Поиск по сайту: 
 

Архив
 июнь 
 2019 
пн вт ср чт пт сб вс
     12
3456789
10111213141516
17181920212223
24252627282930

 
 

 

Здоровье

Лувись—лувити

Равжа чайсь аф ладяй пакарьхненди
А уцез равжа чайсь пакеткаса, кона рамаф супермаркетста, канды зиян пакарьхненди и пейхненди.
Испанскяй учёнайхнень валснон коряс, равжа чаень кельгихнень эвондакшнихть прябаласна пакарьснон мархта, сяс мес равжа чайса лама фторда. Да, сон эряви ломанть организманцты. Фторть аф сатнемац эвондафни кариес и остеопороз. Омбоце мировой войнада меле сембе мирса кармасть кайсема фтор ведти. Но лама фторсь стане жа канды зиян ломанть организманцты. Сяс уцез чайса, инь пяк пакеткаса мишендевить эса, лама фторидта. Фторда башка, эсонза ули и алюминиень фторид. Сяс лама фторонь лувкссь эвондафни пеень и пакарень флюороз, лихтьсы кальцийть и салхне озсихть сосудань стенкатнень, эзнятнень (суставы) и потмонь оргаттнень лангс.
Ламоц ломаттне, рамсемок уцез чай, нльне афи шарьхкотькшнесазь пельксть шумбрашиснонды. Сянгяря чайть колга аф лятфневи.
 
Нолдасть тевс инезиень лопатнень
Работан социальнай службаса. Ширезонк сидеста сашенкшни фкя бабаня и фалу—аф шавонь кятть. Мзярда эсь пидеф пярякаса каванясамазь, мзярда петрушкат-каперхт эсь перестонза канды. Несколькаксть зелень мархта кяскавнятнень эса повондсть инезиень лопань пусмот. Васенда работай ялганень мархта арьсеме, што бабась сязезень синь куяронь салыяфтоманкса, но эльбядсь и кандозень тейнек. Эльбядеме. Кода содавсь, инезиень лопатне кочкафтольхть тейнек. Сиренясь азозе, што тя пяк цебярь пчкафтомбяль! И нльне азозе, кодама урмань пчкафтоманкса и кода нолдамс синь тевс.
Лувине, што инезиень лопатнень эса лама С витаминда, конань ули противовоспалительнай виец, органическяй кислотада, конат ладяйхть марнек организмати, флавоноитта, синь тиендьсазь эластичнайкс сосудатнень.
Кельмофтевомать и витаминонь аф сатнемать пингста пяк ладяй инезиень лопаста отварсь, сон валхтсы температурать. Вов аньцек марса аспиринть мархта симондемс эздонза  аф мярьгондеви.
Шабатненди мярьгондеви оргалямс тя симомбяльса курга потмоть стоматитть пингста. А настой мархта примочкатне и компрессне лезнихть токаф васттнень, коськолдать (лишай), герпесть, геморройть пчкафтомста. Лопатне нолневихть тевс и косметологияса: вельдест ули кода кемокстамс шяярьхнень и машфтомс копнень. Тянкса мярьгондеви аноклакшнемс косметическяй маскат инезиень тапаф лопаста или шити несколькаксть шташендомс шамать свежай или  косьфтаф лопаста тиф отварса, кона тиемдонза меле кадома мзярошка пингс ащема.
Л.Колотилова.
 
Матодовомс эрси пяк стака
Аф удомада аралакшнян пря пиононь унксонь настойкаса. Тя цебярь средствась и аф удомада, и стресста. 50 грамма коське пиононь мелкайгофтф ункснень лангс каяда пяле литра водка, кадость ащема 2 недялят шобда вастса. Симондеда 1 чайнай куцюнянь мадомда инголе.
И.Семёнкова.

06.06.2019 №22
 
 
 

 
НОВОСТИ
 
 

Исавелети—300 киза

Эрь кизоня Тройцянь шиня Инсарскяй райононь Исавели кочксеви лама ломаньда. Тядде тяза сашендсь кафта тежянть малава инжи странать сембе уженястонза: Москуста, Санкт-Петербургста, Самараста, Краснодарста, Коми Республикаста, лия областтнень и республикатнень эзда.
Тядде вели ломаттнень пуроптозень аф аньцек Тройцясь, ня шитнень Исавелети топодсь 300 киза. Велесь козя эсь историянц, коензон, обуцянзон мархта, тяса шачсь лама содаф ломаньда. Нят: ученайсь, писательсь, драматургсь, виднай общественнай деятельсь Г.Я.Меркушкин, Мордовия Республикань Почетнай Гражданинць, Российскяй Федерациянь Президентть видеса финно-угорскяй  нароттнень сембе масторонь конгрессть спецпредставителец Н.И.Меркушкин, медицинскяй наукань докторхне В.А.Базаев и М.Д.Кузьмин, лама лия содаф ломань. Велесь инжихнень васьфтезень эсь мазышинц мархта. Тяса лама од кудта, аф кунара панчфт социальнай центра, идень сад, од ФАП, строяфт спортивнай площадкат, культурань объектт, велеть мазопнесы Шкаень кудсь. Ламонцне илас састь идьснон, унокснон мархта, ломаттне кштисть, морасть, седисна и ваймосна пяшксель кенярдемада. Фкя-фкянь мельге сцена лангста кайгсть поздравленият, илань вятихне   азондсть велеть историянц колга, лятфтазь сятнень лемснон, кит аралазь Родинать вракнень эзда. Лама велеряй фронтста ашесть мрда, максозь эряфснон минь инксонк.
20.06.2019  № 24
 

Минь поздравленияньке

13.06.2019  № 23
 
 
 
 
 

«Рузаевкаса мольфтевихть анокламатне стекольнай заводть панжеманцты»

Мордовиянь Оцюнясь Владимир Волков:
Мордовиянь Оцюнясь Владимир Волков 29 майста ётафтсь рабочай васедема Рузаевскяй райононь руководительть Вячеслав Кормилицынонь мархта. Ванондовсть территориять социально-экономическяй виияфтоманц коряс кизефксне. Тяконь лувксса корхтамась мольфтевсь социальнай объекттнень строямаснонды анокламать колга: Рузаевкаса Паровознай ульцяса 160 вастонди идень садть, Татаронь Пишляса 250 вастонди школать, фельдшерско-акушерскяй пункттнень.
Ванондовсть районца водоснабжениянь и водоотведениянь систематнень одкстоптомаснон, а стане жа «Безопасные и качественные автомобильные дороги» национальнай проектть эряфс ётафтоманц рамкаса китнень строямаснон и петемаснон коряс кизефксне. Тядде, кода отмечазе Вячеслав Кормилицын, петевихть-одкстоптовихть 13 вайгяльбень кувалмоса кит.
06.06.2019  № 22
 

Аделсеви «Мокшень правдати» сёрматфтомась

Эряскодода!
Кельгома ялгат!
2019 кизоть омбоце пяленцты «Мокшень правдати» сёрматфтомать шумордамс ляткшни аньцек кафта недялят.  И ули тячи мяленьке нинге весть азомс нюрьхкяняста: мес именна «Мокшень правда» эряви тинь семьянтенди.
Кода аф ужяль, мокшэрзятнень лувкссна стаки кири. А «Мокшень правдась» семботь тиендьсы сянкса, штоба аф нолдамс тянь. Кода ванфтомс и виияфтомс кяленьконь, культураньконь, аф юкстамс эсь коеньконь-обуцяньконь—вов мезть колга мольфтеви корхтамась сонь лопанянзон эса. Пцтай эрь номерса макссевихть материалхт мокшэрзятнень историяснон, содаф ломаньцнон колга, азонкшневи народоньконь арьсеманзон и пичефксонзон колга.
«Мокшень правдаса» макссевихть медицинскяй темас советт и рекомендацият, советт перень сёронь касфнихненди и жувата мельге якайхненди. Эрь номерса ули юморонь и сатирань уженя, рузонь кяльса печатлакшневихть недялянди ламоц телевизионнай программатне.
«Мокшень правдась» республиканскяй газетатнень эзда фкя инь интереснай и уцез газетась. Сон нльне сяда уцез ламоц «районкатнень» коряс.
Теенза тяшфтемать питнец:
6 ковонди—336 цалковай,
3 ковонди—168 цалковай.
Газетать индексоц П4719.
 Эряскодода почтав. Тоса учихть эсонт. Пингсь содай ётаманц.
06.06.2019  № 22
 

 

 

Яндекс.Метрика Яндекс цитирования Rambler's Top100
Учредительхие:
Главнай редакторсь: И. С. Лушкин