«Келу» ансамблень артисткатне кштисть и морасть Сургутса

2 июньцта Ханты-Мансийскяй автономнай округонь—Югрань Сургут ошса етась «Соцветие» национальнай культурань фестивальсь. Тядде сон етафтфоль комсь омбоцеда и лемтьфоль ошть 425 кизонцты. Сургутскяй университетть  инголе площадьса тя шиня азорондась народонь ялгаксшинь оцюдонга оцю ила, коза пуромкшнесь тежятть ошеряй. А инь васенце геройкс праздникса ульсть общественнай национально-культурнай объединениянь представительхне.
«Соцветие» фестивальсь аф стак шачсь-эвондась Сургутса. Кунардонь пингста сявомок тяса ладязь, ялгаксшиса ряцок эряйхть лама нациянь ломатть. Тяниень пингть ошса лувондови 100-да лама народность, работай 22 общественнай этническяй объединения, 17 эздост примась участия «Соцветие» XXII фестивальса.
Эрь нациясь илас аноклазе эсь «кудонц»—национальнай подворьянц. Тяста ульсь кода няемс-ваномс эрь народть национальнай щамонзон-карямонзон, кудъетконь паршинзон, сувенирнай продукциянц, варжамс национальнай ярхцамбяльхнень, кулхцондомс разнай кяльса кайги моротнень, ваномс тя или тона народть кштиманзон.
Подворьятнень ванома сашендсь лама оцю инжи. Тясоль Сургут ошень мэрсь В.Д.Шувалов, ошень Думать председателец Н.А.Красноярова, Сургутскяй райононь оцюнясь А.А.Трубецкой и лият.
Фестивальса сембонь мархта ряцок келиста няфтьфоль мокшэрзянь подворьясь. Ладяф оцю шрать лангса национальнай аньцек кодама ярхцамбяль ашель—пачат, пярякат, поза. Кайгсть мокшень и эрзянь морот, ашезь сетьмосе гармониять вайгялец. Мокшень и эрзянь щамса щаф аватне-алятне кшиса-салса васьфнезь инжихнень. Инжиень васьфтихнень-каваняйхнень етксотольхть Г.И.Сураев-Королевонь лемса «Келу» фольклорнай ансамблень морсихне—МР-нь народнай артисткась А.Г.Атласова и Мордовиянь Заслуженнай артисткась Г.Н.Макшева. Артисткатне аф васенце кизось ни примсихть участия «Соцветие» фестивальса. Эрь самасна Сургутонь мокшэрзятненди оцю праздник. Кода фалу синь кеняртьфтезь фестивалень участникнень мокшень и эрзянь ваймонь эжди мороса, седикс-ваймокс корхнесть Сургутса эряй мокша и эрзя ломаттнень мархта. А эздост тяса аф кржа. 2010 кизонь Всероссийскяй переписень даннайхнень коряс, Сургутскяй районца эряй 318 мокшэрзя. Ламонцне еткстост састь кельме шири ефси одста, тяни тяса касыхть синь идьсна и уноксна. Кепотьксонди, Зубово-Полянскяй районцта мирттне-рьвятне Вячеслав и Ольга Овчинникофне састь Сургуту, мзярда афи содасть фкя-фкянь. Тяса васедсть, пуроптсть семья. Синь семьясна интернациональнай. Кудазорсь Ковылкинскяй райононь мокшаля, рьвац—Волгоградонь рузава. Эряфонь кисна прасть марс стане жа Сургутонь модать лангса. Аф ваномок сянь лангс, што земляконьке лама киза ни эряйхть ширеса емла родинаснон  эзда, синь аф юкснесазь родной кяльснон, койхнень-обуцятнень, национальнай культурать. Кой-кинь нльне идьсновок корхтайхть мокшекс или эрзякс. Пара мяльса лувондыхть национальнай литература, кона пачфневи Мордовияста. Кеняртькшнихть, мзярда ширезост сашендыхть инжихть мокшэрзянь масторста, конат каннихть эсь мархтост шачема-касома уженяста лямбоня.
О.Евдокимова.