28 апрельста—Очижись

Очижись—православнай христиаттнень инь оцю праздниксна. Русьса праздновандамонза кармасть эста, мзярда примафоль  христианствась.  Тя оцю праздникти анокламась мольфтеви аф фкя недяля, а мянь ковда лама пинге. И тевсь аф най эряма вастонь-мезень  аруяфнемать  эса. Тя шинди Шкаенди эрь верондайсь старандай аруяфтомс  ваймонц.  И васендакиге тя тиендеви поставамать  вельде.  Тя постсь  лемневи Великай  постокс. Сон сисем недялянь кувалмоса. Тняра пинге  поставайхне аф ярхцсихть сивольда, лофцта, калда. Эсь лацонь диетас озсихть  сянкса, штоба Шкайсь нолдалезень  грехснон и  кулелезень  озондомань валснон. Эрямс сисем  недялят, можна мярьгомс, кши, модамарь и чай лангса—аф кажнайти вийс коре. А кинди сяськондеви тя испытаниясь, сянь, кле, ароптови  кальдявть эзда ваймоц.
Очижинь  шиня, пачфневи «писанияса», эреклакшнихть сембе кулофне (конешна, аньцек эсь эряфснон лангс кядень  кеподида башка). И синь, эряфста туфне, тя шиня якайхть минь  еткованк, аньцек Шкайсь ашезень пута тейнек няевикс. Киза кувалмоса уленди фкя ши, а сяда видеста азомс—фкя ве—тя Христость  эрекламань вец, мзярда «воляс нолдавихть» кулофне и самай тя веня синь  и минь  уленттяма марса. А «инжихнень» сяда пара васьфнемс аруста. Тяса мяльса  кирдеви и кудонь-мезень, и ронгонь-пондонь, и ваймонь арушись. Сянкса, улема, и банянь уштомаське аф  кадондови ефси  иляденди.  Тя тиендеви Очижинь карша еткшиста или  нинге чистай шуваланяста. Ару кудса, ару  мяльса, ару ваймоса, ару щамса-карямса васьфневи Очижись. Праздниконь каршень  сембе  тефнень тиемда, Очижинь алхнень архтомдост меле  ни  азоравась тушенды пирьфонц ладанца шарома. Ладанонь качамняса етасы и кудботмонцка.  Тяфта паньцыне сембе  кальдяфнень, тердьсы кудозонза праздникть. Сембе семьянц качафтсы тяфтама качамняса. Тяда меле ни арьсихть  фкя-фкянди шумбраши, озондыхть, штоба кизось улель козя.
А кие аф  мяляфтсыне Очижинь нюряпнень?! Велень эрь ульцяса  мольфтсть эсь лацонь  пялькстомат сянь коряс, кинь сяда сери нюрямоц. Шинь шишка праздниконь пингть  ашесть тушенда перьфстост ломаттне. Нюрьсесть, морсесть, кштишендсть гармониянь  коряс, мольфтсть разнай  налхкомат.
Преданиять коряс, Мария Магдалина, кода Иисус Христость сембе учениконза, якась масторлангонь ошнень эзга и азонкшнесь Сонь колганза, эряфонц и Эрекламанц квалма. Весть сон сась Риму, тоса сонь инголи содазь кода козянь и знатнаень, сянкса и нолдафоль императорти Тибериянди. Сон казсь теенза ал и мярьгсь: «Христоссь Эреклась!» Дивандась императорсь: «Кода может кие-бди эрекламс куломда меле?! Тяндивок стане жа аф теждя верондамась, што акша алсь может арамс якстерькс!» И апак учсек, алсь кармась полафнемонза тюсонц. Васенда розовайгодсь, меле арась якстерькс! Тянь мяльса кирдезь, XII векста сявомок, сембе христиаттне Очижиста макссихть фкя-фкянди якстерь алхт, хуш церькавса тя тевс нолдафоль нинге IV векста.