Поиск по сайту: 
 

Архив
 март 
 2024 
пн вт ср чт пт сб вс
    123
45678910
11121314151617
18192021222324
25262728293031

 
 

 

САНАТОРИЙСА

Сась санаторияв иляденди, ужнама ашезь карма и мадсь. А шобдава цебярь мяльса-арьсемаса нарась и валгсь столоваи. Сонь озафтозь шра ваксс ськамонза и ашезь кенере арьсемс тястонь администрациять колга, кона семботь пяк лац аноклазе и ужяльдезе сизеф газетчикть, кода теенза маладсь шаржу сакал мархта атяня. Сонь кядьсонза ульсь кодама-бди ярхцамбяль, а сельмонза ванцть Тимкинонь лангс.

 

Тимкин цють якстерьгодсь. Мезе эряви тиемс тяфтама случайста? Улема, стямс, сявомс атять кядьста ярхцамбяльть, сюконямс и азомс мзярошка валня. Сюкпря теенть.

 

Атясь тя пингть маладсь шрати и венептезе тарелкать, коса ульсь кши лангс шарфты ярхцамбяль.

 

—Вов,—мярьгсь атясь и путозе тарелкать шрать лангс.—Варжасть.

 

—Сюкпря, што шарфтоде лангозон мяль,—отвечась Тимкин.

 

Атясь кяжиста ванць фельетонистть лангс и лоткафтозе сонь.

 

—Кодама мялень шарфтома? Ерань, штоба фельетонистсь сонць варжалезе, мезьда тяса андыхть.

 

И  шись эстокиге шобдалгодсь. Шра ваксс озаф аватне эстокиге арасть сирекс, а сяряди максоц эстокиге лятфтась эсь колганза. «Кудонь кольги вельхксне и нолапарь сантехникне—вов тонь тевце»,—мярьгсь эстеенза Тимкин.

 

Сон цянгоняса аф мяль вельде шорясь кантф ярхцамбяльть эса. Тя аф пяк салсезе мяленц. Мялец петевсь аньцек кафта частта меле. Сон сувась моряв. Ведсь лямболь. Крхкаста таргазе ваймонц и валомне чёпафтсь ведти. Уйсь ведть алга ветешка метрат и лиссь меки, стакаста ваймонь тарксезь. Аф, мезе тят корхта, морясь тя моря. Нльне тя шаржу шяярь атять и сонь каваняманц колга юкстафоль.

 

—Тимкин ялгась,—кулевсь ведть потмоста вайгяль и фельетонистть маласа эвондась эчке ава, кона уйсь кода корабль.—Тимкин ялгась, тон кода фельетонист, кода печатень представитель, ватт сянь лангс, мес тяса лежанкатне аф пяк оцюфт, тяйнянят.

 

Тимкин тага весть чёпафтсь. Пельсь, што морять потмаксса сонь пеняцяма мархта учсесы Ведявась, сяс мес теенза педезь-педихть эшеляй алятне или сонць Нептунць кармай эняльдема сянь лангс, мес пляжса пяк лама кархчта.

 

Мзярда мрдась санаторияв и панжезе эсь номерозонза кенкшть, сон няезе авать, кона ульсь кроватенц маласа. Авась шарфтсь ширезонза и мярьгсь:

 

—Простямасть, кандонь теенть нардама. Кда ули пингонте, азондолень сянь колга, мезе тиенди кастеляншась.

 

—Ванды, пожалуйста,—эняльдсь Тимкин.—Или кизода меле. Векть аделамда меле!

 

Сон рахазевсь и авась потазь тусь комнатаста.

 

Мзярда Тимкин мольсь враченди, каршезонза лиссь ся атясь, кона ерась шобдава каванямс сонь, кизефтезе кяжиста, сермадсь или аш фельетон. Тимкин, кода нумол, комотсь шири и тусь медицинскяй кабинету.

 

—Так, так,—мярьгсь врачсь, ванондомок сонь справканзон и урмань историятнень,—максоце. Ну мезе ина. Кулхцонтт, мезе тейть азан. Мялезе пачфтемс максоцень колга...

 

—Аф, аньцек аф тянь!—ювадсь Тимкин.—Аньцек тяда пеняця максозень лангс. Тяда мярьгонде, штоба сермадолень колганза фельетон!

 

Вася ласькозь тусь врачть ширде.

 

—Кие содасы, коза синь тоса ваныхть,—мярьгсь илять врачсь рьванцты,—санаториясь максонь и потмонь органонь пчкафтомань, а кучсихть ширезонк лафча нерва мархта ломатть…

 

В.Ямашкин.

 


 

 
НОВОСТИ
 

МОРДОВИЯСА ЛОТКАФТФ МАСКАНЬ КАННЕМАНЬ РЕЖИМСЬ

09.06.2022  № 22
 

НАЦПРОЕКТТНЕНЬ—ЭРЯФС!

Мордовиянь Правительствась сяда тов мольфтьсы работать национальнай проекттнень эряфс ётафтоманкса, конатненди ки макссь странань Президентсь Владимир Путин. Республикань Оцюнять ширеса совещанияса корхтафоль основной федеральнай и республиканскяй программатнень эряфс ётафтомаснон колга. Мольфтеви работать квалма азондсть вице-премьерсь Игорь Чадов, МР-нь строительствань и архитектурань министрсь Алексей Гришакин, МР-нь транспортть и дорожнай хозяйствать коряс Госкомитетть председателец Валерий Кандрин, МР-нь велень хозяйствань и продовольствиянь министрсь Александр Кечайкин, МР-нь вирень, охотничьяй хозяйствань и природопользованиянь министрсь Алексей Ларькин.

 

Мордовиянь Оцюнясь путсь задача кирдемс кеме контроль ала строямань графикнень пяшкотькшнемаснон. Васендакиге корхтамась мольфтевсь социальнай инфраструктурань объекттнень колга. Тяфта, ванфтольхть кизефксне, конат сотфт Саранскяйса Кировонь ульцяса 250 вастонди идень садть и Тавлинскяй набережнайса 1450 вастонди школать строямаснон шумордамасна.

 

09.06.2022  № 22
 

ЁТАФТОВСЬ АНТИКРИЗИСНАЙ ШТАБТЬ ЗАСЕДАНИЯЦ

2 июньцта Мордовияса ётафтовсь экономикать ширенц кирдеманц и кемошинц ванфтоманц коряс антикризиснай штабть заседанияц, коса ванондовсть республикаса уликс тефне. Азфоль, што Россиянь Правительствась сяда тов мольфти работа санкциятнень эзда экономикать араламанц коряс законодательнай базань тиеманкса. Региоттнень ширень кирдемасна и синь финансовай кемошиснон кемокстамасна—главнай направлениятнень эзда фкясь. Путф подпись РФ-нь Правительствать постановлениянц алу, кона максси возможность кирьфнемс пандоматнень бюджетнай кредиттнень коряс, конат сявфт дефицитть пяшкодеманкса.

 

Майста нолдаф тевс важнай продукциянь импортёрхнень специальнай льготнай кредитованиянь программасна. Тянкса федеральнай бюджетста нолдаф 37 миллиардта лама цалковай. Тяфтама ширень кирдемать сюнеда бизнести ули кода меки  ладямс товаронь рамсемать, конат мзярс аф нолявихть Россиять территорияса, и сяда тов мольфтемс сембе пингонь работать.
 

09.06.2022  № 22
 
 

Одкстоптови общественнай транспортсь

28 майста Саранскяйса Советскяй площадьса Мордовиянь Оцюнясь Артём Здунов ванозень пассажирскяй од автобуснень, конат работайхть газса. Мордовияти тя общественнай од видонь транспорт, кона арьсекшневи нолдамс тевс республикань транспортнай предприятиятнень подвижнай составснон одкстоптоманкса.

Автобусонь ноляйхне няфтезь средняй и оцю классонь техникать. Артём Здунов ванозень автобуснень эса тяниень пингонь салонть и водителень кабинаса оборудованиять.

«Газса работай техникась сяда ванфтсы экологиять и аф веши оцю карьхцьт. Тяфтама транспортть эвондамац максы инфраструктурати касома-виияма—ков сяда лама тяфтама видонь транспортта, тов сяда лама кармай заправочнай станцияда. Тянь мельге сай пингсь»,—китькстазе Мордовиянь Оцюнясь.

Сембе автобусне стане жа тифт усксемс физическяй ширде ограниченнай возможность мархта ломаттнень. Тяниень пингть Саранск ошса ули автомобильнай газонаполнительнай компрессорнай фкя станция.

02.06.2022  № 21
 

Ревакцинация COVID-ть эзда эряви ётамс сембонди

Мордовиянь Оцюнять Артём Здуновонь председательстванц ала 27 майста ётафтовсь Мордовияса коронавируснай инфекциять инголдаманц и келемоманцты кить персеманц коряс оперативнай штабть заседанияц.

Отмечафоль, регионца ванфтови ковидса одс сярядихнень лувксснон киремац—ётай недялять тя ульсь 30 ломань шити.

«Эряви сяда тов мольфтемс ломаттнень вакцинацияснон и ревакцинацияснон коряс работать. Тянь мельге ванома кода муниципальнай образованиянь оцюнятненди, стане и предприятиянь и бизнес-структурань руководительхненди. Тяниень пингть ётафтовихть ЕГЭ-тне, сяс инфекцияда инголдамань мератненди эряви шарфнемс башка мяль»,—мярьгсь региононь руководительсь.

МР-нь Правительствать Председателенц заместителец Галина Лотванова азозе, што республикань медицинскяй учреждениянь стационархненди тона недялять эрь шиня пачфневсь 20 малава ломань. Сёлкф нинге 50 ковиднай койка-вастсь, стационарса пчкси 203 ломань, конатнень эзда пялесна—60+ кизосот.

02.06.2022  № 21
 

Экономикать виияфтоманцты—башка мяль

Мордовиянь Оцюнясь Артём Здунов 27 майста ётафтозе республикань экономикать ширень кирдеманц и кемошинц ванфтоманц коряс антикризиснай штабть заседаниянц.
Региононь руководительсь мярьгсь, што Россиянь Правительствась сяда тов примси решеният, конат эрявкснихть тячиень аф тёждя пингть экономикать работанц лац ладяманцты.
 
«Васенце очередень тевонь мольфтемань федеральнай планти сувафтф нинге 23 кизефкс. Фалу эвондакшнихть од механизмат, од возможностть. Тейнек эряви синь сяда лац нолямс тевс,—мярьгсь Артём Здунов.—Кепотьксонди, Россиянь Правительствась дополнительнайста нолдай 3 миллиартт цалковай региоттнень эса спортивнай инфраструктурать виияфтоманкса. Эряви кенеремс тиемс заявка ня программатненди и получамс финансирования».

Тяфта жа арьсекшневихть отечественнай программнай обеспечениянь ширень кирдемань од механизмат. Республикань цифровой виияфтомань министерствати и региональнай IT-компаниятненди мярькф активнайста примсемс участия ня процесснень эса.

02.06.2022  № 21
 
 

Артём Здунов встретился с многодетными семьями

Глава Мордовии Артём Здунов провел встречу с многодетными семьями республики – её приурочили к Международному дню защиты детей.

Встреча состоялась в Доме Республики в теплой, почти семейной обстановке, за чашкой чая. В ней участвовали вице-премьер Галина Лотванова и министр социальной защиты, труда и занятости населения РМ Игорь Князьков.

«Я хочу от всей души поблагодарить всех многодетных родителей за ваш нелегкий труд, достойный глубокого уважения и общественного признания, - сказал Артём Здунов. – Вы взяли на себя большую ответственность. Понимаю, сколько дел в большой семье, какая у вас загруженность, но прошу вас, чтобы за этими делами вы не забывали разговаривать со своими детьми. Обсуждайте с ними, что происходит в мире, что было много лет назад. Нам важно, чтобы дети выросли настоящими людьми, чтобы любили свою семью и свою Родину. Это наша с вами общая задача. Вы выполнили и перевыполнили свою демографическую программу, спасибо вам за это, теперь дело за нами».

В Мордовии около 8 тысяч многодетных семей, в которых воспитываются более 25 тысяч детей.

25 мая Президент России Владимир Путин на заседании президиума Государственного Совета, посвящённого вопросам социальной поддержки, подчеркнул, что многодетная семья должна быть ценностным ориентиром для всего общества и поддерживаться государством. Президентом поставлена задача сделать всю систему поддержки семьи целостной, последовательной, понятной и эффективной.
02.06.2022