Поиск по сайту: 
 

Архив
 август 
 2020 
пн вт ср чт пт сб вс
     12
3456789
10111213141516
17181920212223
24252627282930
31      

 
 

 

Здоровье

Лувись—лувити

Козда—медень цюкорнят
Монь кафта шабадон. Фкясь якай идень саду, омбоцесь тядде ушедсь якама школав. Кда конацка ушеды козома, эстокиге тиендян медень цюкорнят. Эряви ведень баняса мельцек-мельцек каязь шорсемс 1 столовай куцювонь медь, коське горчица, водка, постнай вай и тозер почф. Лисьф шапакссь явома кафта пяльксова. Пялькснень башка путомат пищевой пленка лангс. Цюкорнятне вельхтямат кафтонь-крда ладяф бинтса. Ня цюкорнятне цютькада люпштамат, путомат  бинткя ширде шабать мяштенц и копоренц вярде пяльксонц лангс. Штоба цюкорнятне афольхть пра, сотнесайне синь нуласа шабать перьф кресонь крес. Лямбоста вельхтязь шабать матотфнеса.
М.Златникова.
 
Сузокстомада—чесноконь вай
Мялезе азондомс кода лездомс ефси емла шабатненди сузокстомать пингста. Эждема 30 минута ведень баняса 50 миллитра оливковай вай. Тя вайти каяма мелкайста керсеф чесноконь 3 пейнят. Чеснок мархта вайсь кирдема фкя ши. Кодак шабать ушедсь сузокстомась, эвондасть урмать васенце признаконза, эряви кафксть-колмоксть шити вадендемс шалхка потмонц чесноконь вайса. Тя вайсь пара нолямс тевс, мзярда моли кельмофтевомань урмаса сярядемань пингсь, штоба афоль педе шабати кодамовок вирус.
Д.Иванова.
 
Цилькне бта и ашельхть
Пялевеста (пяле ковть пингста)  лисема ульцяв, начфтомат цилькнень шуди ведяла (кранть ала), ковть лангс ванозь. Тяда меле киньге мархта аф корхтама, мадома. Монць ашень талакода, кода цилькне юмасть, хуш тяда инголе кодама средства аньцек ашень варчсе—ковть ала начфнине, сяс мес ашень му лия средства, кона лездоль.
Кенярдян, кда советозе киндивок лезды.
Ю.КУЗЬМИНКИНА.
 
Ярхцседа шурьхкада
Шурьхкять ули антибактериальнай оцю виец, тянь колга содайхть сембе. Медь мархта шурьхкянь свежай сокса пчкафнесазь бронхитть и пневмониять, лоткафнесазь вишке козть. Шоваф шурьхкаста компрессне лездыхть пилень урматнень пингста и нльне валхтсазь температурать, кда путнемс синь пилькнень лангс. Термообработкать пингста сон аф юмафнесы пчкафты виенц, пидемста аньцек лисихть эфирнай вайхне, конат отвечайхть керы шинеть и таньфонц инкса.
1. Пидеф шурьхкясь лезды сяськомс язватнень и ламос аф пчкафневи керф        васттнень. Эряви пидемс шурьхкять кеднек и путнемс сяряди васттненди снярс, мзярс сярятьфсь аф сетьми.
2. Пидеф шурьхкясь лезды пчкафтомс копнень: шурьхкянь лямбе компрессь  кирнемс копть лангса 20 минута шити.
3. Духовкаса пидеф шурьхкять мархта можна пчкафтомс и геморройть. Шурьхкянь компресснень ули дезинфицирующай вийсна и синь лездыхть кедень ткаттненди вишкста эрекламс.
4. Пидеф шурьхкада эряви сидеста ярхцсемс сембонди, кинь улихть прябаланза верть тустолгодоманц мархта. Инфарктта или инсультта меле мярьгондихть ярхцсемс эрь шиня тяфтама шурьхкада.
5. Пидеф шурьхкясь цебярьгофтсы гипертонияса и атеросклерозса сярядихнень прянь марямаснон. Шурьхкясь лезды аруяфтомс вер саттнень, урядасыне атеросклеротическяй бляшкатнень, перясы кить веронь давлениять касоманцты.
Пидеф шурьхкять анокламанкса кочкада средняй размеронь шурьхкат—синь эсост сембода лама питни микроэлементта. Пидемань пингсь: духовкаса—30-60 минута, микроволновкаса—15 минута, мультиваркаса—30 минута. Пидеф шурьхкясь улеза ляпокс и аф ламода пачк    няевикс.

11.04.2019 №14
 
 
 

 
НОВОСТИ

Ушедсь сёронь урядама пингсь

Эрь гектарста ули кочкаф 50 центнер сёра

 

Тяфтама ни велень эряфсь, фкя тевсь полафнесы омбоцеть. Нинге исяк республикань велень хозяйстватнень эса инь оцю мяль шарфневсь и водендафоль лама вий кормань анокламати,  тячи лама вастова кярьмодсть ни сёронь урядамати. Лихтезь паксятнень лангс эсь комбайнаснон и Рузаевскяй райононь «Агросоюз—Левженский» ООО-нь механизаторхне.

 

 

—Сёронь урядама пингти маладоме сембе ширде аноклафста,—азонды хозяйствань вятись, Мордовия Республикань велень хозяйствань Заслуженнай работниксь В.И.Сетин.—Комбайнатне пцтай сембе отт, мяльце касы мархтост работамс. Сёронь урядама пингть синь фалу паксясот, кой-кона участкатне ащихть кемоньшка вайгяльбень вастса и техникась мековасу аш месть панцемс. Марнек сёротне видефтольхть фкя тёжянь гектар лангса. Урожайсь пяк цебярь, эрь гектарста сяфтяма аф ведьгемоньда кржа центнер сёра. Кда кармай цебярь погодась, сембе  ня площаттнень  урядасаськ кафта-колма недяляста.

 

30.07.2020  № 29
 

МОРДОВИЯ РЕСПУБЛИКАНЬ ОЦЮНЯСЬ ВЛАДИМИР ВОЛКОВ ВАНОЗЕНЬ РЕСПУБЛИКАНЬ РАЙОТТНЕНЬ ЭСА СОЦИАЛЬНАЙ ОБЪЕКТТНЕНЬ СТРОЯМАСНОН КОРЯС РАБОТАТНЕНЬ МОЛЬФТЕМАСНОН

Краснослободскяй районца

 

 

24 июльста МР-нь Оцюнясь Владимир Волков ульсь Краснослободскяй районца, коса ванозе, кода мольфтевихть Бобылевские Выселки велеса «Комплексное развитие сельских территорий» программать коряс комплекснай компактнай строямать коряс проектть эряфс ётафтомац.

 

Проектть коряс арьсекшневи строямс спортивнай комплекс и  модань 132 участкаса эряма кутт. Бобылевские Выселки велесь ащи маласа Краснослободск ошти, сяс тя пцтай фкя агломерация.

 

Кода няезе Мордовиянь Оцюнясь, спортивнай сооружениять строямац мольфтеви сембе вийса и нльне графикта инголе. Республикаса тя фкя и сяка спортивнай объектсь, коса фкя вельхкс ала кармай ледовай арена, оцюфненди и иттненди бассейнат, тренажернай и фитнес-залхт. Лама функцияса спортивнай сооружениясь арай межрайоннайкс.

 

Кда сявомс проектть омбоце пяльксонц—комплекснай компактнай застройкать, тячиень шити площадкаса аделсеви газопроводонь и водопроводонь ётафтомась, тиф 1,4 вайгяльбень кувалмоса ки, лядыкс 1,7 вайгяльбесь—сай кизонь планца.

 

Владимир Волков путсь Краснослободскяй районть оцюнянц Алексей Буйновонь инголе задача—сяда виияфтомс аноклаф  территорияса куттнень строямаснон, тяконь лувксса льготнай велень ипотекать вельде.
 

 

 
30.07.2020  № 29
 
 
 
 
 
 
 

ВЛАДИМИР СУШКОВ ВЕШСЬ СЯДА ЭРЕКЛАФТОМС ТЕФНЕНЬ И КЕМОСТА ВАНОМС КАЧЕСТВАТЬ МЕЛЬГЕ

6 июльста Мордовиянь Правительствань члеттнень мархта совещанияса ванондовсть национальнай проекттнень эряфс ётафтомаснон коряс кизефксне. Республикань Правительствать Председателец Владимир Сушков отмечазе, што социальнай ширде важнай кой-кона объекттнень эса заняф аф сатомшка ломаньда и аф марнек нолявихть тевс графикнень ванфтозь работатнень пяшкотькшнеманкса строительнай механизматне.

 

 
Ётай ваймама шитнень региональнай кабминонь премьер-министрсь ванозень Идень республиканскяй клиническяй больницять хирургическяй корпусонц и Республиканскяй онкологическяй диспансерть поликлиническяй отделениянц, конат строявихть «Здравоохранение» нацпроектть рамкаса, строямаснон. Владимир Сушков мярьгсь работамс        объекттнень эса сутканьберьф и кемоста ваномс тиеви работатнень качестваснон мельге. Тяфта жа Правительствать Председателец мярьгсь анокламс уликс онкодиспансерть зданиянц петеманкса сембе документациять. Тядде нацпроектть рамкаса кармайхть одкстоптфт 70 фельдшерско-акушерскяй пункт и фкя врачебнай амбулатория.

 

09.07.2020
 
 

 

 

Яндекс.Метрика Яндекс цитирования Rambler's Top100
Учредительхие:
Главнай редакторсь: И. С. Лушкин