Мокшэрзянь народть Всероссийскяй VII съездонцты

Саратовскяй областень «Шумбрат» мокшэрзянь региональнай общественнай национально-культурнай центрать председателец В.И.Кривошеева:
«Тейнек ули мезе азомс и няфтемс российскяй нациянь лия нароттненди!»
—Валентина Ивановна, кодама инь оцю целень сатоманкса вятьсыне эсь тевонзон Саратовскяй областьса «Шумбрат» мокшэрзянь региональнай общественнай национально-культурнай центрась?
—2016 кизонь 27-29 сентябрьста мон улень «Российскяй Федерациянь финно-угорскяй народонь Ассоциация» Общероссийскяй общественнай движениять VI съездса, кона етась Коми Республикаса. Тя форумса ульсь 300 делегат, конат састь Россиянь сембе субъекттнень эзда, коса эряйхть финно-угорскяй наротт или синь представительсна.
Съездонь темась—«Финно-угорские народы России: гражданская идентичность и этнокультурное многообразие»—пяк тусь мялезон. Сяс эрьгавста работань съездонь эрь дискуссионнай площадкаса и секцияса, коса корхтаматне мольфтевсть финно-угорскяй народонь национальнай кяльхнень и культуратнень аф аньцек ванфтомаснон, но и виияфтомаснон колга.
Тяфта жа тусть мялезон Российскяй Федерациянь финно-угорскяй народонь Ассоциациять председателенц П.Н.Тултаевонь валонза, конатнень азозень делегаттненди съездонь Пленарнай заседанияса. Сон мярьгсь, што тячи финно-угорскяй сембе сообществати, кона эряй Россияса, кялень ванфтомань прябалась пяк актуальнай. Сяс ся регионца, коса национальнай кяльхнень ули государственнай кялень статуссна, эряви мушендомс ярмаконь ресурст и      макссемс вельдест эрявикс лезкс национальнай газетатненди и журналхненди, тонафнемань системати и национальнай книгань нолдамати.
Мон, кода общественнай организациянь руководитель, шнасайне ня валхнень-мяльхнень. Сяс мес монга арьсян тяфта: эсь национальнай шамаликоньке тейнек ванфтови аньцек эсь национальнай кяленьконь и культураньконь ванфтомаснон-виияфтомаснон вельде.
Российскяй Федерациянь Президентсь В.В.Путин съездонь делегаттненди Приветствиясонза тяфта жа макссь оцю оценка национальнай кялень, культурань, идентичностень и сембе лия кизефксненди, конат ванондовсть съездса. Инь оцю мяльсь, койсон, кона азфоль Президентть Приветствияса, кайги тяфта: «Минь сембе—Россиять иденза. И тейнек эряви мазопнемс марстонь кудоньконь ялгаксшинь и ладямань койхнень вельде!»
Ня и лия пара койхнень вельде и вятьсыне Саратовскяй областьса эсь тевонзон «Шумбрат» мокшэрзянь региональнай общественнай национально-культурнай центрась.
—А кодама соткст кирди Саратовскяй областень «Шумбратсь» Мордовия Республикань профильнай министерстватнень и общественнай организациятнень мархта?
—Цебярь соткст национально-культурнай центрась  кунара ни ладясь Мордовия Республикань Культурань, национальнай политикань и архивнай тевонь, Образованиянь министерстватнень мархта. Синь фалу тейнек макссихть эрявикс лезкс сембе тевсонк, конатнень минь тиендьсаськ мокшэрзянь национальнай культурать и кяльхнень ванфтоманкса и виияфтоманкса Саратовскяй областьса.
Тякоть тейне ули кода азомс Мокшэрзянь народть Межрегиональнай общественнай организациянц, Мордовия республикань Народонь ялгаксшинь кудть и Финно-угорскяй народонь культурань Поволжскяй центрать колга.
 Тяфта жа эряви азомс: минь фалу аф аньцек уленттяма, но и  эрьгавста работатама национальнай мероприятиятнень эса, конат етафневихть Мордовия Республикаса. Сяс тейне ули кода мярьгомс: сембе ширдень сотксне, конат ладявсть Саратовскяй областень «Шумбрат» мокшэрзянь региональнай общественнай национально-культурнай центрать и  Мордовия Республикань профильнай министерстватнень и общественнай организациятнень еткса, кафта ширденнет.
И ня сотксне, конат кизоста кизос коль кемокснихть, эсон пяк  кеняртьфнихть.
—Кодама мероприятияса, Валентина Ивановна, и лия национально-культурнай форумса ванфты и виияфты Саратовскяй областьса мокшэрзянь кяльхнень и национальнай культурать эса «Шумбрат» центрась?
—Эрь кизоня минь етафнетяма лама национально-культурнай мероприятия. Синь, койсон, няевиста лездыхть виияфнемс Саратовскяй областьса мокшень и эрзянь кяльхнень, а тяфта жа  национальнай культураньконь. Тяда башка, ня мероприятиятнень вельде няфнесаськ Саратовскяй областень лия нароттненди эсь национальнай культураньконь и коеньконь, щамоньконь мазышиснон, а тяфта жа, мярьголень, мокшэрзянь национальнай шамаликоньконь.
Тякоть тиендьсаськ ся мероприятиятнень эса, конатнень етафнесаськ марса Саратовскяй областень лия народонь национально-культурнай объединениятнень мархта. Мярьктяма, «Миронь коренной нароттнень шисна» фестивальса, «Волга—Сура» ляйхнень ланга марстонь уендемаса, Площадкаса, коза валгсь Ю.А.Гагарин космосста, Советскяй Союзонь Геройти М.П.Девятаевонди лемтьф «Ялгаксшинь иласа», Победань, Россиянь шиста и лия оцю мероприятиятнень пингста.
Мокшэрзянь башка национально-культурнай мероприятиятнень колга корхтамста, койсон, васенцекс эрявихть лятфтамс мокшень и эрзянь кяльса диктанттнень, Мокшэрзянь национальнай культурань «Шумбрат» областной фестивальть, «Шумбратада, ялгат!» мокшэрзянь культурань межрайоннай фестивальть, а тяфта жа тяка лем ала районнай лия фестивальхнень и илатнень.
—Валентина Ивановна, а маластонь пингть мезьса  ули заняф национально-культурнай центрась?
—Тяни минь аноклатама национально-культурнай проектт, конатнень мяленьке етафтомс эряфс «Волгась—ялгаксшинь ляй» Международнай этнокультурнай экспедицияса и Мокшэрзянь народть Всероссийскяй VII съездсонза.
Тяда башка,  центраньке тиенди лама благотворительнай тевда. Мярьктяма, лезттама Энгельс ошень «Риф» реабилитационнай центрати, коса макссеви медицинскяй лезкс иттненди, конат кальдявста няихть.
Тяфта жа тядде арьсекшнетяма етафтомс эряфс проект национальнай культурань и этно-туризмань сфераса. Тянь тиемста улихть оцю надиямат Саратовскяй областень  Оркино велень Мокшэрзянь национальнай центрать лангс.
Лиякс мярьгомс, Саратовскяй областень мокшэрзятненди ули мезе няфтемс российскяй нациянь лия народонь представительхненди!
—Удалаза сембе арьсефонте, Валентина Ивановна.
—Сюкпря пара валонкса-арьсеманкса.
В.Нестеров.