Поиск по сайту: 
 

Архив
 июнь 
 2019 
пн вт ср чт пт сб вс
     12
3456789
10111213141516
17181920212223
24252627282930

 
 

 

Национальная тематика

КОРХНЕДА ИДЕНТЕНЬ МАРХТА МОКШЕКС

Лариса Васильевна работай Саранск ошень 32№ школаса. Тядде примась участия «Мокшень и эрзянь кялень инь цебярь учительсь» пялькстомаса. Арась призеркс Саранск ошень округонь конкурсса «Учитель-организатор» номинацияса. Л.В.Ишаевать учениконза занцихть призовой вастт эрь кодама пялькстомаса, олимпиадаса. Кепотьксонди, тядде «Мелодия родного языка», «Пою Мордовию мою» стихонь конкурсса сонь учениконзон ёткста лиссть 4 призерхт. Тя пара вайме учительницать мархта корхнемста шарьхкодевсь, Лариса Васильевна музе эсь вастонц эряфса, седишкава кельгсы эсь тевонц, эсь кяленц, народонц.

 

—Лариса Васильевна, азонтт учителень тевцень колга? Мес кочкайть тя кить?

 

—Ёт шабакс монь ульсь оцю мялезе арамс тонафтыкс. Класснай руководителезе Мария Семеновна Терёшкинась вятезе школаса мокшень кяльть и литературать. Лятфтаса, кода сон ётафнесь мялень салай урокт, инксонза тейневок педезь педсь кельгомась учителень профессияти. Вейхксоце класста меле тунь тонафнема Зубова Полянань педучилищав, конань аделайне якстерь дипломса. Меле тонафнень Саранскяйса, аделайне Н.П.Огарёвонь лемса МГУ-ть, а меле—аспирантурать. Мялезе азомс сюконямань валхт тядязти, сон тейне ламоса лездсь.

 

—Кодама стакат-сталмот васьфнят мокшень кяльть рузонь шабатненди тонафтомаса?

 

—Мекольдень пингть пяк лама мяль шарфневи мокшень и эрзянь кяльхненди, сембе минценнеть ванфтоманцты. Тя эрявикс тев! Кепотьксонди, школатненди максфт тяниень пингонь учебникт, пособият. Мон вов ни 8 кизот тонафтан школаса мокшень кяльти рузонь шабат. Да, аш кода мярьгомс, што сембе шабатне руст, верс коре ламонцне, а тяфтамда 40 процентть малава, мокшет и эрзят. Аньцек семьяса, тейне аф шарьхкодеви туфталонкса, аф корхнихть  шабать мархта шачема кяльса.  Тя оцюдонга оцю эльбятькс!  Кда минь кудса аф  карматама корхнема шабаньконь мархта  мокшекс, кодамовок     учителенди  синь аф      тонафтовихть.   Кда шабась ашезь куленде,
кода кайги кяльсь, мархтонза кивок ашезь корхне мокшекс, сон мяльс сявсы тя кяльть,  кода иностраннай кялень, но коданга аф родной. Содаф, кода иностраннай кяльть афолить тонафне, кда аш «языковой среда», сон аф тонафневи лац. Сяс, монь койсон, аньцек учителень вийса шабати кяльсь аф тонафтови. Конашкава улель пара, кда мокшень тядятне-алятне улельхть сяда ответственнайхть, афольхть визде корхнемс шабаснон мархта родной кяльса. Содалесте, конашкава оцю мяльсна, интерессна шабатнень, инь пяк начальнай класса, мокшень кяльть тонафнеманцты. Синь вии мялямсна, курокста мяляфнесазь валхнень, тонафнесазь стихнень. Сяс, кда тядятне-алятне шарьхкодьсазь родной кяльть питнишинц, кодамовок стакашит кяльть тонафнемаса аш.

 

—Лариса Васильевна, а кода тонцень иттне, корхтайхть мокшекс?

 

—Монь кафта стирне, Валерияти 14 киза, Алёнати—5. Стирне содасазь кяльть. Валерия эрь кизоня пара мяльса примси участия мокшень кялень олимпиадаса, сявонди призовой вастт. Алёнать мяленц салсесазь мазы мокшень щапне, коль кизефни кода инголи эрясть мокшетне, кодамот ульсть иднятнень налхкшсна. Монь мирдезе мокша. Сяс кодамовок перяфкс семьясонк шачема кяльса фкя-фкянь мархта корхнемати аш.

 

—Спасиба!

 

Мокшень ломатть, эрьда ванфтсаськ кяленьконь, вдь тя козяшись максф тейнек Шкайть эзда!

 

Т.ПЕТРОВА.

 


17.05.2019 №
 
 
 

 
НОВОСТИ
 
 

Исавелети—300 киза

Эрь кизоня Тройцянь шиня Инсарскяй райононь Исавели кочксеви лама ломаньда. Тядде тяза сашендсь кафта тежянть малава инжи странать сембе уженястонза: Москуста, Санкт-Петербургста, Самараста, Краснодарста, Коми Республикаста, лия областтнень и республикатнень эзда.
Тядде вели ломаттнень пуроптозень аф аньцек Тройцясь, ня шитнень Исавелети топодсь 300 киза. Велесь козя эсь историянц, коензон, обуцянзон мархта, тяса шачсь лама содаф ломаньда. Нят: ученайсь, писательсь, драматургсь, виднай общественнай деятельсь Г.Я.Меркушкин, Мордовия Республикань Почетнай Гражданинць, Российскяй Федерациянь Президентть видеса финно-угорскяй  нароттнень сембе масторонь конгрессть спецпредставителец Н.И.Меркушкин, медицинскяй наукань докторхне В.А.Базаев и М.Д.Кузьмин, лама лия содаф ломань. Велесь инжихнень васьфтезень эсь мазышинц мархта. Тяса лама од кудта, аф кунара панчфт социальнай центра, идень сад, од ФАП, строяфт спортивнай площадкат, культурань объектт, велеть мазопнесы Шкаень кудсь. Ламонцне илас састь идьснон, унокснон мархта, ломаттне кштисть, морасть, седисна и ваймосна пяшксель кенярдемада. Фкя-фкянь мельге сцена лангста кайгсть поздравленият, илань вятихне   азондсть велеть историянц колга, лятфтазь сятнень лемснон, кит аралазь Родинать вракнень эзда. Лама велеряй фронтста ашесть мрда, максозь эряфснон минь инксонк.
20.06.2019  № 24
 

Минь поздравленияньке

13.06.2019  № 23
 
 
 
 
 

«Рузаевкаса мольфтевихть анокламатне стекольнай заводть панжеманцты»

Мордовиянь Оцюнясь Владимир Волков:
Мордовиянь Оцюнясь Владимир Волков 29 майста ётафтсь рабочай васедема Рузаевскяй райононь руководительть Вячеслав Кормилицынонь мархта. Ванондовсть территориять социально-экономическяй виияфтоманц коряс кизефксне. Тяконь лувксса корхтамась мольфтевсь социальнай объекттнень строямаснонды анокламать колга: Рузаевкаса Паровознай ульцяса 160 вастонди идень садть, Татаронь Пишляса 250 вастонди школать, фельдшерско-акушерскяй пункттнень.
Ванондовсть районца водоснабжениянь и водоотведениянь систематнень одкстоптомаснон, а стане жа «Безопасные и качественные автомобильные дороги» национальнай проектть эряфс ётафтоманц рамкаса китнень строямаснон и петемаснон коряс кизефксне. Тядде, кода отмечазе Вячеслав Кормилицын, петевихть-одкстоптовихть 13 вайгяльбень кувалмоса кит.
06.06.2019  № 22
 

Аделсеви «Мокшень правдати» сёрматфтомась

Эряскодода!
Кельгома ялгат!
2019 кизоть омбоце пяленцты «Мокшень правдати» сёрматфтомать шумордамс ляткшни аньцек кафта недялят.  И ули тячи мяленьке нинге весть азомс нюрьхкяняста: мес именна «Мокшень правда» эряви тинь семьянтенди.
Кода аф ужяль, мокшэрзятнень лувкссна стаки кири. А «Мокшень правдась» семботь тиендьсы сянкса, штоба аф нолдамс тянь. Кода ванфтомс и виияфтомс кяленьконь, культураньконь, аф юкстамс эсь коеньконь-обуцяньконь—вов мезть колга мольфтеви корхтамась сонь лопанянзон эса. Пцтай эрь номерса макссевихть материалхт мокшэрзятнень историяснон, содаф ломаньцнон колга, азонкшневи народоньконь арьсеманзон и пичефксонзон колга.
«Мокшень правдаса» макссевихть медицинскяй темас советт и рекомендацият, советт перень сёронь касфнихненди и жувата мельге якайхненди. Эрь номерса ули юморонь и сатирань уженя, рузонь кяльса печатлакшневихть недялянди ламоц телевизионнай программатне.
«Мокшень правдась» республиканскяй газетатнень эзда фкя инь интереснай и уцез газетась. Сон нльне сяда уцез ламоц «районкатнень» коряс.
Теенза тяшфтемать питнец:
6 ковонди—336 цалковай,
3 ковонди—168 цалковай.
Газетать индексоц П4719.
 Эряскодода почтав. Тоса учихть эсонт. Пингсь содай ётаманц.
06.06.2019  № 22
 

 

 

Яндекс.Метрика Яндекс цитирования Rambler's Top100
Учредительхие:
Главнай редакторсь: И. С. Лушкин