Поиск по сайту: 
 

Архив
 январь 
 2021 
пн вт ср чт пт сб вс
    123
45678910
11121314151617
18192021222324
25262728293031

 
 

 

Наша семья

«Пяк кельгсайне ниле иднень, но содавсь, што колмотне аф моннет»

Ростислав фалу арьсекшнесь оцю семьянь колга. Васенце рьванц мархта эрясь гражданскяй бракса 15 киза. Мзярда ушедсть марса эряма, рьвять ульсь колма кизоса цераняц. Марстонь идьсна ашезь шаче, но лама идень семьянь колга арьсематне Ростиславонь ашезь кадонда. Явомок рьванц мархта, сон ашезь лотксе надиямда, што муй стирь, кона арай тядякс шабанзонды.
Кафкса кизода инголе тяфтама стирь мархта сонь содафтозе таксист ялгац. Лида ульсь Ростиславонь коллеганц сембе пингонь (постояннай) клиенткац, и ся эстокиге максозе стирть телефононь номеронц. Стирти эста ульсь цють 20 кизода лама. Ся пингти сон ськамонза касфтозе кафта кизоса церанянц.
Кельгомась  васенце сельмованфста
Васенцеда няемок Лидать, Ростислав шарьхкодезе, што ваясь кельгомати. Ронгс-пондс удалаф, оцю, сенем сельме стирсь кошардозе седиенц шавома сяда вишкста. Васенце васедемаса ни Ростислав азозень теенза оцю семьянь колга арьсеманзон. Мярьгсь, кда соньге мяленза тяфтамот, кармай учендома гайфтеманц эса. Лида гайфтсь недялянь етазь и отвечась, што анок варжамс.
Ялганзон корхнемаснон Ростислав, мярьгат, ашезень куле и, аф ваномок етксост 18 кизоть лангс, етась Лидать мархта эряма бабанц  ташта  куднязонза. Курокста ушедсь коттеджень строяма—и васенце шабаснон шачеманцты сон аноколь ни.
 Васенда шачсь церасна Петр, колма кизода меле—  Настя, сяльде—Ростислав. Сембе иттнень Ростислав лемнезень сонць. Сон нинге шачемдост инголе  сась мяльс, што стиренц лемдьсы бабанц лемса, а инь емланяти макссы эсь лемонц.
Ростислав пяк павазуволь: пяшкодевсть арьсеманза. Оцю кудоц пяшксель шабада, заботада. Ся пингти сон лиссь работама ошень администрацияв китнень обслуживандамаснон коряс отделу. Зарплатац аф оцюволь, но семьяти сатнесь. Аф ваномок сянь лангс, што сон лама пингта етафнесь работама вастса, кенерькшнесь якамс шабатнень мархта походс, ваймосемс велеса. Тянкса нльне рамафоль оцю машина, штоба марнек семьясь тяльголь.
Павазсь аф кувакаль
Сёксень фкя шиня гайфтсь телефонць, и трубкать эзда авань вайгяльсь азозе Ростиславонди, што сонь рьвац кирди кельгомань соткст сонь мирденц мархта. Алять эводемац ашезь азов  валса.
Илядель, шабатне удость, сяс скандал Ростислав ашезь кеподе, аньцек кизефтезе рьванц, виде или аф тя сембось. Лида урокоткшнесь, корхтась, што тя шава кяльготнемасна сятнень, кинь мяльсна срафтомс синь семьяснон. Кельги мирдсь верондась рьванцты.
Но ся гайфтемась ашезь лисенде Ростиславонь пряста. Сон кармась шарфнема мяль сянь лангс, мезсь тяда инголе лядондсь апак приметак. Кепотьксонди, Лида теждяста кадондолезень иттнень мирденц мархта, а сонць тушенкшнесь кудть маласа эсонза ученды машинаса. Меле Ростислав эсь оцю дивандаманцты приметазе, што шабасна лангозонза ефси аф шарфтыхть!
Несколька ковда меле Лида кеняртьфтезе мирденц куляса: синь тага шачи шабасна. Кизефкссь, кинь эзда идсь, кяжияфтозе Ростиславонь рьванц. Кода фалу, Ростислав ушедсь арьсекшнема сай пингонь церанцты лемонь колга, и сельмонзон инголи повсь Марк Твенонь книгац. Сась мяльс, што кармай Марк.
Шачфтомань кудста рьванц и церанц сявомста Ростислав тага таколгодсь, сонь-аф тя шабась, мезть лангс рьвац аньцек люкштядезе прянц. Тя ульсь «мекольце путерьксокс», и сон сявозень сембе идензон лабораторияв, штоба тиемс ДНК-ть коряс экспертиза.
Кафта ковонь
зарплатать—видешить содаманкса
Штоба тиемс ДНК ниле    иттненди, Ростиславонди савсь карьхцямс кафта ковонь зарплатанц. Но тя аш мезевок сянь ваксса, мезе савсь теенза кирдемс анализонь результаттнень получамда меле. Колмотне ниле шабатнень эзда, кафта оцюфне и инь емланясь, теенза аф роднойхтельхть.  Родноель аньцек сонь тезкац, Ростислав.
Аф ваномок рьванц эняльдеманзон лангс, Ростислав мярьгсь теенза кочкамс паршиензон и тумс эряма идензон аляснон шири.
Содавсь, што Романонь (любовникть) мархта Лида содафтсь нинге Ростиславонь васьфтемда инголе. Стирсь кельгозе Романонь, но сон рьвяяфоль. Эста авась лиссь рьвакс Ростиславонди, но кельгоманц мархта ашезь ява. Лама пинге сон эрясь кафту, шачфнесь итть и азонкшнесь мирденцты кельгомать колга. А Ростислав кельгсь, касфтозень шабаснон, аф содамок сембе видешить.
Сембе иттнень инкса пичеди фкя лаца
Кода афоль уле, шабатне  лувондозь Ростиславонь родной алякс, а сон синь родной шабакс. Штоба афоль уле аф шарьхкодема, Ростислав азондозе идензонды семботь. Пачфтезе, што сон аля аньцек Ростиславонди, а синь лия алясна, конань мархта курок содафтыхть.
Ростиславонь ингольдень рьвац тусь кельгоманцты Уфав, кадомок теенза марстонь цераснон. Тяни тя сембе, мезе лядсь аляти семьянц эзда—оцю кудсь и кафта кизоняса цераняц. Саворне тонаткшнемок од эряфонцты, алясь тонафни пицемс церокшти ям, лям, вятнемонза шабать идень саду. Ляды иттнень инкса сон стане жа пичеди, вдь оцюти курок молема школав, а емлати, аньцек шачсь,  савсь тняра кирдемс.

30.04.2019 №17
 
 
 

 
НОВОСТИ
 
 
 
 

РОССИЙСКЯЙ ПЕЧАТЕНЬ ШИТЬ МАРХТА!

Мордовиянь массовай информациянь средствань кельгома работникт! Кельгома ветератт! Седи ваксста поздравляндатядязь тинь профессиональнай праздниконтень—Российскяй печатень шить мархта!

 

Тя шись пуропнесыне марс разнай профессиянь ломаттнень: журналисттнень, редакторхнень, издательхнень, полиграфисттнень, почтань работникнень, печатнай продукциянь  каннихнень—сембонь сятнень, кие эрь шинь трудса тиендьсы минь республиканьконь и сембе странать фкя информационнай пространстванц.

 

Ламошкада тинь работантень вельде Мордовия Республикась тячи—тя стабильнай регион, коса фкя-фкянь мархта ладязь эряйхть лама национальностень и конфессиянь представительхне, лац решандакшневихть экономическяй и социальнай прябалатне, пяшкотькшневихть виияфтомань федеральнай и региональнай программатне. Минь опытоньконь колга эрь шиня корхнихть общероссийскяй уровеньца, тянь мархта ладямок Мордовиять цебярь имидженц кода вииямань оцю потенциал мархта перспективнай территориянь.

 

Инголе минь лама марстонь работадонк промышленностьса, аграрнай секторса, социальнай сфераса. Минь карматама тиендема семботь од производствань и рабочай вастонь тиеманкса, финансовай системать одкстоптоманкса, асу од ломаттнень, конат каннихть польза ёмла родинати, ширеснон кирдеманкса. Тяса пяк важнай сембе ширде ваномась и курокста тевонь тиемась, виде оценкань максомась и региональнай СМИ-тнень позицияснон принципиальностьсна, крхкаста и сембе ширде мольфтеви процессненди и событиятненди сувамась. Надиян марстонь цебярь работать лангс, кона кармай лездома минь родной Мордовияньконь виияфтомаса.

 

 Благодарностень инь лямбе валхт азомат печатень ветераттненди. Информациянь максомань курокстонь пингсь, информациянь пачфтемань каналхне тячиень шить пяк полафтсть и стаки полафнихть сяда тов. Но сякокс отрасляса работань фундаментокс лядондыхть мархтонт ладяф профессионализмань койхне, аф озадонь седихть ащемась, тяштемаса маштомошинте! Арьсян теенть, тинь мала ломанентенди шумбраши, творческяй од сатфкст, благополучия и панчфокс панжема. Российскяй печатень шить мархта!

 

Мордовия Республикань

 

Оцюнять аф лама

 

пингс тевонзон

 

тиендисна А.А.Здунов.

 

15.01.2021  № 1
 
 
 
 

Газетать киц

Кельгома ялгат! Кода ни пачфнеськ, сай кизонь 24 сентябрьста топоди 100 киза ёт Родинаньконь столицаса—Москуса лиссь мокшэрзянь «Якстере теште»  газетать васенце номероц. Тя шись и арась шачема шикс мордовскяй национальнай печатти. Сон ульсь афкукс центральнай газетакс сембе мокшетненди и эрзятненди. Сонь сёрматфнезь-мишендезь Пензенскяй, Тамбовскяй, Самарскяй, Симбирскяй, Саратовскяй, Нижегородскяй и лия губерниятнень эса.
«Якстере тештесь», кона лисендсь мокшень и эрзянь кяльса, тернезень лувихнень кирдемс кеме соткст редакциять мархта, пачфнемс мордовскяй народть тевонзон, арьсеманзон и пичефксонзон колга. Лувихне няйсть эздонза ялга, советонь, содамошинь максси. Сон лезнесь теест тиемс письменностьснон, литератураснон, касфнезе национальнай самосознанияснон.
Честь мархта сяда тов мольфтезе тя тевть «Од веле» газетась, кона  кармась лисендема мокшень кяльса 1924 кизоста сявомок Пензаса. Сон лама тись мокшень кяльть грамматическяй норманзон ладямаса, мордовскяй литературать и искусствать виияфтомаса.
«Од велеть», а сяльде «Мокшень правдать» ламоц воспитанниконза кассть оцю квалификациянь журналистокс и цебярь редакторкс.
Юбилеень карша аш кода аф лятфтамс пара валса газетать редакторонзон, конат кизоста кизос мольфтезь национальнай изданиять тевонц, теенза макссезь сембе эсь содамошиснон, асуснон и седиень псиснон. Нят П.С.Глухов, И.И.Московкин, И.В.Шотин, Л.Е.Бажанов, С.Б.Леонтьев, Н.С.Шестов, Г.А.Игнатьев, П.К.Ежов, П.В.Шавензов, А.Д.Горькин, Ф.С.Руськин, В.М.Сурков, Н.И.Учватов, П.П.Кулешов. Ужяленди, конацка эздост аш ни шиса. Сяс тячи макстама аньцек лятфнемат.
Лятфнихть ингольдень редакторхне
П.Глухов, «Якстере теште» газетать редактороц
«Апак ватт оцю сталмотнень лангс, 1921 кизонь 24 сентябрьста Москуса лиссь «Якстере теште» газетать васенце номероц. Тя ульсь РКП(б)-нь ЦК-ть мордовскяй секциянц органоц. Васенце редакторкс кемокстафоль М.М.Евсеев. Газетать нолямаса активнай участия примсесть Е.С.Окин и Ф.И.Завалишин.
Газетать эрь номеронц оцю мяльса васьфнезь кода эрзянь, стане и мокшень лувихне, и активнайста лездсть теенза.
1925 кизоня, мзярда улень редакторкс ни мон, газетаса оцю мяль шарфневсь литературнай виень пуроптомати. Тейнек васенце произведенияснон тяштезь Ф.Чесноков, И.Кривошеев, Я.Григошин и лиятне. Оцю лезкс макссесь Ф.Завалишин, кона эста работась «Беднота» газетаса.
Мокшэрзянь васенце газетать заслуганза пяк оцюфт. Сонь традициянза, козя опытоц тячемс лезнихть национальнай печатть виияфтоманцты».
И.Шотин, «Од веле» газетать редактороц
«Од веле» газетась ульсь РКП(б)-нь Пензенскяй губкомть и губисполкомть органцна. Сон ушедсь лисендема 1924 кизонь 5 майста. Васенце номерхнень редактировандазень партиянь губкомть мордовскяй секциянц секретарец И.И.Московкин, а сяльде редакторкс путфолень мон. Пяк лездсь газетати асу литературнай редакторсь И.Г.Черапкин, кона тиендезе тя важнай и почётнай тевть куломозонза.
Ся кизотнень Пензав работама кучфтольхть Шишканов, Кузькин, Петербургский и  лия ялгатне, кармасть сашендома тонафнема мокшень  цёрат и стирьхть. Газетать перьф пуроптфтольхть местнай мокшень ломатть. Материалхт ушедсть сашендома губерниять, а стане жа Советскяй Союзть сембе вастонзон эзда, коса эрясть мокшет. Велень    корреспонденттне пачфнесть, кода молихть занятиятне школаса,  лац-аф работайхть изба-читальнятне.
«Од велесь» мольфтсь народть ёткса воспитательнай оцю работа, лездсь касомс мокшень асу ломаттненди—композиторхненди, писательхненди, конатнень моросна, стихсна и рассказсна печатлакшневсть газетать страницанзон эса».
Н.Шестов, «Мокшень правдать» редактороц
«Мокшень правдаса» редакторкс кармань работама 1934 кизоня. Ся кизоня Мордовскяй автономнай областсь тифоль автономнай республикакс. Мокшэрзятненди тя ульсь пефтома кенярдемакс.
Пароль сявок, што колхозс пуроптфтольхть крестьянскяй хозяйстватнень 65 процентсна, тифоль 27 МТС и 45 совхоз. Оцю населениять грамотностец пачфтьфоль 90 процентти, аноклафоль всеобщай начальнай образованияти ётамась.
Шарьхкодеви, што сембе ня кизефкснень вакска ашезь ётне  и «Мокшень правдась». Но сембода оцю мяль шарфнеме мокшень велеть культуранц кеподеманцты. Клупнень, изба-читальнятнень, медпункттнень, школатнень работаснон колга корреспонденцият можналь няемс газетать эрь номерсонза».
10.12.2020  № 48
 

«Бизнес-сообществать мархта васедематне кармайхть ётафневома сидеста»

7 декабрьста Мордовия Республикань Оцюнять аф лама пингс тевонзон тиендисна Артём Здунов васетькшнесь предпринимательскяй сферань представительхнень мархта. Корхтамась мольфтевсь ся кизефкснень коряс, конат пичефтьсазь бизнес-сообществать. Предпринимательхне азондозь Мордовиянь вятити прябалатнень, конат эвондакшнихть эпидемическяй условиятнень пингста работамста. Кой-кона кизефксне кармайхть ванондовома коронавируснай инфекциять келемоманц инголдаманц коряс оперативнай штабть маластонь заседаниясонза.
Артём Здунов китькстазе, што тяфтама васедематне кармайхть ётафневома сидеста, а тячиень повесткась аноклафоль синцень участникнень мархта. Лама корхтафоль тяниень пингонь противоэпидемическяй ограничениянь условиятнень пингста предпринимательхнень работаснон колга.
«Талина» компаниянь группать президентоц, промышленниконь и предпринимателень Российскяй союзонь региональнай отделениять и работодателень Мордовскяй объединениять председателец Виктор Бирюков азозень эсь мялензон-арьсеманзон общественнай объединениятнень рольснон касфтомаснон коряс, конат няфнесазь министерстватнень и ведомстватнень видеса бизнес-сообществать интересонзон.
«Ламоц кизефкснень ули кода решандамс ведомственнай уровеньца, кда тя аф лисенди, эста—системась аф работай»,—китькстазе Артём Здунов.
Стане жа примаф предложения аноклакшнемс региональнай бизнес-сообществань представительхнень рейтингснон. Рейтингть тиемста мяльс сявови предприятияса пандови заработнай платась, вииякшнеманкса нолдаф инвестициятне и налоговай пандоматне. «Тейнек эряви содамс, кие канды ярмакт республикав, а кие Мордовияста лихнесыне синь. Кие панды цебярь зарплата, а кие аф. Тя кармай честнайста»,—мярьгсь региононь вятись.
Тяда башка, васедемаса корхтафоль сянь колга, кода кармай работама Од кизонь илатнень пингста питаниянь сферась. Стане жа корхтамась мольфтевсь Роспотребнадзорть и лия контрольно-надзорнай ведомстватнень мархта марстонь работать, илань карша ваймама шинь ярмаркатнень ётафтомаснон колга.
10.12.2020  № 48
 

 

 

Яндекс.Метрика Яндекс цитирования Rambler's Top100
Учредительхие:
Главнай редакторсь: И. С. Лушкин