ЛЯМБЕ ВАСЕДЕМА ВОЛГОГРАДОНЬ МОДАТЬ ЛАНГСА

Кода журналистонди и «Ламзурь» ансамбльса морсиенди тейне савсь улемс лама вастса, васетькшнемс лама ломань мархта. Арьсекшнень, мезьсовок ни оду аф дивандафтован. Эльбятькшнень. Мекольце васедематне кадсть седисон-ваймосон стама мяльхть-арьсемат, конат мзярдовок аф юкставихть. И аф най тейне, а, улема, сембонди, кие 23-26 майста якась мархтон Волгоград ошу. Делегацияньке аф оцюволь. Нят: Мордовскяй (мокшень и эрзянь) народть Межрегиональнай общественнай организациянц председателец Ю.А.Мишанин, О.В.Дулкин, А.С.Пушкинонь лемса библиотекань главнай библиотекарсь В.И.Пронина, журналистсь В.В.Лазарев, «Мордовия» ГТРК-ста журналистсь И.Данилов телеоператор мархта.
Видеста азомс, тя ошса улень васенцеда, хуш арьсекшнень тянь колга кунара ни. И вов тейне удалась няемс ся васттнень, коса Великай Отечественнай войнать пингста мольсть виидонга вии тюремат, шавовсь тёжятть ломань и коса стяфтф-ладяф сембе мирса содаф «Родинась-тядясь терди» памятниксь. Волгограду повоманкса сюконян Мордовскяй (мокшень и эрзянь) народть Межрегиональнай общественнай организациянцты, конань мяленц коряс и пачкодеме тяза. Эряви азомс, тяфтама васедемада тя организациясь ётафни аф кржа. Синь ульсть Россиянь пцтай сембе региоттнень эса, коса компактнайста эряйхть мокшет и эрзят. Тяни мольфтеви анокламась Мокшэрзянь народть Всероссийскяй VII съездонцты, кона кармай тяддень октябрь ковста. Тянкса лия регионца эряй эрзятнень и мокшетнень мархта васедематне ётафневихть сядонга сидеста.
Волгограду молеманьконди ульсь и лия туфтал. Тоса эряй, кода азозе срхкамстонк Юрий Александрович Мишанин, пяк цебярь ломань, конань кяденза афкукс золотаннет. Тя Владимир Павлович Кшнякин. Сон—шуфтста керсемать коряс оцю мастер, аньцек мезень тиема аф машты. Эрь тифоц—искусствань афкуксонь произведения. Тяфтама ломаттнень колга эряви азонкшнемс и сёрматкшнемс сяда сиденяста. Ужяленди, Мордовиясовок тя ломанть содасазь аньцек раднянза да мала ломаненза, конатнень ёткса «Октябрьская» агрофирмать директороц И.С.Андин. Эряви азомс, Иван Семеновичень оцю лезксоц Волгограду молемасонк. Васендакиге, сон максозе транспортть, кона пачфтемазь и тоза, и меки.
Кис срхкаме венц лангс. Савсь ардомс кемгафтува, а, пади, сядовок лама част. Волгоградса васьфтемазь тостонь мокшэрзянь организациять пуроптыенза-вятиенза В.Н.Кияев, В.Н.Учаев, В.Т.Фомичев. Марса арьсеме, коза молемс васенда, а коза—меле. Сафоль мяльс васенцекс молемс В.П.Кшнякинонь шири.
Валерий Тарасович Фомичев—ламонь
содай ломань
Кшнякинонь пяли пачкодеме аф курокста. Эрявсь ардомс пцтай марнек Волгоградть пачк, кона таргави сядода лама вайгяльбень кувалмоса. Волжскяйсь ащи Волга ляйть тона боксонза, сембе ширде перяф ведьса. Ардомста Волгоградть историянц эзда лама азондсь Валерий Тарасович Фомичев. Сон техническяй наукань доктор, Волгоградскяй государственнай техническяй университетонь профессор. Тяка пингть лац содасы семботь, мезсь сотф Волгоградть мархта. Сонць Валерий Тарасович шачсь Мордовияса, Кочкуровскяй райононь Сабаева велеса.
Эрзятне и мокшетне Волгать крайге эрясть фалу. Волгоградонь модать лангсовок эздост ульсь пяк лама. Пётр I пингста (XII-XIII векста), мзярда мольфтевсь Волгодон каналть шувомац, тяза мярькфоль панемс ломатть, кит улельхть аф крепостнойкс, а государственнайкс. Тяфтамокс лувондовсть эрзятне и мокшетне. Синь муфтольхть. Кит састь ськамост, кит—семьянек. Каналть шувомац педа-пес ашезь шумордав туркатнень мархта войнать ушедоманц сюнеда. Шувихне ворьготькшнесть, кармасть эряма Волгать маласа модатнень лангса. Тяфта пуроптфоль мзярошка веле. Пингонь ётазь, тостонь эряйхне рузыясть, юкстазь шачема кяльснон.    Кафттнень эса—Вярце (Горнай) Балыклейса и Алуце (Нижняй) Балыклейса, Фомичевонь валонзон коряс, корхтайхть эрзякс. Мекольцеса 1958 кизоть самс эрзянь кяльсь тонафневсь школаса. Ульсь, кле, тяса пяк оцю совхоз, лемоцоль «Крепь». Тяса эрясть эрзят. Синь стане жа юмафтозь кяльснон. А вов Разгуляевка велеса, кона ащи сяда ширеса, тячивок корхтайхть эсь кяльсост.
Владимир Павлович Кшнякин и сонь
«сёрматфонза»
Корхнезь и Фомичев ялгать кулхцондозь, пачкодеме Волжскяень ся ульцяв, коса ащи В.П.Кшнякинонь кудоц. Сон шарфтсь ёфксонь дворец лангс. Тяфтама мазыши ашень няенде костовок, и аф аньцек мон. Крышась, кржа мярьгомс, мазоптфоль, сон сёрматфоль. Тяфта серматфоль-мазоптфоль кудботмоське. Тяса-тоса повфтафтольхть серма мархта ваномат, пейзашт и портретт. Фкять эса Россиянь Президентсь В.В.Путин. Масторга латцефт вазат-месть. Сельмованфсь эстокиге прай оцю карьхкять лангс. Мастерсь тиезе сонь вербань коське тарадста, конатнень кандозень вирьста. Тифонц лемдезе «Илья Муромецонь карьхкац».
Кода эвондась шуфтста керсемати кельгомась, тя кизефксть лангс сонць В.П.Кшнякин отвечась тяфта: «Ёмласта Очижинь шиня кельгине нюрьсемс нюрямса и ванондомс велень аватнень лангс. Потмозе пяшкотькшнесь седиень эжди лямбоняса, мзярда синь эсь мазы щамснон мархта лисендсть ульцяв. Тяни, мзярда кальдявста молихть тевне, лятфнесайне ся пинкнень».
В.П.Кшнякин шачсь Атюрьевскяй райононь Арга велеса. Сидеста яксесь Красновка вели, коса шачсь-кассь сонь аляц. Эряфсь эста аф тёждяль. Сяс алянцты савсь тумс работама Пермскяй краи. Тяфта Кшнякиттне, вастста вастс ётнезь, пачкодсть Волгограду. Тонафнемс художниконди Владимир Павловиченди ашезь сав. Шабакс сон кельгозе тиендемс налхкшкат пластилинцта. Сибирьса сидеста якась вири. Тоса и эвондась эсонза оцю мяль кярьмодемс шуфтста керсемати.
Пингонь ётазь фкя выставкаса васьфтсь художникть Александр Сергеевич Маховонь мархта, кона лездсь теенза мумс творчестваса эсь ширенц: тиендемс сермаса мазоптьф рамкат. Тя тевсь меле арай Кшнякинонди эряфонь койкс. Кизоста кизос кядялдонза лисьф произведениятнень лувкссна коль кассь. Сяс рьванц Людмилать мархта састь мяльс панжемс музей. Эряви азомс, музейса пуроптф экспонаттнень ванома сашендыхть аф аньцек Волгоградста, но и лия вастстовок. И сембе, кода и минь, лисендихть тяста пара мяльса-арьсемаса.
Лямбе валхт, седикс-ваймокс корхнемат, морот… Владимир Павлович морамасовок няфтезе прянц творческяй ломанькс. А мзяра спасибамань вал азсь сон казнетнень инкса, конат теенза пачфтьфтольхть Мордовияста. Кле, тяфтама оцю мялень шарфтома эсь лангозон ашень сотце. Тяни, кода азозе Ю.А.Мишанин, сонь мялень салай творчестванц колга кармайхть содама аф аньцек Волгоградса, но и лия вастова. И надияфтсь мокшэрзянь съездти тердемс В.П.Кшнякинонь Мордовияв выставка мархта.
Василий Никифорович Кияев и сонь тевонза
Сяка шиня фкя музейста повоме омбоцети. Эсонза экспонаттне лиятольхть. Тясотольхть аф фкя лацонь музыкальнай инструментт (гуслят, духовой трубат, гармоният, патефон и лият), утюкт, частт, лорнет, театраса ванома биноклят, кядьгот, мезьста ярхцсесть кунардонь пингть козя ломаттне. Нльне ули «Зингер» стамань машинка.
Музеень азорсь—Василий Никифорович Кияев. Тя лемсь лац содаф кода Волгоградса, стане и эздонза ширеса. Тоса сон лувондови цебярь политикокс, предпринимателькс. Сон—«Югканат» ООО-ть вятиец, аф весть кочксевсь Волгоград ошень Думань депутатокс. В.Н.Кияев—Волгоградскяй областьса Казахстанть и Мордовиять еткса мишендемань-рамсемань тефнень вятисна. Шачсь В.Н.Кияев Кочкуровскяй райононь Сабаева велеса. Кафкса кизоса лядсь тядяфтома-аляфтома. Трямс-касфтомс сявозь радня ломаненза, конат эрясть Кривой Рог ошса. Тонафнесь Волгоградскяй политехническяй институтса. Комозьда лама киза работась Волгоградонь сталепроволочноканатнай заводса. 2000 кизоня путфоль «Югканат» ООО-ти вятикс. Рьванц, Светлана Михайловнань, мархта эряйхть колмогемоньда лама киза. Кафта шабасна, уноксна, сембе эряйхть эздост аф ичкозе. Лиякс мярьгомс, Кияефнень семьясна нолдась Волгоградса кеме ункст.
Аф ваномок тянь лангс, Василий Никифорович аф юксни шачема веленц колга.  Эрь кизоня сашенды алянц-тядянц калмоснон лангс. Эсь перезонза озафтсь шуфтонят, конатнень ускозень Сабаеваста. Кудонц инголе, переса, ков тят варжакста, няят шачема ширеста пачфтьф  лятфнембяльхть: сире пингонь сюрень кштирдема, кудъетконь кядьгот-месть. Кудсонза, бта музейса, повфнефт фотографият, конатнень эса тядяц и аляц, шачема велень ломаненза. Сембе экспозициятнень еткста сельмос пови эрзянь панарсь, кона повфтаф няеви вастса. Конашкава кельгсы эрзялясь эсь родонц-пляманц, народонц.
Сюконяма вастт
Улемс Волгоградса и аф молемс Мамаев кургану?! Етаськ сонь педа-пес. Сувсеме Лятфтамань мемориалу. Ваноськ стелатнень, коса серматфт шавфнень лемсна. Эздост сняра, сембе афи лувовихть. Фамилиятнень коряс шарьхкотькшневи: сембонь мархта марса тюрсь лама мокша и эрзя ломань. Войнать пингста, мзярда врагсь маладсь Волгограду, араламонза стяшендсть ошень сембе эряйхне. Аш стама васта, кона афоль валов верса. Вишке тюрема мольфтевсь эрь кудть, эрь мода пакшть инкса. Аньцек васенце шиня шавовсь 43 тежянь ломань. Шуди верса валовсь Волга ляйсь. Тянь колга арьсемста аф кирдевихть сельмоветтне. «Родинась-тядясь терди» памятникть лангска аф вановат седиень апак таколтт. Прясот эстокиге эвондакшнихть Шкабавазти эняльдемань валхт: Шкабаваз, сюконятама тейть и   эняльттяма максомс ломаттненди валда ень. Катк синь ванфтсазь модать-масторть. Катк мастор лангса мзярдовок аф ули тяфтама война!
Меки срхкаме стане жа венц лангс. Но кись тяни марявсь сяда теждякс и нюрьхкянякс. Пади, тейнек лездсть Волгоградса и Волжскяйса васедематнень колга лямбе лятфнематне. Волгоградса улемась кадсь пара мяльхть-арьсемат кажнайть ваймоса и седиса.  И сембе састь фкя мяльс: тя молемась ульсь мялень кеподи и кемамань максы. Сон тага няфтезе: эрзятне и мокшетне, коса афольхть эря, фалу кирдьсазь седисост-мялямсост шачема масторснон. Аньцек тяфтама ломаттне эрявихть вешендемс и азонкшнемс колгаст. Катк сембе содасазь, кодама виихть, енюфт, эрь кодама тевса маштыхть минь народоньконь ломаненза. Тяфта сядовок вярьгак вастс кеподеви народоньконь лемоц, касы-виияй сай пингти кемамац.