Поиск по сайту: 
 

Архив
 август 
 2020 
пн вт ср чт пт сб вс
     12
3456789
10111213141516
17181920212223
24252627282930
31      

 
 

 

Национальная тематика

Мокшэрзянь народть Всероссийскяй VII съездонцты

Ванфтомс национальнай козяшиньконь
РСФСР-нь и Мордовия Республикань Народнай артисткась Александра Куликова:
—Пингсь моли афи фатят кода. Бта ефси аф кунара минь, мокшень и эрзянь ломаттне, пуромкшнеме народоньконь всероссийскяй васенце съездозонза, а тядде сон етафтови ни сисемцеда. Пяк лама кизефкс ванфоль-кепотьфоль тя пингста, и пяк кеняртьфти, мзярда съездса примаф решениятне етафневихть эряфс. Васенце пуромксоньке, мяляфтса, етнесть пяк оржаста, улендсть нльне сялондомат. А тяни съездста съездс ломаттне мушендыхть фкя-фкянь мархта шарьхкодема, кайгиста юватькшнематне полафневихть пичефтить колга сетьме, деловой корхтамаса.
Ламось, пяк ламось полафтсь эряфсонк. Оцю тефт тифт и тячивок мольфтевихть культураньконь виияфнеманкса. Башка мялезе лоткамс «Шумбрат, Мордовия!» народнай творчествань республиканскяй фестивальть лангс, кона арась народоньконди фкя инь оцю, маласькофты, ялгаксшинь кемокстай илакс. Тякоть ули кода азомс «Волга—река мира» международнай этнокультурнай экспедициять-фестивальть колга, кона эрь кизоня пуропнесыне мастор лангонь разнай уженятнень эзда артисттнень, ученайхнень, журналисттнень.  Мольфтевихть псиста корхтамат сянь колга, кода ванфтомс кяленьконь, культураньконь, коеньконь-иланьконь, мезе тиемс масторть келес сратф мокшетнень и эрзятнень мархта соткснень кемокснеманкса. Мекольцеть коряс эряви азомс, сатф-тиф пяк лама. Республикань представительхне сидеста улендихть лия региоттнень эса, етафневихть васедемат мокшэрзятнень мархта, пуропневихть национальнай илат, фестивальхть. Ширесонк тонафни лия республикань-областень лама од ломань.
Кода артист, мялезе шарфтомс мяль вов мезть лангс. Тейне сидеста сашендови улендемс концерт мархта лия национальнай региоттнень эса. Няендьса, кода ширесост илатнень, фестивальхнень пингста пяк оцю васта макссеви национальнай моротненди, кштиматненди. Миньцонковок, койсон, эрь кодама концерттнень программас сувафнемаль сяда лама мокшэрзянь кштимада-морамада. Кда минь минць аф карматама няфнемонза национальнай культураньконь, вастозонк тянь кивок аф тисы.
 
Н.П.Огаревонь лемса МГУ-нь Историко-социологическяй институтонь философиянь кафедрань профессорсь Н.С.Савкин:
—Аф лама лядонды ся шити, мзярда кяльс коре радняньке тага пуромихть эсь оцю пуромксозост. Моньге оцю мялезе улемс делегатокс съездса, тянкса максонь ни эрявикс заявка. Арьсян, съездса вановихть инь таколфты кизефксне и участникне муйхть кит-ятт кода синь решандамс. Пуромксса максови вал сембонди, кинь ули мялец тянь тиемс. Шарьхкотьф, учитель-делегатсь кеподьсыне  школаса работанц мархта сотф прябалатнень, врачсь—эсь кизефксонзон. Но целайнек, васенце вастти лихтема национальнай шамаликоньконь ванфтоманц. А тянкса тейнек кирдема марса. Тейне удалась примамс участия тяда ингольдень съезттнень эса и лац мяляфтсайне корхнематнень, кле, мокшетне и эрзятне—тя кафта наротт, кайгсть кошардомат явомс фкя-фкянь эзда. Ня корхтайхненди мярьголень варжакстомс историяти, сяда лац ваномс-тонафнемс культураньконь, коеньконь-обуцяньконь, иланьконь. Эсост пяк лама марстоннеда. Кяленьковок ламоса шарфтыхть фкя-фкянди. Мокшесь теждяста шарьхкодьсы эрзякс корхтайть, а эрзясь—мокшеть. Сяс, койсон, аш месть «явфнемс» эсонк кафту, эздонк тяфтаковок ни лядсь аф лама. Тейнек, меколанкт, вешендемат и мушендомат кит-ятт кемокстамс сотксоньконь, марстоньшиньконь. Марса решандакшнемс национальнай ширеть мархта сотф кизефкснень.
О.Евдокимова.

11.04.2019 №14
 
 
 

 
НОВОСТИ

Ушедсь сёронь урядама пингсь

Эрь гектарста ули кочкаф 50 центнер сёра

 

Тяфтама ни велень эряфсь, фкя тевсь полафнесы омбоцеть. Нинге исяк республикань велень хозяйстватнень эса инь оцю мяль шарфневсь и водендафоль лама вий кормань анокламати,  тячи лама вастова кярьмодсть ни сёронь урядамати. Лихтезь паксятнень лангс эсь комбайнаснон и Рузаевскяй райононь «Агросоюз—Левженский» ООО-нь механизаторхне.

 

 

—Сёронь урядама пингти маладоме сембе ширде аноклафста,—азонды хозяйствань вятись, Мордовия Республикань велень хозяйствань Заслуженнай работниксь В.И.Сетин.—Комбайнатне пцтай сембе отт, мяльце касы мархтост работамс. Сёронь урядама пингть синь фалу паксясот, кой-кона участкатне ащихть кемоньшка вайгяльбень вастса и техникась мековасу аш месть панцемс. Марнек сёротне видефтольхть фкя тёжянь гектар лангса. Урожайсь пяк цебярь, эрь гектарста сяфтяма аф ведьгемоньда кржа центнер сёра. Кда кармай цебярь погодась, сембе  ня площаттнень  урядасаськ кафта-колма недяляста.

 

30.07.2020  № 29
 

МОРДОВИЯ РЕСПУБЛИКАНЬ ОЦЮНЯСЬ ВЛАДИМИР ВОЛКОВ ВАНОЗЕНЬ РЕСПУБЛИКАНЬ РАЙОТТНЕНЬ ЭСА СОЦИАЛЬНАЙ ОБЪЕКТТНЕНЬ СТРОЯМАСНОН КОРЯС РАБОТАТНЕНЬ МОЛЬФТЕМАСНОН

Краснослободскяй районца

 

 

24 июльста МР-нь Оцюнясь Владимир Волков ульсь Краснослободскяй районца, коса ванозе, кода мольфтевихть Бобылевские Выселки велеса «Комплексное развитие сельских территорий» программать коряс комплекснай компактнай строямать коряс проектть эряфс ётафтомац.

 

Проектть коряс арьсекшневи строямс спортивнай комплекс и  модань 132 участкаса эряма кутт. Бобылевские Выселки велесь ащи маласа Краснослободск ошти, сяс тя пцтай фкя агломерация.

 

Кода няезе Мордовиянь Оцюнясь, спортивнай сооружениять строямац мольфтеви сембе вийса и нльне графикта инголе. Республикаса тя фкя и сяка спортивнай объектсь, коса фкя вельхкс ала кармай ледовай арена, оцюфненди и иттненди бассейнат, тренажернай и фитнес-залхт. Лама функцияса спортивнай сооружениясь арай межрайоннайкс.

 

Кда сявомс проектть омбоце пяльксонц—комплекснай компактнай застройкать, тячиень шити площадкаса аделсеви газопроводонь и водопроводонь ётафтомась, тиф 1,4 вайгяльбень кувалмоса ки, лядыкс 1,7 вайгяльбесь—сай кизонь планца.

 

Владимир Волков путсь Краснослободскяй районть оцюнянц Алексей Буйновонь инголе задача—сяда виияфтомс аноклаф  территорияса куттнень строямаснон, тяконь лувксса льготнай велень ипотекать вельде.
 

 

 
30.07.2020  № 29
 
 
 
 
 
 
 

ВЛАДИМИР СУШКОВ ВЕШСЬ СЯДА ЭРЕКЛАФТОМС ТЕФНЕНЬ И КЕМОСТА ВАНОМС КАЧЕСТВАТЬ МЕЛЬГЕ

6 июльста Мордовиянь Правительствань члеттнень мархта совещанияса ванондовсть национальнай проекттнень эряфс ётафтомаснон коряс кизефксне. Республикань Правительствать Председателец Владимир Сушков отмечазе, што социальнай ширде важнай кой-кона объекттнень эса заняф аф сатомшка ломаньда и аф марнек нолявихть тевс графикнень ванфтозь работатнень пяшкотькшнеманкса строительнай механизматне.

 

 
Ётай ваймама шитнень региональнай кабминонь премьер-министрсь ванозень Идень республиканскяй клиническяй больницять хирургическяй корпусонц и Республиканскяй онкологическяй диспансерть поликлиническяй отделениянц, конат строявихть «Здравоохранение» нацпроектть рамкаса, строямаснон. Владимир Сушков мярьгсь работамс        объекттнень эса сутканьберьф и кемоста ваномс тиеви работатнень качестваснон мельге. Тяфта жа Правительствать Председателец мярьгсь анокламс уликс онкодиспансерть зданиянц петеманкса сембе документациять. Тядде нацпроектть рамкаса кармайхть одкстоптфт 70 фельдшерско-акушерскяй пункт и фкя врачебнай амбулатория.

 

09.07.2020
 
 

 

 

Яндекс.Метрика Яндекс цитирования Rambler's Top100
Учредительхие:
Главнай редакторсь: И. С. Лушкин