"МОКШАНОЧКА" КРУЖОКСА ИТТНЕ СОДАФНЕВИХТЬ КОЕНЬКОНЬ-ОБУЦЯНЬКОНЬ МАРХТА

Ковылкино ошень «Светлячок» идень садса башка мяль шарфневи национальнай ширети. Тоса вов ни несколька киза мельцек работай «Мокшаночка» кружоксь, конань вятьсы тевонь содай воспитательсь, мокшавась Любовь Фёдоровна Кельмяшкина.
«Мокшаночка» кружокса иттне содафневихть мокшэрзянь крайть, мокшень кяльть и мокшэрзянь литературать, национальнай койхнень-обуцятнень мархта. Тяфтама занятияс сашендыхть аф аньцек мокшень семьяста, но и лия национальностень шабатне. Мялезост тушенды мокшэрзятнень козя фольклорсна.
Сонць Любовь Фёдоровна шачсь-кассь Ковылкинскяй райононь Порапа мокшень велеса. Нинге шабакс ёрась лемдемс эряфонц иттнень мархта работати. Школада меле поступась Зубово-Полянскяй педагогическяй училищав. Меле ушедсь работама идень садса и заочнайста шумордазе М.Е.Евсевьевонь лемса Мордовскяй государственнай педагогическяй институтть.
«Мокшаночка» кружоконь участникне и сонь вятиец, воспитательсь Любовь Фёдоровна, ётафнихть праздникт. Мзярда аноклакшневи мокшень кяльса пуромкс, нолясазь тевс национальнай щамоньконь-карямоньконь. Ширесост улендихть инжихть. Кепотьксонди, Мордовия Республикань Заслуженнай поэтсь П.В.Алёшина оцю мяльса сашендсь «Светлячок» идень саду «Мазы тундась» праздникти, пачфтсь пуромфненди эсь колганза, лувозень шачема крайть, ёмла родинать колга стихонзон. Шабатне лувсть стихотвореният рузонь и мокшень кяльса, налхксесть мокшэрзянь налхкомаса.
Любовь Фёдоровнань валонзон коряс, синьцост фкявок праздник аф ётни весяла морофтома. Нолявихть тевс содаф композитороньконь, тяконь лувксса и Н.В.Кошелевать, иттненди тяштьф музыкальнай композициянза.
Мазы тундась, Урожаень праздник, Масланцясь, Роштувась, Очижись—ня и лия праздникне ётафневихть Ковылкинань «Светлячок» идень садса. Стирнятне и церанятне содайхть мокшэрзянь аф кржа мора, сидеста морсесазь синь. Мокшень кяльса занятият етафневихть перспективнай планть коряс. Пингстост тонафневихть перень сёротне, ломанень ронгть пяльксонза, семьясь и ламоц лия тематне.
Любовь Фёдоровна содафнесыне иттнень мокшень щапнень-каряпнень мархта. Мокшавати пяк мала сембось, мезсь сотф минценнеть—мокшеннеть мархта. Шабатненди няфнесыне национальнай костюмса някатнень, корхни мархтост мокшэрзянь щапнень колга.
—Шабатне пяк кеняртькшнихть, мзярда щашендсазь мокшень костюпнень. Тияк тонафтсайне, кода азовихть мокшекс тяфтама щамть пяльксонза: панар, сапоня, кямот, руця, каркс, сёкт,—азозе «Светлячок» идень садонь воспитательсь.
Кода няйсаськ, Ковылкинань «Светлячок» идень садонь «Мокшаночка» кружокть ули кода путомс кепотьксонди лиятненди.
Т.АЛЬШИНА.