Поиск по сайту: 
 

Архив
 май 
 2019 
пн вт ср чт пт сб вс
  12345
6789101112
13141516171819
20212223242526
2728293031  

 
 

 

Тема дня

Атязе 68 киза лувондовсь куляфтома юмафокс

Атязе шачемас коре Старошайговскяй райононь Лемдяй велеста. Но лиссь стане, што  савсь тумс эряма ошу. Ся пингть ламоц од ломаттне тушендсть шири покодема, ярмаконь добувама. Атязевок, Иван Федосеевич, рьвяямда меле аф лама пингонь етазь, рьванц, Елизавета Мироновнань, мархта ерасть мумс паваз ошса. Тусть Свердловскяй области. Шачсть кафта церасна, Василий и Виктор. Но оттненди павазуста эрямс савсь аф ламос. Ушедсь Великай Отечественнай войнась. Войнань васенце шинякиге атязе тертьфоль Родинать аралама. Рьванц кядьс лядсть кафта атнай шабат. Прважамок мирденц фронту, од тядясь сась мяльс, што ошса радняфтома, мала ломаньфтома кафта идь мархта теенза кармай пяк стака. Арьсесь-тись и  мрдась меки шачема-касома Лемдяй велезонза.
Велесовок синь мезеньге цебярь ашезень учсе. Эрявсь и покодемс коса-бди, штоба ярмаконя добувамс, и перень серот касфнемс, штоба трямс семьянц. Стакаль, аш месть корхтамс. Бабазе аньцек сонць содазе, мезе етась ланганза. Ашель вакссонза лезды аф пирьфонь, аф кудонь тевса. А седись стаки учсь мирденц эзда кодамовок куляня. Ашезе сода эста Лиза, што мирдец, Иван, 1941 кизонь октябрь ковть ушетксста шавовсь Ленинградскяй областень Тосненскяй райононь  Красная горка велеть маласа, коса омбоце Ударнай Армиясь ульсь Ленинградскяй блокадать сяземанц коряс Любанскяй операцияса.
Кунара ни аделавсь войнась. Кассть-кеподсть церанза, рьвяясть, шачсть уноконза. А сонць, Елизавета, кода и ламоц тяфтама жа мирдьфтома лятф удаватне, учсь кодамовок куляня мирденц колга. Эрь кизоня, Победань шиня, якась велеса стяфтф  войнаса шавф воиттнень лемс памятникть ваксс, коза пуромкшнесть ветераттне. Няемок шис лятф ветераттнень, кулхцондомок лятфнематнень войнать колга, эрь мезне таколкшнесь седиец  кульфть эзда. Соньге мялямозонза сашендсть лятфнемат мирденц колга. Эрь тяфтама пуромкста меле куду сашендсь кольгондезь-авардезь. Кулось бабазе 1991 кизоня, стаки ашезь учев кодамовок куляня кельгома мирденц эзда.
Ётась лама пингта. И вов 2009 кизоня, сёксенда, «Север-2» поисковай отрядонь боецсь Эдуард Кротов Тосненскяй районца 48 высотать маласа вирть потмоса, Сичева и Витка кафта ляйхнень еткса 13 кварталста мусь немецкяй блиндаж, конань панжемста няйсь Советскяй армиянь 34  боецонь ляткст. Синь етксост ульсть сисем медальотт. Сисемть эзда аньцек кафттне удаласть лувомс. Медальоттнень эзда фкясь ульсь атязень, Иван Федосеевич Становкинонь, Лемдяй велень эряйть.
Медальонць стафоль гимнастерказонза. Аф оцю пластиковай медальонца, кона шарфтсь гильзанди, ванфтовсь каготкя, коса тяштьфтольхть сонь фамилияц, лемоц, отчествац, шачема кизоц и велеть лемоц, коса сон шачсь. 
Кода шавовсь Иван Федосеевич, кивок аф содасы, кивок аф азондсы. Лувондомок историческяй лятфнематнень, шарьхкодьсак, што Великай Отечественнай войнать пингста врагть каршес тюремась Волховскяй фронтса 2-це Ударнай армияти ульсь инь стакакс.
2009 кизонь 13 ноябрьста Ленинградскяй областень Тосненскяй райононь Рябово поселкать эзда аф ичкозе, воинскяй площадкаса, коса мольфтевсть бойхне врагть каршес, боецонь 32 лятксне одукс калмафтольхть воинскяй и духовнай почесть мархта. Атязе калмаф ськамонза.
Поисковай отрядонь боецне, интернетть вельде, ушедсть вешендема Иван Федосеевич Становкинонь маластонь ломанензон. Лувомок тянь, эстокиге максонь ответ, што Иван Федосеевичень шисот кафта рьвянянза и вете уноконза. Церанза ся пингти ашельхть ни шиса. Поисковай отрядонь командирсь серма вельде эняльдсь кучемс атязень фотографиянц и тердемазь тоза, штоба няфтемс, коза сон калмаф. Эстокиге кучине фотографиянц, конань куломозонза ванфнезе бабазе.
Монць стирезень и племянницазень мархта срхкаме кис кизонда. Вокзалса васьфтемазь «Север-2» поисковай отрядонь разведкань группань командирсь В.А.Ведерников. Озафтомазь машинас и туме кис. Кись ичкозель. Перьфпяльге, коза тят варжакста, вирь, да шяйхть. И вов атязень калмонц вакссотама. 
Путоме калма лангозонза панчфт, почердайне мархтон ускф моданять. Ламос ащеме калмонц ваксса… лятфнеськ атязень эряфонц. Поисковай отрядонь командирсь азондсь тейнек кодама стака тюремат фашисттнень каршес мольсть ся вастса, штоба синь аф нолдамс Ленинграду.
Тяни содасаськ, коса воявась и коза калмаф атязе, Иван Федосеевич Становкин. Сон аш шиса, но улихть сонь лятфтаенза, уноконза, уноконь иденза.
Римма
Становкина-Цыганова.
Старошайговскяй районць.

13.05.2019 №
 
 
 

 
НОВОСТИ
 
 

ВЛАДИМИР ВОЛКОВ примась участия РФ-нь Правительствать вице-премьеронц Виталий Мутконь председательстванц ала совещанияса

14 майста Мордовиянь Оцюнясь Владимир Волков примась участия совещанияса, конань видеоконференциянь лаца ётафтозе РФ-нь Правительствань вице-премьерсь Виталий Мутко. Совещаниянь основной кизефксокс арасть уштомань пингонь ётай кизонь итокне.

 


Виталий Мутко отмечазе: ся региоттнень эса, коса губернаторхне шарфнихть башка мяль тя темати, сезонць ётась тапорксфтома. Но марнек,   ЖКХ-нь объекттнень эса чрезвычайнай ситуациянь лувкссь кассь, и главнай туфталсь—сеттнень таштомомасна. Вице-премьерсь отмечазе, што сай кизоста сявомок арьсекшневи нолдамс коммунальнай инфраструктурать, кона 60 процентта таштомсь, одкстоптоманц коряс федеральнай программать. Сяс региоттненди эряви максомс  РФ-нь Минстрои тяфтама объекттнень и капитальнай вложениятнень размерснон коряс, конат эрявихть тиемс нормативно-техническяй вешфксненди кондястикс, педа-пес кочкаф информация.

24.05.2019
 

Сёрматфтода «Мокшень правда» уцез (льготнай) питнеса

24.05.2019
 
 
 
 
 
 
 

 

 

Яндекс.Метрика Яндекс цитирования Rambler's Top100
Учредительхие:
Главнай редакторсь: И. С. Лушкин