт ламоц региоттнень эзда—Самарскяй, Саратовскяй, Брянскяй, Пензенскяй, Нижегородскяй областьста.
Азфоль, што Физикань и химиянь институтонь учебно-лабораторнай комплексса кармайхть етафневома занятият университетскяй лицеень, кона арьсекшневи панжемс тонафнемань од кизоня, ученикненди.
Лабораториять ваномда меле республикань Оцюнясь васетькшнесь од ученайхнень мархта. Кепотьфоль-ванфоль лама кизефкс, конат сотфт Н.П.Огаревонь лемса МГУ-ть и республикань промышленнай предприятиятнень марстонь работаснон виияфнеманц, а стане жа од антибиотикнень синтезснон тонафнеманц коряс проектть эряфс етафтоманц мархта.
—Пяшксе циклань тяниень пингонь инь од антибиотикнень анокламасна—тя минь путксоньке странать лекарственнай безопасностенц  кемокснеманцты,—мярьгсь В.Д.Волков.—Проектсь решандасыне импортонь полафнемань задачатнень и кирьфтасы лекарствань омба масторонь производительхнень эзда ащемать.
Васедемать пингста шарфтфоль мяль пищевой промышленностьса антибиотикнень тевс нолнемаснон мархта сотф прябалати.
Стане жа ванфтольхть кой-кодама социальнай кизефксне, конат пичефтьсазь од ученайхнень. Ламошкасна сотфт эряма вастса обеспечендамать, идень шачфтомста ипотечнай кредитть пяльксонц пандоманц, а стане жа идень садса васттнень аф сатнемаснон мархта.
Васедемаса примасть участия МР-нь Правительствать Председателенц заместителец—промышленностень, наукань и од технологиянь министрсь А.И.Седов, «Промомед Биохимик» компаниянь группать директоронь советонц председателец П.А.Белый, Н.П.Огаревонь лемса МГУ-нь ректорсь С.М.Вдовин.
О.Колединова.