Поиск по сайту: 
 

Архив
 январь 
 2020 
пн вт ср чт пт сб вс
  12345
6789101112
13141516171819
20212223242526
2728293031  

 
 

 

Юмор и сатира

ОРЖА СЕЛЬМЕ БАБА


 
Стирь да цёра скомняня
                             лангс озасть,
         Озасть ёфси фкя-фкянь
                                        малас.
Агра баба няезень синь—
                                    паласть.
Цёрась—кати-кие,
Стирсь—Ульяна щакать Розац.
Шобдаль.
Аньцек менельса фкя тяштель,
Сявок кати-мес аф валдоль.
Агра эздост маланяти кяшфоль.
Паласть мес,
Сонь седиец пяк сялговсь.
Розанянь лангс кяжиясь сон
                                      тянкса,
Колганза аф пара мяльса арьсесь:
Сон исяк вдь тяка скомнять
                                       лангса
Симкин Федянь мархта палсесь.
Агра няезень аф ичкозде синь
                                     парста,
Сельмонза сонь оржадонга
                                       оржат.
Тяни Роза палсесь лиянь мархта.
Азосте тинь, кали тяфта
                                      можна?
Симкин Коля Агранди цють
                                        радня,
Пялост бабась кой-коста и якси.
Инксонза сяс теенза досадна.
Обжамс цёрать киндивок
                                 аф макссы.
Кельгом стиренц мархта
                           кати-кие озаф,
Палсесы сонь ёфси апак
                                 кизефтть.
Нярти мес аф вачкодьсак тон,
                                         Роза?
Тя куцьканть эзда эсь пряцень
                                        идек!
Бабась сяда ламос ашезь кирде:
Перяфкаста таргась нарде
                                      байдек.
Арьсесь сон Куцьканти каямс
                                      ирдезс,
Розань ваксста афпарморть
                             тянь айдямс!
Агра бабаньке тянц исце учсе:
Стясь Куцьканць и оду ашезь оза.
Розань эсток сявозе кядьнучкта,
Тусть синь, бабати изь аза, коза.
Агра бабаньке минь кургонц
                                  келептсь,
Наказамс охальниксь изь удала.
Каяль теенза и эста пелель,
Розань оду вестьке афоль пала.
Арьсетяда, Агра тянц юкстазе?
Розань тядянц кядьта весть
                                     кундазе:
—Эх, Ульяна! Эх, Ульяна!
Азка, стирцень мельге мес аф
                                      ванат?
Азондозе, Розанц кие палси,
Федянь кие кельгом стиренц
                                        салси.
—Азк, Ульяна, кали тяфта
                                      можна?
Няине, монь сельмоне пяк оржат.
Кулхцондозе сонь Ульяна щакась,
Кулхцондозе сонь и аньцек
                                       рахась.
Меле корхтась бабати сон апак
                                    пеетть:
—Сирешицень инкса, Агра бабай,
Сюконян мон тееть.
Аньцек арьсек, хуш и сельмотне
                                 пяк оржат,
Цёратнень и стирьхнень мельге
Кали салаване тетьксемс
                         сельмот можна?
Мезевок изь аза бабаньке
                              тянь каршес.
Аньцек арьсесь: валонзон Ульяна
                                       щакась
Исцень шарьхкодь.
Седиец изь сетьме Агра
                                   бабань,—
Шуфттнень эшксса фкя илядня
                          кяшендсь тага.
Кядьсонза сон кирдезе
Сяка нарде байдекть,
Ёрась варжамс весть хуш
                                  ирдезонц
Ся Куцьканть и айдямс
Розань ваксста педа-пес…
Да исть са синь тячи кати-мес.
Менельбеста кеподсь ковсь
                                       валом,
Туцятне тусть кати-коза
                                    мельцек.
Агра баба цють изь матодов,
И вов—
Стирь да цёра эвондасть сей
Кяденьбецек.
Скомнянять лангс курок кафцьке
                                      озасть.
Бабась элякодсь, нльне сон
                                     озондсь:
Аф Куцьканць ульсь тя, аф Роза.
Ватта! Ватта!
Симкин Федя сась сей
Яксяргова Катянь мархта.
Агра баба аньцек прянц шуказе—
Кали Розань Федяня юкстазе?
Тя спектаклясь Агрань мялезонза
                          афи тушендсь:
Федянь мархта Катявок палсема
                               ни ушедсть.
Агрань пряса вишке ёндолкс
Арьсеманза сей-тов ётнесть:
Месендихть? Вай, месендихть ня
                                     оттне?
Кали афкукс лиссть синь ёньда?
Прянц шуказе нинге Агра бабась,
Шарьхкодемс сон тя
          спектаклять тяряфтсь…
Сёксесь сась,
И Агрань тердезь свадьбас—
Радняц Симкин Коляня рьвяясь.
Кирдезе эсь вакссонза сон
Кельгом Катянц.
Морасть инжихне—
Винаняда синь симдезь.
Агра бабаньге кядьбеда фатязь
И тя свадьбаса сонь
                              кштифтезь.
Анатолий ТЯПАЕВ.

11.04.2019 №14
 
 
 

 
НОВОСТИ
 
 
 
 
 
 

Од ломаттненди азонтфоль РФ-нь Конституциять колга

12 декабрьста Мордовия Республикань Государственнай Собранияса ётась пуромкс, кона лемтьфоль Российскяй Федерациянь Конституциять шинцты. Госсобранияв сашендсть Саранск ошень 23№ гимназиянь и Рузаевкань 9№ школань тонафнихне. Тяса теест ётафтфоль экскурсия зданиять эзга, няфтьфоль Госсобраниянь музейсь, азонтфоль закононь нолни органть работанц колга. Тяда меле школьникне пуромкшнесть Оцю залса, коса синь мархтост васетькшнесь МР-нь Госсобраниять Председателец, «Единая Россия» партиять Мордовскяй региональнай отделениянц Секретарец В.В.Чибиркин. Владимир Васильевич пачфтсь од ломаттненди кода и мезенди примафоль Конституциясь, азондсь республикаса властень системать колга.

—Странаньконь фкя инь васенце законоц—Конституциясь примафоль аф тёждя пингста синцень странань эряйхнень мяльснон коряс,—азозе В.В.Чибиркин.—Эсонза кемокстафт ломанть праванза и воляшинза.

 

Российскяй Федерациянь Конституциясь примафоль 1993 кизоня. Тядде теенза топодсь 25 киза.

 

В.В.Чибиркин кошардозень од ломаттнень улемс эсь странань афкуксонь гражданинкс, кельгомс шачема масторснон. Тинь эздонт, мярьгсь Владимир Васильевич, ащи Россиять сай пингоц.

 

Сяда тов Российскяй Федерациянь Конституциять колга лекция школань тонафнихненди лувсь «Молодая гвардия «Единой России» ВОО-ть МРО-ц вятиенц тевонзон тиендисна И.А.Заугольнов.

 

О.ЕВДОКИМОВА.

 

 

 

13.12.2019
 
 
 
 

 

 

Яндекс.Метрика Яндекс цитирования Rambler's Top100
Учредительхие:
Главнай редакторсь: И. С. Лушкин