Поиск по сайту: 
 

Архив
 ноябрь 
 2019 
пн вт ср чт пт сб вс
    123
45678910
11121314151617
18192021222324
252627282930 

 
 

 

Тема дня

Тага футболонь оцю праздник ётафтф Саранскяйса

«Мордовия Арена» стадионца Россиянь сборнай командась  9:0 счетса
сяськозе Сан-Маринонь сборнайть
Ёткшиста, 8 июньцта, Саранскяйса «Мордовия Арена» стадионца етась футболть коряс 2020 кизонь Европань чемпионатть отборочнай турниронц мяльса кирдезь Россиянь и Сан-Маринонь национальнай сборнайхнень еткса международнай матч.
Футболонь тя праздникти анокламась ушетфоль инголи. Саранскяйса тифтольхть инжиень примай колма зонат: Тысячелетиянь площадьса, А.С.Пушкинонь  лемса культурань и ваймамань паркть маласа и Экопаркса. Тяда башка, музейхнень,  скверхнень, выставочнай залхнень эса етафтфоль культурно-массовай пяк лама пуромкс.
6 июньцта Саранскяи сась Россиянь, а 7 июньцта—Сан-Маринонь сборнайхне.
Матчень етафтома шиня «Мордовия Арена» стадионть  ширес аськолясть футболонь кельгихне. Отт, эряфкшуфт, семьянь келеса… Болельщикта пяк ламоль.
Стадионть площадьсонза теест ульсь мезе ваномс и мезьса примамс участия. Шить омбоце пялестонза ушедозе работанц тематическяй фудкортонь зонась. Тясоль Сан-Марино республикать шатровай фан-зонац.
Россиянь и Сан-Маринонь национальнай сборнайхнень еткса международнай матчсь ушедсь 19 частста.
«Мордовия Арена» стадионць пяшксель ваныда. Ламошкасна ульсть Мордовиянь, но сашендсть болельщикт Москуста, Пензаста, Нижняй Новгородста, Екатеринбургста и лия вастста. Ульсть болельщикт Сан-Мариноста. Катк аф ламонест, но сембе сяка  састь сборнайснон ширенц кирдема.
Матчть ушедомста азфтольхть кафта сборнайхнень составсна, синь главнай тренерсна. Россиянь сборнайть тренероц—Станислав Черчесов, Сан-Маринонь сборнайть—Франко Варрелла. Работасть судьят Швецияста.
Кайгсть кафта государстватнень Гимнасна и ушедсть  матчсь.
Васенце голть эсь ортазост сувафтозе (тянди мярьгихть автогол) Сан-Маринонь сборнайть налхкиец Микеле Чеволи 25 минутать пингста, панжемок тянь мархта счетть.  31 минутаста гол пенальтиста сувафтсь Россиянь сборнайть капитаноц Артем Дзюба. Счетсь арась 2:0. Аф лама пингонь етазь Сан-Маринонь сборнайть ортас тага сувафтфоль гол—тянь тиезе Федор Кудряшов. 41 минутаста нинге фкя гол сувафтсь Антон Миранчук. Матчть васенце пялец шумордавсь 4:0 счетса.
Аф сяда кальдявста Россиянь сборнайсь няфтезе прянц матчть омбоце пялестонза. 73 минутаста тага фкя гол Сан-Маринонь командать ортас  сувафтсь Артем Дзюба. Нинге фкя гол Дзюба сувафтсь 76 минутаста. 77 минутаста  счетть 7:0 тиезе Федор Смолов, мзяра пингонь етазь (83 минутаста) Федор сувафтсь нинге  фкя гол. Счетсь арась 8:0!
Кулевсть корхтамат, што миннетне 10-це голти пачфтьсазь. Тяфта ашезь лисе, но 88 минутаста тага фкя гол сувафтсь Артем Дзюба. Россиянь сборнайть команданц капитаноц тя матчса сувафтсь Сан-Маринонь сборнайть ортас ниле голхт!
Матчть шумордамста азфоль, што стадиону пуромкшнесь 42241 ломань.
Меле кафта сборнайхнень главнай тренерсна Станислав Черчесов и Франко Варрелла отвечасть журналисттнень кизефксснон лангс.
Станислав Черчесов азозе: «Кеняртьфан, мес тя матчень етафтома вастокс кочкафоль Мордовиясь, Саранскяйсь. Пяк цебярь стадионць, пяшксет трибунатне. Тяса сембось пяк тусь мялезонк».
Россиянь сборнайсь 9:0 счетса сяськозе Сан-Маринонь сборнайть. Тя сборнаеньконди арась инь оцю сяськомакс эсь историясонза. 
Т.АЛЬШИНА.

13.06.2019 №23
 
 
 

 
НОВОСТИ
 
 

ЭСОНЗА АФ МАДОНДЫ ТОЛКС ЮРНАЙ МИНЦЕННЕТИ КЕЛЬГОМАСЬ

 
Родной кялень кельги, национальнай коень-обуцянь ванфты, афкуксонь патриот. Тянь ули кода азомс Мордовиянь Инсарскяй райононь Пою велеса шачф-касф мокшавать Анастасия Афанасьевна Шумкинать (Акшаевать) колга. Аф ваномок сянь лангс, што сон лама киза ни аф эряй мокшэрзянь масторса, эсонза аф мадонды толкс юрнай семботи минценнети кельгомась. Мзярда корхнень Анастасия Афанасьевнань мархта, тя шарьхкодевсь эстокиге. А ушедозе азондомать аф эсь колганза, а ёмла родинанц эзда.

 

Уликс легендать мяльс сявозь, атянзон атясна эрясть оцю губор лангса, конань лемоцоль Ош панда ляй, кона кафта ширде шарфоль вирьхнень мархта, а нинге кафта ширде ульсть сери крутоярхт, конатнень ала шудесь Исса ляйсь. Пингонь ётазь карафне ушедсть пяярема и ляйсь полафтозе ведень шудема вастонц, вов эста родонь плямась сась мяльс ётамс эряма такор вастти, коса ульсь кода касфнемс козя урожай, а Иссать трвава кассь поювонь оцю и туста вирь. Вельденза алятне шапондсть од кутт семьяснонды. Тяфта и эвондась велеть лемоц—Пою.

 

Школаса тонафнемстонза Анастасия сидеста ванондсь раскопкатнень мельге, конатнень Ош панда ляйса ётафнезь Мордовскяй госуниверситетонь студенттне и преподавательхне. Синь мушендсть сёвонень кядьгонь пакшт, трудонь кевонь орудият, налонь пет, авань мазоптомат, монетат и лама мезе лия. Кунардонь эряма вастста ламоц муфкснень ули кода няемс Саранск ошса Краеведческяй музейса, улихть синь и велень школань музейса.

 

24.10.2019  № 42
 
 
 

Россиянь и Мордовиянь Народнай артисткась, Мордовия Республикань Почётнай гражданинць Александра КУЛИКОВА:

 «ПАВАЗУВАН, МЕС ЭРЯН МОРДОВИЯСА!»
 
Тячи республиканьконь столицаса, Саранскяйса, ушедсы эсь работанц Мордовскяй (мокшень и эрзянь) народть Межрегиональнай общественнай организациянц Всероссийскяй VII съездоц. Пингстонза вановихть кизефксне, конат оржаста ащихть мокшэрзянь нациять инголе. Тя оцю пуромксть карша тейнек удалась корхнемс Россиянь и Мордовиянь Народнай артисткать, Мордовия Республикань Государственнай премиянь лауреатть, Славань III степенень орденонь кавалерть, Мордовия Республикань, Рузаевкань и Темников ошень почётнай гражданинть Александра Куликовать мархта. Александра Николаевна сувси съездонь делегаттнень лувксс.

 

Александра Куликовать лемоц лац содаф аф аньцек эсь республикасонк, но и ламоц лия вастова. Вии, седиень-ваймонь токай вайгялец лездсь велень стирняти арамс кельговиксокс тежятть ваныти. Эсь творческяй кинц артисткась ушедозе 1962 кизоня «Умарина» моронь и кштимань государственнай ансамбльса. Лама киза А.Куликова кеняртьфнесыне ломаттнень сольнай мораманц мархта.

 

Александра Николаевнань творческяй киц козя гастролень ширде. Вайгялец кайгсь аф аньцек Россияса, но и лия ширеса: Германияса, Чехословакияса, Финляндияса, Польшаса, Венгрияса, Китайса, Белоруссияса, Украинаса, Молдавияса, Киргизияса, Таджикистанца, Чувашияса. Лия регионца и нльне омба масторса улемста артисткати удалси васьфнемс-корхнемс тоса эряй мокшетнень и эрзятнень мархта, а сяс аф кулемас коре содасы, мезсь синь пичефтьсыне-таколфтсыне.

 

Корреспондентоньконь мархта корхнемста артисткась азозе, мезе ученды мокшэрзятнень оцю пуромксснон эзда, мезть колга мялец корхтамс сонцень, а стане жа отвечась и лия кизефкснень лангс.

 

 

 
24.10.2019  № 42
 
 
 

МОКШЕНЬ И ЭРЗЯНЬ КЯЛЬХНЕ ТОНАФНЕВИХТЬ ШКОЛАТНЕНЬ

Понедельникста Саранск ошень округонь Администрацияса ётафтф оперативнай совещанияса ванондовсь лама кизефкс. Башка мяль шарфтфоль Мордовскяй (мокшень и эрзянь) народть Межрегиональнай общественнай организациянц VII съездонцты анокламати. Тяса азфоль, што Саранскяень 45 сембе школатнень эса 2 класста сявомок 7 классти молемс тонафневихть мокшень и эрзянь кяльхне. Тя тевса заняф 94 педагог. Тонафнемаса фатяф 17916 ученик. Недяляти макссеви 1-2 част. Тяда башка, тяконди водендафт кружокне, музейхне. Саранскяень идень сембе саттнень эса тевс ноляви «Минь эрятама Мордовияса» этнокультурнай компонентсь. Дошкольнай учреждениятнень эса мокшэрзянь народть историянц, коензон-обуцянзон и культуранц мархта иттне содафневихть культорологическяй аспектть, налхксематнень вельде. Стане жа работай этнокультурнай (кштимань, музыкальнай, народнай творчествань) 93 кружок, коса заняф 2160 шаба. Тянь и ламоть лиять колга заседанияса пачфтсь социальнай политикать коряс Департаментть директоронц заместителец—Образованиянь управлениять начальникоц Оксана Шуляпова.

 

24.10.2019
 
 

 

 

Яндекс.Метрика Яндекс цитирования Rambler's Top100
Учредительхие:
Главнай редакторсь: И. С. Лушкин