Поиск по сайту: 
 

Архив
 июнь 
 2019 
пн вт ср чт пт сб вс
     12
3456789
10111213141516
17181920212223
24252627282930

 
 

 

Письма из села

ВЕЛЕСЬ ШАМОНДЫ

Таколфтыть колга
Атюрьевскяй райононь Пичепулоня вели срхкань попутнай машинаса. Арды ялгане содаф ломатть. А.С.Девятаев трудендась ингольдень «Партизанский» совхозса. Ульсь оцюнякс «Клопинский» хозяйстваса. Покодсь Стрельникова велень поселенияса. Мзярдовок тевфтома ашезь лядонда и Н.А.Лушкин. Пичепулоняса шачсть, тяса и кондястсть.
—И арьсят велестонк киньге муят?—кизефнесамань А.С.Девятаев.
—А мес аф муян?! Тунда ломаттне перень тевса заняфт.
—Ся инголи тяфта ульсь. А тяни ни ломаттьке вели ашесть ляда. Финцне Москуса добувайхть, омбонцне кудстовок аф лисендихть.
И видецоль Андрей Сергеевичень. Школань курняста васьфтине кунардонь содафозень П.В.Савкинонь. Алясь нинге од, отькорь, но якай байдек вельде.
—Тят и сувсе,—мярьгсь тейне.—Курнясь шава, эрь кудса амбаронь замок повфтаф.
—Кали тяшка курняса кивок аш?
—Кивок аш.
—А косот ина ломаттне?
—Тячи «Газельня» Атерьста сашендсь. Финцне туфт тев мельге райцентрав. Омбонцне кяшендихть монь лацон инжихнень эзда, кяльге замокт кенкшезост повфнихть.
—Ожу-ка, Пичепулоняса ломаттне мзярдовок афолезь пякснекшне эсь кенкшснон.
—Тяфта ульсь. А тяни эсь эздот ушедат пелема.
Конашкава оцюволь Пичепулонясь. Сонь лемнезь «Ёмла Китайкс». Нинге аф кунара тястонь кафкса кизонь школаса 300-та ламоль шабада. А тяни школаса аш кашт моли. Сёлкф. Иттнень усксесазь Кяшалу.
—Пичепулоняса хуш мезевок ули?—кизефтине Савкинонь.
—Мезевок аш,—отвечась мокшалясь. А меле аф ламода арьсезевсь.
—Лавканяньке ули. Библиотеканьконь панчсесазь. Аньцек лувихне ни кодаптама, букватненьге юкстаськ. Лувомс сельмот эрявихть. Почтальонканьке газетат канни.
Пара хуш тяфта. Педагогическяй трудонь ветеранць  И.Ф.Брындин арьси, што Пичепулонять вандыец оцю кизефкс ала. Шабада кржа, школать сёлгозь. А мзяроль идьтост. Школати мокшалясь макссь ведьгемоньда лама киза. Тонафнезе марнек велеть. Коса афольхть эря учениконза, аф юкснесазь ветеранть.
—Пичепулонять козят коенза-обуцянза, лама содаф ломаньдонза,—азозе Иван Фролович.—Минь кельгсаськ эсь веленьконь. Пяк мяленьке, штоба эряль ламоняс. Но надиямада пяк кржа.
Мокшэрзянь крайти лац содаф Н.С.Савкин. Сон учёнай, покоди Н.П.Огарёвонь лемса Мордовскяй госуниверситетса. Вели сашенды, васьфни эсь велеряензон мархта. Тяни кочкай материал эсь родонц-пляманц колга.
 Тя велеса сембе эсь эряфонц ётафтозе Ф.И.Резепов. Фёдор Ильич лядсь районца войнань ветераттнень эзда ськамонза. Сон цебярь тонафты, лама киза вятезе школань коллективть.
Лац содафт Трунькиттне, Девятаефне, Резепофне и ламотне лиятне. Лама киза вятьсы идень «Якстерь тяштеня» журналть В.И.Брындина. Сембе синь Пичепулонять шнама ломаненза.
В.В.Савкин—од мокшаля. Покодсь и школаса учителькс, и лесникокс. А мекольдень кизотнень якай Москуву добувама. Кода-бди пря тряма. Кда улель коса трудендамс, сон мзярдовок афолезе када семьянц, афоль ту шири покодема.
—Пропискас коре Пичепулонясонк кафтошка сяда ломань,—азозе Василий Васильевич.—А афкукс эряй сядошка. Ломаттне сайхть, туйхть. Аф Пичепулонясь тяни мяльсонк, а прянь трямась.
И виде. Л.Я.Тремасова—трудонь кельги мокшава. Покодема якай то Перевесьянь, то Вольно-Никольскяень хозяйствав. А тя эряма вастонц эзда колмогемоньшка вайгяльбе.
Шабрац, В.И.Панькин, стане жа Перевесьяв якай добувама. Сон цебярь водитель, эрь техникаса шарьхкоди. Тяфта велеса эряйхть ламотне.
И.ВЕШКИН.

06.06.2019 №22
 
 
 

 
НОВОСТИ
 
 

Исавелети—300 киза

Эрь кизоня Тройцянь шиня Инсарскяй райононь Исавели кочксеви лама ломаньда. Тядде тяза сашендсь кафта тежянть малава инжи странать сембе уженястонза: Москуста, Санкт-Петербургста, Самараста, Краснодарста, Коми Республикаста, лия областтнень и республикатнень эзда.
Тядде вели ломаттнень пуроптозень аф аньцек Тройцясь, ня шитнень Исавелети топодсь 300 киза. Велесь козя эсь историянц, коензон, обуцянзон мархта, тяса шачсь лама содаф ломаньда. Нят: ученайсь, писательсь, драматургсь, виднай общественнай деятельсь Г.Я.Меркушкин, Мордовия Республикань Почетнай Гражданинць, Российскяй Федерациянь Президентть видеса финно-угорскяй  нароттнень сембе масторонь конгрессть спецпредставителец Н.И.Меркушкин, медицинскяй наукань докторхне В.А.Базаев и М.Д.Кузьмин, лама лия содаф ломань. Велесь инжихнень васьфтезень эсь мазышинц мархта. Тяса лама од кудта, аф кунара панчфт социальнай центра, идень сад, од ФАП, строяфт спортивнай площадкат, культурань объектт, велеть мазопнесы Шкаень кудсь. Ламонцне илас састь идьснон, унокснон мархта, ломаттне кштисть, морасть, седисна и ваймосна пяшксель кенярдемада. Фкя-фкянь мельге сцена лангста кайгсть поздравленият, илань вятихне   азондсть велеть историянц колга, лятфтазь сятнень лемснон, кит аралазь Родинать вракнень эзда. Лама велеряй фронтста ашесть мрда, максозь эряфснон минь инксонк.
20.06.2019  № 24
 

Минь поздравленияньке

13.06.2019  № 23
 
 
 
 
 

«Рузаевкаса мольфтевихть анокламатне стекольнай заводть панжеманцты»

Мордовиянь Оцюнясь Владимир Волков:
Мордовиянь Оцюнясь Владимир Волков 29 майста ётафтсь рабочай васедема Рузаевскяй райононь руководительть Вячеслав Кормилицынонь мархта. Ванондовсть территориять социально-экономическяй виияфтоманц коряс кизефксне. Тяконь лувксса корхтамась мольфтевсь социальнай объекттнень строямаснонды анокламать колга: Рузаевкаса Паровознай ульцяса 160 вастонди идень садть, Татаронь Пишляса 250 вастонди школать, фельдшерско-акушерскяй пункттнень.
Ванондовсть районца водоснабжениянь и водоотведениянь систематнень одкстоптомаснон, а стане жа «Безопасные и качественные автомобильные дороги» национальнай проектть эряфс ётафтоманц рамкаса китнень строямаснон и петемаснон коряс кизефксне. Тядде, кода отмечазе Вячеслав Кормилицын, петевихть-одкстоптовихть 13 вайгяльбень кувалмоса кит.
06.06.2019  № 22
 

Аделсеви «Мокшень правдати» сёрматфтомась

Эряскодода!
Кельгома ялгат!
2019 кизоть омбоце пяленцты «Мокшень правдати» сёрматфтомать шумордамс ляткшни аньцек кафта недялят.  И ули тячи мяленьке нинге весть азомс нюрьхкяняста: мес именна «Мокшень правда» эряви тинь семьянтенди.
Кода аф ужяль, мокшэрзятнень лувкссна стаки кири. А «Мокшень правдась» семботь тиендьсы сянкса, штоба аф нолдамс тянь. Кода ванфтомс и виияфтомс кяленьконь, культураньконь, аф юкстамс эсь коеньконь-обуцяньконь—вов мезть колга мольфтеви корхтамась сонь лопанянзон эса. Пцтай эрь номерса макссевихть материалхт мокшэрзятнень историяснон, содаф ломаньцнон колга, азонкшневи народоньконь арьсеманзон и пичефксонзон колга.
«Мокшень правдаса» макссевихть медицинскяй темас советт и рекомендацият, советт перень сёронь касфнихненди и жувата мельге якайхненди. Эрь номерса ули юморонь и сатирань уженя, рузонь кяльса печатлакшневихть недялянди ламоц телевизионнай программатне.
«Мокшень правдась» республиканскяй газетатнень эзда фкя инь интереснай и уцез газетась. Сон нльне сяда уцез ламоц «районкатнень» коряс.
Теенза тяшфтемать питнец:
6 ковонди—336 цалковай,
3 ковонди—168 цалковай.
Газетать индексоц П4719.
 Эряскодода почтав. Тоса учихть эсонт. Пингсь содай ётаманц.
06.06.2019  № 22
 

 

 

Яндекс.Метрика Яндекс цитирования Rambler's Top100
Учредительхие:
Главнай редакторсь: И. С. Лушкин