Поиск по сайту: 
 

Архив
 ноябрь 
 2019 
пн вт ср чт пт сб вс
    123
45678910
11121314151617
18192021222324
252627282930 

 
 

 

Здоровье

Тинь кизефнеде

Копта
Шабакс пингста сидеста ронгсон эвондакшнесть копт (чирей). Вятнемазь враченди, тиендсть уколхт, но сембе сяка копне ашесть  машфтов. Пчкафтомань тя урмада бабазе. Кизонь каникулатнень пингста эрянь ширесонза и сон кошярямань симондемс соргапанчфонь (одуванчик) юрста аноклаф отварда. Тя рецептсь тейне мяляфтовсь эряфоньберьф.
Кядьготи марамс 1 столовай куцю мелкайняста керсеф соргапанчфонь юрхт, лангозост каямс стакан пси ведь. Лакафтомс, а сяльде педямс марлянь пачк. Симондемс тяфтама отварда ярхцамда инголе пяле стаканонь шити колмоксть. Аф танцти, но афкукс лезды!
 
МЗЯРДА ШАПАМСЬ ПОРЬСЫ СЕДИЦЕНЬ
Вестевок ашень пеняцякшне шумбрашизень лангс и апак учсек кармась шапамсь порема седиезень (изжога). Васенда арьсень, бта сивонь мезеньге ваи. Но приступне кармасть сидекстоннет. Молень враченди, бта мезевок пелькс аш, аньцек кислотностезе аф ламода оцю. Симомань содада лоткань симондема ёфсикс, сяс мес коста-бди лувине, што сидеста нолямс тевс сонь аф эряви. Мунь лия средства. Сявондень 1 оцю куцю солодкань ункст и 1 чайнай куцюня косьфтаф апельсиновай кеднят, кайсень лангозост 2 стакатт ведь. Путнине тол лангс и лакафнине снярс, мзярс лядондсь аньцек пялец. Аф ламода эшентьфнине и петцине. Кайсень 1 оцю куцю медь и шорсине. Петцине и симондень шити колмоксть 10-15 минутада ярхцамда инголе. Тяфта пчкафнень пря 1 ков и юкстайне, мезсь стамсь шапамсь порьсы седицень.
И.ЛИТВИНОВ.
 
Стирезе аф ярхцай аф сивольда, аф алда
—Шабазе пяк кельгсыне верокста цветной капстать, брокколить и модамарть. Аф тиихть ли синь зиян 5 кизоса иднять шумбрашинцты?
М.Малышева.
—Сембе ня перень сёротне можнат сивомс верокста. Тяфтама ярхцамась корхтай сянь колга, што организмаса аф сатни С витаминць. Идть рационца обязательна улест цитрусовайхть, перень сёрот и сиволь.
—9 кизоса стирнязе эрь шиня ярхцай фкя и сяка ярхцамбяльда: люкшяда, модамарьда, фасольда, свежай куярда, сосискада, лофцта, кшида. Весть недяляти может ярхцамс борщта, кой-кодама фруктада, мичкта. Лияда мезьдовок аф ярхцай. Аф сивольда, аф алда… Мирдезе телевизорса ванць фкя передача, конань эса азондовсь, што тяфтама ломаттне эряйхть аф куватьс.
Римма.
—Главнайсь—вятесть прянтень сетьмоста. Сувафнеда ярхцамбяльти сяда лама сиволь, перень сёрот, фруктат. Кда стирце кельгсыне сосискатнень, мичкть, сяда пара анокламс синь эстейть. Алста аноклада имож мархта танцти суфле.
 
—Тядязе и алязе кельгсазь пангонь кочксемаснон. Кизонда синь коль ёрайхть андомс панкта кафта ёмла уноконяснон. Мзяра кизоса можна ушедомс аннемс иттнень панкта?
А.Белова.
—Аф ваномок сянь лангс, што панкнень эса лама белокта, В группань витаминда и минеральнай веществада, шабатне, конатненди нинге ашезь топоде 5-6 киза, аф эрявихть аннемс панкта кафта туфталонкса. Васенцесь, панкнень эса лама кальдяв пищевой волокнада (клетчаткада); омбоцесь, вирень панкне шокшсазь рдазу модаста токсическяй веществатнень. Исключениякс лувондовихть шампиньоттне и вешенкатне, конат касфтовихть искусственнай условияса (мярьгондеви макссемс 1,5 кизоста сявомок аф ламнянь перень сёроста консерват).
Кизефкснень лангс отвечась диетологсь, высшай категориянь врачсь Г.Птахина.
 
Сявость мяльс
Кардиолокне мусть доказательстват, што рахамась лезды мянемс седиень приступть эзда. Учёнайхне содазь, што седиень сярятьф мархта ломаттне рахсихть кафксть сяда шуроста сяка ситуациятнень пингста, мзярда рахсихть сяка кизонь ломаттне, конатнень аш седиень урмасна. Пеетькшнемась аш ся ломаттнень эса, конат кирдезь шунтированиянь операциять. Сяс учёнайхне макссихть рекомендацият сембе ломаттненди, конатнень сярядихть седисна: рахсемс лац-ряц кафксть-нилексть шити эрь шиня. Тя стане жа эряви, кода физическяй упражнениянь тиендемась и лац ярхцамась. И эряви семботь лангс ваномс лия ванфса.

13.06.2019 №23
 
 
 

 
НОВОСТИ
 
 

ЭСОНЗА АФ МАДОНДЫ ТОЛКС ЮРНАЙ МИНЦЕННЕТИ КЕЛЬГОМАСЬ

 
Родной кялень кельги, национальнай коень-обуцянь ванфты, афкуксонь патриот. Тянь ули кода азомс Мордовиянь Инсарскяй райононь Пою велеса шачф-касф мокшавать Анастасия Афанасьевна Шумкинать (Акшаевать) колга. Аф ваномок сянь лангс, што сон лама киза ни аф эряй мокшэрзянь масторса, эсонза аф мадонды толкс юрнай семботи минценнети кельгомась. Мзярда корхнень Анастасия Афанасьевнань мархта, тя шарьхкодевсь эстокиге. А ушедозе азондомать аф эсь колганза, а ёмла родинанц эзда.

 

Уликс легендать мяльс сявозь, атянзон атясна эрясть оцю губор лангса, конань лемоцоль Ош панда ляй, кона кафта ширде шарфоль вирьхнень мархта, а нинге кафта ширде ульсть сери крутоярхт, конатнень ала шудесь Исса ляйсь. Пингонь ётазь карафне ушедсть пяярема и ляйсь полафтозе ведень шудема вастонц, вов эста родонь плямась сась мяльс ётамс эряма такор вастти, коса ульсь кода касфнемс козя урожай, а Иссать трвава кассь поювонь оцю и туста вирь. Вельденза алятне шапондсть од кутт семьяснонды. Тяфта и эвондась велеть лемоц—Пою.

 

Школаса тонафнемстонза Анастасия сидеста ванондсь раскопкатнень мельге, конатнень Ош панда ляйса ётафнезь Мордовскяй госуниверситетонь студенттне и преподавательхне. Синь мушендсть сёвонень кядьгонь пакшт, трудонь кевонь орудият, налонь пет, авань мазоптомат, монетат и лама мезе лия. Кунардонь эряма вастста ламоц муфкснень ули кода няемс Саранск ошса Краеведческяй музейса, улихть синь и велень школань музейса.

 

24.10.2019  № 42
 
 
 

Россиянь и Мордовиянь Народнай артисткась, Мордовия Республикань Почётнай гражданинць Александра КУЛИКОВА:

 «ПАВАЗУВАН, МЕС ЭРЯН МОРДОВИЯСА!»
 
Тячи республиканьконь столицаса, Саранскяйса, ушедсы эсь работанц Мордовскяй (мокшень и эрзянь) народть Межрегиональнай общественнай организациянц Всероссийскяй VII съездоц. Пингстонза вановихть кизефксне, конат оржаста ащихть мокшэрзянь нациять инголе. Тя оцю пуромксть карша тейнек удалась корхнемс Россиянь и Мордовиянь Народнай артисткать, Мордовия Республикань Государственнай премиянь лауреатть, Славань III степенень орденонь кавалерть, Мордовия Республикань, Рузаевкань и Темников ошень почётнай гражданинть Александра Куликовать мархта. Александра Николаевна сувси съездонь делегаттнень лувксс.

 

Александра Куликовать лемоц лац содаф аф аньцек эсь республикасонк, но и ламоц лия вастова. Вии, седиень-ваймонь токай вайгялец лездсь велень стирняти арамс кельговиксокс тежятть ваныти. Эсь творческяй кинц артисткась ушедозе 1962 кизоня «Умарина» моронь и кштимань государственнай ансамбльса. Лама киза А.Куликова кеняртьфнесыне ломаттнень сольнай мораманц мархта.

 

Александра Николаевнань творческяй киц козя гастролень ширде. Вайгялец кайгсь аф аньцек Россияса, но и лия ширеса: Германияса, Чехословакияса, Финляндияса, Польшаса, Венгрияса, Китайса, Белоруссияса, Украинаса, Молдавияса, Киргизияса, Таджикистанца, Чувашияса. Лия регионца и нльне омба масторса улемста артисткати удалси васьфнемс-корхнемс тоса эряй мокшетнень и эрзятнень мархта, а сяс аф кулемас коре содасы, мезсь синь пичефтьсыне-таколфтсыне.

 

Корреспондентоньконь мархта корхнемста артисткась азозе, мезе ученды мокшэрзятнень оцю пуромксснон эзда, мезть колга мялец корхтамс сонцень, а стане жа отвечась и лия кизефкснень лангс.

 

 

 
24.10.2019  № 42
 
 
 

МОКШЕНЬ И ЭРЗЯНЬ КЯЛЬХНЕ ТОНАФНЕВИХТЬ ШКОЛАТНЕНЬ

Понедельникста Саранск ошень округонь Администрацияса ётафтф оперативнай совещанияса ванондовсь лама кизефкс. Башка мяль шарфтфоль Мордовскяй (мокшень и эрзянь) народть Межрегиональнай общественнай организациянц VII съездонцты анокламати. Тяса азфоль, што Саранскяень 45 сембе школатнень эса 2 класста сявомок 7 классти молемс тонафневихть мокшень и эрзянь кяльхне. Тя тевса заняф 94 педагог. Тонафнемаса фатяф 17916 ученик. Недяляти макссеви 1-2 част. Тяда башка, тяконди водендафт кружокне, музейхне. Саранскяень идень сембе саттнень эса тевс ноляви «Минь эрятама Мордовияса» этнокультурнай компонентсь. Дошкольнай учреждениятнень эса мокшэрзянь народть историянц, коензон-обуцянзон и культуранц мархта иттне содафневихть культорологическяй аспектть, налхксематнень вельде. Стане жа работай этнокультурнай (кштимань, музыкальнай, народнай творчествань) 93 кружок, коса заняф 2160 шаба. Тянь и ламоть лиять колга заседанияса пачфтсь социальнай политикать коряс Департаментть директоронц заместителец—Образованиянь управлениять начальникоц Оксана Шуляпова.

 

24.10.2019
 
 

 

 

Яндекс.Метрика Яндекс цитирования Rambler's Top100
Учредительхие:
Главнай редакторсь: И. С. Лушкин