Поиск по сайту: 
 

Архив
 июнь 
 2019 
пн вт ср чт пт сб вс
     12
3456789
10111213141516
17181920212223
24252627282930

 
 

 

Тема дня

Оцю шадот тядде аф учендовихть

Шавшиста, 9 апрельста, Мордовия Республикань Пресс-центраса ётась пресс-конференция, коса примасть участия МР-ть эзга РФ-нь МЧС-нь, республиканскяй аварийно-спасательнай службань представительхне. Корхтамась мольфтевсь тундань шадотненди республикать анокшинц колга.
Кода азозе МР-ть эзга РФ-нь МЧС-нь главнай управлениянь ведень       объекттнень лангса ломаттнень безопасностьснон коряс отделть начальникоц А.В.Романов, тундань шадотне тядде пелькс аф эвондафнихть. Эйсь пцтай сембе ляйхнень лангса солась ни, ведсь эсост кеподсь аньцек аф ламода. Пелькс вастокс мзярс лядондыхть эрьхкне и пруттне, сяс мес синь лангсост нинге ванфневи шуваня эйсь.
—Республикань райоттнень администрацияснонды мярькф примамс эрявикс мерат эйть лангс аф лисендеманкса,—азозе А.В.Романов.—Но, аф ваномок тянь лангс, зиян сякокс лиссь. Зубово-Полянскяй районца ведь мархта карафс ваясь 53 кизоса аля. Тевть коряс мольфтеви следствия.
Кода азфоль, меля тяка пингти ведти ваясть колма ломатть. А сембоц апрель ковста ётай кизоть ваясть 9 ломатть.
Кода пачфтьфоль пуромксса, шадотнень пингста чрезвычайнай ситуациятнень аф нолдаманкса анокт сембе вийхне и средстватне. Тяфта, кда эрявксты, ведень объекттнень лангс анокт лисемс республиканскяй аварийно-спасательнай службань личнай составонь 45 ломань, 3 единицат стака техника, 5 единицат специальнай техника, 15 лодка, конат арьсефт аф аньцек ломанень, но и жуватань ётафтоманкса.
—Ведень объекттнень маласа шинек-венек ащихть патрульхть,—азозе республиканскяй аварийно-спасательнай службать начальникоц В.И.Ахремкин.—Ётафневихть профилактическяй корхнемат калонь кунцихнень мархта, конат лисендихть шуваня эйть лангс, ванови низководнай сеттнень мельге, конат вайсесть ведть потмос тяда ингольдень кизотнень, васендакиге Зубово-Полянскяй, Ковылкинскяй, Краснослободскяй райоттнень эса.
Меколи азфоль, хуш ловть ламошкац солась ни, сетьмосемс нинге рана. Вдь ляйхнень, эрьхкнень эса ведть касоманцты вятихть и пизепне, кода тя ульсь 2012 кизоня.
О.ЕВДОКИМОВА.

11.04.2019 №14
 
 
 

 
НОВОСТИ
 
 

Исавелети—300 киза

Эрь кизоня Тройцянь шиня Инсарскяй райононь Исавели кочксеви лама ломаньда. Тядде тяза сашендсь кафта тежянть малава инжи странать сембе уженястонза: Москуста, Санкт-Петербургста, Самараста, Краснодарста, Коми Республикаста, лия областтнень и республикатнень эзда.
Тядде вели ломаттнень пуроптозень аф аньцек Тройцясь, ня шитнень Исавелети топодсь 300 киза. Велесь козя эсь историянц, коензон, обуцянзон мархта, тяса шачсь лама содаф ломаньда. Нят: ученайсь, писательсь, драматургсь, виднай общественнай деятельсь Г.Я.Меркушкин, Мордовия Республикань Почетнай Гражданинць, Российскяй Федерациянь Президентть видеса финно-угорскяй  нароттнень сембе масторонь конгрессть спецпредставителец Н.И.Меркушкин, медицинскяй наукань докторхне В.А.Базаев и М.Д.Кузьмин, лама лия содаф ломань. Велесь инжихнень васьфтезень эсь мазышинц мархта. Тяса лама од кудта, аф кунара панчфт социальнай центра, идень сад, од ФАП, строяфт спортивнай площадкат, культурань объектт, велеть мазопнесы Шкаень кудсь. Ламонцне илас састь идьснон, унокснон мархта, ломаттне кштисть, морасть, седисна и ваймосна пяшксель кенярдемада. Фкя-фкянь мельге сцена лангста кайгсть поздравленият, илань вятихне   азондсть велеть историянц колга, лятфтазь сятнень лемснон, кит аралазь Родинать вракнень эзда. Лама велеряй фронтста ашесть мрда, максозь эряфснон минь инксонк.
20.06.2019  № 24
 

Минь поздравленияньке

13.06.2019  № 23
 
 
 
 
 

«Рузаевкаса мольфтевихть анокламатне стекольнай заводть панжеманцты»

Мордовиянь Оцюнясь Владимир Волков:
Мордовиянь Оцюнясь Владимир Волков 29 майста ётафтсь рабочай васедема Рузаевскяй райононь руководительть Вячеслав Кормилицынонь мархта. Ванондовсть территориять социально-экономическяй виияфтоманц коряс кизефксне. Тяконь лувксса корхтамась мольфтевсь социальнай объекттнень строямаснонды анокламать колга: Рузаевкаса Паровознай ульцяса 160 вастонди идень садть, Татаронь Пишляса 250 вастонди школать, фельдшерско-акушерскяй пункттнень.
Ванондовсть районца водоснабжениянь и водоотведениянь систематнень одкстоптомаснон, а стане жа «Безопасные и качественные автомобильные дороги» национальнай проектть эряфс ётафтоманц рамкаса китнень строямаснон и петемаснон коряс кизефксне. Тядде, кода отмечазе Вячеслав Кормилицын, петевихть-одкстоптовихть 13 вайгяльбень кувалмоса кит.
06.06.2019  № 22
 

Аделсеви «Мокшень правдати» сёрматфтомась

Эряскодода!
Кельгома ялгат!
2019 кизоть омбоце пяленцты «Мокшень правдати» сёрматфтомать шумордамс ляткшни аньцек кафта недялят.  И ули тячи мяленьке нинге весть азомс нюрьхкяняста: мес именна «Мокшень правда» эряви тинь семьянтенди.
Кода аф ужяль, мокшэрзятнень лувкссна стаки кири. А «Мокшень правдась» семботь тиендьсы сянкса, штоба аф нолдамс тянь. Кода ванфтомс и виияфтомс кяленьконь, культураньконь, аф юкстамс эсь коеньконь-обуцяньконь—вов мезть колга мольфтеви корхтамась сонь лопанянзон эса. Пцтай эрь номерса макссевихть материалхт мокшэрзятнень историяснон, содаф ломаньцнон колга, азонкшневи народоньконь арьсеманзон и пичефксонзон колга.
«Мокшень правдаса» макссевихть медицинскяй темас советт и рекомендацият, советт перень сёронь касфнихненди и жувата мельге якайхненди. Эрь номерса ули юморонь и сатирань уженя, рузонь кяльса печатлакшневихть недялянди ламоц телевизионнай программатне.
«Мокшень правдась» республиканскяй газетатнень эзда фкя инь интереснай и уцез газетась. Сон нльне сяда уцез ламоц «районкатнень» коряс.
Теенза тяшфтемать питнец:
6 ковонди—336 цалковай,
3 ковонди—168 цалковай.
Газетать индексоц П4719.
 Эряскодода почтав. Тоса учихть эсонт. Пингсь содай ётаманц.
06.06.2019  № 22
 

 

 

Яндекс.Метрика Яндекс цитирования Rambler's Top100
Учредительхие:
Главнай редакторсь: И. С. Лушкин