ПАНЧФОКС ПАНЧТ И МОРСЕК МОРОТ, ПОЙВЕЛЕ!

Пою велень администрациять оцюнянц Владимир Петрович Келинонь мархта служебнай машинаса арттама велень ульцява. Катк нинге ашезь пачкоде вели асфальтсь, но сембе сяка перьфпяльсь кепси мяль, эжни седи. Тяса афкукс шава, сратф-калатф куттненди максови од эряф.
—Вов тя кудть кафта кизоста строязе М.М.Щанкин,—азонды Владимир Петрович.—Лама киза сон покодсь Москуса, кодак тусь пенсияс, мрдась вели и алянь-тядянь ташта кудть вастс строясь од, тяниень пингонь материалста. Михаил профессияс коре строитель, сяс семботь тиезе эсь кядензон мархта. Маластонь пингть арьси ошень прописканц полафтомс веленнети. Лядсь нолдамс куду газ и эряк, кеняртькшнезь тифть инкса.
Сонць кудазорсь азондсь тейнек, мес мрдась шачема вели, няфтезень озафнеф марлюнянзон, вишняфкснень, шукшторукснень. Мялец строямс теплица, баня, водендамс сараст, мацихть.
Саранск ошста мрдасть эсь шачема велезост Виктор Егорович и Елена Ивановна Кадеефне. Мрдасть аф фкя шис, а лама кизос. Усксесть-анокласть строительнай материал, тядде кеподсть ни кирпицень куд.
—Мон кунара арьсекшнень самс эряма эсь шачема велезон и вов тяни мяльне-арьсемане ётафневихть эряфс,—кепотьф мяльса азонды кудазорсь Виктор Кадеев.—Тяса шачень, якань школав, лезнень алязти кудонь тевса, а тяни монць вятян стройка. Кудть ваксс нинге строян картт, карматама кирдема тувот, учат, кудонь нармотть. Васеттяма мархтонт сай кизоть, каванятядязь эсь кядьса касфтф продукцияса.
Ошень пропискать полафтозь веленнети—Александр Фёдорович и Нина Михайловна Федотофне, Юрий Васильевич и Людмила Сергеевна Моисеефне, Виктор Васильевич Сяськин, Василий Петрович Келин, Иван Чекашов, Валерий Козлов, Евгений Акшаев, Валентина Макушкинась и пойвелень лама лия эряй.
Эряви азомс, сембе ня цебярь полафткснень эса оцю путксоц велень администрациять. Тястонь покодихне мезьса маштыхть лездыхть од семьятненди, курокста аноклакшневихть эрь кодама документтне, кудга ётафневи газ, ведь, свет.
—Кда сяда товга тяфта кармай молема тевсь, маластонь пингть ни велеса аф ляды фкявок шава куд,—мярьгсь Пою велень администрациянь оцюнясь.—Тя пяк кеняртьфти и  максси надияма вандыень шити.
Ламоц велеряенди мушендови работа «Изолайн» предприятияса. Тянкса ломаттне азондыхть спасиба директорти Г.Г.Палаевонди. Сон аф аньцек производствать мельге ваны, но и лезни велеса ётафнемс эрь кодама спортивнай и культурнай программат, васедемат, илат.
Башка мяленьке азондомс Николай Васильевич и Екатерина Григорьевна Шичкиттнень семьяснон колга. Теест ни кодгемонть вельф, но покодихть сиземань аф содазь, сембоса няфнихть цебярь пример оттненди. Синь кудсна инь цебярсь велеса, сембось тяса петьф-ладяф азоронь кядьса, лама кизос. Перьфпяле аф няят сор тише, палакс, мезе-мезе ёряф. Тя семьяса кунара ни азорондай ялгаксшись, фкя-фкянди лездомась, шарьхкодемась. Николай Васильевич сембе эряфонц лемдезе школати, Екатерина Григорьевна покодсь клубса, велень лавкаса мишендикс. Миртть-рьват пяк кельгсазь морамаснон, сидеста синь кудсост кулевихть мокшень морот, сиде моронят. Тяни синь аноклайхть Тройцяти, эсь велень гармонисттнень Юрий и Владимир Келиттнень мархта Шичкиттне лисихть сцена лангс и лемдихть морот и сиде моронят тя илань инжихненди.
А минь эсь ширденк арьсетяма Пою велень сембе эряйхненди шумбраши, паваз, сяда товга кельгомс и вельмофнемс минценнеть, мзярдонга аф юкснемс, коста молихть юроньке.
Н.ЛОБАНОВ.