Поиск по сайту: 
 

Архив
 ноябрь 
 2019 
пн вт ср чт пт сб вс
    123
45678910
11121314151617
18192021222324
252627282930 

 
 

 

Здоровье

ПИЧЕПУЛОНЯНЬ ФЕЛЬДШЕРСЬ САФТСЫ СЕМБОСА

Пичепулоня велесь ащи пяк ичкозе райцентрать эзда. Тяса эряйхть и сире ломатть, и отт, и шабат. Сяс фельдшерско-акушерскяй пунктфтома ёфси аш кода. Надияма и прянь шнама вастокс ащи Пичепулоня велеса фельдшерсь Н.А.Тремасова. Ётак сембе велеть, Нина Акимовнада цебярь, ару вайме, панжада седи ломань аф муят. Сон лац содасыне эсь велеряензон: кинь кенярдемац, кинь ризфоц-пичефксоц. Эрть седис муй панжеманя, эрти содасы мезе азомс, кода пшкядемс и пчкафтомс аф аньцек лекарстваса, но и лямбе валняса сяряди ваймонц.
—Шкайсь ванолезе докторняньконь,—корхтайхть велеряйхне.—Кда кивок сярятьксты, мокшавась юмафтсы покоенц. То уколня тии, то цебярь совет максы. Ласьки рана шобдава, сай шить и поздна  илять. Кда эрявксты лезксоц, ветеньге сай. Лац содасы, што соньфтомонза ломанти кивок аф лезды. Мзяра ломанень эряф аралась, мзяра сяряди велеряй кеподсь пильге лангс. Сембонь лемсна афи лятфтавихть.
Да и кальдявста работамс Нина Акимовнанди ёфси аш кода. Пичепулонясь—сонь шачема велец. Тяса эряйхть раднянза, учителенза, ялганза. Кажнайть сярятьфонц марясы кода сонценнеть. Лисеза кодамовок зиян, аф мусы вастонц.
Тяни участкасонза 200-да лама ломань. Ингольдень кизотнень ульсь сяда лама. Кажнайть сонцень характероц, эряфоц-ащефоц. Кой-коста велень поселениянь оцюняти аф панчсазь кенкшснон, а Нина Акимовна эрь кудса эсь ломань. Сон кальдяв аф арьси, кальдяв совет аф максы.
Шачсь мокшавась ётай веконь сизьгемонце кизотнень ушетксста Назаркиттнень оцю и трудонь кельги семьяса. Аляц, Аким   Тимофеевич, вирень ваныель, шинь-шинь юмсесь вирьса. Тядяц, Мария Кузьминична, касфнесь буканят «Партизанский» совхозса. Трудонь кельги ломаттне шачфтсть и касфтсть кота итть. Нина ульсь мекольцесь семьяса. Аф кальдявста тонафнесь школаса. Аканза, Анна, Полина, кочказь учителень тевть. Сонь эздонзовок лисель аф кальдяв учитель. Кепотьксовок ульсь кинь эзда сявомс. Тянемс аньцек шнама валса лятфнесыне эсь васенце учителенц А.В.Савкинать и класснай руководителенц Д.П.Шукшинать. Кочказе Нина Назаркинась медицинскяй работниконь профессиять. Аделазе Краснослободскяень медицинскяй училищать. И кучезь покодема Атюрьевскяй райононь Оцяду велень участковай больницяв. Эстонь кизотнень тя больницять лемоц кайгсь. Усксесть сярядихть мянь шабрань райоттнень эзда. Нина Акимовна тоса работась колма кизот. Сембось ульсь лац. Стирть приметазь, кельгозь, шназь. Сонцьке старандась улемс цебярькс сярядихненди, аф обжамс синь. Оцюнятневок азонкшнесть лемозонза шнама валхт. Но сяка седись тердсь эсонза Пичепулоняв. И сон, аф ваномок мезеньге лангс, мрдась шачема-касома велезонза. И вов ни пцтай 26 киза пчкафты велеряензон эса. Теенза аш праздникт, ваймама шит. Кда лиси зиян, сави молемс ветеньге. Ответственностсь оцю. Нина Акимовнань кядьса ломанть эряфоц.
Н.А.Тремасова—кельгома рьвя, тядя, сазор, рьвяня. Мирденц Сергей Семёновичень мархта эряйхть ладязь и кельгозь. Касфтсть кафта стирьхть. Кафцьконь высшай образованиясна, аделасть Москуса вуст. Сембось синь лац. Учихть уноконяснон шачеманц. Сявсть идень кудста цёраня. Егор тонафни нилеце класса. Тремасофне сембе эсь кельгомаснон                                   макссесазь Егорканди. Кельгсазь сонь родонь-плямань келеса. Мезевок аф ужяльдихть цёраняти.
Эрьгодят хозяйствазост. Мезе аньцек аф кирдихть эсь пирьфсост, кодама аньцек жуватасна, кудонь нармоньцна аш. А конашка пересна.
Цебярь ломанць цебярь сембоса. Аф ваномок заняфшинц лангс, Н.А.Тремасова морай «Пиченя» фольклорнай ансамбльса. А нят и репетицият, и концертт, и фестивальхть. Эрь кизоня примси участия  «Шумбрат, Мордовия!» народнай творчествань республиканскяй фестивальса. Конашкава кельгсыне мокшавась щапнень-каряпнень, койхнень-обуцятнень. Лиякс аш кода. Эрят велеса. А эрь велеть сонцень коенза-обуцянза.
Цебярь, панжада вайме ломанць велеса няеви. Лама велеряй мархта корхнень и хуш фкясь эздост азоль Н.А.Тремасовать колга кальдяв вал. А шнама валда ульсь сняра, сембе синь афи лятфтавихть. Машты покодема, кельгсыне ломаттнень и эсь тевонц. Тякоть азозь и Торбеевскяй межрайоннай больницянь, коза тяни сувси и Пичепулонянь фельдшерско-акушерскяй пунктсь, оцюнятне.
И.ВЕШКИН.

20.06.2019 №24
 
 
 

 
НОВОСТИ
 
 

ЭСОНЗА АФ МАДОНДЫ ТОЛКС ЮРНАЙ МИНЦЕННЕТИ КЕЛЬГОМАСЬ

 
Родной кялень кельги, национальнай коень-обуцянь ванфты, афкуксонь патриот. Тянь ули кода азомс Мордовиянь Инсарскяй райононь Пою велеса шачф-касф мокшавать Анастасия Афанасьевна Шумкинать (Акшаевать) колга. Аф ваномок сянь лангс, што сон лама киза ни аф эряй мокшэрзянь масторса, эсонза аф мадонды толкс юрнай семботи минценнети кельгомась. Мзярда корхнень Анастасия Афанасьевнань мархта, тя шарьхкодевсь эстокиге. А ушедозе азондомать аф эсь колганза, а ёмла родинанц эзда.

 

Уликс легендать мяльс сявозь, атянзон атясна эрясть оцю губор лангса, конань лемоцоль Ош панда ляй, кона кафта ширде шарфоль вирьхнень мархта, а нинге кафта ширде ульсть сери крутоярхт, конатнень ала шудесь Исса ляйсь. Пингонь ётазь карафне ушедсть пяярема и ляйсь полафтозе ведень шудема вастонц, вов эста родонь плямась сась мяльс ётамс эряма такор вастти, коса ульсь кода касфнемс козя урожай, а Иссать трвава кассь поювонь оцю и туста вирь. Вельденза алятне шапондсть од кутт семьяснонды. Тяфта и эвондась велеть лемоц—Пою.

 

Школаса тонафнемстонза Анастасия сидеста ванондсь раскопкатнень мельге, конатнень Ош панда ляйса ётафнезь Мордовскяй госуниверситетонь студенттне и преподавательхне. Синь мушендсть сёвонень кядьгонь пакшт, трудонь кевонь орудият, налонь пет, авань мазоптомат, монетат и лама мезе лия. Кунардонь эряма вастста ламоц муфкснень ули кода няемс Саранск ошса Краеведческяй музейса, улихть синь и велень школань музейса.

 

24.10.2019  № 42
 
 
 

Россиянь и Мордовиянь Народнай артисткась, Мордовия Республикань Почётнай гражданинць Александра КУЛИКОВА:

 «ПАВАЗУВАН, МЕС ЭРЯН МОРДОВИЯСА!»
 
Тячи республиканьконь столицаса, Саранскяйса, ушедсы эсь работанц Мордовскяй (мокшень и эрзянь) народть Межрегиональнай общественнай организациянц Всероссийскяй VII съездоц. Пингстонза вановихть кизефксне, конат оржаста ащихть мокшэрзянь нациять инголе. Тя оцю пуромксть карша тейнек удалась корхнемс Россиянь и Мордовиянь Народнай артисткать, Мордовия Республикань Государственнай премиянь лауреатть, Славань III степенень орденонь кавалерть, Мордовия Республикань, Рузаевкань и Темников ошень почётнай гражданинть Александра Куликовать мархта. Александра Николаевна сувси съездонь делегаттнень лувксс.

 

Александра Куликовать лемоц лац содаф аф аньцек эсь республикасонк, но и ламоц лия вастова. Вии, седиень-ваймонь токай вайгялец лездсь велень стирняти арамс кельговиксокс тежятть ваныти. Эсь творческяй кинц артисткась ушедозе 1962 кизоня «Умарина» моронь и кштимань государственнай ансамбльса. Лама киза А.Куликова кеняртьфнесыне ломаттнень сольнай мораманц мархта.

 

Александра Николаевнань творческяй киц козя гастролень ширде. Вайгялец кайгсь аф аньцек Россияса, но и лия ширеса: Германияса, Чехословакияса, Финляндияса, Польшаса, Венгрияса, Китайса, Белоруссияса, Украинаса, Молдавияса, Киргизияса, Таджикистанца, Чувашияса. Лия регионца и нльне омба масторса улемста артисткати удалси васьфнемс-корхнемс тоса эряй мокшетнень и эрзятнень мархта, а сяс аф кулемас коре содасы, мезсь синь пичефтьсыне-таколфтсыне.

 

Корреспондентоньконь мархта корхнемста артисткась азозе, мезе ученды мокшэрзятнень оцю пуромксснон эзда, мезть колга мялец корхтамс сонцень, а стане жа отвечась и лия кизефкснень лангс.

 

 

 
24.10.2019  № 42
 
 
 

МОКШЕНЬ И ЭРЗЯНЬ КЯЛЬХНЕ ТОНАФНЕВИХТЬ ШКОЛАТНЕНЬ

Понедельникста Саранск ошень округонь Администрацияса ётафтф оперативнай совещанияса ванондовсь лама кизефкс. Башка мяль шарфтфоль Мордовскяй (мокшень и эрзянь) народть Межрегиональнай общественнай организациянц VII съездонцты анокламати. Тяса азфоль, што Саранскяень 45 сембе школатнень эса 2 класста сявомок 7 классти молемс тонафневихть мокшень и эрзянь кяльхне. Тя тевса заняф 94 педагог. Тонафнемаса фатяф 17916 ученик. Недяляти макссеви 1-2 част. Тяда башка, тяконди водендафт кружокне, музейхне. Саранскяень идень сембе саттнень эса тевс ноляви «Минь эрятама Мордовияса» этнокультурнай компонентсь. Дошкольнай учреждениятнень эса мокшэрзянь народть историянц, коензон-обуцянзон и культуранц мархта иттне содафневихть культорологическяй аспектть, налхксематнень вельде. Стане жа работай этнокультурнай (кштимань, музыкальнай, народнай творчествань) 93 кружок, коса заняф 2160 шаба. Тянь и ламоть лиять колга заседанияса пачфтсь социальнай политикать коряс Департаментть директоронц заместителец—Образованиянь управлениять начальникоц Оксана Шуляпова.

 

24.10.2019
 
 

 

 

Яндекс.Метрика Яндекс цитирования Rambler's Top100
Учредительхие:
Главнай редакторсь: И. С. Лушкин