Поиск по сайту: 
 

Архив
 январь 
 2020 
пн вт ср чт пт сб вс
  12345
6789101112
13141516171819
20212223242526
2728293031  

 
 

 

Ветеранам о ветеранах

Ваймоц панжада сембонди

Аф ичкозе Атерть эзда ащи Ташта веленясь. Тяса и етафтозе эсь эряфонц трудонь кельги мокшавась, лама идень тядсь, кельгома бабась, щавась Ф.В.Чудаева. Ефси аф кунара тя ломанти топодсь кафксогемонь киза. И мзярс мяляфтсы эсь прянц, фалу заняфоль трудса. Трудонь стажец—пцтай ведьгемонь киза. Вестевок ашезе полафне покодема вастонц, фалу трудендась Атерень районнай больницянь терапевтическяй отделенияса.
Шачсь Федосья Васильевна Атерь велеса Шумкиттнень семьяса 1939 кизонь 10 майста. Пингсь стакаль, аф сетьмоль и вачель. Кафта кизонянзоль, мзярда ушедсь  Великай Отечественнай войнась. Мокшавась лац-ряц афи мяляфтсы, кода ильхтезь аляснон фашисттнень каршес тюрема. Шабатне надиясть, што тапасазь            фашисттнень и алясна мрдай куду. Но сон ашезь учев. Шавовсь бойса. А кудса лядсть колма шабанза, конатнень касфтозень, кеподезень рьвац. Сембе синь арасть шнама ломанькс, кельгома рьвакс, мирдекс, тядякс-алякс.
Федосья Васильевна шачфтсь кота итть. Тяфта ни лиссь эряфса, што мирдец кулось пяк рана, 42 кизоса. Мокшавась тиезе семботь, штоба  шабанзонды, максомс цебярь образования, воспитания, аральхть шнама ломанькс. И тя теенза удалась. Тяни сонь кемонь уноконза, уноконь колма иденза. Сембе синь кельгсазь эсь бабаснон, щаваснон.
А кода аф кельгомс  панжада седи, ару вайме мокшавать. Кальдяв сон киндинге и мзярдовок аф арьси. Максси цебярь советт, смузю мяльхть-арьсемат. Сембе синь сявфт эряфста. Сонцень эряфоц Федосья Васильевнань аф теждяль, нярьхкамазда сяпиель. Но кядензон вестевок ашезень ноля. Ломань ашезь  корхтафне, обжакшне. Аф радня, аф велеряй лангс вестевок ашезь пеняцякшне. Лац шарьхкотькшнезе, што оцюнятне эрявихть кулхцондомс, кельгомс. Сонценьге сембе кулхцондозь, кельгозь. Аф стак 70 кизозонза работась  больницяса санитаркакс. А тевоц аф теждятнень эздоль.
Ушедсь работама Федосья Васильевна етай веконь ведьгемонце кизотнень кучкаста. Помещениятне таштонятольхть. Ведь каннесть эшиста, уштсть пенгаса. Палататне емлатольхть, пяшксетольхть сярядида. Покодема шись ушеткшнесь рана. Федосья Васильевна кенеркшнесь эрь тевса. Работась виень аф ужяльдезь, совестьс коре. Ашезь юксне и кудть колга, коса сон тиендезень и алянь, и авань тефнень.
Ф.В.Чудаевать содаса пяк кунара. Аф весть мархтонза васьфнень и мзярда работась больницяса санитаркакс, и мзярда тусь ваймама.  Етак марнек Ташта веленять, сонь лацонза ломань аф муят. Федосья Васильевна, аф ваномок тяни ни эсь 80 кизонзон лангс, фкявок минута тевфтома аф ащи. Ломаттне кельгозь сонь лемнесазь Федакакс, Васильевнакс. Сяда эряфкшуфне пшкятькшнихть «Серафиморясь». И сембонди сон кельгома ака, щака. Ваймоц панжада сембонди, сембонь кулхцондсыне, сембонди максы пара советт. Сонь аш кальдяв и аф кельгома рьвянянза, овонза, уноконза. Сембе келькфт и кельгомат.
—Мон кельгса эсь тядязень,—мярьгсь церац Сергей Серафимович.—Сон лама тись сянкса, штоба касолень, аралень афкуксонь ломанькс. Аделань школа, вуз. Тядянь лезксфтома ефси ашель кода. Юбилейстонза арьсень тядязти кеме шумбраши и сяда ламоняс эрямс.
Тяни Федосья Васильевна эряй церанц Николай Серафимовичень семьянц мархта. Эряйхть ладязь, фкя-фкянь шарьхкодезь.        Вакссонза кельгома рьвяняц Ольга Ивановна, кона казсь мокшавати кафта унокт—Людмилать и Русланонь. Тяни синь оцюфт. А мзярда-бди Федосья Васильевна теест пидесь-панць, ильхнезень и васьфнезень школаста.
—Цебярь авозезе, пяк цебярь,—виденцясь Ольга Ивановна.—Сембоса лезды. Фалу ащесь и ащи кеме семьять инкса, коса фалу улельхть ладяма, кельгома. Катк ламоняс эряй, ули тейнек сембоса примеркс, прянь шнама вастокс.
Миньге арьсетяма Ф.В.Чудаевати кеме шумбраши и ламоняс эрямс. Содасаськ, што сон мокшень кялень и «Мокшень правдань» кельги, коень-обуцянь ванфты.
И.Вешкин.

13.06.2019 №23
 
 
 

 
НОВОСТИ
 
 
 
 

Од ломаттненди азонтфоль РФ-нь Конституциять колга

12 декабрьста Мордовия Республикань Государственнай Собранияса ётась пуромкс, кона лемтьфоль Российскяй Федерациянь Конституциять шинцты. Госсобранияв сашендсть Саранск ошень 23№ гимназиянь и Рузаевкань 9№ школань тонафнихне. Тяса теест ётафтфоль экскурсия зданиять эзга, няфтьфоль Госсобраниянь музейсь, азонтфоль закононь нолни органть работанц колга. Тяда меле школьникне пуромкшнесть Оцю залса, коса синь мархтост васетькшнесь МР-нь Госсобраниять Председателец, «Единая Россия» партиять Мордовскяй региональнай отделениянц Секретарец В.В.Чибиркин. Владимир Васильевич пачфтсь од ломаттненди кода и мезенди примафоль Конституциясь, азондсь республикаса властень системать колга.

—Странаньконь фкя инь васенце законоц—Конституциясь примафоль аф тёждя пингста синцень странань эряйхнень мяльснон коряс,—азозе В.В.Чибиркин.—Эсонза кемокстафт ломанть праванза и воляшинза.

 

Российскяй Федерациянь Конституциясь примафоль 1993 кизоня. Тядде теенза топодсь 25 киза.

 

В.В.Чибиркин кошардозень од ломаттнень улемс эсь странань афкуксонь гражданинкс, кельгомс шачема масторснон. Тинь эздонт, мярьгсь Владимир Васильевич, ащи Россиять сай пингоц.

 

Сяда тов Российскяй Федерациянь Конституциять колга лекция школань тонафнихненди лувсь «Молодая гвардия «Единой России» ВОО-ть МРО-ц вятиенц тевонзон тиендисна И.А.Заугольнов.

 

О.ЕВДОКИМОВА.

 

 

 

13.12.2019
 
 
 
 
 
 

 

 

Яндекс.Метрика Яндекс цитирования Rambler's Top100
Учредительхие:
Главнай редакторсь: И. С. Лушкин