Поиск по сайту: 
 

Архив
 август 
 2019 
пн вт ср чт пт сб вс
   1234
567891011
12131415161718
19202122232425
262728293031 

 
 

 

Наши мокшанские сыновья и дочери

«ЭСОН УЛИ ОЦЮ КЕЛЬГОМА ЭРЯФТИ»

28 апрельста эсь шачема шинц васьфтезе мокшэрзянь содаф языковедсь С.З.Деваев. Теенза топодсь 88 киза. Мокшалять эряфонц оцюшка пяльксоц сотф мокшень кяльть тонафнеманц мархта. Колмогемонь ветие киза Семён Захарович работась М.Е.Евсевьевонь лемса Мордовскяй государственнай педагогическяй институтса, а пенсияс лисемдонза меле и тячиень шити самс заняф научнай работаса. Ня шитнень Семён Захарович  ульсь редакциясонк и пара мяльса отвечась корреспондентоньконь кизефксонзон лангс.
—Семён Захарович, пара улель, кда азондолеть аф лама эсь колгат, коса шачеть-касоть, лятфталить идькс пингцень.
—Эряфонь крнязень орадомац ушедсь Зубово-Полянскяй райононь Сире Потьма велеста. Семьясонк колма шабатольхть. Браднень еткста мон ёмлась. Аляньке, Захар Филиппович, тяка веленнель, ётазе Великай Отечественнай войнать, повсь пленц, а войнать шумордамда меле, кода и сембе пленнайхне, прважафоль Колымав. Мзярс мольфтевсь следствия и алязе кирдевсь тюрьмаса, тядязе, Александра Петровна, работцесь Москуса. А сяс касфтомазь атязе и бабазе. Атязе, Филипп Ермолаевич, стане жа войнань участник, етазень Васенце мировой войнань толу-качаму китнень, лама пинге кирдевсь пленца Германияса.
Эряме ашуста. Сембе козяшиньконь эзда ульсь кемоньшка сотка мода пакшеньке, да сараскяньке. Атязе пяк строгаель. Нинге емласта тонафтомазь трудендама. Стяфтсамазь, мяляфтса, аньцек шись няфтьсы прянц, и шиньберьф тевса заняфтама: то переса шуфтама-кочктама, то вирьса пенгат аноклатама. Сашендовсь работцемс колхозсовок. Мзярда ушедсь войнась, тейне кемонь кизотольхть, а сяс ламоц тефне тиевомшкатольхть ни.
Сире Потьмаса шумордайне начальнай школать, а «семилеткав» якань шабра вели. Пяк усковонь содамошитненди, сядонга салсезь мялезень гуманитарнай наукатне. Школада меле тонафнемазень поладыне Зубово-Полянскяй педагогическяй училищаса. Активистолень, улень комсомольскяй организациянь секретарькс. Педучилищада меле тейне максфоль направления школав (кда аф эльбятькшнян, Торбеевскяй району), но мон атказань и поступань тонафнема университету. Эста тяса аньцек панчфоль мокшэрзянь отделениясь.
—Но школань тонафтыень, нльне директоронь тевть сембе сяка савсь варжамс мзярошка пингонь ётазь.
—Виде. Университетть шумордамда меле прважафолень покодема Инсарскяй райононь Исавелень школав. Путфолень директоркс. Тевсь аф теждяль од цёрати. Лац-ряц ашине сода, кода улемс руководителень вастса, кода вятемс хозяйственнай тефнень. Тевда школаса пефтомоль. Зданиясь педа-пес апак строяколь, савсь эсь вийса, коллективть мархта штукатурендамс стенатнень. Меле учителень келеса анокламе пенгат тялонди. Тонафнида школаса эста ламоль, ётксост аф най мокшет, ульсть и руст, и татархт, конат сашендсть тяза шабра велетнень эзда. Эрявсь маштозь вятемс тонафнемань тевть, штоба мушендоволь шарьхкодема кода тонафнихнень, стане и тонафтыхнень еткса. Аф емла лезкс макссесь школати эста велень хозяйствань председательсь И.Я.Меркушкин, мяльса кирдьса хозяйственнай пяльксть.  Тяса содафтонь и сонь цёрокшенц, Мордовиянь ингольдень Оцюнять Н.И.Меркушкинонь мархта. Васенце классу Коля Меркушкин сась аф эсь ровесниконзон мархта, сон сяда одоль, но еньц, содамошис коре сон ни эста шарфтсь эсь лангозонза мяль.
Ниле кизот работань Исавелень школаса, а меле поступань аспирантурав.
—Колмогемонь ветие киза тон максоть М.Е.Евсевьевонь лемса МГПИ-ти. Мезьса заняфолеть?
—Пединститутть мархта киньке-яноньке сотневсть панжемдонза меле эстокиге. Эста мон, исяконь аспирантсь, путфолень деканкс филологическяй факультетти. Тяка пингть, вятень мокшень кялень и литературань занятият, вятине общай языкознаниянь курсть. Пингонь ётазь филологическяй факультетсь явфтфоль кафту, эздонза лихтьфоль омба масторонь факультетсь и мон кармань вятемонза сонь. Ся кизотнень педагогическяй институтсь ёфси лияль тячиеннеть коряс. Вузса ашесть сатне помещениятне, «паратнень» сашендовсь ётафнемс то тяса, то тоса. Кой-кона группатне тонафнесть ошень 8№ школаса, конат—Учителень усовершенствованиянь институтса. Но кеняртьфнесть ся пингонь студенттнень сатфкссна. Эздост лиссь аф кржа «оцю» ломань.
Несколька кизода меле МГПИ-са панжевсь начальнай классонь факультетсь, путфолень тоза деканкс.
—Семен Захарович, тячиень шити самс тон мольфтят научнай оцю работа кяльхнень тонафнемаснон коряс. Мезсь кошардонзе тянди?
—Мокшень валхнень этимологияснонды шарфнень мяль нинге аспирантураса, а лия кяльхнень мархта марстоньшиснон тонафнема кармань пенсияс лисемдон меле. Весть гайфтсь тейне ингольдень студентозе и аназе Зубово-Полянскяй райононь диалекттнень коряс диссертациязень, теенза эрявсть материалхт книгань анокламс. Максыне, а тияк надияфтонь кочкамс нинге кой-кодама дополнительнай информация. Вов эста и арьсезевонь: кода ина тиевсть валхне? Лувомок аф фкя литература, содайне, што мокшень кяльсь мала греческяй, английскяй, немецкяй, монгольскяй, корейскяй, китайскяй, латинскяй и кой-кона лия кяльхнень мархта. Ламоц валхнень марстоннет юрсна. Арьсезевонь, кода тяфта лиссь? Туфталсь вов мезьса. Кода содаф, лама тёжянь кизода инголе ломаттне эрясть кочевникокс, ётнесть фкя вастста омбоцети, вов тяста и эвондась кяльхнень ёткса шоворемась. Лама марстоннеда мокшень и монгольскяй кяльхнень ёткса. Туфталть аф стака шарьхкодемац: мокшэрзянь масторти савсь кирдемс татаро-монгольскяй нашествиять.
Кяльхнень тонафнемста мушендови лама марстоннеда разнай нароттнень культураснон, койснон-обуцяснон, иласнон эса.
—Мокшень и эрзянь кяльхнень колга лама корхтама кармай мольфтевома Мокшэрзянь народть Всероссийскяй VII съездонц пингста, кона ётай тяддень октябрьста Саранскяйса. Кодамот мяльхне-арьсематне тя пуромксть колга?
—Съезттне, койсон, занцихть оцю васта народоньконь эряфса. Синь лездсть кеподемс мокшэрзятнень национальнай самосознанияснон. Ульсь пинге, мзярда ломаненьке виздсть корхнемс эсь кяльсост, сёпондозь мокшэрзянь юрснон. Съезттнень вельде удалась виияфтомс национальнайти кельгомать. Ня пуромкснень пингста, арьсян, сяда оцю мяль шарфтома научнай конференциятнень ётафтомаснонды, коса кармай азонкшневома народоньконь эряфонь кувака кинц, республикать и странать эряфса оцю событиятнень эса участвовандаманц колга. Койсон, содамок кодама козяль народонц етай пингоц, кажнайть кеподи мялец.
—Семён Захарович,   иттне эсь лацот заняфт научнай тевса?
—Вете иднень эзда фкяське ашезь ту киган. Кафта цёране кочказь полициянь тевть, фкясь получась медицинскяй образования, тяни заняф предпринимательскяй тевса. Стирезе—библиотекань работник. Аш тевозень поладыенза вете уноконень ётксовок. Шять, хуш идень унокненди ётай наукати кельгомазе. Идень уноктон монь кота.
—Семён Захарович, аф ваномок эряфкшу кизотнень лангс, тон тячемс эрьгават, пара мяльса трудендат дачаса. Месть касфнят мода пакшцень лангса?
—Монь касыксонень лаца аф эрь переса васьфтят. (Рахай). Дачаса касфнян виноград, лакштормарькс (ежевика), сенеме марь (голубика), шяймарькс (клюква). Стане жа улихть марлюне, грушаксоне, инезине. Пяк кельгса мельгаст якамазень. Целайнек эсон ули оцю кельгома перьфпяльти и эряфти.
—Спасиба, Семён Захарович! Шумбраши тейть нинге лама кизос!
О.ЕВДОКИМОВА.

30.04.2019 №17
 
 
 

 
НОВОСТИ
 

Новый благотворительный проект для пенсионеров Саранска!

В Саранске с 1 июля стартует новый благотворительный проект «От грёз к реальности». Проект был разработан Мордовским республиканским отделением Общероссийского благотворительного общественного фонда «Российский фонд милосердия и здоровья», его поддержка осуществлена в рамках конкурса социально­-значимых просветительских проектов для пожилых людей «Серебряный возраст» на средства, предоставленные АО «Райффайзенбанк».
Цель проекта—обучение пожилых людей оказанию психологической и педагогической самопомощи и взаимопомощи с целью сохранения благоприятного психологического самочувствия, развития и активизации их интеллектуальной деятельности и позитивной жизненной позиции.
В рамках проекта предполагается осуществить обучение 50 пожилых людей основам геронтопсихологической и педагогической самопомощи и взаимопомощи. Обучение будет проходить на базе ГБУ РМ «Комплексный центр социального обслуживания по г.о. Саранск» с июля по октябрь 2019 года. В качестве выездных мероприятий по проекту запланированы посещения Мордовского республиканского краеведческого музея им. И.Д.Воронина, библиотеки им. А.С.Пушкина, городского зо-опарка.
19.07.2019
 
 
 
 
 
 
 
 
 

 

 

Яндекс.Метрика Яндекс цитирования Rambler's Top100
Учредительхие:
Главнай редакторсь: И. С. Лушкин