Поиск по сайту: 
 

Архив
 июнь 
 2019 
пн вт ср чт пт сб вс
     12
3456789
10111213141516
17181920212223
24252627282930

 
 

 

События

Сергей Васильевич Кинякин

С.В.Кинякинонь тяштьфонза печатлакшневома ушедсть 1957 кизоста сявомок: «Миронь гуленя» сонь васенце стихотворенияц эвондась «Мокшень правда» газетаса. Фронтса шавф боецонь цёрать и сяда товолдоньге произведениянзон эса оцю мяль шарфтфоль тя святой темати—мирть ванфтоманцты.
1967 кизоня Мордовскяй книжнай издательстваса лиссь «Эряфсь и кельгомась» стихонь васенце книгац, конань эса няфтевсть Сергей Васильевичень поэзиянь башка ширенза, сонь художественнай стиленц эсь лацоньшиц, конат сяда тов арасть поэтическяй сембе творчестванцты главнайкс. Сяда товолдонь кизотнень мокшень кяльса лиссть «Инь мазысь» (1970 к.), «Кизот-вайгяльбет» (1973 к.), «Ялгаксшинь седь» (1976 к.), «Шачень эряма павазукс» (1987 к.) поэтическяй сборниконза. Рузонь кяльса лиссть «Тревожусь» (1971 к.), «На свете нет тебя дороже» (1975 к.), «Первопроходцы» (1977 к.) стихонь и поэмань сборниконза, мокшень и рузонь кяльса «Сизеф алашань вайгяль» («Голос уставшей лошади», 1977 к.)
С.В.Кинякинонь стихонь произведениянзон темасна пяк келихть. Авторть мялень шарфтомань башка темац—Родинать и родной крайть, конатнень коряс мезеньге питни аш, величественнай образсна.
Лувить мяленц саласазь стихотворениянза, конат лемтьфт войнань пингонь идькс пингти. Эсост цёраняти войнать марямац няфтьф пяк ризнафтыста. «Годы-версты» поэмась лемтьф од поколенияти, конат сяда тов мольфтьсазь тядяснон-аляснон тевснон трудовой фронтса.
С.В.Кинякин—СССР-нь Писателень союзонь член (1971 кизоста сявомок), Мордовия Республикань Государственнай гимнать текстонц автороц.
1987 кизоня С.В.Кинякинонди ульсь максф «Мордовскяй АССР-нь Заслуженнай поэт» почётнай лем, сон казьф Почётонь орденца (1998 к.), Мордовия Республикань Государственнай премиянь лауреат (2005 к.). 2012 кизоня С.В.Кинякинонди максфоль «Мордовия Республикань Народнай поэт» почётнай лемсь.
Мордовия Республикась юмафтсь цебярьдонга цебярь поэт и ломань. Сергей Васильевич Кинякинонь колга валда мялямсь сембе пингс ляды минь седисонк.
В.Д.Волков, В.В.Чибиркин, В.Ф.Сушков, М.С.Сезганов, А.А.Богатов, Г.А.Лотванова, П.Н.Тултаев, В.А.Калугин, А.М. Чушкин, С.С.Сурдин, А.М.Доронин, Н.В.Кошелева, И.И.Келин, В.М.Лобанов, Ю.А.Мишанин, В.И.Брындина.

24.05.2019 №
 
 
 

 
НОВОСТИ
 
 

Исавелети—300 киза

Эрь кизоня Тройцянь шиня Инсарскяй райононь Исавели кочксеви лама ломаньда. Тядде тяза сашендсь кафта тежянть малава инжи странать сембе уженястонза: Москуста, Санкт-Петербургста, Самараста, Краснодарста, Коми Республикаста, лия областтнень и республикатнень эзда.
Тядде вели ломаттнень пуроптозень аф аньцек Тройцясь, ня шитнень Исавелети топодсь 300 киза. Велесь козя эсь историянц, коензон, обуцянзон мархта, тяса шачсь лама содаф ломаньда. Нят: ученайсь, писательсь, драматургсь, виднай общественнай деятельсь Г.Я.Меркушкин, Мордовия Республикань Почетнай Гражданинць, Российскяй Федерациянь Президентть видеса финно-угорскяй  нароттнень сембе масторонь конгрессть спецпредставителец Н.И.Меркушкин, медицинскяй наукань докторхне В.А.Базаев и М.Д.Кузьмин, лама лия содаф ломань. Велесь инжихнень васьфтезень эсь мазышинц мархта. Тяса лама од кудта, аф кунара панчфт социальнай центра, идень сад, од ФАП, строяфт спортивнай площадкат, культурань объектт, велеть мазопнесы Шкаень кудсь. Ламонцне илас састь идьснон, унокснон мархта, ломаттне кштисть, морасть, седисна и ваймосна пяшксель кенярдемада. Фкя-фкянь мельге сцена лангста кайгсть поздравленият, илань вятихне   азондсть велеть историянц колга, лятфтазь сятнень лемснон, кит аралазь Родинать вракнень эзда. Лама велеряй фронтста ашесть мрда, максозь эряфснон минь инксонк.
20.06.2019  № 24
 

Минь поздравленияньке

13.06.2019  № 23
 
 
 
 
 

«Рузаевкаса мольфтевихть анокламатне стекольнай заводть панжеманцты»

Мордовиянь Оцюнясь Владимир Волков:
Мордовиянь Оцюнясь Владимир Волков 29 майста ётафтсь рабочай васедема Рузаевскяй райононь руководительть Вячеслав Кормилицынонь мархта. Ванондовсть территориять социально-экономическяй виияфтоманц коряс кизефксне. Тяконь лувксса корхтамась мольфтевсь социальнай объекттнень строямаснонды анокламать колга: Рузаевкаса Паровознай ульцяса 160 вастонди идень садть, Татаронь Пишляса 250 вастонди школать, фельдшерско-акушерскяй пункттнень.
Ванондовсть районца водоснабжениянь и водоотведениянь систематнень одкстоптомаснон, а стане жа «Безопасные и качественные автомобильные дороги» национальнай проектть эряфс ётафтоманц рамкаса китнень строямаснон и петемаснон коряс кизефксне. Тядде, кода отмечазе Вячеслав Кормилицын, петевихть-одкстоптовихть 13 вайгяльбень кувалмоса кит.
06.06.2019  № 22
 

Аделсеви «Мокшень правдати» сёрматфтомась

Эряскодода!
Кельгома ялгат!
2019 кизоть омбоце пяленцты «Мокшень правдати» сёрматфтомать шумордамс ляткшни аньцек кафта недялят.  И ули тячи мяленьке нинге весть азомс нюрьхкяняста: мес именна «Мокшень правда» эряви тинь семьянтенди.
Кода аф ужяль, мокшэрзятнень лувкссна стаки кири. А «Мокшень правдась» семботь тиендьсы сянкса, штоба аф нолдамс тянь. Кода ванфтомс и виияфтомс кяленьконь, культураньконь, аф юкстамс эсь коеньконь-обуцяньконь—вов мезть колга мольфтеви корхтамась сонь лопанянзон эса. Пцтай эрь номерса макссевихть материалхт мокшэрзятнень историяснон, содаф ломаньцнон колга, азонкшневи народоньконь арьсеманзон и пичефксонзон колга.
«Мокшень правдаса» макссевихть медицинскяй темас советт и рекомендацият, советт перень сёронь касфнихненди и жувата мельге якайхненди. Эрь номерса ули юморонь и сатирань уженя, рузонь кяльса печатлакшневихть недялянди ламоц телевизионнай программатне.
«Мокшень правдась» республиканскяй газетатнень эзда фкя инь интереснай и уцез газетась. Сон нльне сяда уцез ламоц «районкатнень» коряс.
Теенза тяшфтемать питнец:
6 ковонди—336 цалковай,
3 ковонди—168 цалковай.
Газетать индексоц П4719.
 Эряскодода почтав. Тоса учихть эсонт. Пингсь содай ётаманц.
06.06.2019  № 22
 

 

 

Яндекс.Метрика Яндекс цитирования Rambler's Top100
Учредительхие:
Главнай редакторсь: И. С. Лушкин