Поиск по сайту: 
 

Архив
 ноябрь 
 2019 
пн вт ср чт пт сб вс
    123
45678910
11121314151617
18192021222324
252627282930 

 
 

 

Наша усадьба

Июньцта лаказь лакайхть перень тефне

Июньцта лаказь лакайхть перень тефне
Сембось, мезе озафтфоль переса майста, июньцта эряви мотыжендамс. Сор тишетне сязендемат унксонек. Штоба машфтомс кумбаравть, модать видева керомат нетькссна и керф вастти почедома аф лама сал.
Июньцта эрявихть «андомс» переса озафтф касыксне. Подкормкась эряви помидоратненди, перецти и баклажаттненди. Тянкса ладяй перегнойсь. Чесноксь ушеткшни макссема «стрелкат». Синь эрявихть синнемс, штоба касольхть чесноконь прянятне. Видьмонди кадома мзярошка стрелка: сай кизоть чеснокть сяда пара видемс, а аф озафнемс пейняса. Етксост кой-коста повондыхть урма мархтот.
Тясть юкста шуроптомс пурьхкятнень. Тя тиендема сянкса, штоба ункссна афольхть шорсе фкя-фкянди касомс. И сяда пара тиемс тянь кафксть:  мзярда эвондайхть васенце и омбоце афкуксонь лопанятне, кадондомок касыкснень еткса 3-4 сантиметра, и 25-30 шида меле, касфтомок еткснон 5-6 сантиметрас. Эрь мезне шуроптомда меле пурьхкятне валомат.
 
Мес пужсь куярсь
Куярхне озафнемат фкя-фкянь эзда 30-50 сантиметрань вастса. Тяфта синь аф шобдалгофнесазь валдть шабра куяр кодорксненди, и сятненди аф сави тюремс валдть, питательнай веществатнень и ведть инкса. Стане жа кодоркснень ланга таргамс шить сюролданзон эзда ванфты сетка. Тяфтама условияса куярхне ванфтсазь летькть и аф пужихть.
Эряви содамс, кода валондомс куярхнень. Кода эрси, валондсазь колма-ниле шити весть. Но, кда ульцяса пси, эста валондомс эрявихть эрь шиня. Валондомать эзда штадыхть унксне, тянкса эрявихть кодоркснень перьфснонды марамс перегной или компост.
Ванфтость гербициттнень эзда!
Куярхне пяк аф кельгсазь гербициттнень, и кда вакссост валондсасть сор тишетнень гербицидса, коськихть и куярхне.
Стане жа гербицидта меле эряви штамс муськомань порошок мархта опрыскивательть. Аньцек сяда меле ули кода валондомс мархтонза лия перень серотнень лия препаратса.
Ванода ушеть мельге
15 градус лямбоса кодорксне лоткайхть сотнемда куярнят, а 10 градусонь пингста лоткайхть касомда. Сяс кельмотнень прамда инголе валондость куярхнень Иммуноцитофитса или Цирконца.
Вредительхнень или урматнень эвондамасна стане жа пужфнесазь куярхнень. Инь пяк, кда эвондасть сит, (тля), или ложнай мучнистай росась. Сяда теждя мумс ситнень, ваномок лопатнень омба ширеснон, эзкиге ули кода машфтомс синь. Клещне аф няевихть, но синь эвондамаснон пингста лопатне пужихть бта кодамовок туфталфтома. Тяфтама жа признаконза мучнистай росать. Унксонь наксадомась, грибковай лия урматне фатнесазь касыкснень, мзярда пяк лама летькта или модаса ули грибоконь урма етай кизонь касыкснень эзда. Грибоконь урматнень эрявихть касыксонь озафнемда инголе машфнемс, полафнемок модать или валондомок марганцовкань растворса, видьмотненьге озафтомда инголе лопафнемат протравительса.
Штоба етафтомс грибоконь урматнень куяр кодоркснень эзда, васендакиге, сязендесть урмав лопатнень или таргасть марнек кодорксть, а лядыкс куярхнень валондость фунгициднай препаратса.
 
Сявость мяльс помидорань касфтомста
Кой-коста помидорань касфтомста васетькшнетяма прябала мархта, ламошкаснон конатнень тиендьсаськ минць. Целайнек помидоратне  аф вешфксу касыкст, но кой-кона эльбятьксне синьге мялезост аф тушендыхть.
1. Аф арьсезь рамафт видьмотне
Кда помидорада ератада касфтомс лама, эста сяда пара кочкамс гибриттнень. Синь сяда товарнайхть, аф лопиихть и кирдихть урматнень каршес. Но и ефси атказамс сорттнень эзда аш кода. Синь сидеста эсь лацонне таньфсна, тюссна, формасна.
2. Аф лац кочкаф озафтоманди вастсь
Аф кондясти лямбонь кельги  сорттнень озафнемс панденяс и, меколанкт,  панденя лангса касфнеманкса  со- рттнень—теплицав. Тяфта помидоратненди аш кода касомс сембе вийса.
3. Аф маштозь кочкаф пленка теплицав
Сидеста садовоттне нолнесазь тевс эчке полиэтиленовай пленкать, лувондомок сонь сяда надежнайкс. Но, кода няфнесы эряфсь, сяда пара нолнемс тевс гидрофильнай    полиэтиленовай пленкать. Путерьксне лангстонза  кеворькшнихть алу, пульсь аф педи. Веть сон максси сяда кржа лямбе.
4. Шинек-венек валдопнемат и кирдемат лямбоса
Видеф помидоратне сяда лац касыхть, кда синь валдопневихть 15-16 частонь потмоса и веть температурась аф валгонды 10 градуста алу.
5. Рассадась озафтома маштозь
Рамсемс кярьмаз мархта касыкст, надиямок сяда рана сявомс урожай, аф эряви. Панчфкятне пяярихть, кда аф озафтомс рассадать модань оцю поколь мархта. Но и эстовок панчфне озафтомста эрявихть керомс.
Рассадась озафнема видеста рдазти. Валондома рассадась озафтома карша, а аф шида-кафтта инголе, мезсь тисыне нетькснень теждяста синневикс.
6. Аф эрявихть валондомс эрь шиня
Валондомс помидоратнень куярхнень лаца аф мярьгондеви. Сяда пара тиендемс тянь 7-10 шис весть. Старандада, штоба ведсь афоль повонда лопатнень лангс. Тяфта аф нолдави фитофторась.
7. Керсемат тараттне
Ламонцненди ужяль керсемс боку касы тараттнень или нетькснень текшснон. Тянкса, кда сортсь аф индетерминантнай, кусторкссь уленди паргана, но помидорафтома.
8. Аф юкснема профилактикать колга
Кда аф етафнемс урматнень каршес профилактика, пркшамок касыкснень Ридомилса, Акробатса,  Квадрисса, Стробиса и лия фунгицидса, эста эвондай урма и кармай поздна.

20.06.2019 №24
 
 
 

 
НОВОСТИ
 
 

ЭСОНЗА АФ МАДОНДЫ ТОЛКС ЮРНАЙ МИНЦЕННЕТИ КЕЛЬГОМАСЬ

 
Родной кялень кельги, национальнай коень-обуцянь ванфты, афкуксонь патриот. Тянь ули кода азомс Мордовиянь Инсарскяй райононь Пою велеса шачф-касф мокшавать Анастасия Афанасьевна Шумкинать (Акшаевать) колга. Аф ваномок сянь лангс, што сон лама киза ни аф эряй мокшэрзянь масторса, эсонза аф мадонды толкс юрнай семботи минценнети кельгомась. Мзярда корхнень Анастасия Афанасьевнань мархта, тя шарьхкодевсь эстокиге. А ушедозе азондомать аф эсь колганза, а ёмла родинанц эзда.

 

Уликс легендать мяльс сявозь, атянзон атясна эрясть оцю губор лангса, конань лемоцоль Ош панда ляй, кона кафта ширде шарфоль вирьхнень мархта, а нинге кафта ширде ульсть сери крутоярхт, конатнень ала шудесь Исса ляйсь. Пингонь ётазь карафне ушедсть пяярема и ляйсь полафтозе ведень шудема вастонц, вов эста родонь плямась сась мяльс ётамс эряма такор вастти, коса ульсь кода касфнемс козя урожай, а Иссать трвава кассь поювонь оцю и туста вирь. Вельденза алятне шапондсть од кутт семьяснонды. Тяфта и эвондась велеть лемоц—Пою.

 

Школаса тонафнемстонза Анастасия сидеста ванондсь раскопкатнень мельге, конатнень Ош панда ляйса ётафнезь Мордовскяй госуниверситетонь студенттне и преподавательхне. Синь мушендсть сёвонень кядьгонь пакшт, трудонь кевонь орудият, налонь пет, авань мазоптомат, монетат и лама мезе лия. Кунардонь эряма вастста ламоц муфкснень ули кода няемс Саранск ошса Краеведческяй музейса, улихть синь и велень школань музейса.

 

24.10.2019  № 42
 
 
 

Россиянь и Мордовиянь Народнай артисткась, Мордовия Республикань Почётнай гражданинць Александра КУЛИКОВА:

 «ПАВАЗУВАН, МЕС ЭРЯН МОРДОВИЯСА!»
 
Тячи республиканьконь столицаса, Саранскяйса, ушедсы эсь работанц Мордовскяй (мокшень и эрзянь) народть Межрегиональнай общественнай организациянц Всероссийскяй VII съездоц. Пингстонза вановихть кизефксне, конат оржаста ащихть мокшэрзянь нациять инголе. Тя оцю пуромксть карша тейнек удалась корхнемс Россиянь и Мордовиянь Народнай артисткать, Мордовия Республикань Государственнай премиянь лауреатть, Славань III степенень орденонь кавалерть, Мордовия Республикань, Рузаевкань и Темников ошень почётнай гражданинть Александра Куликовать мархта. Александра Николаевна сувси съездонь делегаттнень лувксс.

 

Александра Куликовать лемоц лац содаф аф аньцек эсь республикасонк, но и ламоц лия вастова. Вии, седиень-ваймонь токай вайгялец лездсь велень стирняти арамс кельговиксокс тежятть ваныти. Эсь творческяй кинц артисткась ушедозе 1962 кизоня «Умарина» моронь и кштимань государственнай ансамбльса. Лама киза А.Куликова кеняртьфнесыне ломаттнень сольнай мораманц мархта.

 

Александра Николаевнань творческяй киц козя гастролень ширде. Вайгялец кайгсь аф аньцек Россияса, но и лия ширеса: Германияса, Чехословакияса, Финляндияса, Польшаса, Венгрияса, Китайса, Белоруссияса, Украинаса, Молдавияса, Киргизияса, Таджикистанца, Чувашияса. Лия регионца и нльне омба масторса улемста артисткати удалси васьфнемс-корхнемс тоса эряй мокшетнень и эрзятнень мархта, а сяс аф кулемас коре содасы, мезсь синь пичефтьсыне-таколфтсыне.

 

Корреспондентоньконь мархта корхнемста артисткась азозе, мезе ученды мокшэрзятнень оцю пуромксснон эзда, мезть колга мялец корхтамс сонцень, а стане жа отвечась и лия кизефкснень лангс.

 

 

 
24.10.2019  № 42
 
 
 

МОКШЕНЬ И ЭРЗЯНЬ КЯЛЬХНЕ ТОНАФНЕВИХТЬ ШКОЛАТНЕНЬ

Понедельникста Саранск ошень округонь Администрацияса ётафтф оперативнай совещанияса ванондовсь лама кизефкс. Башка мяль шарфтфоль Мордовскяй (мокшень и эрзянь) народть Межрегиональнай общественнай организациянц VII съездонцты анокламати. Тяса азфоль, што Саранскяень 45 сембе школатнень эса 2 класста сявомок 7 классти молемс тонафневихть мокшень и эрзянь кяльхне. Тя тевса заняф 94 педагог. Тонафнемаса фатяф 17916 ученик. Недяляти макссеви 1-2 част. Тяда башка, тяконди водендафт кружокне, музейхне. Саранскяень идень сембе саттнень эса тевс ноляви «Минь эрятама Мордовияса» этнокультурнай компонентсь. Дошкольнай учреждениятнень эса мокшэрзянь народть историянц, коензон-обуцянзон и культуранц мархта иттне содафневихть культорологическяй аспектть, налхксематнень вельде. Стане жа работай этнокультурнай (кштимань, музыкальнай, народнай творчествань) 93 кружок, коса заняф 2160 шаба. Тянь и ламоть лиять колга заседанияса пачфтсь социальнай политикать коряс Департаментть директоронц заместителец—Образованиянь управлениять начальникоц Оксана Шуляпова.

 

24.10.2019
 
 

 

 

Яндекс.Метрика Яндекс цитирования Rambler's Top100
Учредительхие:
Главнай редакторсь: И. С. Лушкин