Поиск по сайту: 
 

Архив
 август 
 2020 
пн вт ср чт пт сб вс
     12
3456789
10111213141516
17181920212223
24252627282930
31      

 
 

 

Наша семья

Мирттне-рьвятне Петяйкиттне васьфтезь ведьгемонь кизонь юбилейснон

 
 
Топодсь ведьгемонь киза ся пингста, кода пуроптсть семья. Етасть оцю и кувака ки. Ульсть сембот ведьгемонь кизоста. Трудонь кельги, сталмода аф пели ня кафта ломаттне эрясть и тянемс эряйхть кельгозь, фкя-фкянь шарьхкодезь, ужяльдезь. Борис Михайлович вестевок аф пшкятькшни кельгома рьванцты кальдяв, казяма валса. Валентина Ивановнавок ванцы мяленц кельгома поланянц, сембоса старандай согласиндакшнемс мархтонза. Сон, кле, аля, кудса азор, сяда лац содасы, кода и мезе тиема.
Тяфта лиссь, што весяла свадьба Петяйкиттне налхксть Валентина Ивановнань шачема шистонза. Эряфоньберьф фкя шиня кафта илат и отмечсихть.
—Свадьбань шить, пади, кой-коста афолить лятфта,—мярьгсь Борис Михайлович.—А тяса кельгома рьвязень шачема шиц. Афолить лятфта да лятфтасак. Пяк пара, што эряфса улендихть илат. Одста сяда лама пинге макссеме работати, илатне омбоце вастсотольхть. А тяни кафцьке пенсионерхтама, кудсотама. Мес ба аф лятфтамс павазу одкс пингоньконь.
А лятфтамс ули мезе. Б.М.Петяйкин шачсь Курташка велеса 1946 кизоня. Аляц, Михаил Федорович, аньцек сась Великай Отечественнай войнаста. Ульсь санитаркс, лихнезень тюремань паксяста ранендаф солдаттнень, макссесь васенце медицинскяй лезкс. Тядяц, Мария Ивановна, Кяшалнянь (Духонькинань). Мокшавась шачфнесь пяк лама идь, но аньцек кототне лядсть шиса, лядыксне нинге ёмласта кулость.
Шабакс пингоц Борис Михайловичень пяк стакаль. Родителенза покодсть «Рассвет» колхозса. Сонць тонафнесь школаса. Кефкие кизоцоль, мзярда кенкшезост чакась зиянць, шавовсь вирьса аляц. Лама сельмоведь пяярдсь тядяц. Ашезь мушенда эстеенза васта и Борис. Тяни сон кудса ськамонза алясель. Кемголмува кизоса ушедсь покодема Оброчнай велеса, ванондсь тувот. Тя ульсь 1959 кизоня. Вете класст аделась шинь школаса. А средняй образования получась илядень школаса. Колма кизот ванць стада. А сяльде поступась тонафнема Жукувонь 3№ СПТУ-в, получась трактористонь профессия. Училищать аделамда меле сась покодема Курташкань «Рассвет» колхозу.
—Васьфтемазь пяк цебярьста,—лятфнесы Борис Михайлович.—Механизаторонь тевса васенце тонафтыкс тейне ульсь инь сире, опытнай механизаторсь П.Е.Анисимов. Тянемс тя ломанть лятфнеса аньцек шнама валса.—Сон тонафтомань техникать кельгома, мельганза якама.
21 кизоса Борис Петяйкин эсь воля  тусь армияв служама. А тяда инголе кенерсь тядянцты путомс кудня.
—Стакаль тядязти, пяк стакаль,—азондсь сяда тов Борис Михайлович.—Алязе аш, лезкс аш коста. Сашендовсть тиендемс и авань, и алянь тефнень. Эста ламотне тяфта велеса эрясть.
Курташкань церась служась Уфаса, военно-строительнай отрядса. Служась совестьс коре. Аф стак цебярьста служаманкса кучсезь отпускс. А Курташкаса ся пингть учсь эсонза стирь ялгац Валентина Понимасова. Борис Михайлович арьсесь пингть аф тарксемс, эстокиге кучсь кудат Понимасофнень пяли. Налхксть весяла свадьба. Од мирдсь тусь меки армияв эсь долгонц пяшкодема, рьвац лядсь вели. 1970 кизоня Борис Петяйкин аделазе службанц, мрдась куду, кельгома рьванцты. Путозь «Рассвет» колхозонь тракторнай бригадань бригадирти лездыкс. А кизода меле арась тяка жа бригадати бригадиркс. Хозяйствась оцюволь. Эзонза сувсесть эста Булдыга, Оброчнай, Курташка велетне. Козяль хозяйствась техникань ширде.
 Эрь тевти од бригадирсь кярьмотькшнесь пара мяльса. Эрь тевса сафнезе. Аф стак оцю авторитетоцоль кода механизаторхнень, стане и оцюнятнень еткса. И 1974 кизоня, мзярда председателькс покодсь В.В.Тюрин, Б.М.Петяйкинонь путозь главнай инженеркс, а сянкса и колхозонь председательти производствань кизефкснень коряс заместителькс. Од председательсь Г.Г.Енин цебярь специалистть, трудонь кельги од мокшалять приметазе эстокиге, мзярда аньцек сась колхозу. И макссь  ответственнай тев.
Тяда меле кодама аньцек покодема вастт Борис Михайлович ашезь занце колхозса. Ульсь завхозкс, бригадиркс, главнай инженеркс. Сембоц трудонь стажец ведьгемоньда лама киза. Эрь вастса сафнезе, трудендась виень аф ужяльдезь. Тянь колга корхтайхть оцю казненза.
А инь питни казнесь мокшалять эряфсонза—тя Валентина Ивановнац.
Сон шачсь и кассь Понимасофнень семьяса. Аляц, Иван Иванович, войнань ветераноль. Фронтовиксь комозьда лама киза ульсь колхозса председателькс. Лама пинге работась парторгокс, ДРСУ-са оцюнякс. Тядяц, Елена Никифоровна, сембе эсь эряфонц лемдезе Курташкань школати. И тя мянь нильгемоньшка киза. Идьтост кафксоль. Валентина Ивановна школать аделамда меле покодсь старшай пионервожатайкс. Аделазе М.Е.Евсевьевонь лемса МГПИ-нь химико-биологическяй факультетть. Покодсь и оцю класснень мархта. Но лама киза вятезень начальнай класснень, ульсь кувалготф шинь группаса  воспитателькс.
—Школати максонь 36 киза,—азозе Валентина Ивановна.—Иттнень кельгине, а синь кельгомазь монь. Тонафнине марнек Курташкать. Эрь кудса улихть учениконе.
Петяйкиттнень ниле идьсна. Стирьсна, Елена Борисовна, аделазе Н.П.Огарёвонь лемса Мордовскяй госуниверситетонь экономическяй факультетть. Семьянц мархта эряй Москуса. Колма цёрасна, Дмитрий и кафтасне Юрий и Александр, стане жа покодихть Москуса. Касыхть кота уноксна, сиренятнень гордостьсна и прянь шнафтома вастсна. Кеняртькшнихть тонафнемаса и лия тевса сатфксснонды.
Борис Михайлович и Валентина Ивановна тяни эряйхть кафонест. Но юкстафокс пряснон аф марясазь. Пяле Курташка раднядост, ялгадост. Аф юкснесазь идьсна, уноксна. Ведьгемонь кизонь иласнон мархта получасть пяк лама поздравления.
Петяйкиттне кельгсазь мокшень койхнень-обуцятнень. Вов ни лама киза серматфнесазь «Мокшень правда» газетать.
Кельгома Борис Михайлович и Валентина Ивановна! Седи ваксста поздравляндатядязь золотань свадьбантень мархта. Кеме шумбраши теенть и ламоняс эрямс!
 
И.Вешкин.
Снимкаса: Валентина Ивановна и Борис
Михайлович Петяйкиттне.

13.05.2019 №
 
 
 

 
НОВОСТИ

Ушедсь сёронь урядама пингсь

Эрь гектарста ули кочкаф 50 центнер сёра

 

Тяфтама ни велень эряфсь, фкя тевсь полафнесы омбоцеть. Нинге исяк республикань велень хозяйстватнень эса инь оцю мяль шарфневсь и водендафоль лама вий кормань анокламати,  тячи лама вастова кярьмодсть ни сёронь урядамати. Лихтезь паксятнень лангс эсь комбайнаснон и Рузаевскяй райононь «Агросоюз—Левженский» ООО-нь механизаторхне.

 

 

—Сёронь урядама пингти маладоме сембе ширде аноклафста,—азонды хозяйствань вятись, Мордовия Республикань велень хозяйствань Заслуженнай работниксь В.И.Сетин.—Комбайнатне пцтай сембе отт, мяльце касы мархтост работамс. Сёронь урядама пингть синь фалу паксясот, кой-кона участкатне ащихть кемоньшка вайгяльбень вастса и техникась мековасу аш месть панцемс. Марнек сёротне видефтольхть фкя тёжянь гектар лангса. Урожайсь пяк цебярь, эрь гектарста сяфтяма аф ведьгемоньда кржа центнер сёра. Кда кармай цебярь погодась, сембе  ня площаттнень  урядасаськ кафта-колма недяляста.

 

30.07.2020  № 29
 

МОРДОВИЯ РЕСПУБЛИКАНЬ ОЦЮНЯСЬ ВЛАДИМИР ВОЛКОВ ВАНОЗЕНЬ РЕСПУБЛИКАНЬ РАЙОТТНЕНЬ ЭСА СОЦИАЛЬНАЙ ОБЪЕКТТНЕНЬ СТРОЯМАСНОН КОРЯС РАБОТАТНЕНЬ МОЛЬФТЕМАСНОН

Краснослободскяй районца

 

 

24 июльста МР-нь Оцюнясь Владимир Волков ульсь Краснослободскяй районца, коса ванозе, кода мольфтевихть Бобылевские Выселки велеса «Комплексное развитие сельских территорий» программать коряс комплекснай компактнай строямать коряс проектть эряфс ётафтомац.

 

Проектть коряс арьсекшневи строямс спортивнай комплекс и  модань 132 участкаса эряма кутт. Бобылевские Выселки велесь ащи маласа Краснослободск ошти, сяс тя пцтай фкя агломерация.

 

Кода няезе Мордовиянь Оцюнясь, спортивнай сооружениять строямац мольфтеви сембе вийса и нльне графикта инголе. Республикаса тя фкя и сяка спортивнай объектсь, коса фкя вельхкс ала кармай ледовай арена, оцюфненди и иттненди бассейнат, тренажернай и фитнес-залхт. Лама функцияса спортивнай сооружениясь арай межрайоннайкс.

 

Кда сявомс проектть омбоце пяльксонц—комплекснай компактнай застройкать, тячиень шити площадкаса аделсеви газопроводонь и водопроводонь ётафтомась, тиф 1,4 вайгяльбень кувалмоса ки, лядыкс 1,7 вайгяльбесь—сай кизонь планца.

 

Владимир Волков путсь Краснослободскяй районть оцюнянц Алексей Буйновонь инголе задача—сяда виияфтомс аноклаф  территорияса куттнень строямаснон, тяконь лувксса льготнай велень ипотекать вельде.
 

 

 
30.07.2020  № 29
 
 
 
 
 
 
 

ВЛАДИМИР СУШКОВ ВЕШСЬ СЯДА ЭРЕКЛАФТОМС ТЕФНЕНЬ И КЕМОСТА ВАНОМС КАЧЕСТВАТЬ МЕЛЬГЕ

6 июльста Мордовиянь Правительствань члеттнень мархта совещанияса ванондовсть национальнай проекттнень эряфс ётафтомаснон коряс кизефксне. Республикань Правительствать Председателец Владимир Сушков отмечазе, што социальнай ширде важнай кой-кона объекттнень эса заняф аф сатомшка ломаньда и аф марнек нолявихть тевс графикнень ванфтозь работатнень пяшкотькшнеманкса строительнай механизматне.

 

 
Ётай ваймама шитнень региональнай кабминонь премьер-министрсь ванозень Идень республиканскяй клиническяй больницять хирургическяй корпусонц и Республиканскяй онкологическяй диспансерть поликлиническяй отделениянц, конат строявихть «Здравоохранение» нацпроектть рамкаса, строямаснон. Владимир Сушков мярьгсь работамс        объекттнень эса сутканьберьф и кемоста ваномс тиеви работатнень качестваснон мельге. Тяфта жа Правительствать Председателец мярьгсь анокламс уликс онкодиспансерть зданиянц петеманкса сембе документациять. Тядде нацпроектть рамкаса кармайхть одкстоптфт 70 фельдшерско-акушерскяй пункт и фкя врачебнай амбулатория.

 

09.07.2020
 
 

 

 

Яндекс.Метрика Яндекс цитирования Rambler's Top100
Учредительхие:
Главнай редакторсь: И. С. Лушкин