Поиск по сайту: 
 

Архив
 март 
 2024 
пн вт ср чт пт сб вс
    123
45678910
11121314151617
18192021222324
25262728293031

 
 

 

НАРОДТЬ ПОДВИГОЦ АФ ЮКСТАВИ

 

Молихнень ёткста лоткафттама фкя эряфкшу аля.  Знакомондатама.

 

—Алексей Иванович Сидорин, трудонь ветеран. Эряскоттама тячиень парадть ванома унокозень Юриень мархта,—мярьгсь сон.

 

—Мезе астада тячиень шить колга?

 

—Победань шись—тя минь национальнай гордостеньке, оцюдонга оцю праздниконьке. Сембе содасаськ, кодама питнеса сатф Победась—миллиотт ломаненьке лядсть боень паксятненди. Синь ашесть мрда куду, но минь фалу мяляфтсаськ синь,—азозе ветеранць. Сон аф ламода лоткась, а сяльде поладозе:

 

—Кода аф ужяль, кой-кона странань «пропагандисттне» стаки тяряфнихть велянь ширде няфтемс историять, валхтомс ответственностть сятнень лангста, кит ушедозь мировой омбоце войнать, кирьфтамс странаньконь роленц фашистскяй захватчикнень  тапамаса,—сялдозь-апряказь корхтай Алексей Иванович.—Но синь тевсна аф лиси. Видешись киндивок аф сяськови,—меколи мярьгсь сон.

 

Азозе, кода керозе. Афкукс, сембе  мирса содаф, што именна минь странаньке путозе инь оцю путксть Великай Победати, аралазе мирть фашизмать эзда. Человечествась нинге ашезь сода тяфтама массовай героизма, доблесть, мужества и воляши победати, конань няфтезь минь воиноньке, минь народоньке врагть каршес тюремста. Победась лац няфтезе и минь странань нароттнень ялгаксшиснон и брадокс улемаснон. Гитлеровскяй захватчикнень каршес героическяйста тюрсть Родинаньконь сембе нациянь и народностень воинонза.

 

Лац содафт лемсна и Мордовиять цёранзон: армиянь генералть Максим Афанасьевич Пуркаевонь, генерал-полковникть Иван Васильевич Болдинонь, легендарнай летчикть, Советскяй Союзонь Геройть Михаил Петрович Девятаевонь и ламотнень лиятнень. Мокшэрзянь крайса шачф 110 тежянь ломанць казьф орденца и медальса, 124 ломанць казьф оцюдонга оцю казнеса—Советскяй Союзонь Героень лемса.

 

Кеняртьфти и авартьфти Победань шись. Эслек шудихть сельмоведьсна сятнень, кит оду мзярдонга аф няйсазь войнаста апак мрдак мала ломаньцнон. Вов и тячивок, 9 майста, Саранск ошень Победань площадьса перьфпяльге мзолфт, пеедемат и сельмоветть.

 

 
Пингсь малаткшни 10  часттненди. Великай Отечественнай войнаса шавф воиттненди памятникть вакссот Мордовия Республикань Оцюнясь В.Д.Волков, МР-нь Государственнай Собраниять Председателец В.В.Чибиркин, МР-нь Правительствать Председателец В.Ф.Сушков, Мордовия Республикать эзга главнай федеральнай инспекторсь М.С. Сезганов, Саранск ошень мэрсь П.Н.Тултаев.

 

И вов сась торжественнай минутась. Площадть вельхксса кулеви Кремлевскяй      куранттнень шавомасна. Ушедови «Сюконятама великай ся кизотненди» лем ала митингсь-реквиемсь.

 

Микрофонть ваксс малады Саранск ошень мэрсь П.Н.Тултаев. Сон панчсы митингть и максы вал республикань Оцюняти В.Д.Волковонди.

 

—Кельгома фронтовикт, ветератт, офицерхт и военнослужащайхть, Мордовиянь эряйхть и инжихть, минь тячи мархтонт васьфнесаськ странаньконь главнай праздниконц—Победань шить,—корхтаманц ушедомста мярьгсь Владимир Дмитриевич.—Тя шись арась пяк питникс Мордовиянь эрь семьяти, эздонк кажнайти, а валда мялямсь Победать колга тиендьсамазь сядонга малакс и сядонга виикс.

 

Республикань Оцюнясь азонды пефтома благодарность сембонди сятненди, кит сатозь тя Великай Победать. Эсь выступлениясонза лятфтазе и Мордовиянь эряйхнень путксснон сяськомати. 246 тежянь воин тушендсь фронту. Пяледа ламосна эздост ашесть мрда меки куду.

 

Лямбе валхт азфтольхть и тылонь труженикнень лемс, кит эсь лафтуснон лангса кандозь сембе стакатнень-сталмотнень.

 

Войнань участникнень лемста Победань шить мархта сембонь седи ваксста поздравляндазень Великай Отечественнай войнань ветеранць, 93 кизоса А.Д.Пенко.

 

—Кода войнань участник,—мярьгсь сон,—эсь лангсон варжайне войнань сембе стакатнень-сталмотнень. Участвондань Ленинградскяй и Сталинградскяй битватнень эса, Белоруссиять, Польшать фашисттнень эзда воляс нолдамаса, пачкодень мянь Берлину. Минь долгоньке мзярдонга аф юкстамс тянь колга и пачфтемс семботь тянь оттненди.

 

Од ломаттнень лемста ветераттненди благодарностень валхт азсь Саранск ошень 40№ школань 9-це классонь учениксь Иван Давыдов.

 

Кулеви траурнай музыка. 1941-1945 кизотнень Великай Отечественнай войнаса шавф воиттненди памятникти путовихть венокт и панчфт.

 

—Парадть, кона лемтьф Великай Победать 74 кизонь топодеманцты, участниконза строяфт!—кайги микрофонца.

 

Парадса примась участия сядот ломань—МЧС-нь,      МР-нь МВД-нь, СОБР-нь, ОМОН-онь сотрудникт, а стане жа кадетт, ушаковецт, юнармеецт.

 

Тяда меле митингонь участникне тусть Саранск ошень Мемориальнай калмотненди.

 

* * *

 

Кода содаф, Великай Отечественнай войнань солдаттнень колга мяляфтомань символкс арась «Бессмертный полк» акциясь. 9 майста марса сембе странать мархта Саранск ошень ульцятнень эзга ламотне кандозь мала ломаньцнон фотографияснон—ся пелькс кизотнень участникснон и  свидетельснон.

 

Победань шись шумордавсь пяк цебярь праздничнай салютса.

 

И.САРГИН.

 


 

 
НОВОСТИ
 

МОРДОВИЯСА ЛОТКАФТФ МАСКАНЬ КАННЕМАНЬ РЕЖИМСЬ

09.06.2022  № 22
 

НАЦПРОЕКТТНЕНЬ—ЭРЯФС!

Мордовиянь Правительствась сяда тов мольфтьсы работать национальнай проекттнень эряфс ётафтоманкса, конатненди ки макссь странань Президентсь Владимир Путин. Республикань Оцюнять ширеса совещанияса корхтафоль основной федеральнай и республиканскяй программатнень эряфс ётафтомаснон колга. Мольфтеви работать квалма азондсть вице-премьерсь Игорь Чадов, МР-нь строительствань и архитектурань министрсь Алексей Гришакин, МР-нь транспортть и дорожнай хозяйствать коряс Госкомитетть председателец Валерий Кандрин, МР-нь велень хозяйствань и продовольствиянь министрсь Александр Кечайкин, МР-нь вирень, охотничьяй хозяйствань и природопользованиянь министрсь Алексей Ларькин.

 

Мордовиянь Оцюнясь путсь задача кирдемс кеме контроль ала строямань графикнень пяшкотькшнемаснон. Васендакиге корхтамась мольфтевсь социальнай инфраструктурань объекттнень колга. Тяфта, ванфтольхть кизефксне, конат сотфт Саранскяйса Кировонь ульцяса 250 вастонди идень садть и Тавлинскяй набережнайса 1450 вастонди школать строямаснон шумордамасна.

 

09.06.2022  № 22
 

ЁТАФТОВСЬ АНТИКРИЗИСНАЙ ШТАБТЬ ЗАСЕДАНИЯЦ

2 июньцта Мордовияса ётафтовсь экономикать ширенц кирдеманц и кемошинц ванфтоманц коряс антикризиснай штабть заседанияц, коса ванондовсть республикаса уликс тефне. Азфоль, што Россиянь Правительствась сяда тов мольфти работа санкциятнень эзда экономикать араламанц коряс законодательнай базань тиеманкса. Региоттнень ширень кирдемасна и синь финансовай кемошиснон кемокстамасна—главнай направлениятнень эзда фкясь. Путф подпись РФ-нь Правительствать постановлениянц алу, кона максси возможность кирьфнемс пандоматнень бюджетнай кредиттнень коряс, конат сявфт дефицитть пяшкодеманкса.

 

Майста нолдаф тевс важнай продукциянь импортёрхнень специальнай льготнай кредитованиянь программасна. Тянкса федеральнай бюджетста нолдаф 37 миллиардта лама цалковай. Тяфтама ширень кирдемать сюнеда бизнести ули кода меки  ладямс товаронь рамсемать, конат мзярс аф нолявихть Россиять территорияса, и сяда тов мольфтемс сембе пингонь работать.
 

09.06.2022  № 22
 
 

Одкстоптови общественнай транспортсь

28 майста Саранскяйса Советскяй площадьса Мордовиянь Оцюнясь Артём Здунов ванозень пассажирскяй од автобуснень, конат работайхть газса. Мордовияти тя общественнай од видонь транспорт, кона арьсекшневи нолдамс тевс республикань транспортнай предприятиятнень подвижнай составснон одкстоптоманкса.

Автобусонь ноляйхне няфтезь средняй и оцю классонь техникать. Артём Здунов ванозень автобуснень эса тяниень пингонь салонть и водителень кабинаса оборудованиять.

«Газса работай техникась сяда ванфтсы экологиять и аф веши оцю карьхцьт. Тяфтама транспортть эвондамац максы инфраструктурати касома-виияма—ков сяда лама тяфтама видонь транспортта, тов сяда лама кармай заправочнай станцияда. Тянь мельге сай пингсь»,—китькстазе Мордовиянь Оцюнясь.

Сембе автобусне стане жа тифт усксемс физическяй ширде ограниченнай возможность мархта ломаттнень. Тяниень пингть Саранск ошса ули автомобильнай газонаполнительнай компрессорнай фкя станция.

02.06.2022  № 21
 

Ревакцинация COVID-ть эзда эряви ётамс сембонди

Мордовиянь Оцюнять Артём Здуновонь председательстванц ала 27 майста ётафтовсь Мордовияса коронавируснай инфекциять инголдаманц и келемоманцты кить персеманц коряс оперативнай штабть заседанияц.

Отмечафоль, регионца ванфтови ковидса одс сярядихнень лувксснон киремац—ётай недялять тя ульсь 30 ломань шити.

«Эряви сяда тов мольфтемс ломаттнень вакцинацияснон и ревакцинацияснон коряс работать. Тянь мельге ванома кода муниципальнай образованиянь оцюнятненди, стане и предприятиянь и бизнес-структурань руководительхненди. Тяниень пингть ётафтовихть ЕГЭ-тне, сяс инфекцияда инголдамань мератненди эряви шарфнемс башка мяль»,—мярьгсь региононь руководительсь.

МР-нь Правительствать Председателенц заместителец Галина Лотванова азозе, што республикань медицинскяй учреждениянь стационархненди тона недялять эрь шиня пачфневсь 20 малава ломань. Сёлкф нинге 50 ковиднай койка-вастсь, стационарса пчкси 203 ломань, конатнень эзда пялесна—60+ кизосот.

02.06.2022  № 21
 

Экономикать виияфтоманцты—башка мяль

Мордовиянь Оцюнясь Артём Здунов 27 майста ётафтозе республикань экономикать ширень кирдеманц и кемошинц ванфтоманц коряс антикризиснай штабть заседаниянц.
Региононь руководительсь мярьгсь, што Россиянь Правительствась сяда тов примси решеният, конат эрявкснихть тячиень аф тёждя пингть экономикать работанц лац ладяманцты.
 
«Васенце очередень тевонь мольфтемань федеральнай планти сувафтф нинге 23 кизефкс. Фалу эвондакшнихть од механизмат, од возможностть. Тейнек эряви синь сяда лац нолямс тевс,—мярьгсь Артём Здунов.—Кепотьксонди, Россиянь Правительствась дополнительнайста нолдай 3 миллиартт цалковай региоттнень эса спортивнай инфраструктурать виияфтоманкса. Эряви кенеремс тиемс заявка ня программатненди и получамс финансирования».

Тяфта жа арьсекшневихть отечественнай программнай обеспечениянь ширень кирдемань од механизмат. Республикань цифровой виияфтомань министерствати и региональнай IT-компаниятненди мярькф активнайста примсемс участия ня процесснень эса.

02.06.2022  № 21
 
 

Артём Здунов встретился с многодетными семьями

Глава Мордовии Артём Здунов провел встречу с многодетными семьями республики – её приурочили к Международному дню защиты детей.

Встреча состоялась в Доме Республики в теплой, почти семейной обстановке, за чашкой чая. В ней участвовали вице-премьер Галина Лотванова и министр социальной защиты, труда и занятости населения РМ Игорь Князьков.

«Я хочу от всей души поблагодарить всех многодетных родителей за ваш нелегкий труд, достойный глубокого уважения и общественного признания, - сказал Артём Здунов. – Вы взяли на себя большую ответственность. Понимаю, сколько дел в большой семье, какая у вас загруженность, но прошу вас, чтобы за этими делами вы не забывали разговаривать со своими детьми. Обсуждайте с ними, что происходит в мире, что было много лет назад. Нам важно, чтобы дети выросли настоящими людьми, чтобы любили свою семью и свою Родину. Это наша с вами общая задача. Вы выполнили и перевыполнили свою демографическую программу, спасибо вам за это, теперь дело за нами».

В Мордовии около 8 тысяч многодетных семей, в которых воспитываются более 25 тысяч детей.

25 мая Президент России Владимир Путин на заседании президиума Государственного Совета, посвящённого вопросам социальной поддержки, подчеркнул, что многодетная семья должна быть ценностным ориентиром для всего общества и поддерживаться государством. Президентом поставлена задача сделать всю систему поддержки семьи целостной, последовательной, понятной и эффективной.
02.06.2022