Газетаньконь тячиень номерсонза азонттама лама идень семьять колга, кона эряй Кочкуровскяй райононь Вирь Тавла велеса. Олег Владимирович и Елена Алексеевна Гангеефне вов 22 киза кода пуроптсть семья. Шачфтсть вете итть. Олег Владимирович шачемас коре Сабаева велень. Профессияц—музыкань преподаватель. Рьвац шачсь Ромодановскяй районца Атьминский совхозса, профессияс коре—повар-технолог. Рьвяямда меле эрясть Саранскяйса, а тяни вов ни 6 кизот кода эряйхть велеса. Азоравась азондозе, мес тяфта лиссь. Шабатнень шумбрашиснонды (эста эздост ульсь 3) мезе-бди ошень эряфса ашезь ладя, сидеста сярятькшнесть, эвондакшнесь аллергия аф шарьхкодеви мезень лангс. Врачне фкя вайгяльса кошарязь полафтомс эряма вастснон. Миртть-рьват кафцьке шачсть-кассть велеса, сяс састь мяльс тумс эряма вели. Путсть шуфтонь куд, озафтсть сад, водендасть жуватат, кудонь нармотть, касфнихть перень серот. Лиякс мярьгомс, пильгонек-прянек чопафтсть велень эряфс. Олег Владимировичень эстокиге тердезь работама велень школав директоркс. Кота кизот работась школаса, тяни, ужяленди, школать реорганизовандазь.
Оцю семьянь тряйсь лядсь работафтома. О.В.Гангеевонь валонзон коряс, аф ваномок ня прябалатнень лангс, сон ефси аф каендай, мес кадозе ошть. Велень эряфсь сетьме и мазы ошень эряскодоматнень-пульхкоматнень коряс, сон ламода ладяй трудонь кельги ломанти. Вдь машты кядь ломанць мзярдонга аф ляды тевфтома. Олег Владимирович кярьмодсь шоферонь тевс, тяни сон ускси ломатть эсь ГАЗельсонза.
Ня пара вайме ломаттнень фалу панжадот кенкшсна инжихненди, кудсна пяшксе шабань весяла вайгяльда, маряви пианинаса, гитараса морама, яфоди танцти ярхцамбялень шиненя. Семьяса азорондай кельгомась, сембоса фкя-фкянь шарьхкодемась. Вов кодама сон павазу эряфсь!
Но павазда башка тя семьясь васьфтсь оцюдонга оцю ризф мархта. Кафта кизоняса стака урмать—менингококковай менингитть сюнеда, кулось ся пингть фкя и тяка иднясна. Тя вии, шуродонга-шуроста васьфневи урмась ашезь лоткафтов врачненди и церанять сязевсь аньцек ушеткшни эряфоц. Тя ульсь стакадонга-стака пичедема тядянь-алянь ваймотненди. Но, аф ваномок семботь лангс, тя зиянць ашезе срафта семьять, а нинге сядонга кемокстазе мирдть и рьвять еткса кельгомань сотксть, фкя-фкянди ужяльдемать, лездомать.
—Мзярда саме ежес, сембе етаф сталмода-ризфта меле, минь мирдезень мархта араме плманжа лангс Шкайть инголи, панжеськ потмоньконь и сельмоведь мархта эняльдеме Шкайти. Анаме кядьстонза семьязонк лама идня,—азозе Елена Алексеевна.
Шкабавазть пилес пачкодсть фкя-фкянь кельги ломаттнень эняльдемасна и вов Гангеефнень семьяса касыхть 4 удалаф шабанят.
Сембода оцюти, Марияти, 14 киза. Стирнясь школада башка тонафни Вирь Тавлань идень художественнай школаса. Мялец поладомс тонафнеманц Ф.В.Сычковонь лемса Саранскяень художественнай училищаса. Кельгсы мораманц, примси участия вокальнай конкурснень эса. Кепотьксонди, аф кунара Кочкуроваса етафтфоль «Мон асуван!» идень творческяй фестиваль, коса Маша кургса, а аляц—гитараса морасть шачема кяльса «Менелень Тятяй» мора (музыкась и валхне О.В.Гангеевонь) и сатозь колмоце вастть. Эряви азомс, што семьянь азорсь асудонга-асу ломань. Машты эрь кодама музыкальнай инструментса морама. А конашкава мазы вайгялец! Аф стак 10 кизот морсесь «Торама» ансамбльса. А тяни—«Лайме» ансамбльса.
Мрдатама иттненди. Иванонди 10 кизот. Сон омбоце алясь семьяса. Аф ваномок кизонзон лангс, сафтсы алянь тевса. Машты пенгянь лазондома, жуватань мельге якама. Пяк оцю мялец лездомс алянцты кудъетконь тевса. Сон якай художественнай школав, тонафни шуфта ланга керсема. Тонафтыец шнасы, кле, кядец кеме, инструментть кирдьсы маштозь.
Дашати 8 кизот. Сонь стане жа ули музыкань ширде асувоц, пяк мазы вайгялец. Школаса тонафни аньцек «ветес». Мялец арамс идень стоматологокс.
Мекольце иднясь Анна, теенза 5 кизонят. Тядянц валонзон коряс, сон сембодонга асусь и маштысь сембонь еткста. Пяк прафты тонафнемати, компьютернай программас коре тонафнесы английскяй кяльть. Киза кода якай спортивнай гимнастикань секцияв. Тядянза-алянза пачфнесазь Саранскяи «Мордовия» спортивнай комплексу. Мялец арамс чемпионкакс.
Азоравать мархта ламос корхнеме тяниень пингонь од ломаттнень колга. Тяни ломаттне пяк пелихть сталмода, мянь семьянь пуроптомска аш мяльсна, сяда «теждя» эрямс апак серматфтт—тячи тянь мархта, ванды—лиянь. Да и семьятнень етксовок коль касы явихнень лувкссна. А лисенди тяфта сяс, мес эсь прянь кельгомась васенце вастса. Ломаттне аф эряскодыхть шачфтомс шабат, кле, васенда эряви эрямс эстейть.
А мезсь васенце вастса Гангеефнень семьяса?
—Васенце вастса улеза Шкайсь. Коса Шкайсь—тоса кельгомась, а коса кельгомась, тоса сетьме и павазу эряфсь,—мярьгсть Шкайти кемай полатне.
Виде, тяфтама удалаф семьяса, коса ушетксстокиге путфт эряфонь питнишитне, аф ваномок мезеньге лангс, кармай азорондама кельгомась. А шабатне касыхть пара вайме, трудонь кельги ломанькс.
Т.Петрова.
