Поиск по сайту: 
 

Архив
 апрель 
 2021 
пн вт ср чт пт сб вс
   1234
567891011
12131415161718
19202122232425
2627282930  

 
 

 

В Правительстве РМ

Владимир Волков ётафтсь социальнай сферань отраслятнень эса национальнай проекттнень эряфс ётафтомаснон коряс совещания

Мордовиянь Оцюнясь Владимир Волков 16 апрельста ётафтсь социальнай сферань отраслятнень эса национальнай проекттнень эряфс ётафтомаснон коряс совещания, коса ульсть Саранск ошень округонь и республикань муниципальнай райоттнень оцюнясна.
Региононь руководительсь лятфтазе: нацпроекттне арьсефт сянкса, штоба решандамс ломаттнень эряфснон цебярьгофтомаснон коряс оцю задачатнень, конат водендафт ломаттнень эряфснон кувалмонц касфтоманкса, доходснон кеподеманкса, ашушить кирьфтаманкса.
Финансовай обеспечениянь проекттнень эзда фкя инь оцюсь—тя «Здравоохранение» проектсь, конанди нолявихть оцю ярмакт, а стане жа уликс медицинскяй учреждениятнень оборудованияса пяшкодемасна.
Нацпроектть структураса—ниле основной направленият: первичнай медико-санитарнай лезксонь максомась, седить и сосудатнень, онкологиять мархта сотф урматнень каршес тюремась, идень медицинась.
Мордовиянь Оцюнясь отмечазе ломаттненди первичнай звенань медицинскяй учреждениятнень работаснон башка рольснон, тяконь лувксса ичкоздень велень эряйхненди. Теест строявихть ФАП-т и рамавихть дополнительнай мобильнай медицинскяй комплекст. Тяконь мархта, кода мярьгсь республикань Оцюнясь, велень ломаттненди пяк важнайкс лувондови тяниень пингонь пчкафтомань метоттнень доступнайшисна. Межрайоннай больницятнень эса рамаф од оборудованиясь ащекшни стак, а пациенттнень кучсесазь пчксема Саранскяи.
Сяс Владимир Волков отмечазе республикань здравоохранениянь од министрть цебярь ушетксонц районнай больницянь врачненди лапароскопическяй операциятнень коряс мастер-классонь ётафнемать.
Лятфтасаськ, Олег Маркин С.В.Катковонь лемса Республиканскяй больницянь специалистонь группать мархта ульсь ни Чамзинскяй районца, очередьса—Краснослободскяйсь, Торбеевась, а сяльде—сембе райоттнень эса пчкафтомань учреждениятне.
Кода мярьгсь Мордовиянь Оцюнясь, здравоохранениянь системать работанц ладямац, сонь грамотнайста тевонь вятемац—пяк важнай задачась, кона, енюста тевонь мольфтезь, лихтьсы республикаса медицинать виияфтоманц од уровеньц.
2024 кизоти самс республикань здравоохранениять финансированиянь объемоц—7,7 миллиард цалковай, тяконь лувксса 2019-2021 кизотнень—5,7 миллиард цалковай.
Оцю задачат эрявихть решандамс и социальнай блоконь лия нацпроекттнень коряс: «Демография», «Образование», «Культура». Марнек Мордовияса социальнай сфераса национальнай проекттнень финансированиянь объемсна 2024 кизоти—37 миллиардта  лама цалковай.
Совещаниять пингста лац-ряц ванондовсть муниципальнай и региональнай        власттнень марстонь работаснон коряс кизефксне, конат водендафт сянди, штоба аф нолдамс тя работаса афсатыкст.
«Тейнек эряви мяляфтомс сянь колга, мезе мярьгсь Россиянь  Президентсь В.В.Путин: нацпроекттнень главнай задачасна—тя цебярь шири полафткст российскяй эрь гражданинть и эрь семьять эряфса. И тейнек эряви ваномс, кода минь работаньке отвечай тя задачати. Нацпроекттнень эряфс ётафтомасна—минь марстонь оцю тевоньке и марстонь оцю ответственностеньке»,—мярьгсь Владимир Волков.

25.04.2019 №16
 
 
 

 
НОВОСТИ
 

КИЗОНЬ КОФНЕНЬ ИТТНЕНЬ ВАЙМАМАСНОН И ШУМБРАШИСНОН ПЕТЕМАСНОН ЛАНГС ШАРФТОМА БАШКА МЯЛЬ

7 апрельста МР-нь Оцюнять аф лама пингс тевонзон тиендиснон Артём Здуновонь видеса совещанияса ванондовсть кизонь кофнень иттнень ваймамаснонды лемтьф кизефксне. Региононь руководительсь ётафтф работать мзярс лувондсы аф педа-пес лац-ряц тифокс. Тя важнай направлениясь веши сяда цебярьста аноклама, инь пяк сянь эса, мезсь токсесы досугонь ладямать и иттнень ваймама пингть аралафшиснон обеспечендамаснон.

 

 

 
Кода азозе МР-нь Правительствать Председателенц заместителенц тевонзон тиендисна Галина Лотванова, тядде планц коре кармай работама 337 лагерь, эздост 22-сь стационарнай (санаториятнень базаса), и шитемба улемань 315 лагерь образовательнай организациятнень и социальнай учреждениятнень базаса. Тяконь мархта Галина Лотванова отмечазе, што инголи работай 23 лагерсь тяни республикаса сёлкфт ташта, калада инфраструктураснон инкса, хуш синь ащихть Мордовиять инь мазы вастонзон эса.

 

15.04.2021  № 14
 

МОРДОВИЯНЬ УЧЁНАЙХНЕ ТИСТЬ НАУЧНАЙ ПОДВИГ!

15.04.2021  № 14
 
 
 

ЛОМАТТНЕНЬ ЭРЯФСНОН ЦЕБЯРЬГОФТОМАНКСА

31 мартста Мордовиянь Оцюнять аф лама пингс тевонзон тиендисна Артём Здунов ВКС-нь режимса примась участия МР-нь Промышленностень, наукань и од технологиянь министерствать расширеннай коллегиясонза. Совещанияса примасть участия Россиянь Промышленностень и торговлянь министерствать региональнай промышленнай политикань и проектнай управлениянь Департаментонц директороц Виталий Хоценко, региональнай отраслевой министерствань представительхне, республикань инь оцю производствань вятихне тисть итокт кизоньберьфонь работаснонды.

 

Артём Здунов шарфтсь мяль, што регионца трудса заняфнень нилецекс пялькссна покодихть промышленностьса, тя республикань экономикать флагманонзон эзда фкясь. Мордовиянь Оцюнять аф лама пингс тевонзон тиендисна азозень тематнень, конатнень коряс эряви мольфтемс корхтама коллегиять пингста. Васендакиге тя собственностень и предприятиятнень вятемаснон коряс кизефксне. Эряви содамс, кие ащи выгодань получайкс, кие отвечай трудовой коллектифнень инкса. Прябалакс арси собственностень праватнень кядьста кядьс ламоксть ётнемасна, мезсь шоряй предприятиятненди лац-ряц вииякшнемс.

 

08.04.2021  № 13
 

ЗАСЕДАНИЯСЬ ЛЕМТЬФОЛЬ КОРРУПЦИЯТЬ КАРШЕС ТЕВОНЬ МОЛЬФТЕМАТИ

МР-нь Оцюнять аф лама пингс тевонзон тиендисна Артём Здунов 30 мартста ётафтозе Мордовия Республикаса коррупциять каршес тевонь вятемать коряс Комиссиять заседаниянц. Заседанияса ванондозь 2020 кизоня коррупционнай преступлениятнень мархта сотф ситуациять. МР-ть эзга МВД-ть информациянц коряс, ётай кизоня сембе провоохранительнай оргаттне мусть коррупциять мархта сотф 205 преступления, инь оцю талекасна тиф государственнай властень сфераса и сотф разнай уровенень должностной лицатнень оцю вастса улемста закононь колсемать мархта. Приоритетнай направлениятнень эзда фкясь—национальнай       проекттнень эряфс ётафтомста правонарушениятнень инголдамасна, 2020 кизонь работань итокнень коряс, внутренняй тевонь оргаттнень мархта лихтьф 14 тяфтама преступления, корязост карьхцне лувондовсть 1 миллион цалковайть малава, синь мрдафтфт меки. МР-нь Оцюнять аф лама пингс тевонзон тиендисна азозе, што карьхцнень мрдафтомаснон коряс работась пяк важнай—средстватне улест мрдафтфт экономикати и нолдафт республикать виияфтоманцты.

 

08.04.2021  № 13
 

АРТЁМ ЗДУНОВ АЗСЬ СТРАНАНЬ ПРЕЗИДЕНТТИ РЕГИОТТНЕНЬ ФИНАНСОВАЙ СИСТЕМАСНОН ШУМБРАЛГОФТОМАСНОН КОРЯС ПРЕДЛОЖЕНИЯТ

Россиянь Президентсь Владимир Путин мярьгсь кафта недяляньберьф арьсемс тядде региоттнень дополнительнай финансовай ширень кирдемаснон коряс параметрат, штоба сявомс мяльс тя кизефксть Федеральнай Собранияти сай пингонь посланиясонза. Тянь колга азфоль Правительствань члеттнень мархта совещанияса, кона ётафтовсь 31 мартста.

 

«Федерациянь субъекттнень  финансовай положенияснон минь сембе пингть кирдьсаськ контроль ала,—мярьгсь Владимир Путин.—Мекольдень пингть эряфс ётафтовсь лама мера, штоба кирдемс региоттнень ширеснон и максомс теест эрявикс лезкс—васендакиге, конешна, сявоньдсайне мяльс решениятнень, конат примафтольхть пандемиять пингста». Странань Президентсь лятфтазе, што меля нолдафоль 280 миллиард цалковай прямой дотация и нинге 223 миллиард цалковай специальнай бюджетнай кредитт. «Российскяй экономикать пильге лангс стяфтоманцты тенденциятне нинге аньцек кемокснихть, минь тянь лац содасаськ. Аф сембе субъекттнень эса минь няйсаськ деловой активнайшить касоманц, сяс региоттнень доходнай базасна ламода аф стабильнай. Тянкса мялезе кулемс коллеганень, губернаторхнень эзда регионцнон финансовай состоянияснонды анализ, а стане жа предложеният сянь колга, кодама од решеният эрявихть, штоба аф аньцек обеспечендамс региональнай финанснень стабильнайшиснон, но и касфтомс экономическяй вииямать, вов мезсь ащи тейнек целькс—тиемс РФ-нь эрь субъектть кемоста виияфтоманкса основа».

 

08.04.2021  № 13
 
 
 

 

 

Яндекс.Метрика Яндекс цитирования Rambler's Top100
Учредительхие:
Главнай редакторсь: И. С. Лушкин