Поиск по сайту: 
 

Архив
 апрель 
 2021 
пн вт ср чт пт сб вс
   1234
567891011
12131415161718
19202122232425
2627282930  

 
 

 

Демография

ВЕТЕ ИДЕНЬ ТЯДЯ

—Тяфтама ломаттнень вельде, кода Анна Дмитриевна, кирди велесь,—корхтай Атюрьевскяй райононь Перевесье велень поселениянь оцюнясь Н.В.Степанов.—Сон кенерькшни и кудонь тевонзон тиемс, и велеть эряфонц эздовок шири мзярдовок аф лядонды. Пшкядят, сембе тевонзон кадсыне, лезды вийс коре. А кудоц фалу пяшксе ломаньда. Оцю семьяц. Финцне сайхть, омбонцне туйхть. Велеряеньке ширденза аф лисендихть. Тяфтама ни Анна Дмитриевна пара вайме ломанць.

 

И видекс, кржа тяни велеса васьфтят тяфтама ломаньда, конат лиянь сярятьфть кульсазь, марясазь и вийс коре лездыхть. И нят аф шава валхт. Тянь колга корхтасть и Н.В.Степанов, и велеряйхне.

 

Шачсь Анна Дмитриевна Атюрьевскяй райононь Потма велеса. Но идькс пингоц, стирень кизонза етасть Шяйгужа велеса. Родителенза, Дмитрий Николаевич и Прасковья Ивановна Шукшиттне, тушендсть эряма Уралу. Анна Дмитриевна кассь щаванц-щятянц, Сиркиттнень видеса. Прасковья Григорьевна и Иван Дмитриевич касфтозь стирнять трудонь кельгикс, сталмода аф пеликс, кулхцондыкс. Нинге шабакс ушедсь хозяйстваса покодема, кудонь тевса лезнема. Школать аделамда меле сявозь Оцядувонь пекарняв покодема. Од тевоц стирнять мялезонзоль, хуш и сон аф теждятнень эздоль. Ниле кизот пидесь-панць велеряйхненди кши. А сяльде солафтозе седиенц Ляце Прянь церась  (тяфта Шяйгужеса мярьгихть Кяшалня (Духонькина) велети)  В.Д.Кабаев.  Налхксть свадьба. Василий Дмитриевич ускозе од рьванц шачема-касома велезонза. Кармасть марса эряма-ащема. Алясь трудендась колхозса трактористокс, постуфокс, кладовщикокс. Шнама ломанель велеса, районца. А мзяра казне получась лац покодеманкса. Эздонза вестевок ашезь лядонда и Анна Дмитриевна. Сон покодсь фермаса свинаркакс, дояркакс, пидесь-панць столовайса. И эрь вастса сафнезе. Шнакшнезь оцюнятне. Сатнесь аф емла сатфкст аф теждя тевсонза.

 

Кабаефнень фалу оцюволь семьясна. Анна Дмитриевна шачфтсь и касфтсь вете итть. Тяда башка, мархтост эрясь авозец. И сембонди мокшавать сатнесь пингоц, кельгомац. А мзярда иденза кассть, лядсть миртть-рьват кафонест, эряма сявозь Шяйгужа велень эряфкшу бабанять М.П.Кижеваткинать. Сон аф Анна Дмитриевнанди, аф Василий Дмитриевиченди аф радня. Ужяльдезь сиренять.

 

—Мзярда сявоськ пялонк эряма Марякать, эста теенза ульсь ни 86 киза,—азозе мокшавась.—Эрясь шава кудса. А ськамот эрямась, прянь пичефтемась, тевонь якафтомась, шарьхкотьф, стака.

 

—А сонцень иденза што ли ашельхть?

 

—Кода ашельхть. Москуса церацоль. Ладясть, васьфнесть, гайфнесть фкя-фкянди. Кодама эздонза Москувонь эряй, кда сембе эряфонц етафтозе велеса. Аньцек шорсема, машнефнема. А велеса ни тага кода аф кода. Ломанень эряфсь аф сяшкава ни кувака. Ну, мярьгонь, эряй бабанясь нинге колмошка кизоня. А эрясь мянь кемонь. Кулось 96 кизоса.

 

И тянкса оцю спасиба Анна Дмитриевнанди. Тяфта ломаттне эсь тядяснон мельге аф якайхть, кода сон варжась Мария Павловнань мельге. И симтьфоль-антфоль, и муськфоль-шовафоль. А конашкава кельгозь мокшавать иденза. Сайхть ошста, ускихть гостинецт, каванясазь сиренять. Ашель фкявок кальдяв валнясна. Ужяльдезь, кельгозь кода родной ломанень.

 

Анна Дмитриевнань колма стиренза, кафта церанза. Сембе эсь лацонза трудонь кельги, шнама ломатть. Василий Васильевич эряй Явас поселкаса, покоди УФСИН-ца. Ульсь Чечняса. Светлана Васильевна эряй Архангельскяй областьса, стане жа покоди УФСИН-нь системаса. Нина Васильевна эряй Саранскяйса, медицинскяй образованияц, трудендай садикса. Галина и Дмитрий—Москусот. Синцень эряфсна-ащефсна, кельгома тевсна. Кабаефнень сисем уноксна, конатнень пяк кельгсазь. Шачема кудсна, родной велесна теест—святой васта. Кить куду мяляфтсазь фалу. Анна Дмитриевна шнасыне идензон. Фалу лезнихть, родительснонды мезевок аф ужяльдихть.

 

Ванат Анна Дмитриевнань лангс и кенярди седице. Корхтамонга машты, морамонга машты. Кштимасонга сафтсы. Ушеды морама, аф лоткафтови. Вайгялец мазы, сиянь пайгонякс кайги. Петьсы эрь илать, концертть. Тердьсазь клубу морама, аф атказай. А кда эряви, ялганзон мархта примай участия «Шумбрат, Мордовия!» республиканскяй фестивальса и лия оцю илатнень эса.

 

Да и кудсовок тев потмоса. И перень серот касфты, и жуватат кирди. Эрямс велеса и  ащемс тевфтома, тянь А.Д. Кабаевась аф шарьхкодьсы. Аф ваномок эсь кизонзон лангс, тянемс нинге кодай пикст. Эрь тевсь кядялонза лаказь-лакай. Катк фалу тяфта и ули.

 

И.Вешкин, 

 

«Мокшень  правдать» эсь корреспондентоц.

 

                                                                                Снимкаса: А.Д.Кабаева.

 


18.04.2019 №15
 
 
 

 
НОВОСТИ
 

КИЗОНЬ КОФНЕНЬ ИТТНЕНЬ ВАЙМАМАСНОН И ШУМБРАШИСНОН ПЕТЕМАСНОН ЛАНГС ШАРФТОМА БАШКА МЯЛЬ

7 апрельста МР-нь Оцюнять аф лама пингс тевонзон тиендиснон Артём Здуновонь видеса совещанияса ванондовсть кизонь кофнень иттнень ваймамаснонды лемтьф кизефксне. Региононь руководительсь ётафтф работать мзярс лувондсы аф педа-пес лац-ряц тифокс. Тя важнай направлениясь веши сяда цебярьста аноклама, инь пяк сянь эса, мезсь токсесы досугонь ладямать и иттнень ваймама пингть аралафшиснон обеспечендамаснон.

 

 

 
Кода азозе МР-нь Правительствать Председателенц заместителенц тевонзон тиендисна Галина Лотванова, тядде планц коре кармай работама 337 лагерь, эздост 22-сь стационарнай (санаториятнень базаса), и шитемба улемань 315 лагерь образовательнай организациятнень и социальнай учреждениятнень базаса. Тяконь мархта Галина Лотванова отмечазе, што инголи работай 23 лагерсь тяни республикаса сёлкфт ташта, калада инфраструктураснон инкса, хуш синь ащихть Мордовиять инь мазы вастонзон эса.

 

15.04.2021  № 14
 

МОРДОВИЯНЬ УЧЁНАЙХНЕ ТИСТЬ НАУЧНАЙ ПОДВИГ!

15.04.2021  № 14
 
 
 

ЛОМАТТНЕНЬ ЭРЯФСНОН ЦЕБЯРЬГОФТОМАНКСА

31 мартста Мордовиянь Оцюнять аф лама пингс тевонзон тиендисна Артём Здунов ВКС-нь режимса примась участия МР-нь Промышленностень, наукань и од технологиянь министерствать расширеннай коллегиясонза. Совещанияса примасть участия Россиянь Промышленностень и торговлянь министерствать региональнай промышленнай политикань и проектнай управлениянь Департаментонц директороц Виталий Хоценко, региональнай отраслевой министерствань представительхне, республикань инь оцю производствань вятихне тисть итокт кизоньберьфонь работаснонды.

 

Артём Здунов шарфтсь мяль, што регионца трудса заняфнень нилецекс пялькссна покодихть промышленностьса, тя республикань экономикать флагманонзон эзда фкясь. Мордовиянь Оцюнять аф лама пингс тевонзон тиендисна азозень тематнень, конатнень коряс эряви мольфтемс корхтама коллегиять пингста. Васендакиге тя собственностень и предприятиятнень вятемаснон коряс кизефксне. Эряви содамс, кие ащи выгодань получайкс, кие отвечай трудовой коллектифнень инкса. Прябалакс арси собственностень праватнень кядьста кядьс ламоксть ётнемасна, мезсь шоряй предприятиятненди лац-ряц вииякшнемс.

 

08.04.2021  № 13
 

ЗАСЕДАНИЯСЬ ЛЕМТЬФОЛЬ КОРРУПЦИЯТЬ КАРШЕС ТЕВОНЬ МОЛЬФТЕМАТИ

МР-нь Оцюнять аф лама пингс тевонзон тиендисна Артём Здунов 30 мартста ётафтозе Мордовия Республикаса коррупциять каршес тевонь вятемать коряс Комиссиять заседаниянц. Заседанияса ванондозь 2020 кизоня коррупционнай преступлениятнень мархта сотф ситуациять. МР-ть эзга МВД-ть информациянц коряс, ётай кизоня сембе провоохранительнай оргаттне мусть коррупциять мархта сотф 205 преступления, инь оцю талекасна тиф государственнай властень сфераса и сотф разнай уровенень должностной лицатнень оцю вастса улемста закононь колсемать мархта. Приоритетнай направлениятнень эзда фкясь—национальнай       проекттнень эряфс ётафтомста правонарушениятнень инголдамасна, 2020 кизонь работань итокнень коряс, внутренняй тевонь оргаттнень мархта лихтьф 14 тяфтама преступления, корязост карьхцне лувондовсть 1 миллион цалковайть малава, синь мрдафтфт меки. МР-нь Оцюнять аф лама пингс тевонзон тиендисна азозе, што карьхцнень мрдафтомаснон коряс работась пяк важнай—средстватне улест мрдафтфт экономикати и нолдафт республикать виияфтоманцты.

 

08.04.2021  № 13
 

АРТЁМ ЗДУНОВ АЗСЬ СТРАНАНЬ ПРЕЗИДЕНТТИ РЕГИОТТНЕНЬ ФИНАНСОВАЙ СИСТЕМАСНОН ШУМБРАЛГОФТОМАСНОН КОРЯС ПРЕДЛОЖЕНИЯТ

Россиянь Президентсь Владимир Путин мярьгсь кафта недяляньберьф арьсемс тядде региоттнень дополнительнай финансовай ширень кирдемаснон коряс параметрат, штоба сявомс мяльс тя кизефксть Федеральнай Собранияти сай пингонь посланиясонза. Тянь колга азфоль Правительствань члеттнень мархта совещанияса, кона ётафтовсь 31 мартста.

 

«Федерациянь субъекттнень  финансовай положенияснон минь сембе пингть кирдьсаськ контроль ала,—мярьгсь Владимир Путин.—Мекольдень пингть эряфс ётафтовсь лама мера, штоба кирдемс региоттнень ширеснон и максомс теест эрявикс лезкс—васендакиге, конешна, сявоньдсайне мяльс решениятнень, конат примафтольхть пандемиять пингста». Странань Президентсь лятфтазе, што меля нолдафоль 280 миллиард цалковай прямой дотация и нинге 223 миллиард цалковай специальнай бюджетнай кредитт. «Российскяй экономикать пильге лангс стяфтоманцты тенденциятне нинге аньцек кемокснихть, минь тянь лац содасаськ. Аф сембе субъекттнень эса минь няйсаськ деловой активнайшить касоманц, сяс региоттнень доходнай базасна ламода аф стабильнай. Тянкса мялезе кулемс коллеганень, губернаторхнень эзда регионцнон финансовай состоянияснонды анализ, а стане жа предложеният сянь колга, кодама од решеният эрявихть, штоба аф аньцек обеспечендамс региональнай финанснень стабильнайшиснон, но и касфтомс экономическяй вииямать, вов мезсь ащи тейнек целькс—тиемс РФ-нь эрь субъектть кемоста виияфтоманкса основа».

 

08.04.2021  № 13
 
 
 

 

 

Яндекс.Метрика Яндекс цитирования Rambler's Top100
Учредительхие:
Главнай редакторсь: И. С. Лушкин