Поиск по сайту: 
 

Архив
 январь 
 2021 
пн вт ср чт пт сб вс
    123
45678910
11121314151617
18192021222324
25262728293031

 
 

 

Люди и дела

Геройкс аф шачендыхть, геройкс арсихть

Эрь кизоня лама мялень кеподи мероприятия етафни «Трудовая доблесть России» Мордовия Республикаса  ВОО-нь Региональнай отделениясь, коса Председателькс отставкаса полковниксь И.И.Дзюбак. Мекольце тяфтама васедематне лемтьфтольхть комсомолть 100 кизонь топодеманцты, а тяфта жа Трудовой Якстерь знамянь орденть и Социалистическяй Трудонь Героень лемть юбилейснонды. Мокшэрзянь модась козя ломаньца, кинди максфт тяфтама оцю казнет, кинь лемоц серматф Мордовиять летописьса. Синь сатсть оцюдонга оцю сатфкст велень хозяйствань производстваса, промышленностьса, строительстваса, лия отраслятнень эса.
Оцю гордостень марязь лятфнесаськ Социалистическяй Трудонь Геройть Раиса Ивановна Жидковать. Средняй школать аделамда меле сон сась работама Саранск ошень «Электровыпрямитель» заводу. Курокста тонадозе приборонь кочкаень профессиять и кармась сатнема трудса оцю сатфкст. Аф лама пингонь етазь, Раиса Жидковась арась од ломанень бригадаса оцюнякс, кона шиста-шис касфнезень производственнай показательхнень. Кемонце пятилеткань итокнень коряс, бригадась лиссь сяськикс аф аньцек заводса, но и марнек приборостроительнай отрасляса. Ся кизоня Р.И.Жидковати максфоль Социалистическяй Трудонь Героень лем. Тя ломанть колга лама сермадсть  газетатне, колганза аноклафт телевизионнай фильмат и радионь очеркт. Сонь цебярь тевонза эряйхть тячемс, служайхть примеркс од ломаттненди.
Аф аньцек Рузаевскяй районца, но и марнек республикаса лац содаф Пелагея Ивановна Борисовать лемоц. 40 киза сон покодсь «Красное Сельцо» плодопитомническяй совхозса, ульсь бригадиркс. Сонь коллективоц эрь кизоня касфнесь 170 тежянь озафтомс шуфтоня, сяда ламось эздост марлюнят, вишнякст, грушакст. Цебярьста работаманкса 1966 кизоня Пелагея Ивановнанди максфоль Социалистическяй Трудонь Героень лем. Эста теенза ульсь 35 киза. Тяфтама оцю казнеса 1968 кизоня казьфоль и учительницась Нина Федоровна Госткина. Шачсь сон велень учителень лама идень семьяса. Аляц—Ф.Г.Госткин математиколь, сонь киганза тусть колма стиренза, тонафнесть педагогическяй училищаса, а сяда меле эсь содамошиснон макссезь иттненди. Нина Федоровнань ульсть сонцень методикац, тонафнемань приемонза, сонь уроконза етнесть интереснайста, шарьхкодевиста. Сонь учениконзон еткса—инженерхт, ученайхть, Родинань аралайхть, учительхть, культураса покоди содаф ломатть.
Социалистическяй Трудонь Геройсь А.В.Долганов кочказе алянц кинц—нильгемоньда лама киза покодсь хозяйствань  вятикс. Тяфтама мяльс сон сась кемгафтува кизоса, мзярда фронтста сась алянц геройкс шавовоманц колга кулясь. Нинге фронту тумда инголе Василий Долганов мярьгсь рьванцты: «Александр тонь васенце лездыце, сон кельгсы модать, шачема ширеть!» Тяфта лиссь и эряфса. 1969 кизоня велень хозяйствань институтть аделамда меле од специалистсь сась работама Лямбирскяй райононь Александровка вели. Эста хозяйстваса ашельхть специалистт, эрь гектарста кочксесть 10-12 центнеронь сёра, тялоти ашесть сатне корматне.
Пингонь етазь тефне кармасть полафневома цебярь шири, «Россия» совхозса урожайностсь кассь 45-50 центнерти, колмоксть сяда лама тяса кармасть потьнема лофцта. Александр Васильевич Долганов тиезе семботь, штоба сонь хозяйствац улель инголи моликс аф аньцек эсь республикасонк, но и марнек странаса. Коллективть оцю сатфксонзон колга сермадсть очеркт, кода эсь республикасонк лисенди газетатнень эса, стане и центральнай лама изданияса. Аф стак 1986 кизоня А.В.Долгановонди максфоль Социалистическяй Трудонь Героень лем.
В.Корчеганов,
 СССР-нь Писателень союзонь член,
 Мордовия Республикань Заслуженнай поэт.

30.04.2019 №17
 
 
 

 
НОВОСТИ
 
 
 
 

РОССИЙСКЯЙ ПЕЧАТЕНЬ ШИТЬ МАРХТА!

Мордовиянь массовай информациянь средствань кельгома работникт! Кельгома ветератт! Седи ваксста поздравляндатядязь тинь профессиональнай праздниконтень—Российскяй печатень шить мархта!

 

Тя шись пуропнесыне марс разнай профессиянь ломаттнень: журналисттнень, редакторхнень, издательхнень, полиграфисттнень, почтань работникнень, печатнай продукциянь  каннихнень—сембонь сятнень, кие эрь шинь трудса тиендьсы минь республиканьконь и сембе странать фкя информационнай пространстванц.

 

Ламошкада тинь работантень вельде Мордовия Республикась тячи—тя стабильнай регион, коса фкя-фкянь мархта ладязь эряйхть лама национальностень и конфессиянь представительхне, лац решандакшневихть экономическяй и социальнай прябалатне, пяшкотькшневихть виияфтомань федеральнай и региональнай программатне. Минь опытоньконь колга эрь шиня корхнихть общероссийскяй уровеньца, тянь мархта ладямок Мордовиять цебярь имидженц кода вииямань оцю потенциал мархта перспективнай территориянь.

 

Инголе минь лама марстонь работадонк промышленностьса, аграрнай секторса, социальнай сфераса. Минь карматама тиендема семботь од производствань и рабочай вастонь тиеманкса, финансовай системать одкстоптоманкса, асу од ломаттнень, конат каннихть польза ёмла родинати, ширеснон кирдеманкса. Тяса пяк важнай сембе ширде ваномась и курокста тевонь тиемась, виде оценкань максомась и региональнай СМИ-тнень позицияснон принципиальностьсна, крхкаста и сембе ширде мольфтеви процессненди и событиятненди сувамась. Надиян марстонь цебярь работать лангс, кона кармай лездома минь родной Мордовияньконь виияфтомаса.

 

 Благодарностень инь лямбе валхт азомат печатень ветераттненди. Информациянь максомань курокстонь пингсь, информациянь пачфтемань каналхне тячиень шить пяк полафтсть и стаки полафнихть сяда тов. Но сякокс отрасляса работань фундаментокс лядондыхть мархтонт ладяф профессионализмань койхне, аф озадонь седихть ащемась, тяштемаса маштомошинте! Арьсян теенть, тинь мала ломанентенди шумбраши, творческяй од сатфкст, благополучия и панчфокс панжема. Российскяй печатень шить мархта!

 

Мордовия Республикань

 

Оцюнять аф лама

 

пингс тевонзон

 

тиендисна А.А.Здунов.

 

15.01.2021  № 1
 
 
 
 

Газетать киц

Кельгома ялгат! Кода ни пачфнеськ, сай кизонь 24 сентябрьста топоди 100 киза ёт Родинаньконь столицаса—Москуса лиссь мокшэрзянь «Якстере теште»  газетать васенце номероц. Тя шись и арась шачема шикс мордовскяй национальнай печатти. Сон ульсь афкукс центральнай газетакс сембе мокшетненди и эрзятненди. Сонь сёрматфнезь-мишендезь Пензенскяй, Тамбовскяй, Самарскяй, Симбирскяй, Саратовскяй, Нижегородскяй и лия губерниятнень эса.
«Якстере тештесь», кона лисендсь мокшень и эрзянь кяльса, тернезень лувихнень кирдемс кеме соткст редакциять мархта, пачфнемс мордовскяй народть тевонзон, арьсеманзон и пичефксонзон колга. Лувихне няйсть эздонза ялга, советонь, содамошинь максси. Сон лезнесь теест тиемс письменностьснон, литератураснон, касфнезе национальнай самосознанияснон.
Честь мархта сяда тов мольфтезе тя тевть «Од веле» газетась, кона  кармась лисендема мокшень кяльса 1924 кизоста сявомок Пензаса. Сон лама тись мокшень кяльть грамматическяй норманзон ладямаса, мордовскяй литературать и искусствать виияфтомаса.
«Од велеть», а сяльде «Мокшень правдать» ламоц воспитанниконза кассть оцю квалификациянь журналистокс и цебярь редакторкс.
Юбилеень карша аш кода аф лятфтамс пара валса газетать редакторонзон, конат кизоста кизос мольфтезь национальнай изданиять тевонц, теенза макссезь сембе эсь содамошиснон, асуснон и седиень псиснон. Нят П.С.Глухов, И.И.Московкин, И.В.Шотин, Л.Е.Бажанов, С.Б.Леонтьев, Н.С.Шестов, Г.А.Игнатьев, П.К.Ежов, П.В.Шавензов, А.Д.Горькин, Ф.С.Руськин, В.М.Сурков, Н.И.Учватов, П.П.Кулешов. Ужяленди, конацка эздост аш ни шиса. Сяс тячи макстама аньцек лятфнемат.
Лятфнихть ингольдень редакторхне
П.Глухов, «Якстере теште» газетать редактороц
«Апак ватт оцю сталмотнень лангс, 1921 кизонь 24 сентябрьста Москуса лиссь «Якстере теште» газетать васенце номероц. Тя ульсь РКП(б)-нь ЦК-ть мордовскяй секциянц органоц. Васенце редакторкс кемокстафоль М.М.Евсеев. Газетать нолямаса активнай участия примсесть Е.С.Окин и Ф.И.Завалишин.
Газетать эрь номеронц оцю мяльса васьфнезь кода эрзянь, стане и мокшень лувихне, и активнайста лездсть теенза.
1925 кизоня, мзярда улень редакторкс ни мон, газетаса оцю мяль шарфневсь литературнай виень пуроптомати. Тейнек васенце произведенияснон тяштезь Ф.Чесноков, И.Кривошеев, Я.Григошин и лиятне. Оцю лезкс макссесь Ф.Завалишин, кона эста работась «Беднота» газетаса.
Мокшэрзянь васенце газетать заслуганза пяк оцюфт. Сонь традициянза, козя опытоц тячемс лезнихть национальнай печатть виияфтоманцты».
И.Шотин, «Од веле» газетать редактороц
«Од веле» газетась ульсь РКП(б)-нь Пензенскяй губкомть и губисполкомть органцна. Сон ушедсь лисендема 1924 кизонь 5 майста. Васенце номерхнень редактировандазень партиянь губкомть мордовскяй секциянц секретарец И.И.Московкин, а сяльде редакторкс путфолень мон. Пяк лездсь газетати асу литературнай редакторсь И.Г.Черапкин, кона тиендезе тя важнай и почётнай тевть куломозонза.
Ся кизотнень Пензав работама кучфтольхть Шишканов, Кузькин, Петербургский и  лия ялгатне, кармасть сашендома тонафнема мокшень  цёрат и стирьхть. Газетать перьф пуроптфтольхть местнай мокшень ломатть. Материалхт ушедсть сашендома губерниять, а стане жа Советскяй Союзть сембе вастонзон эзда, коса эрясть мокшет. Велень    корреспонденттне пачфнесть, кода молихть занятиятне школаса,  лац-аф работайхть изба-читальнятне.
«Од велесь» мольфтсь народть ёткса воспитательнай оцю работа, лездсь касомс мокшень асу ломаттненди—композиторхненди, писательхненди, конатнень моросна, стихсна и рассказсна печатлакшневсть газетать страницанзон эса».
Н.Шестов, «Мокшень правдать» редактороц
«Мокшень правдаса» редакторкс кармань работама 1934 кизоня. Ся кизоня Мордовскяй автономнай областсь тифоль автономнай республикакс. Мокшэрзятненди тя ульсь пефтома кенярдемакс.
Пароль сявок, што колхозс пуроптфтольхть крестьянскяй хозяйстватнень 65 процентсна, тифоль 27 МТС и 45 совхоз. Оцю населениять грамотностец пачфтьфоль 90 процентти, аноклафоль всеобщай начальнай образованияти ётамась.
Шарьхкодеви, што сембе ня кизефкснень вакска ашезь ётне  и «Мокшень правдась». Но сембода оцю мяль шарфнеме мокшень велеть культуранц кеподеманцты. Клупнень, изба-читальнятнень, медпункттнень, школатнень работаснон колга корреспонденцият можналь няемс газетать эрь номерсонза».
10.12.2020  № 48
 

«Бизнес-сообществать мархта васедематне кармайхть ётафневома сидеста»

7 декабрьста Мордовия Республикань Оцюнять аф лама пингс тевонзон тиендисна Артём Здунов васетькшнесь предпринимательскяй сферань представительхнень мархта. Корхтамась мольфтевсь ся кизефкснень коряс, конат пичефтьсазь бизнес-сообществать. Предпринимательхне азондозь Мордовиянь вятити прябалатнень, конат эвондакшнихть эпидемическяй условиятнень пингста работамста. Кой-кона кизефксне кармайхть ванондовома коронавируснай инфекциять келемоманц инголдаманц коряс оперативнай штабть маластонь заседаниясонза.
Артём Здунов китькстазе, што тяфтама васедематне кармайхть ётафневома сидеста, а тячиень повесткась аноклафоль синцень участникнень мархта. Лама корхтафоль тяниень пингонь противоэпидемическяй ограничениянь условиятнень пингста предпринимательхнень работаснон колга.
«Талина» компаниянь группать президентоц, промышленниконь и предпринимателень Российскяй союзонь региональнай отделениять и работодателень Мордовскяй объединениять председателец Виктор Бирюков азозень эсь мялензон-арьсеманзон общественнай объединениятнень рольснон касфтомаснон коряс, конат няфнесазь министерстватнень и ведомстватнень видеса бизнес-сообществать интересонзон.
«Ламоц кизефкснень ули кода решандамс ведомственнай уровеньца, кда тя аф лисенди, эста—системась аф работай»,—китькстазе Артём Здунов.
Стане жа примаф предложения аноклакшнемс региональнай бизнес-сообществань представительхнень рейтингснон. Рейтингть тиемста мяльс сявови предприятияса пандови заработнай платась, вииякшнеманкса нолдаф инвестициятне и налоговай пандоматне. «Тейнек эряви содамс, кие канды ярмакт республикав, а кие Мордовияста лихнесыне синь. Кие панды цебярь зарплата, а кие аф. Тя кармай честнайста»,—мярьгсь региононь вятись.
Тяда башка, васедемаса корхтафоль сянь колга, кода кармай работама Од кизонь илатнень пингста питаниянь сферась. Стане жа корхтамась мольфтевсь Роспотребнадзорть и лия контрольно-надзорнай ведомстватнень мархта марстонь работать, илань карша ваймама шинь ярмаркатнень ётафтомаснон колга.
10.12.2020  № 48
 

 

 

Яндекс.Метрика Яндекс цитирования Rambler's Top100
Учредительхие:
Главнай редакторсь: И. С. Лушкин