Поиск по сайту: 
 

Архив
 март 
 2024 
пн вт ср чт пт сб вс
    123
45678910
11121314151617
18192021222324
25262728293031

 
 

 

Обо всем

16 июнцьта—Тройцясь
Ведьгемонь шинь ётазь Христость живолгодомда меле—Святой Тройцясь—Пятидесятницась. Тройцяда ингольдень ёткшиня церькавса помондавихть кулофне. Тя шись лемневи—Тройцянь ёткшикс. Тройцянь омбоце шиня—Святой Духонь шись (Духов  день). Сон эрси фалу понедельникста.
Христость шачемс Пятидесятницать  значенияц лияль. Сон лемтьфоль Моисеень законца кемонь заповеттненди, конатнень теенза максозень сонць Шкайсь Синайскяй пандть пряса. Тройцясь лятфни христиаттнень и лия библейскяй событиятнень колга. Менели тумдонза инголе Христоссь надияфтсь  апостолхненди кучемс лангозост Святой Дух. Сянкса мярьгсь теест  аф тушендомс Иерусалимста. Господть менели тумда меле учениконза мрдасть Иерусалиму и сувасть самай ся кудти, коса ульсь Тайнай Вечерясь. Тоса ульсь и Божий Матерсь и сембе учсть лангозост Святой Духть валгоманц эса.
И апак учсек марясть менельста вармакс сай шум, кона пяшкодезе марнек кудботмоть.
Тяфта валгсь лангозост Святой Духсь и синь кармасть корхтама разнай кяльса. Тяза пуромф народсь  пяк дивандазевсь тянди. Кажнайсь марязе сонь кяльсонза корхтамать.
Православнай христиаттне Тройцянь шиня кудснон и церькавть наряжакшнесазь сянгяря  тараткаса и панчфса. И тя обычайсь моли нинге Ветхозаветнай церькавста. Тя тиендеви  ся пингста,  мзярда Моисей получазень Шкайть эзда кемонь заповеттнень. Эста Синайскяй пандть видеса сембось сянгярьготкшнесь и панчсь.
Святой Тройцянь шиня морафтови Святой Духти молитва.
 
Кодама алхне сяда цебярьхть
—Мезть эзда ащи алхнень тюссна и виде, бта, шобда тюсоннетне сяда цебярьхть?
 Л.Веревкина.
—Алхнень тюссна мзярошкада ащи сянь эзда, мезьда анневи саразсь. Кда аф сатнихть кой-кона аминокислотатне, алть кедец может улемс сяда валда тюсонь. Но ламода тюссь ащи саразть породанц эзда.
Валда толга мархтотне алыяйхть акша алхт. Тяфтама сарасне сяда сидеста кирневихть-касфневихть оцю производстваса, синь макссихть лама алда. А вов фермерхне кочксесазь мясо-яичнай ширень породатнень, синь толгасна сидеста коричневайхть, сяс и алсновок тяфтама тюсоннет. Тяста эвондась мяльсь, што кудонь коричневай тюсонь алхне сяда цебярьхть акшетнень коряс, конат получафт агрокомплексса, но тя эльбятькс. Алхнень качествасна ащи сараснень андомаснон и кирдемань условияснон эзда.
 
Пзьгататне менельса лиендихть лама ковонь, модать лангс апак озсек
А тинь содасть, што пзьгататне (стрижи) лиендихть кемонень ковонь, аф озсемок модать лангс? Лиемста синь удыхть, ярхцсихть унжаняда, фкя-фкянь мархта кельгсихть и кочксихть пизонди строямань материал.
Тяфтама мяльс састь Швециянь Лундскяй университетонь ученайхне. Исследованиятнень пингста сисем нармонень копорьс путфтольхть компактнай датчикт, кафта кизот синь ванцть пзьгататнень лиендемаснон мельге. Мзярда ученайхне ванозь даннайхнень, няезь, што колма нармоттне 10 ковста ашесть озсе модать лангс, сяка пингть вететне озсесть модать лангс аньцек весть. Мезьса ина заняф пзьгатась лядыкс кафта кофнень? Тя пингть нармоттне нарвасазь алняснон.
Азома сявок, орнитолокне арьсихть, што и тя аф рекорд, сяс мес эряфонь васенце кизоня пзьгатась лефкскат аф лихни, лисенди, модать лангс озсемань туфталхт аш. Улихть мяльхть, што од нармоннясь лиенди модать лангс апак озсек кафта кизот. Тяфтама исследованият апак етафтфтольхть, сяс мес од нармоннятнень аш синцень пизосна, коза синь мртцельхть алняснон алыяма и лефкскаснон касфтома, и коса ученайхненди улель кода валхтомс копорезост кемокстаф датчикнень.
 
—Тейть, ялгай, эряви сяда курокста осалгодомс.
—Доктор, но монь тяфтама конституциязе.
—Конституцияньке минь фкя, проста аф эряви вельф лама тетькомс.
Ардонь кода-бди таксиса, водительть настроенияц цебярель и сон корхтай: «Мон кельгса эсь работазень. Монць эстейне начальникан, кивок тейне аф указовай». А мон теенза: «Вов тоса,—сурса няфтень инголи,—шарфтк види шири».

Аватненди. Кда мирденте кашт аф молезь щакшнесыне варяв носканзон, лисенди, ботинканзон кайсесыне аньцек кудса. Ванфтость и ужяльдесть сонь.
—Матаняй, мон тяни лац получсян и анокан трямс-щамс нинге фкя ава… мезе азат тянь колга?
—Пяк пара! Мон гайфтян тядязти, катк кармай эряма мархтонк…

Вете кизоса цёрокшсь маладсь телефонти.
—Да.
—Серьгятьк аляцень или тядяцень.
—Синь кудса ашет.
—А кивок нинге кудса ули?
—Да, сазорозе.
—Серьгятьк, пожалняста.
Аф лама пингонь ётазь цёрокшсь тага сявозе трубкать:
—Сон вельф стака. Тейне коляскаста аф таргави!

 

 
НОВОСТИ
 

МОРДОВИЯСА ЛОТКАФТФ МАСКАНЬ КАННЕМАНЬ РЕЖИМСЬ

09.06.2022  № 22
 

НАЦПРОЕКТТНЕНЬ—ЭРЯФС!

Мордовиянь Правительствась сяда тов мольфтьсы работать национальнай проекттнень эряфс ётафтоманкса, конатненди ки макссь странань Президентсь Владимир Путин. Республикань Оцюнять ширеса совещанияса корхтафоль основной федеральнай и республиканскяй программатнень эряфс ётафтомаснон колга. Мольфтеви работать квалма азондсть вице-премьерсь Игорь Чадов, МР-нь строительствань и архитектурань министрсь Алексей Гришакин, МР-нь транспортть и дорожнай хозяйствать коряс Госкомитетть председателец Валерий Кандрин, МР-нь велень хозяйствань и продовольствиянь министрсь Александр Кечайкин, МР-нь вирень, охотничьяй хозяйствань и природопользованиянь министрсь Алексей Ларькин.

 

Мордовиянь Оцюнясь путсь задача кирдемс кеме контроль ала строямань графикнень пяшкотькшнемаснон. Васендакиге корхтамась мольфтевсь социальнай инфраструктурань объекттнень колга. Тяфта, ванфтольхть кизефксне, конат сотфт Саранскяйса Кировонь ульцяса 250 вастонди идень садть и Тавлинскяй набережнайса 1450 вастонди школать строямаснон шумордамасна.

 

09.06.2022  № 22
 

ЁТАФТОВСЬ АНТИКРИЗИСНАЙ ШТАБТЬ ЗАСЕДАНИЯЦ

2 июньцта Мордовияса ётафтовсь экономикать ширенц кирдеманц и кемошинц ванфтоманц коряс антикризиснай штабть заседанияц, коса ванондовсть республикаса уликс тефне. Азфоль, што Россиянь Правительствась сяда тов мольфти работа санкциятнень эзда экономикать араламанц коряс законодательнай базань тиеманкса. Региоттнень ширень кирдемасна и синь финансовай кемошиснон кемокстамасна—главнай направлениятнень эзда фкясь. Путф подпись РФ-нь Правительствать постановлениянц алу, кона максси возможность кирьфнемс пандоматнень бюджетнай кредиттнень коряс, конат сявфт дефицитть пяшкодеманкса.

 

Майста нолдаф тевс важнай продукциянь импортёрхнень специальнай льготнай кредитованиянь программасна. Тянкса федеральнай бюджетста нолдаф 37 миллиардта лама цалковай. Тяфтама ширень кирдемать сюнеда бизнести ули кода меки  ладямс товаронь рамсемать, конат мзярс аф нолявихть Россиять территорияса, и сяда тов мольфтемс сембе пингонь работать.
 

09.06.2022  № 22
 
 

Одкстоптови общественнай транспортсь

28 майста Саранскяйса Советскяй площадьса Мордовиянь Оцюнясь Артём Здунов ванозень пассажирскяй од автобуснень, конат работайхть газса. Мордовияти тя общественнай од видонь транспорт, кона арьсекшневи нолдамс тевс республикань транспортнай предприятиятнень подвижнай составснон одкстоптоманкса.

Автобусонь ноляйхне няфтезь средняй и оцю классонь техникать. Артём Здунов ванозень автобуснень эса тяниень пингонь салонть и водителень кабинаса оборудованиять.

«Газса работай техникась сяда ванфтсы экологиять и аф веши оцю карьхцьт. Тяфтама транспортть эвондамац максы инфраструктурати касома-виияма—ков сяда лама тяфтама видонь транспортта, тов сяда лама кармай заправочнай станцияда. Тянь мельге сай пингсь»,—китькстазе Мордовиянь Оцюнясь.

Сембе автобусне стане жа тифт усксемс физическяй ширде ограниченнай возможность мархта ломаттнень. Тяниень пингть Саранск ошса ули автомобильнай газонаполнительнай компрессорнай фкя станция.

02.06.2022  № 21
 

Ревакцинация COVID-ть эзда эряви ётамс сембонди

Мордовиянь Оцюнять Артём Здуновонь председательстванц ала 27 майста ётафтовсь Мордовияса коронавируснай инфекциять инголдаманц и келемоманцты кить персеманц коряс оперативнай штабть заседанияц.

Отмечафоль, регионца ванфтови ковидса одс сярядихнень лувксснон киремац—ётай недялять тя ульсь 30 ломань шити.

«Эряви сяда тов мольфтемс ломаттнень вакцинацияснон и ревакцинацияснон коряс работать. Тянь мельге ванома кода муниципальнай образованиянь оцюнятненди, стане и предприятиянь и бизнес-структурань руководительхненди. Тяниень пингть ётафтовихть ЕГЭ-тне, сяс инфекцияда инголдамань мератненди эряви шарфнемс башка мяль»,—мярьгсь региононь руководительсь.

МР-нь Правительствать Председателенц заместителец Галина Лотванова азозе, што республикань медицинскяй учреждениянь стационархненди тона недялять эрь шиня пачфневсь 20 малава ломань. Сёлкф нинге 50 ковиднай койка-вастсь, стационарса пчкси 203 ломань, конатнень эзда пялесна—60+ кизосот.

02.06.2022  № 21
 

Экономикать виияфтоманцты—башка мяль

Мордовиянь Оцюнясь Артём Здунов 27 майста ётафтозе республикань экономикать ширень кирдеманц и кемошинц ванфтоманц коряс антикризиснай штабть заседаниянц.
Региононь руководительсь мярьгсь, што Россиянь Правительствась сяда тов примси решеният, конат эрявкснихть тячиень аф тёждя пингть экономикать работанц лац ладяманцты.
 
«Васенце очередень тевонь мольфтемань федеральнай планти сувафтф нинге 23 кизефкс. Фалу эвондакшнихть од механизмат, од возможностть. Тейнек эряви синь сяда лац нолямс тевс,—мярьгсь Артём Здунов.—Кепотьксонди, Россиянь Правительствась дополнительнайста нолдай 3 миллиартт цалковай региоттнень эса спортивнай инфраструктурать виияфтоманкса. Эряви кенеремс тиемс заявка ня программатненди и получамс финансирования».

Тяфта жа арьсекшневихть отечественнай программнай обеспечениянь ширень кирдемань од механизмат. Республикань цифровой виияфтомань министерствати и региональнай IT-компаниятненди мярькф активнайста примсемс участия ня процесснень эса.

02.06.2022  № 21
 
 

Артём Здунов встретился с многодетными семьями

Глава Мордовии Артём Здунов провел встречу с многодетными семьями республики – её приурочили к Международному дню защиты детей.

Встреча состоялась в Доме Республики в теплой, почти семейной обстановке, за чашкой чая. В ней участвовали вице-премьер Галина Лотванова и министр социальной защиты, труда и занятости населения РМ Игорь Князьков.

«Я хочу от всей души поблагодарить всех многодетных родителей за ваш нелегкий труд, достойный глубокого уважения и общественного признания, - сказал Артём Здунов. – Вы взяли на себя большую ответственность. Понимаю, сколько дел в большой семье, какая у вас загруженность, но прошу вас, чтобы за этими делами вы не забывали разговаривать со своими детьми. Обсуждайте с ними, что происходит в мире, что было много лет назад. Нам важно, чтобы дети выросли настоящими людьми, чтобы любили свою семью и свою Родину. Это наша с вами общая задача. Вы выполнили и перевыполнили свою демографическую программу, спасибо вам за это, теперь дело за нами».

В Мордовии около 8 тысяч многодетных семей, в которых воспитываются более 25 тысяч детей.

25 мая Президент России Владимир Путин на заседании президиума Государственного Совета, посвящённого вопросам социальной поддержки, подчеркнул, что многодетная семья должна быть ценностным ориентиром для всего общества и поддерживаться государством. Президентом поставлена задача сделать всю систему поддержки семьи целостной, последовательной, понятной и эффективной.
02.06.2022