Земляконьконь, Советскяй Союзонь Геройть В.И.Чудайкинонь колга азондсть Васенце каналса

Шачсь-кассь В.И.Чудайкин 1925 кизонь 24 февральста Темниковскяй райононь Поповка велеса крестьянонь оцю семьяса. Тяса сон аделазе начальнай школать, а меле тусь атянц шири эстонь Куйбышевскяй областень Борскяй району, коса кярьмодсь сторожень тевти. Мзярда ушедсь войнась, Володя Чудайкинонди ульсь 16 киза. Кода ашезь тяряфне, фронту ашезь сявонде. Коза? Ёмла нинге! Да и заводской бронец ульсь. Сон эста работась Куйбышевскяй авиационнай заводса. А рабочай кяттне тылса ашесть сатне. Штоба повомс фронту, церокшсь арьсесь вов мезе. Ульцяса документонь проверямста прдазе заводской броненц и комсомольскяй билетонц и азсь пря … беспризорникокс. «Кудфтопнень» сявонделезь фронту—виде, штрафной батальону, кода паспортнай режимонь колаень. Цёрась, шарьхкодемок, што теенза сави повомс штрафбату, призывной пунктса ашезь кирде и азозе коза прдазень документонзон. Призывной комиссиясь сюцезе, но сембе сяка прважазе фронту кеме характер отькорь цёрать.
1944 кизонь апрель ковста В.Чудайкин сась тонафнема танковай школав. Кота ковоньберьф содафнесь техникать мархта, тонафнесь ляцендема. Меля максозе выпускной экзаменть, получазе сержантскяй званиять и тусь врагть каршес тюрема.
Орудиянь командирсь и тяка пингть 23-це танковай бригадань 269-це танковай батальононь танконь командирсь Владимир Чудайкин няфтсь оцюдонга оцю героизма войнать песта, 1945 кизонь 1 майста, мзярда мольфтевсть тюрематне Берлинца Рейхстагть инкса. Штурмовой группать лувксса сержантть В.И.Чудайкинонь танкац мольсь подразделениятнень инголе, машфнемок Рейхстагть зданияста ляцендихнень и макссемок ки пехотати. Тюремста инголи лисьф танкати повсь пулеметнай очередь и сон крьвязсь, перямок кить Чудайкинонь техниканцты. Эста сержантсь Владимир Чудайкин лиссь танканц эзда, лездсь экипажти матомс толть, а меле лихтезе ляцьф машинать тюремань паксяста. Ранендафоль, но сембе сяка лядондсь стройса и сяда тов лездсь пехотати Рейхстагть сявомаса.
1945 кизонь 31 майть эзда СССР-нь Верховнай Советонь Президиумть Указонц коряс  немецко-фашистскяй захватчикнень каршес тюремста оцю героизмань няфтеманкса Владимир Иванович Чудайкинонди максф Советскяй Союзонь Героень лем. Победань шить земляконьке васьфтезе госпитальса, а оцюдонга оцю казнеса каземанц колга содась аньцек частезонза мрдамста.
Войнать аделамда меле В.И.Чудайкин нинге вете кизот служась Берлинца, мобилизовандафоль 1950 кизоня майоронь званияса. Тяда меле Владимир Иванович мрдась Мордовияв, тонафнесь партийнай школаса Саранскяйса. Тяса сон содафтсь сай пингонь рьванц Лидия Дмитриевнать мархта.
Колма кизот В.И.Чудайкин ульсь Рыбкинскяй райононь (тяни Ковылкинскяй районць) райсоветонь председательти заместителькс, а 50-це кизотнень песта Чудайкиттнень семьясна ётась эряма Куйбышев ошу (тяни Самара ошсь).
Нильгемоньда лама киза Владимир Иванович трудендась металлургическяй заводса, пенсияс лиссь аньцек 1996 кизоня.
Лама пинге Чудайкин вятезе Самарань Кировскяй райононь войнань, трудонь, военнай службань и правоохранительнай органонь ветеранонь Советть. Сон тячивок фалу примси участия од ломаттнень патриотическяй воспитандамаса, васетькшни школьникнень и студенттнень мархта, азонкшни теест войнань стака кизотнень колга.
В.И.Чудайкин казьф Ленинонь орденца, Отечественнай войнань 1 степенень орденца, лама медальса. Геройть лемоц максф Самарань Кировскяй райононь 150№ школати.