Поиск по сайту: 
 

Архив
 апрель 
 2021 
пн вт ср чт пт сб вс
   1234
567891011
12131415161718
19202122232425
2627282930  

 
 

 

Религия

Тинь кизефнеде

Кизефкснень лангс отвечась священниксь Алексий Степанов
Кяшендемс-аф ваноматнень?
—Мзяра ши ломанть куломдонза меле эрявихть кяшендемс ваноматнень?
Наталья.
—Кяшендемс ваноматнень кудса—суеверия, сонь аш мезевок марстоннец церькавонь койхнень мархта, конат сотфт кулофнень калмамаснон мархта.
Крёстнай тядякс—пекить?
 
—Можна-аф крёстнай тядякс сявомс пеки авать?
Юлия.
—Мяльсь сянь колга, што пеки авась, мзярда кстиндай идь, тии пелькс эстеенза,  сай пингонь иденц эряфонцты, суеверия и христиаттненди сонь лангозонза мяль аф шарфнема. Идти крестнай тядякс арамать колга согласиянь максомста,  кизефтема эсь пряце: мон афкуксонь христианинан? Вийс коре тейне христианскяй воспитаниять вельде заботендамс идть колга? Вов тянь колга лац арьсема. Лездоза тейть Шкайсь!
 
Тядятне-алятне ащихть каршек свадьбати
—Азость, кода улемс: цера ялгазень мархта мяленьке рьвяямс. И суркстка рамаме, и шивок кочкаме. Но вов сонь раднянза ащихть  каршек свадьбати. И цера ялгазень тядяцка атказась минь бславамс, мес сась тяфтама мяльс—ашезе аза, а цёрати тядять бславамац пяк эряви. Минь фкя-фкянь кельктяма, но лия ломаненкса эряви явомс. Мезе тиемс?
Юлия.
—Аф шарьхкотьф тинь ситуациянте. Аньцек мярьган тейть и цера ялгацти васьфтемс тядянц и алянц мархта и седикс-ваймокс корхнемс, штоба содамс сембе туфталхнень. Вдь аф стак тя сембось ушедсь. И, конешна, эряви озондомс и надиямс Шкайть лангс.  Эрси тяфта, што Шкайсь кати кодама туфталонкса аф максы рьвяямс ломаттненди. Аф содасайне тевонтень, сяс аф карман судендама. Озондода, а тоса кода Шкайсь бславатядязь. Пяк пара, мзярда тядятне-алятне макссазь эсь бславамаснон рьвяяманди. Кда омбоце ширде сявомс, сон аф эрси условиякс, штоба рьвяямс, кода гражданскяй, тяфта жа и церковнай рьвяямаса. Кда тядятне-алятне аф макссазь эсь бславамаснон кати-кодама лия туфталхнень, а аф верать и нравственностть инкса, эста тяфта иттне аф «сотнефт» мярьгомаснон мархта. Нинге XIX векста Москувонь митрополитсь и святительсь Филарет корхнесь, што, кда тядятне-алятне атказасть  рьвяяфтомать эзда, мярьктяма, аньцек ярмаконь карьхцямать инкса,  эста стирти и цёрати ули кода аф кулхцондомс синь и тиемс тяфта, кода пара эстеест.

25.04.2019 №16
 
 
 

 
НОВОСТИ
 

КИЗОНЬ КОФНЕНЬ ИТТНЕНЬ ВАЙМАМАСНОН И ШУМБРАШИСНОН ПЕТЕМАСНОН ЛАНГС ШАРФТОМА БАШКА МЯЛЬ

7 апрельста МР-нь Оцюнять аф лама пингс тевонзон тиендиснон Артём Здуновонь видеса совещанияса ванондовсть кизонь кофнень иттнень ваймамаснонды лемтьф кизефксне. Региононь руководительсь ётафтф работать мзярс лувондсы аф педа-пес лац-ряц тифокс. Тя важнай направлениясь веши сяда цебярьста аноклама, инь пяк сянь эса, мезсь токсесы досугонь ладямать и иттнень ваймама пингть аралафшиснон обеспечендамаснон.

 

 

 
Кода азозе МР-нь Правительствать Председателенц заместителенц тевонзон тиендисна Галина Лотванова, тядде планц коре кармай работама 337 лагерь, эздост 22-сь стационарнай (санаториятнень базаса), и шитемба улемань 315 лагерь образовательнай организациятнень и социальнай учреждениятнень базаса. Тяконь мархта Галина Лотванова отмечазе, што инголи работай 23 лагерсь тяни республикаса сёлкфт ташта, калада инфраструктураснон инкса, хуш синь ащихть Мордовиять инь мазы вастонзон эса.

 

15.04.2021  № 14
 

МОРДОВИЯНЬ УЧЁНАЙХНЕ ТИСТЬ НАУЧНАЙ ПОДВИГ!

15.04.2021  № 14
 
 
 

ЛОМАТТНЕНЬ ЭРЯФСНОН ЦЕБЯРЬГОФТОМАНКСА

31 мартста Мордовиянь Оцюнять аф лама пингс тевонзон тиендисна Артём Здунов ВКС-нь режимса примась участия МР-нь Промышленностень, наукань и од технологиянь министерствать расширеннай коллегиясонза. Совещанияса примасть участия Россиянь Промышленностень и торговлянь министерствать региональнай промышленнай политикань и проектнай управлениянь Департаментонц директороц Виталий Хоценко, региональнай отраслевой министерствань представительхне, республикань инь оцю производствань вятихне тисть итокт кизоньберьфонь работаснонды.

 

Артём Здунов шарфтсь мяль, што регионца трудса заняфнень нилецекс пялькссна покодихть промышленностьса, тя республикань экономикать флагманонзон эзда фкясь. Мордовиянь Оцюнять аф лама пингс тевонзон тиендисна азозень тематнень, конатнень коряс эряви мольфтемс корхтама коллегиять пингста. Васендакиге тя собственностень и предприятиятнень вятемаснон коряс кизефксне. Эряви содамс, кие ащи выгодань получайкс, кие отвечай трудовой коллектифнень инкса. Прябалакс арси собственностень праватнень кядьста кядьс ламоксть ётнемасна, мезсь шоряй предприятиятненди лац-ряц вииякшнемс.

 

08.04.2021  № 13
 

ЗАСЕДАНИЯСЬ ЛЕМТЬФОЛЬ КОРРУПЦИЯТЬ КАРШЕС ТЕВОНЬ МОЛЬФТЕМАТИ

МР-нь Оцюнять аф лама пингс тевонзон тиендисна Артём Здунов 30 мартста ётафтозе Мордовия Республикаса коррупциять каршес тевонь вятемать коряс Комиссиять заседаниянц. Заседанияса ванондозь 2020 кизоня коррупционнай преступлениятнень мархта сотф ситуациять. МР-ть эзга МВД-ть информациянц коряс, ётай кизоня сембе провоохранительнай оргаттне мусть коррупциять мархта сотф 205 преступления, инь оцю талекасна тиф государственнай властень сфераса и сотф разнай уровенень должностной лицатнень оцю вастса улемста закононь колсемать мархта. Приоритетнай направлениятнень эзда фкясь—национальнай       проекттнень эряфс ётафтомста правонарушениятнень инголдамасна, 2020 кизонь работань итокнень коряс, внутренняй тевонь оргаттнень мархта лихтьф 14 тяфтама преступления, корязост карьхцне лувондовсть 1 миллион цалковайть малава, синь мрдафтфт меки. МР-нь Оцюнять аф лама пингс тевонзон тиендисна азозе, што карьхцнень мрдафтомаснон коряс работась пяк важнай—средстватне улест мрдафтфт экономикати и нолдафт республикать виияфтоманцты.

 

08.04.2021  № 13
 

АРТЁМ ЗДУНОВ АЗСЬ СТРАНАНЬ ПРЕЗИДЕНТТИ РЕГИОТТНЕНЬ ФИНАНСОВАЙ СИСТЕМАСНОН ШУМБРАЛГОФТОМАСНОН КОРЯС ПРЕДЛОЖЕНИЯТ

Россиянь Президентсь Владимир Путин мярьгсь кафта недяляньберьф арьсемс тядде региоттнень дополнительнай финансовай ширень кирдемаснон коряс параметрат, штоба сявомс мяльс тя кизефксть Федеральнай Собранияти сай пингонь посланиясонза. Тянь колга азфоль Правительствань члеттнень мархта совещанияса, кона ётафтовсь 31 мартста.

 

«Федерациянь субъекттнень  финансовай положенияснон минь сембе пингть кирдьсаськ контроль ала,—мярьгсь Владимир Путин.—Мекольдень пингть эряфс ётафтовсь лама мера, штоба кирдемс региоттнень ширеснон и максомс теест эрявикс лезкс—васендакиге, конешна, сявоньдсайне мяльс решениятнень, конат примафтольхть пандемиять пингста». Странань Президентсь лятфтазе, што меля нолдафоль 280 миллиард цалковай прямой дотация и нинге 223 миллиард цалковай специальнай бюджетнай кредитт. «Российскяй экономикать пильге лангс стяфтоманцты тенденциятне нинге аньцек кемокснихть, минь тянь лац содасаськ. Аф сембе субъекттнень эса минь няйсаськ деловой активнайшить касоманц, сяс региоттнень доходнай базасна ламода аф стабильнай. Тянкса мялезе кулемс коллеганень, губернаторхнень эзда регионцнон финансовай состоянияснонды анализ, а стане жа предложеният сянь колга, кодама од решеният эрявихть, штоба аф аньцек обеспечендамс региональнай финанснень стабильнайшиснон, но и касфтомс экономическяй вииямать, вов мезсь ащи тейнек целькс—тиемс РФ-нь эрь субъектть кемоста виияфтоманкса основа».

 

08.04.2021  № 13
 
 
 

 

 

Яндекс.Метрика Яндекс цитирования Rambler's Top100
Учредительхие:
Главнай редакторсь: И. С. Лушкин