Поиск по сайту: 
 

Архив
 январь 
 2021 
пн вт ср чт пт сб вс
    123
45678910
11121314151617
18192021222324
25262728293031

 
 

 

Люди и дела

Мяляфтови васедема

Лятфнемат Советскяй Союзонь Маршалть С.Ф.Ахромеевонь колга
Кодгемоньда лама киза кирдян соткст массовай информациянь средстватнень мархта (нинге 1957 кизоня ушедсть лисендема публикацияне районнай газетаса). Тняра кизоста удалась васетькшнемс лама ломанень мархта. Кой-кинь колга тяшнень печатнай оргаттненди, а работамок МАССР-нь Гостелерадиокомитетса, пачфнень радиоса. И вов ня шитнень, ванондомок кудонь архивозень, мунь мялень салай сёрматфкс магнитнай плёнка лангса. Тя ульсь Советскяй Союзонь Маршалть С.Ф.Ахромеевонь рьванц и стиренц мархта корхнема 1941-1945 к.к. Военнай и трудовой подвигонь Мемориальнай музейса Саранск ошень журналисттнень мархта васедемать пингста, мзярда синь сашендсть Торбеевскяй району Сергей Фёдоровичень родной велезонза Виндрейса памятниконь панжема (1995 к.)
Памятникть панжемдонза и тянди лемтьф пуромкснень етамдост меле рьвац, Тамара Васильевна, и стирец,  Наталья Сергеевна, корхнесть СМИ-нь представительхнень мархта. Ётксост улень монга.
Тя васедемада меле эфиру лисендсь радиопередача. А тячи сань мяльс анокламс лятфнемань публикация мирдть и алять колга аф интервью лаца, а азондозь.
Кизефксть лангс, мезьста ащесь Сергей Фёдоровичень эряфти кельгомац, Тамара Васильевна отвечась, што   службань 51 кизоста Сергей Федоровичень  ашель фкявок ваймама шиц, фкявок отпускоц, конань пингста сон ваймяль. Валхнень «Инголи арьсек Родинать колга, а меле эсь колгат» сон шарьхкотькшнезень азфть лаца и эряфоньберьф тиендсь аньцек тяфта.  А Родинати, кода сон шарьхкотькшнезе, сувсесть и странась, коса сон эрясь, и народсь, конанди служась, и семьясь, конань кельгозе. А минь, семьяц, ёраськ тиемс семботь, штоба сон лац-ряц работаль. Эряфоньке ащесь  служебнай тевонзон эзда. Сергей Федорович лама работась и васенце вастти путнезе эсь прянц организованнайкс улеманц. Эрь шобдаваня будильникфтома стяшендсь 5 частста 20 минутаста, лисендсь кудть малас и тиендсь зарядка. Сисем пяле мархта частста тушендсь работама, мртцесь кефкие частста.  Шиц содафоль инголенди минутань, сяс сон ванфтозе эсь и лиятнень пингснон.
Семьяса фкя-фкянь мархта сотксонь кирдемать колга получаме  тяфтама ответ: «Кудса ашеме корхне служебнай тефнень колга. И кядьстонза мезевок ашеме кизефне. Нльне службань од вастс ётаманц колга пачфнесь аньцек эста, мзярда сашендсь оборонань министрть приказоц».
Семьять колга и кода синь арасть содафокс Тамара Васильевна азондсь вов мезе: «Минь кафта стиреньке, кафта овоньке. Улихть кафта уноконьке. Фкяти лем максф Сергей Фёдоровичень честьс.
Шачень Мордовскяй   АССР-нь Ардатоваса. Тядязе учительницаль, алязе бухгалтероль. 1931 кизоня синь, штоба поладомс образованиять, етасть эряма Москуву. Эряме радняньконь ширеса. 1933 кизоня тунь школав. Мзярда ушедсь войнась, васенце сентябрьста  классозонк састь аньцек стирнятне. Церанятнень тердезь армияв. Мзярда немецне маладсть Москути, школатне ефси пякстафтольхть. Кемонце классть шумордайне эвакуацияса Горьковскяй областьса.
А тяни Сергей Федоровичень колга. Родс-плямас коре сон крестьяттнень еткста. Шачсь МАССР-нь Торбеевскяй райононь Виндрей велеса. Сисем кизоста сявомок эрясь Москуса. Тядяц явсь алянц эзда и кодамовок лезкс ашезь получсе. Школаса Сергей башка мяль шарфнесь историяти и литературати. А 1940 кизоня комсомольскяй путёвкас коре тусь М.В.Фрунзень лемса Высшай военно-морской училищав».
Сяда тов Тамара Васильевна шарфтсь мяль, што Сергей Фёдоровичень мархта тонафнесть фкя школаса, но сон корязонза кафта класс коре сяда сирель. Но синь кржас содафтольхть, васьфнесть аньцек учкомонь  комсомолонь комитетонь заседаниятнень эса. Несколька киза сон комсомолонь комитетонь секретарель.
Войнась явфтозень Тамарать и Сергеень.
1941 кизось. Сон Фрунзень лемса училищаса, июльста—Прибалтикаса морской и воздушнай десанттнень каршес тюремась, меле—блокадась, ранендамась…
Госпитальса врачсь мярьгсь теенза: «Мяльце эрямс—катк курендамать». Оду сон эряфоньберьф ашезь тарга фкявок папироса. Войнать шумордазе капитанкс, калмамок боевой ламоц ялганзон. А Тамара эвакуацияда меле поступась авиационнай институту. 1948 кизоня сёксенда ардсь илять институтста. И тя ёткть метроса «Библиотека имени Ленина» остановкаса теенза маладсь Ахромеев. Ащесть-тисть, корхнесть. Сяльде ушедсть васетькшнема, а ковда меле рьвяясть.
Войнать шумордамдонза селе Сергей Фёдорович шумордазе Сталинонь лемса  Бронетанковай  войскань  Академиять, направленияс коре кучфоль  Дальняй Востоку. Кемонь кизот эрясть Китайса, Приморьяса, а меле— Белоруссияса, Украинаса, тага Белоруссияса, тага Дальняй Востокса, меколи Москуса.
Тяса сонь путозь Главнай управлениянь начальникокс, а меле Советскяй Союзонь Вооруженнай Виень Генштабонь начальникокс, СССР-нь оборонань министрти васенце заместителькс, СССР-нь Президентти М.Горбачевонди военнай советникокс.
Сергей Фёдорович кой-коста корхнесь, што вестевок ашезь эвондакшне мялец эрямс эряфонц одукс. Куломада сон ашезь пеле. Корхнесь: сембе минь мзярдовок кулотама, тянь эзда кивок аф кяшеви.
Ульсть ломатть, конатнень Сергей Федорович лемнезень учителькс. Нят маршалхне Жуков, Рокоссовский, Конев.
Мзярда арась шарьхкотьф, што войсканьконь Афганистану сувафтомаснон колга решенияти ули кода улемс примафокс, маршалсь Огарков и сонь заместителенза Ахромеев и Варенников тиендсть доклатт Брежневонди, што афганскяй прябалать решандамс военнай ширеть мархта аш кода. Но синь ашезь кулхцонда. Сергей Фёдорович, улемок дисциплинань кельги военнослужащайкс, пяшкотькшнезень вярдень властть приказонзон, тись оцю путкс Афганистанть территорияса войскатнень улемаснон пингста синь боевой анокшиснон кеподемаснонды. Теенза максфоль Советскяй Союзонь Героень лем 1982 кизонь ДРА-са маштозь командовандаманкса. Кизода меле С.Ф.Ахромеевонди максфоль «Маршал Советского Союза» лем.
Мзярда странати вятикс арась Михаил Горбачев, Сергей Фёдорович надиясь, што сон армиять лангс кармай ванома лиякс, но меле шарьхкодезе, што сембось моли Варшавскяй Договорть, Европаса безопасностень марнек системать срадомаснонды. Меле, кадомок Генштабть, сон и Горбачевонди советникокс ламос ашезь работав. Тяштсь отставкас тумать колга несколька рапорт. Семьяса ширенц кирдезь.
Вов мезе лятфни стирец Наталья 1991 кизонь событиятнень колга: «ГКЧП-ть мархта сотрудничествати алязень кивок ашезе кошяря. Сон примась участия работасонза эсь мяленц коряс. Теенза важнайкс ульсь странать араламанц мархта сотф тевсь. 21 августста сон тяштезе: «Катк историяса ляды хуш пильгоки—тяфтама великай государствать юмаманц-араманц каршес ащесть каршек. А историясь няфтьсы—кие муворусь, кие видеть азыец-няфтиец».
24 августста шобдава, мзярда Сергей Фёдорович тусь работама, уноконяц эняльдсь теенза: «Нюряфнемак нюрямса»! Сон  отвечась: «Мрдан работаста—нюряфтте!» Кали кивок арьсесь, што сон туй кулома?
Ётайхть кизот, туй исяконь шити странаньконь поколенияц, кона сяськозе фашизмать. И сай пингонь поколениятне кармайхть лятфнемост странать достойнай церанзон.
А.Давыдов,
Россиянь  Журналистонь союзонь член.

11.04.2019 №14
 
 
 

 
НОВОСТИ
 
 
 
 

РОССИЙСКЯЙ ПЕЧАТЕНЬ ШИТЬ МАРХТА!

Мордовиянь массовай информациянь средствань кельгома работникт! Кельгома ветератт! Седи ваксста поздравляндатядязь тинь профессиональнай праздниконтень—Российскяй печатень шить мархта!

 

Тя шись пуропнесыне марс разнай профессиянь ломаттнень: журналисттнень, редакторхнень, издательхнень, полиграфисттнень, почтань работникнень, печатнай продукциянь  каннихнень—сембонь сятнень, кие эрь шинь трудса тиендьсы минь республиканьконь и сембе странать фкя информационнай пространстванц.

 

Ламошкада тинь работантень вельде Мордовия Республикась тячи—тя стабильнай регион, коса фкя-фкянь мархта ладязь эряйхть лама национальностень и конфессиянь представительхне, лац решандакшневихть экономическяй и социальнай прябалатне, пяшкотькшневихть виияфтомань федеральнай и региональнай программатне. Минь опытоньконь колга эрь шиня корхнихть общероссийскяй уровеньца, тянь мархта ладямок Мордовиять цебярь имидженц кода вииямань оцю потенциал мархта перспективнай территориянь.

 

Инголе минь лама марстонь работадонк промышленностьса, аграрнай секторса, социальнай сфераса. Минь карматама тиендема семботь од производствань и рабочай вастонь тиеманкса, финансовай системать одкстоптоманкса, асу од ломаттнень, конат каннихть польза ёмла родинати, ширеснон кирдеманкса. Тяса пяк важнай сембе ширде ваномась и курокста тевонь тиемась, виде оценкань максомась и региональнай СМИ-тнень позицияснон принципиальностьсна, крхкаста и сембе ширде мольфтеви процессненди и событиятненди сувамась. Надиян марстонь цебярь работать лангс, кона кармай лездома минь родной Мордовияньконь виияфтомаса.

 

 Благодарностень инь лямбе валхт азомат печатень ветераттненди. Информациянь максомань курокстонь пингсь, информациянь пачфтемань каналхне тячиень шить пяк полафтсть и стаки полафнихть сяда тов. Но сякокс отрасляса работань фундаментокс лядондыхть мархтонт ладяф профессионализмань койхне, аф озадонь седихть ащемась, тяштемаса маштомошинте! Арьсян теенть, тинь мала ломанентенди шумбраши, творческяй од сатфкст, благополучия и панчфокс панжема. Российскяй печатень шить мархта!

 

Мордовия Республикань

 

Оцюнять аф лама

 

пингс тевонзон

 

тиендисна А.А.Здунов.

 

15.01.2021  № 1
 
 
 
 

Газетать киц

Кельгома ялгат! Кода ни пачфнеськ, сай кизонь 24 сентябрьста топоди 100 киза ёт Родинаньконь столицаса—Москуса лиссь мокшэрзянь «Якстере теште»  газетать васенце номероц. Тя шись и арась шачема шикс мордовскяй национальнай печатти. Сон ульсь афкукс центральнай газетакс сембе мокшетненди и эрзятненди. Сонь сёрматфнезь-мишендезь Пензенскяй, Тамбовскяй, Самарскяй, Симбирскяй, Саратовскяй, Нижегородскяй и лия губерниятнень эса.
«Якстере тештесь», кона лисендсь мокшень и эрзянь кяльса, тернезень лувихнень кирдемс кеме соткст редакциять мархта, пачфнемс мордовскяй народть тевонзон, арьсеманзон и пичефксонзон колга. Лувихне няйсть эздонза ялга, советонь, содамошинь максси. Сон лезнесь теест тиемс письменностьснон, литератураснон, касфнезе национальнай самосознанияснон.
Честь мархта сяда тов мольфтезе тя тевть «Од веле» газетась, кона  кармась лисендема мокшень кяльса 1924 кизоста сявомок Пензаса. Сон лама тись мокшень кяльть грамматическяй норманзон ладямаса, мордовскяй литературать и искусствать виияфтомаса.
«Од велеть», а сяльде «Мокшень правдать» ламоц воспитанниконза кассть оцю квалификациянь журналистокс и цебярь редакторкс.
Юбилеень карша аш кода аф лятфтамс пара валса газетать редакторонзон, конат кизоста кизос мольфтезь национальнай изданиять тевонц, теенза макссезь сембе эсь содамошиснон, асуснон и седиень псиснон. Нят П.С.Глухов, И.И.Московкин, И.В.Шотин, Л.Е.Бажанов, С.Б.Леонтьев, Н.С.Шестов, Г.А.Игнатьев, П.К.Ежов, П.В.Шавензов, А.Д.Горькин, Ф.С.Руськин, В.М.Сурков, Н.И.Учватов, П.П.Кулешов. Ужяленди, конацка эздост аш ни шиса. Сяс тячи макстама аньцек лятфнемат.
Лятфнихть ингольдень редакторхне
П.Глухов, «Якстере теште» газетать редактороц
«Апак ватт оцю сталмотнень лангс, 1921 кизонь 24 сентябрьста Москуса лиссь «Якстере теште» газетать васенце номероц. Тя ульсь РКП(б)-нь ЦК-ть мордовскяй секциянц органоц. Васенце редакторкс кемокстафоль М.М.Евсеев. Газетать нолямаса активнай участия примсесть Е.С.Окин и Ф.И.Завалишин.
Газетать эрь номеронц оцю мяльса васьфнезь кода эрзянь, стане и мокшень лувихне, и активнайста лездсть теенза.
1925 кизоня, мзярда улень редакторкс ни мон, газетаса оцю мяль шарфневсь литературнай виень пуроптомати. Тейнек васенце произведенияснон тяштезь Ф.Чесноков, И.Кривошеев, Я.Григошин и лиятне. Оцю лезкс макссесь Ф.Завалишин, кона эста работась «Беднота» газетаса.
Мокшэрзянь васенце газетать заслуганза пяк оцюфт. Сонь традициянза, козя опытоц тячемс лезнихть национальнай печатть виияфтоманцты».
И.Шотин, «Од веле» газетать редактороц
«Од веле» газетась ульсь РКП(б)-нь Пензенскяй губкомть и губисполкомть органцна. Сон ушедсь лисендема 1924 кизонь 5 майста. Васенце номерхнень редактировандазень партиянь губкомть мордовскяй секциянц секретарец И.И.Московкин, а сяльде редакторкс путфолень мон. Пяк лездсь газетати асу литературнай редакторсь И.Г.Черапкин, кона тиендезе тя важнай и почётнай тевть куломозонза.
Ся кизотнень Пензав работама кучфтольхть Шишканов, Кузькин, Петербургский и  лия ялгатне, кармасть сашендома тонафнема мокшень  цёрат и стирьхть. Газетать перьф пуроптфтольхть местнай мокшень ломатть. Материалхт ушедсть сашендома губерниять, а стане жа Советскяй Союзть сембе вастонзон эзда, коса эрясть мокшет. Велень    корреспонденттне пачфнесть, кода молихть занятиятне школаса,  лац-аф работайхть изба-читальнятне.
«Од велесь» мольфтсь народть ёткса воспитательнай оцю работа, лездсь касомс мокшень асу ломаттненди—композиторхненди, писательхненди, конатнень моросна, стихсна и рассказсна печатлакшневсть газетать страницанзон эса».
Н.Шестов, «Мокшень правдать» редактороц
«Мокшень правдаса» редакторкс кармань работама 1934 кизоня. Ся кизоня Мордовскяй автономнай областсь тифоль автономнай республикакс. Мокшэрзятненди тя ульсь пефтома кенярдемакс.
Пароль сявок, што колхозс пуроптфтольхть крестьянскяй хозяйстватнень 65 процентсна, тифоль 27 МТС и 45 совхоз. Оцю населениять грамотностец пачфтьфоль 90 процентти, аноклафоль всеобщай начальнай образованияти ётамась.
Шарьхкодеви, што сембе ня кизефкснень вакска ашезь ётне  и «Мокшень правдась». Но сембода оцю мяль шарфнеме мокшень велеть культуранц кеподеманцты. Клупнень, изба-читальнятнень, медпункттнень, школатнень работаснон колга корреспонденцият можналь няемс газетать эрь номерсонза».
10.12.2020  № 48
 

«Бизнес-сообществать мархта васедематне кармайхть ётафневома сидеста»

7 декабрьста Мордовия Республикань Оцюнять аф лама пингс тевонзон тиендисна Артём Здунов васетькшнесь предпринимательскяй сферань представительхнень мархта. Корхтамась мольфтевсь ся кизефкснень коряс, конат пичефтьсазь бизнес-сообществать. Предпринимательхне азондозь Мордовиянь вятити прябалатнень, конат эвондакшнихть эпидемическяй условиятнень пингста работамста. Кой-кона кизефксне кармайхть ванондовома коронавируснай инфекциять келемоманц инголдаманц коряс оперативнай штабть маластонь заседаниясонза.
Артём Здунов китькстазе, што тяфтама васедематне кармайхть ётафневома сидеста, а тячиень повесткась аноклафоль синцень участникнень мархта. Лама корхтафоль тяниень пингонь противоэпидемическяй ограничениянь условиятнень пингста предпринимательхнень работаснон колга.
«Талина» компаниянь группать президентоц, промышленниконь и предпринимателень Российскяй союзонь региональнай отделениять и работодателень Мордовскяй объединениять председателец Виктор Бирюков азозень эсь мялензон-арьсеманзон общественнай объединениятнень рольснон касфтомаснон коряс, конат няфнесазь министерстватнень и ведомстватнень видеса бизнес-сообществать интересонзон.
«Ламоц кизефкснень ули кода решандамс ведомственнай уровеньца, кда тя аф лисенди, эста—системась аф работай»,—китькстазе Артём Здунов.
Стане жа примаф предложения аноклакшнемс региональнай бизнес-сообществань представительхнень рейтингснон. Рейтингть тиемста мяльс сявови предприятияса пандови заработнай платась, вииякшнеманкса нолдаф инвестициятне и налоговай пандоматне. «Тейнек эряви содамс, кие канды ярмакт республикав, а кие Мордовияста лихнесыне синь. Кие панды цебярь зарплата, а кие аф. Тя кармай честнайста»,—мярьгсь региононь вятись.
Тяда башка, васедемаса корхтафоль сянь колга, кода кармай работама Од кизонь илатнень пингста питаниянь сферась. Стане жа корхтамась мольфтевсь Роспотребнадзорть и лия контрольно-надзорнай ведомстватнень мархта марстонь работать, илань карша ваймама шинь ярмаркатнень ётафтомаснон колга.
10.12.2020  № 48
 

 

 

Яндекс.Метрика Яндекс цитирования Rambler's Top100
Учредительхие:
Главнай редакторсь: И. С. Лушкин