Поиск по сайту: 
 

Архив
 март 
 2024 
пн вт ср чт пт сб вс
    123
45678910
11121314151617
18192021222324
25262728293031

 
 

 

Российскяй нациянь нароттнень иласта

«Луганяса келунясь»—Славянскяй письменностень и культурань шиса!
Российскяй Федерациянь Президентть «Славянскяй письменностень и культурань шить праздновандаманц колга» 2010 кизонь Указонц вешфксонзон коряс, эрь кизоня 24 майста Россиянь эрь субъектса тя илать лемс ётафневихть праздничнай мероприятият. Инь оцю сатфксне, конат арьсевихть сатомс синь вельдест,—нят российскяй обществать ёткса и славянскяй лия нароттнень мархта сембе ширдень соткснень кемокстамасна, а тяфта жа—культурно-историческяй марстонь уликсшиньконь ванфтомац и виияфтомац.
Мордовия Республикать столицаса Славянскяй письменностень и культурань шить лемс 24 майста ётафтовсь оцю концерт. Сонь аноклазь марстонь вийса Мордовиянь Культурань, национальнай политикань и архивнай тевонь министерствась, Рузонь православнай церькавонь Саранскяй и Мордовскяй епархиясь, Всероссийскяй хоровой обществать Мордовскяй региональнай отделенияц.
Концертть ванома, кона ётась А.С.Пушкинонь лемса Культурань и ваймамань паркса, сась тёжяньда лама ломань. Ётксост ульсть культурань и образованиянь работникт, творческяй интеллигенциянь представительхть, рабочайхть, студентт, школаса тонафнихть и  Саранск ошень инжихть.
Сембонь синь Мордовия Республикань Оцюнять В.Д.Волковонь лемста Славянскяй письменностень и культурань шить мархта лямбоста поздравляндазень культурань, национальнай политикань и архивнай тевонь министрсь А.М.Чушкин. Эсь выступлениясонза Анатолий Михайлович тяфта жа макссь оцюдонга оцю питне тя илать духовнай потенциалонцты российскяй нациянь нароттнень ёткса межкультурнай, межнациональнай и межрелигиознай соткснень кемокстамаса. Министрть мяленц коряс, тяфта лиссь сяс, мес Славянскяй письменностень и культурань шись арась эсь илакс российскяй нациянь сембе нароттненди, аф ваномок сянь лангс, кодама культурань или религиознай конфессиянь ломанькс синь лувондсазь эсь пряснон.
Тянь тяфта жа ули кода азомс мокшэрзянь народть колга. Сяс, улема, киньге ни аф дивандафтсазь мокшень и эрзянь тя и кунардонь пингонь моротне, конат кармайхть кайгома Славянскяй письменностень и культурань шити лемтьф концертса.
Мельганза концертс пуромфнень Славянскяй письменностень и культурань шить мархта Саранскяй и Мордовскяй митрополитть Зиновиень лемста тяфта жа лямбоста поздравляндазень иерейсь Николай Овсянников. Тяка пингть, сон тердезень пуромфнень нинге весть лятфтамс сятнень, конат эсь духовнай тевснон вельде пуроптозь-арьсезь тя илать—Славянскяй письменностень и культурань шить. Нят—равноапостольнай святойхне Кирилл и Мефодий, конат арьсезь-тиезь славянскяй азбукать и ётафтозь тя кяльти Библиять, и конатнень лемс Рузонь православнай церькавонь эрь храмса 24 майста ётафневихть праздничнай службат. И тейнек, тячи эряйхненди, аф ваномок эсь национальностеньконь лангс, сембе вийса эряви ванфнемс и келепнемс Россиява ся духовно-культурнай уликсшить, конань тейнек казезь Шкайть милостенц коряс равноапостольнай святойхне Кирилл и Мефодий!
Тяда меле Славянскяй письменностень и культурань шить лемс ушедсь Мордовия Республикань хоровой коллектифнень праздничнай концертсна. Сонь репертуарстонза няевсь: Славянскяй письменностень и культурань шись арась афкукс эсь илакс республикаса эряй нароттненди. Мярьктяма, концертс пуромфнень мяльс пяк тусь «Луганяса келунясь» мокшэрзянь кунардонь пингонь, но, улема, тячивок инь содаф морось. А моразе сонь Лямбирь велень Школьнай хорсь.
Концертс сафнень мяльс тяфта жа тусь «Отче наш» молитвась, конань мокшень кяльс ётафтозе Мордовиянь содаф прозаиксь и драматургсь Валентина Мишанина. Моразе сонь Л.П.Кирюковонь лемса Саранскяй музыкальнай училищань Стирень хорсь.
Мельгаст зрительхненди мазы морот казсть Саранск ошень украинскяй моронь «Криниця» народнай, Саранскяй и Мордовскяй епархиянь своднай, Ичалковскяй райононь Кемля велень народнай, Мордовиянь государственнай камернай, республикань идень, ветеранонь и лия профессиональнай и народнай хорхне.
Концертта меле Всероссийскяй хоровой обществать Мордовскяй региональнай отделениянц председателец, Россиянь и Мордовиянь культурань Заслуженнай работниксь В.Н.Башкиров, азомок сюкпря сембе коллектифненди мялень салай концертонкса, казезень синь Всероссийскяй хоровой обществань Почётнай дипломса.
В.НЕСТЕРОВ.

 

 
НОВОСТИ
 

МОРДОВИЯСА ЛОТКАФТФ МАСКАНЬ КАННЕМАНЬ РЕЖИМСЬ

09.06.2022  № 22
 

НАЦПРОЕКТТНЕНЬ—ЭРЯФС!

Мордовиянь Правительствась сяда тов мольфтьсы работать национальнай проекттнень эряфс ётафтоманкса, конатненди ки макссь странань Президентсь Владимир Путин. Республикань Оцюнять ширеса совещанияса корхтафоль основной федеральнай и республиканскяй программатнень эряфс ётафтомаснон колга. Мольфтеви работать квалма азондсть вице-премьерсь Игорь Чадов, МР-нь строительствань и архитектурань министрсь Алексей Гришакин, МР-нь транспортть и дорожнай хозяйствать коряс Госкомитетть председателец Валерий Кандрин, МР-нь велень хозяйствань и продовольствиянь министрсь Александр Кечайкин, МР-нь вирень, охотничьяй хозяйствань и природопользованиянь министрсь Алексей Ларькин.

 

Мордовиянь Оцюнясь путсь задача кирдемс кеме контроль ала строямань графикнень пяшкотькшнемаснон. Васендакиге корхтамась мольфтевсь социальнай инфраструктурань объекттнень колга. Тяфта, ванфтольхть кизефксне, конат сотфт Саранскяйса Кировонь ульцяса 250 вастонди идень садть и Тавлинскяй набережнайса 1450 вастонди школать строямаснон шумордамасна.

 

09.06.2022  № 22
 

ЁТАФТОВСЬ АНТИКРИЗИСНАЙ ШТАБТЬ ЗАСЕДАНИЯЦ

2 июньцта Мордовияса ётафтовсь экономикать ширенц кирдеманц и кемошинц ванфтоманц коряс антикризиснай штабть заседанияц, коса ванондовсть республикаса уликс тефне. Азфоль, што Россиянь Правительствась сяда тов мольфти работа санкциятнень эзда экономикать араламанц коряс законодательнай базань тиеманкса. Региоттнень ширень кирдемасна и синь финансовай кемошиснон кемокстамасна—главнай направлениятнень эзда фкясь. Путф подпись РФ-нь Правительствать постановлениянц алу, кона максси возможность кирьфнемс пандоматнень бюджетнай кредиттнень коряс, конат сявфт дефицитть пяшкодеманкса.

 

Майста нолдаф тевс важнай продукциянь импортёрхнень специальнай льготнай кредитованиянь программасна. Тянкса федеральнай бюджетста нолдаф 37 миллиардта лама цалковай. Тяфтама ширень кирдемать сюнеда бизнести ули кода меки  ладямс товаронь рамсемать, конат мзярс аф нолявихть Россиять территорияса, и сяда тов мольфтемс сембе пингонь работать.
 

09.06.2022  № 22
 
 

Одкстоптови общественнай транспортсь

28 майста Саранскяйса Советскяй площадьса Мордовиянь Оцюнясь Артём Здунов ванозень пассажирскяй од автобуснень, конат работайхть газса. Мордовияти тя общественнай од видонь транспорт, кона арьсекшневи нолдамс тевс республикань транспортнай предприятиятнень подвижнай составснон одкстоптоманкса.

Автобусонь ноляйхне няфтезь средняй и оцю классонь техникать. Артём Здунов ванозень автобуснень эса тяниень пингонь салонть и водителень кабинаса оборудованиять.

«Газса работай техникась сяда ванфтсы экологиять и аф веши оцю карьхцьт. Тяфтама транспортть эвондамац максы инфраструктурати касома-виияма—ков сяда лама тяфтама видонь транспортта, тов сяда лама кармай заправочнай станцияда. Тянь мельге сай пингсь»,—китькстазе Мордовиянь Оцюнясь.

Сембе автобусне стане жа тифт усксемс физическяй ширде ограниченнай возможность мархта ломаттнень. Тяниень пингть Саранск ошса ули автомобильнай газонаполнительнай компрессорнай фкя станция.

02.06.2022  № 21
 

Ревакцинация COVID-ть эзда эряви ётамс сембонди

Мордовиянь Оцюнять Артём Здуновонь председательстванц ала 27 майста ётафтовсь Мордовияса коронавируснай инфекциять инголдаманц и келемоманцты кить персеманц коряс оперативнай штабть заседанияц.

Отмечафоль, регионца ванфтови ковидса одс сярядихнень лувксснон киремац—ётай недялять тя ульсь 30 ломань шити.

«Эряви сяда тов мольфтемс ломаттнень вакцинацияснон и ревакцинацияснон коряс работать. Тянь мельге ванома кода муниципальнай образованиянь оцюнятненди, стане и предприятиянь и бизнес-структурань руководительхненди. Тяниень пингть ётафтовихть ЕГЭ-тне, сяс инфекцияда инголдамань мератненди эряви шарфнемс башка мяль»,—мярьгсь региононь руководительсь.

МР-нь Правительствать Председателенц заместителец Галина Лотванова азозе, што республикань медицинскяй учреждениянь стационархненди тона недялять эрь шиня пачфневсь 20 малава ломань. Сёлкф нинге 50 ковиднай койка-вастсь, стационарса пчкси 203 ломань, конатнень эзда пялесна—60+ кизосот.

02.06.2022  № 21
 

Экономикать виияфтоманцты—башка мяль

Мордовиянь Оцюнясь Артём Здунов 27 майста ётафтозе республикань экономикать ширень кирдеманц и кемошинц ванфтоманц коряс антикризиснай штабть заседаниянц.
Региононь руководительсь мярьгсь, што Россиянь Правительствась сяда тов примси решеният, конат эрявкснихть тячиень аф тёждя пингть экономикать работанц лац ладяманцты.
 
«Васенце очередень тевонь мольфтемань федеральнай планти сувафтф нинге 23 кизефкс. Фалу эвондакшнихть од механизмат, од возможностть. Тейнек эряви синь сяда лац нолямс тевс,—мярьгсь Артём Здунов.—Кепотьксонди, Россиянь Правительствась дополнительнайста нолдай 3 миллиартт цалковай региоттнень эса спортивнай инфраструктурать виияфтоманкса. Эряви кенеремс тиемс заявка ня программатненди и получамс финансирования».

Тяфта жа арьсекшневихть отечественнай программнай обеспечениянь ширень кирдемань од механизмат. Республикань цифровой виияфтомань министерствати и региональнай IT-компаниятненди мярькф активнайста примсемс участия ня процесснень эса.

02.06.2022  № 21
 
 

Артём Здунов встретился с многодетными семьями

Глава Мордовии Артём Здунов провел встречу с многодетными семьями республики – её приурочили к Международному дню защиты детей.

Встреча состоялась в Доме Республики в теплой, почти семейной обстановке, за чашкой чая. В ней участвовали вице-премьер Галина Лотванова и министр социальной защиты, труда и занятости населения РМ Игорь Князьков.

«Я хочу от всей души поблагодарить всех многодетных родителей за ваш нелегкий труд, достойный глубокого уважения и общественного признания, - сказал Артём Здунов. – Вы взяли на себя большую ответственность. Понимаю, сколько дел в большой семье, какая у вас загруженность, но прошу вас, чтобы за этими делами вы не забывали разговаривать со своими детьми. Обсуждайте с ними, что происходит в мире, что было много лет назад. Нам важно, чтобы дети выросли настоящими людьми, чтобы любили свою семью и свою Родину. Это наша с вами общая задача. Вы выполнили и перевыполнили свою демографическую программу, спасибо вам за это, теперь дело за нами».

В Мордовии около 8 тысяч многодетных семей, в которых воспитываются более 25 тысяч детей.

25 мая Президент России Владимир Путин на заседании президиума Государственного Совета, посвящённого вопросам социальной поддержки, подчеркнул, что многодетная семья должна быть ценностным ориентиром для всего общества и поддерживаться государством. Президентом поставлена задача сделать всю систему поддержки семьи целостной, последовательной, понятной и эффективной.
02.06.2022