РОДНОЙ КЯЛЬСЬ ЭРЯВИ КЕЛЬГОМС И КОРОДОЗЬ ВАНФТОМС

Кода ни пачфнеськ газетаньконь ётай номеронц эса, 16 апрельста Саранскяйса, Мокшэрзянь национальнай драматическяй театраса, ётафтфоль оцю пуромкс, кона лемтьфоль Мокшэрзянь кяльхнень Всероссийскяй шиснонды.
Илась ушедсь ни театрать фойеса. Кштизь-моразь инжихнень васьфтезь «Торама» фольклорнай ансамбльсь, «Морема» этнографическяй студиясь, Рузаевскяй райононь Огарева велень «Мокшаваня» фольклорнай коллективсь, а стане жа Н.П.Огаревонь лемса МГУ-нь Национальнай культурань институтонь студенттне. Тяса жа сайхненди ульсь кода ваномс архивнай фотографиянь и документонь выставкать, кона лемтьфоль мокшэрзянь народть васенце просветителензонды А.Ф.Юртовонди и М.Е.Евсевьевонди.
Торжественнай мероприятиясь ушетфоль театрализованнай представленияста, мокшэрзянь мороста. Залсь пяшксель ломаньда. Пуромсть мокшень и эрзянь  афкуксонь патриоттне, сят, кит фалу ащихть национальнайть ванфтоманц инкса   и тиендьсазь тянь аф шава валса, а тевса.
Мордовия Республикань Оцюнять лемста пуромфнень Мокшэрзянь кяльхнень Всероссийскяй шиснон мархта поздравляндазень МР-нь культурань, национальнай политикань и архивнай тевонь министрть васенце заместителец А.И.Карьгин. Кода азозе Александр Иванович, илати лемтьф пуромкст тя шиня етафтовсть аф аньцек минь республикасонк, но и странань ламоц лия региоттнень эса, коса эряйхть «радняньке». Пингстост кепсевихть-ванондовихть кяленьконь, культураньконь, эсь лацонь коеньконь-обуцяньконь ванфнемаснон мархта сотф кизефксне. Мольфтеви корхтама  сянь колга, мезе тиендеви тянкса идень садса, школаса, вузса.
—Ломанць снярксть ломань, мзяра кяль сон содай,—мярьгсь А.И.Карьгин.—Тячиень иласа няеви, што ломаттне кельгсазь мокшень и эрзянь кяльхнень, корхтайхть вельдест и тиендьсазь семботь синь ванфтомаснон инкса. Катк миньцонк мзярдовок аф улихть тапоркст, конат вятихть фкя-фкянь аф шарьхкодемати.
Тяда меле Александр Иванович максозень оцю казнетнень. МР-нь Оцюнять Благодарностьса казьфт Зубово-Полянскяй педагогическяй колледжень тонафтысь А.И.Лодырева и Ичалковскяй педколледжень преподавательсь О.В.Шаляева.
Мордовия Республикань Государственнай Собраниять Председателенц В.В.Чибиркинонь, а стане жа депутатскяй корпусть лемста пуромфнень поздравляндазень МР-нь Госсобраниять Председателенц заместителец И.М.Москаев. Приветствиянь  валонь азомда меле Иван Михайлович казезень МР-нь Государственнай Собраниять Председателенц Благодарностьса  «Мокшень и эрзянь кялень инь цебярь учительсь» конкурсонь финалисттнень. Сембоц тядде профессиональнай тя пялькстомаса примась участия мокшень и эрзянь кялень 13 инь цебярь тонафты республикань муниципальнай райоттнень эзда и Саранск ошень округста. Сяськикс лиссть Рузаевскяй 9№ средняй общеобразовательнай школань мокшень кялень учительницась Л.В.Белицкая и Саранск ошень округонь Луховскяй лицеень эрзянь кялень тонафтысь Н.В.Платонова. Синь казьфтольхть «Волга—река мира. Диалог культур волжских народов» международнай этнокультурнай экспедицияса-фестивальса участвондаманкса сертификатса. Синць тонафтыхне азсть спасибамань валхт трудснонды оцю оценкань максоманкса, а од учительсь Л.В.Белицкая лувозе эсь сёрматф стихотворениянц, конань эса азондсь тядянь-алянь родной кяльти кельгоманц колга.
Тяда меле сценать лангс тертьфтольхть школьникнень ёткса мокшень и эрзянь кяльхнень, мокшэрзянь литературать коряс и родной кяльса творческяй работань XXI Межрегиональнай олимпиадань призерхне. Диплопнень и ярмаконь премиятнень теест максозень Мордовия Республикань образованиянь министрть заместителец И.К.Дугушкин. Иван Кузьмич китькстазе, што кяленьке ванфтовихть, кда синь вельдест кармайхть корхтама иденьке, кда родной валти пси кельгоманьконь макссаськ эсь уноконьконди.
Тя шиня пуромфнень инголе корхтась Мордовскяй (мокшень и эрзянь) народть Межрегиональнай общественнай организациянц председателец Ю.А.Мишанин. Юрий Александрович азозе, што кяльхнень ванфнемаснон коряс кизефкссь оржаста ащи мастор лангонь ламоц нароттнень инголе. Тяфта, эрь недялять мирса-масторса юмси-тушенды фкя кяль. А сяс тя кизефксти эряви фалу шарфнемс башка мяль. Сон пара мяльса лятфтазе, што родной кяльхнень ванфтомаснонды оцю мяль шарфтсь республикань Оцюнясь В.Д.Волков  МР-нь Государственнай Собранияти Посланиянц эса, азомок тя тевть фкя инь васенце государственнай задачакс.
Ю.А.Мишанин лятфтазе и сянь, што тяддень октябрь ковста Саранскяйса ётафтови Мокшэрзянь народть Всероссийскяй VII съездоц. Анокламатне тя оцю пуромксти мольфтевихть сембе вийса. Кирдевихть кеме соткст региоттнень мархта, коса эряйхть кяльс коре радняньке. Учендови, што съездс пуроми   750-да лама ломань.
Эсь лацонь народной койхнень-обуцятнень ванфнемаснонды путксонкса «Гордость нации» почетнай знаксь   максфоль историческяй наукань докторти Н.Ф.Мокшинонди.
Сяда тов сценать лангс фкя-фкянь мельге лисендсть «Од вий» фестивалень   дипломанттне, конат морасть седиень токай морот мокшень и эрзянь кяльса.
Меколи Мокшэрзянь кяльхнень Всероссийскяй шиснон мархта пуромфнень поздравляндазень Мордовиянь культурань, национальнай политикань и архивнай тевонь министрсь А.М.Чушкин. Сон серьгядезень сембонь кельгомс и ванфтомс родной кяльть, мяляфтомс эсь унксоньконь и историяньконь. Анатолий Михайлович МР-нь Оцюнять Благодарностьса казезе мокшень учёнайть С.З.Деваевонь, кона 35 киза покодсь М.Е.Евсевьевонь лемса МГПИ-са и путсь оцю путкс кяльть, культурать, койхнень-обуцятнень ванфтомаснонды.
О.ЕВДОКИМОВА.